مرقس 3
3
1وفات يسوع كمان مرة ع الكنيس وكان في هناك إنسان إيدو مشلولة. 2فصاروا يراقبوه ويشوفوا إذا راح يشفيه يوم السبت عشان يكون عندهن تهمة ضده. 3حكى يسوع مع الزلمة اللي إيدو مشلولة وقلّو: وقف بالنُص. 4وبعدين سأل الناس: في أيام السبت شو المسموح، الواحد يعمل خيـر وِلا شر، ينجي الإنسان وِلا يقتلو؟ فَضَلّوا ساكتين. 5غضب يسوع وبيّن الغضب في عينيه وحزن على قساوة قلبهن. وقال للزلمة: مد إيدك فمدها ورجعت إيدو منيحة مِتِل م كانت بالأوَّل. 6وطوالي تآمروا جماعة الفريسيين وجماعة هيرودس كيف يقتلوا يسوع.
7فانسحب يسوع وتلاميذه وراحوا باتجاه البحر. لِحْقُه عدد كبيـر من سكان الجليل واليهودية 8ومن أورشليم ومن أدومية ومن شرق نهر الأردن ومن منطقة صور وصيدا لأنهن سمعوا شو عمل. 9طلب يسوع من تلاميذه يحضرولو قارب زغيـر عشان م يدفشوش الناس بعض حوليه. 10لأنو شفى كتيـر من الناس وصاروا كل المُرَضَى يحاشروا عشان يمسكوه. 11ولما شافوه الناس اللي فيهن أرواح نجسة وقعوا ع وجهن قدامه وكانوا يصيحوا ويقولوا إنت هو ابن الله. 12وحذرهن كتيـر إنهن م يعلنوش مين هو.
13وطلع يسوع ع الجبل ونادى اللي بدو إياهن فراحوا لعندو. 14وعيّن منهن 12 واحد وسماهن رسل. وهو بدو إياهن يكونوا معه ويبعتـهن عشان يبشروا 15ويكون عندهن السلطة أنو يطردوا الشياطين 16وال 12 اللي عيّنهن هِني: سمعان اللي سماه بطرس، 17يعقوب ابن زبدي، ويوحنا أخو يعقوب. وسما الإخوة ال 2 بوانرجس ومعناها ولاد الرعد، 18واندراوس وفيلبُّس وبرثولماوس ومتى وتوما ويعقوب ابن حلفى وتداوس وسمعان الغيور 19ويهوذا الإسخريوطي اللي خان يسوع.
20وراح يسوع ع البيت والتموا الناس كمان مرة ومن كتـرهن م قدرش يسوع وتلاميذه أنهن يوكلو. 21ولما سمعوا قرايبو بشو بصير قالو عنو أنجن وراحو عشان يمسكوه. 22ومعلمين الدين من جماعة الكتبة اللي أجوا من أورشليم قالو عنو راكبو بعلزبول، بطرد الشياطين بسلطة رئيس الشياطين. 23ناداهن يسوع وحكى معهن بالأمتال وقلهن: كيف بِقدر شيطان يطرد شيطان تاني؟ 24وإذا بتنقسم مملكة وبتحارب نفسها بتقدرش توقف ع إجريها. 25وإذا انقسم البيت ع نفسه رَح يخرب البيت. 26فإذا وقف الشيطان ضد شيطان تاني بتكون هاي آخرته. 27والحقيقة إنو فش حدا بِقدر يفوت ع بيت القوي وينهب ممتلكاته إلا إذا ربطه بالأول وبعدين بِـنـهَب البيت. 28عنجد بقولكو كل خطايا الناس وكمان الإهانات بأنواعها بتنغفَر 29بس اللي بهين الروح القدس مش رح ينغفرلو للأبد ورَح يكون مجرم للأبد. 30وحكى هيك عشنهن قالو عنو إنو ساكن فيه روح نجس.
31وأجت إم يسوع مع إخوته وبعتوا ينادوه وهِنِّ واقفين بره. 32وكانوا الناس قاعدين حوليه فقلولو: هاي إمك وإخوتك واقفين بره وعم بدوروا عليك. 33فرد عليهن وقلهن: مين إمي ومين إخوتي؟ 34وصار يطّلع ع الناس القاعدين حوليه وقال: هاي إمي وهدول إخوتي 35لأنو كل واحد بِعمل بمشيئة الله هو أخوي وأختي وأمي.
Currently Selected:
مرقس 3: CGB
Highlight
Copy
Compare
Share
Want to have your highlights saved across all your devices? Sign up or sign in
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة
