مرقس 11

1ولما قرّبوا ع أورشليم ووِصلو لبيت فاجي وبيت عنيا عند جبل الزيتون بعت يسوع 2 من تلاميذو 2وقلهن: روحو ع القرية اللي قُدامكو وأول ما تفوتوا عليها رَح تلاقوا جحش مربوط. م حداش قعد عليه من قبل. فكوه وجيبوه. 3وإذا حدا سألكو: شو عم تِعملو؟ قلولو: صاحبو بحاجه لإلو. وطوالي رَح يبعتو كمان مرة لهون. 4وراحو التلميذين ولاقو جحش مربوط بره عند الباب اللي ع الطريق ففكوه. 5وكان في ناس واقفين هناك فسألوهن: شو عم تعملو وبتفكو الجحش؟ 6وبعد ما ردوا عليهن زي م وصاهن يسوع سمحولهن يوخذوه. 7فأخذوا الجحش لعند يسوع وبعد ما حطو عليه أواعيهن ركب عليه يسوع. 8وفي الطريق في كتيـر ناس فرشوا أواعيهن أو حطوا أغصان قطعوها من البساتين. 9وكانت الناس اللي قدامو واللي وراه عم بصيحوا وبقولو: واو! هو المبارك الجاي باسم الرب 10مباركة المملكة اللي عم تيجي. مملكة أبونا داود. واو لرب السما. 11ودخل يسوع ع أورشليم وراح ع الهيكل وبعد م شاف كل إشي صارت الدنيا ليل فَطِلِع ع بيت عنيا مع ال 12 تلميذ.

12وفي الصُّبِح لما طلعوا من بيت عنيا حس يسوع بالجوع. 13وشاف من مسافة بعيدة شجرة تين عليها ورق فقرّب عليها متأمل يلاقي فيها تين ولما قرّب عليها ملاقاش غير ورق لأنو بَعِد م صرش وقت التين. 14فقال للشجرة: من إسه وللأبد فش حدا رَح يوكل منك تين. وُسمعوه التلاميذ.

15ولما وصلوا ع أورشليم وفاتوا ع الهيكل صار يسوع يطرد التجار والبياعين اللي في الهيكل، وقلب طاولات الصرافين وكراسي بياعين الحمام. 16وم سمحش لحدا إنو ينقل بضاعة جوات الهيكل. 17وصار يعلمهن ويقلهن: مش الكتاب بقول الهيكل تبعي هو بيت للصلاة لكل الشعوب. بس إنتو خليتوه يصير مغارة حراميه. 18سمعوه رؤسا الكهنة وجماعة الكتبة وصاروا يدوروا كيف يقتلوه لأنهن كانوا خايفين منو ولأنو كل الشعب معجب بتعليمو. 19ولما عَتَّمت الدنيا طلع يسوع وتلاميذو بريت المدينة.

20وفي الصبح بكير مرؤو التلاميذ من جنب شجرة التين فَشَفُوها يبسانه من شروشها. 21تذكر بطرس شو قال يسوع وقلّو: يا معلم، شوف التينة اللي لعنتها صارت يابسة. 22رد عليه يسوع وقال: آمنو بالله. 23عنجد بقولكو اللي بقول لهادا الجبل احمل حالك وُنُط في البحر رَح تتحق كلماتو. بس لازم يكون مؤمن وقلبه مش متـردد. 24وعشان هيك بقولكو: آمنو إنو الله استجاب لصلواتكو وطلباتكو ورَح توصلكو الاستجابة. 25‏-26ولما توَقْفُوا عشان تصلو اغفروا لأي إنسان غلط بحقكو عشان كمان أبوكو السماوي يغفرلكو خطاياكو.

27ورجعوا ع أورشليم، ولما كان يسوع يتمشى في الهيكل أجو لعندو رؤسا الكهنة وشيوخ وناس من جماعة الكتبة 28وسألوه: شو نوع السلطان اللي بخليك تعمل هاي الأشياء؟ ومين أعطاك الحق إنك تتصرف بهاي الطريقة؟ 29رد عليهن يسوع وقال: وأنا عندي إلكو سؤال واحد. جاوبوني عليه عشان أجاوبكو عن شو نوع السلطان اللي بخليني أتصرف هيك. 30المعمودية تبعت يوحنا هي من السما وِلا من الناس؟ جاوبوني. 31فصاروا يتناقشو بينات بعض وقالو: إذا قلنا من السما فرَح يسألنا طيب ليش م آمنتوش فيه؟ 32يعني نقول من الناس؟ بس هني خايفين يزعلو الناس لأنو كل الناس بعتبـروا يوحنا نـبي. 33فجاوبو يسوع وقلولو: منعرفش. قلهن يسوع: وأنا كمان مش رَح أقولكو شو السلطان اللي بعطيني الحق أعمل هاي الأشياء.

Currently Selected:

مرقس 11: CGB

Highlight

Copy

Compare