مرقس 12

1وبدي يسوع يحكي مع الناس بالأمتال. وقلهن: في واحد زلمة زرع كرم عنب وحط سياج حواليه وحفر حفرة في الصخر عشان يعصر العنب وبنى برج حراسة وقبل م يسافر أجّر الأرض لمزارعين 2ولما صار وقت قطف العنب بَعَت الشغيل تبعو للمزارعين عشان يجيب حصته من العنب 3فمسكوا الشغيل وضربوه ورجّعوه فاضي. 4ورجع الزلمة بعتلهن شغيل تاني، ضربوه ع راسو وهانوه. 5بعت كمان شغيل فقتلوه. بعت الزلمة شغيلة تانيين بس في منهن اللي ضربوه واللي قتلوه. 6وما بقي للزلمة غير م يبعت إبنو المحبوب فبعتو بالآخر لإلهن وقال: رَح يستحو ع دمهن قدام إبني. 7بس هدول المزارعين قالو لبعض: هادا هو صاحب الورثة. تعالو نقتلو وبتصير الأرض إلنا. 8مسكوه وقتلوه ورمو الجثة بريت الكَرِم. 9فشو رَح يعمل فيهن صاحب الكَرِم؟ رَح ييجي ويدمرهن ويعطي كرم العنب لناس تانيين. 10م قريتوش النص المكتوب فيه: "الحجر اللي فكروه البنائين مش نافع، طلع هو أهم حجر. 11هادا ترتيب ربنا وعيونا بتشوف وبتتعجب؟" 12وصار بدهن يعتقلو يسوع لأنهن فهموا إنو حكى هادا المتل عليهن. بس خافوا من الناس فتركوه وروّحو.

13وبعتوا الفريسيين والهيرودسيين مجموعة منهن عشان يوقعو يسوع بالحكي. 14ولما وصلوا قلولو: يا معلم، منعرف إنك حقاني وبهمكاش حدا لأنك بصدق عم بتعلم شو بدو الله ومش هدفك ترضي الناس. مسموح ندفع ضريبة قيصر ولّا لأ؟ ندفع وِلّا م ندفعش؟ 15كان يسوع فاهم إنهن موجهنين فقلهن: ليش عم بتجربوا تورطوني؟ جيبولي دينار روماني أطّلع عليه. 16بعد م جابولو سألهن: لمين هاي الصورة وعن مين الكلام؟ فقلولو: قيصر. 17قلهن يسوع: أعطوا قيصر اللي إلو وأعطوا لألله إللي إلو. فتعجبوا منو.

18وأجو الصدوقيين لعند يسوع. وهنّي جماعة بتآمنش بالقيامة. سألوه وقلولو: 19يا معلم، كتبلنا موسى إذا واحد مات أخوه وترك أرمله بدون ولاد بتجوزها الأخو العايش عشان تخلّف ولد يحمل اسم أخوه الميت. 20كان في 7 إخوة. تجوز الأول وبعدين مات وترك مرتو بدون ولاد 21تجوزها الأخو الثاني وُمات بدون ما يخلّف منها ولد. وُصار نفس الإشي مع الأخو الثالث. 22والسبع إخوة م خلفوش منها ولد. وبالآخر بعد م ماتو ماتت المرة. 23طيب لما بقوموا في القيامة، مرة مين بتكون؟ لأنو السبعة تجوّزوها. 24فقلهن يسوع: بتفكروش إنكو بهادا الكلام عم تنحرفوا عن الحق وبتتجاهلو كلمة الله وقدرتُه؟ 25لأنو في القيامة فش جيزة وجواز. الناس بتكون زي الملايكة اللي في السما. 26وبالنسبة لموضوع قيامة الأموات، م قريتوش قصة نبتة العُليقة في كتاب موسى وكيف حكى الله مع موسى وقال: أنا إله إبراهيم وإله إسحاق وإله يعقوب؟ 27فهو إله ناس عايشين مش ميتين. بَعَدتو كتيـر عن الحق.

28وبعد م سمعهن زلمة من جماعة الكتبة عم بتجادلو وشاف إنو يسوع جاوبهن منيح أجا لعند يسوع وسألو: شو هي أهم وصية في كل الوصايا؟ 29قلّو يسوع أهم وصية هي: اسمع يا إسرائيل الرب إلهنا رب واحد، 30فحب الرب إلهك من كل قلبك ومن كل نفسك وكل عقلك وبكل قوتك. 31والوصية الثانية: حب جارك مثل م بتحب نفسك. فش وصية أهم منهن. 32فقلو الزلمة: براڤو يا معلم. معك حق إنك تقول إنو في رب واحد وفش رب غيرو 33وتحبو من كل قلبك وُفهمك وُقوتك وتحب جارك زي م بتحب نفسك أحسن من كل الذبايح والتقدمات. 34لما شاف يسوع إنو رد الزلمة كان منيح قلو: إنت مش بعيد عن ملكوت الله. وبعد هادا الحكي فش حدا تجرأ إنو يسألو أي سؤال.

35وصار يسوع يعلّم في الهيكل ويقول: كيف بقولو جماعة الكتبة إنو المسيح هو ابن داود؟ 36داود قال بالروح القدس: قال الرب لربي اقعد ع يميني لحد م أخليك تدعس على أعدائك 37داود عم بناديه "رب". فكيف هو ابن؟ وكل الشعب كانوا فرحانين وهِنّي عم يسمعوه.

38ولما كان يعلّم قال: ديروا بالكو من جماعة الكتبة اللي بحبو يمشو في الأسواق بأواعي العظمة وبكثرة السلامات. 39وبحبو يقعدو في صدر البيت في العزومات وعلى كراسي الشرف في الكُنُس. 40وبوكلو حق الأرملة، وعشان يبينو، بطولو الصلاة. رَح يتعاقبو أكبر عقاب.

41وقعد يسوع في الهيكل إقبال صندوق التبرعات وكان عم براقب كيف الناس بحطو المصاري في الصندوق. كتيـر من الأغنيا رمو كومة مصاري 42وبعدين أجت وحدة أرملة وفقيرة وحطت شقفتين مصاري نحاس صغار 43فنادى يسوع تلاميذو وقلهن: بأكدلكو إنو هاي الأرملة الفقيرة حطت في الصندوق أكثر من كل اللي تبرعو. 44لأنهن هني تبرعو من شو عندهن زيادة بس هي تبرعت وهي محتاجة. وحطت كل مصروف البيت.

Currently Selected:

مرقس 12: CGB

Highlight

Copy

Compare