ମାର୍କ 10
10
ଲଂସିସି'ପୁଲେଇ ନିୟମ୍ ଡୁତା କି ଆରାକ୍ ଡ'ସେକ୍ ଜିସୁଲା ଅମାକ୍ଡେନ୍
(ମାତିଉ 19:1–12; ଲୁକ 16:18)
1ଜିସୁଲା କପର୍ନାଉମ୍ ଉଂଗମ୍କୁରୁଂ ତୁର୍ସେକ୍ ଜିଉଦା ରାଜିବକ୍ ଉଇଗା' ମାରି ଉନ୍ତ୍କୁରୁଂ ଜର୍ଦନ୍ କିନ୍ଡାକ୍ ଇନ୍ଡ୍ରି ଉଇଗା' । ସା' ଆତାସା ରେମଲେ ଅବୁଦି ରୁନ୍ଗା' । ରୁନ୍ଗା'ସା' ମାଇ ଇସାଉ ଡେମ'କୁନୁଂସୁଗ ଆତାସା ଆମା'ଏ ମାପ୍ରୁନା ତୁମ' ଅମାଗ' ।
2ପାରୁସିଦଲ୍ନା ରେମଲେ ଏନ୍ତୁକ୍ର ଜିସୁନ୍ବକ୍ ସାକ୍ସେକ୍ “ମୁଇନ୍ଡା ରେମ ଆନିଜର୍ନା କୁନୁଇ' ଲଂସିସି' ଗଂତା ଡ'ସେକ୍ ନେଇ'ନା ନିୟମ୍ବକ୍ ଡୁତା କି?” ଡ'ସେକ୍ ଆମାଇ ପରିକା ଡିନ୍ଡେମ୍ପୁଲେଇ ଅ'ଗଁସ୍ଲା'ଗା' ।
3ସା' ଜିସୁଲା ଆମା'ଏ “ମସାଲା ମା ଡେମ'ନା ଡେନ୍ତା ଡ'ସେକ୍ ଲେକ୍ଲ'ତା?” ଡ'ସେକ୍ ସୁନ' ।
4 #
ମାତିଉ 5:31
ସା' ମା'ଏ ସୁନ' “ମୁଇନ୍ଡା ଲଂସି'ତିଂ ଡ'ସେକ୍ ଏତ୍ନା ମାଇ ମୁଇ ଉଲାକ୍ବକ୍ ମା ଡେଂଗା'ସା' ଲଂସି'ତିଂ ଡ'ସେକ୍ ଗୁତୁନା ଆକୁନୁଇ'ଡେଇଁ ଲେକ୍ଲ' ବେଡ'ସେକ୍ ଲଂସିଡ'ନା ଡେନ୍ତା ଡ'ସେକ୍ ମସାଲା ସୁନ'ତା” ଡ'ସେକ୍ ସୁନ' ।
5ସା' ଜିସୁଲା ସୁନ' “ମାସା'ଡ'ନା ପେ ମାପ୍ରୁନା ନିୟମ୍ ମାନ୍ବାର୍ପୁଲେଇ ମୁନ୍ ମଡୁକୁବାଇ' ରେମଲେ ଡ'ସେକ୍ ମାଗ'ସେଗାଉ ପେନା ମୁନ୍ସୁଗ ଡେମ୍ ଡ'ସେକ୍ ମସାଲା ଆପେ ଲେକ୍ଲ' ବେଡ' । 6ମାତର୍ ମୁଲ୍ମୁଲ୍ ମାପ୍ରୁ କେନ୍ ଦର୍ତନି ଗୁଲାଇ ଅ'ରଇଁବେଲା ଇଂଗେରେ ମାରି ସେଲାନେ ଡ'ସେକ୍ ଆରେମଲେ ଅ'ରଇଁୟ' । 7ଗୁତୁନ୍ସା'ଉ ମାଇପା ୱାଇବୁଇ' ଇ'ପର୍ନା ୟଂବାନା ଡିଂଅଁସାରୁ ଅନ୍ତୁର'ସେକ୍ ଗୁତୁନ୍ ଇଂଗେରା ମାଇନା କୁନୁଇ'ବୁରଂ ମିସ୍ସେକ୍ ବଲ୍ ଡୁତା । 8ମାଇପା ୱାଇବୁଇ' ଇ'ପର୍ସେକ୍ ତିରେ ଡୁତାସା' ଆମାଇପା ମାପ୍ରୁ ଜୁଲ'ନା ମୁଇ ଞେରିସୁଗ ଜୁତ । ସା' ମାଇପା ଇମ୍ବାୟ ପାଲ୍ପାଲ୍ ରେମ ଆରାକ୍, ମାତର୍ ମାଇପା ଇମ୍ବାୟ ମୁଇ ଞେରି ଡେନ୍ତା । 9ଡୁ'ତୁନ୍ସା' ମାପ୍ରୁ ମିସାୟ'କୁନୁଂ ରେମ୍ବକ୍ ଜାଏସା ପାଲ୍ପାଲ୍ ଡିନ୍ଡେମ୍ ଆରାକ୍।”
10ତିର୍ଗି' ଜିସୁଲା ଡିଂଅଁବକ୍ ଡୁକୁନୁଂବେଲା ମାଇନା ସିସ୍ୟଲେ ସାକ୍ସେକ୍ ଞାଂଆଁ ସୁନ'କୁନୁଂ ଲଂସିସି'ନା ମାର୍ ମୁସଉ ବଲ୍ ସୁଁ ଡ'ସେକ୍ ସୁନ' । 11#ମାତିଉ 5:32; 1 କରି 7:10,11ସା' ଜିସୁଲା ଆମା'ଏ ସୁନ' “ଜାଏସା ମୁଇନ୍ଡା ଇଂଗେରା ଆମାଇନା କୁନୁଇ' ଲଂସିଡ'ସେକ୍ ପାଲ୍ ସେଲାମ୍ବୁଇ' ରିଂଅଁ'ନା ମାଇ ଜାଲିବାଇ' କାମ୍ ଡେମ'ତା । 12ମାରି ଜାଏସା ମୁଇନ୍ଡା ସେଲାନ୍ଲା ଆମାଇନା ଇମ୍ପର୍ ଅନ୍ତୁର'ସେକ୍ ଆପାଲ୍ ଇଂଗେରା ଇ'ପର୍ଗା' ଡ'ନା ମାଇସା ଜାଲିବାଇ' କାମ୍ ଡେମ'ତା” ଡ'ସେକ୍ ସୁନ' ।
ଜିସୁଲା ମାରି ଡାଉଡାଉ ଗୁବୁଲେ
(ମାତିଉ 19:13–15; ଲୁକ 18:15–17)
13ମୁସିଂ ଜିସୁଲା ଡାଉଡାଉ ଗୁବୁଲେନ୍ ବାଗ୍ବକ୍ ମାଇନା ତିତି ବୁଂଅଁ'ସେକ୍ ଆମା'ଏ ଆସିର୍ବାଦ୍ ଡେମେଇ' ଡ'ସେକ୍ ଆ'ଇରସୁଗ ରେମଲେ ଆଗୁବୁଲେ ଜିସୁନ୍ବକ୍ ୱାୟ' ରିଂଅଁ' । ସା' ଗୁତୁନ୍ ଜୁଲ'ସେକ୍ ଜିସୁନା ସିସ୍ୟଲେ ସୁନ' “ମାସା' ଜିସୁନ୍ବକ୍ ଆଗୁବୁଲେ ୱାୟ' ରିଂଅଁ'ସେକ୍ ଆମାଇ ଆଇ'ତୁନ୍ କସ୍ଟ ବେଡ'ତୁପେ?” ଡ'ସେକ୍ ତର୍ଞେକ୍ସେକ୍ ସୁନ' । 14ଗୁତୁନ୍ ଜୁଲ'ସେକ୍ ଜିସୁନା ଜିବନ୍ବକ୍ ଅବୁଦି କସ୍ଟ ବାଂଗା' । ସା' ଆମାଇନା ସିସ୍ୟଲେ ସୁନ' “ଗୁବୁଲେ ନିଂବକ୍ ସାବେଇ', ଆମା'ଏ ଆପିଟାୟ', ମାସା'ଡ'ନା ମାପ୍ରୁନା ରାଜି ଡି'କେନ୍ବାଇ' ରେମଲେପୁଲେଇ ଡୁତା । 15#ମାତିଉ 18:3ନିଂ ଆପେ ସତ୍ ସୁନ'ତିଂ, ଗୁବୁଲେ ବିସ୍ବାସ୍ ଡେମ'କୁନୁଂସୁଗ ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ମାଇ ମାପ୍ରୁନା ରାଜିବକ୍ ଇନ୍ଡଇ'ଏସା ଉଇ ଆଗଂତା” ଡ'ସେକ୍ ସୁନ' । 16ତିର୍ଗି' ଜିସୁଲା ଆଗୁବୁଲେ ସବ'ସେ'ଗା କୁନ୍ଡୁଲ' । କୁନ୍ଡୁଲ'ସେକ୍ ମାଇନା ତିତିବୁରଂ ଆଗୁବୁଲେ ଆଲାମ'ସେକ୍ ଆମା'ଏ ଆସିର୍ବାଦ୍ ଡେମ' ।
ମୁଇନ୍ଡା ଅବୁଦି ସାକାର୍ରେମ୍ ଜିସୁଲାବୁରଂ ଅଇଁଡେନ୍
(ମାତିଉ 19:16–30; ଲୁକ 18:18–30)
17ଜିସୁଲା ମାଇନା ସିସ୍ୟଲେବୁରଂ ଉଇ ଡେଂକୁନୁଂବେଲା ମୁଇନ୍ଡା ଉର'ଉର' ସା'ଗା' । ଉର' ସାକ୍ସେକ୍ ଆଜିସୁଲା ସୁନ୍ଡ୍ରକ୍ସେକ୍ “ଅ ବଲ୍ ଗୁରୁ, ମଡୁନମ୍ ଜିବନ୍ ବୁମ୍ବାମ୍ପୁଲେଇ ନିଂ ମା ଡେମ'ନା ଡେନ୍ତା?” ଡ'ସେକ୍ ସୁନ' ।
18ସା' ଜିସୁଲା ଆମାଇ ସୁନ' “ନ ମାସା' ଆନିଂ ବଲ୍ରେମ୍ ଡ'ସେକ୍ ସୁନ'ତୁନ? ମାପ୍ରୁ ମୁଇନ୍ଡାଉ ବଲ୍ରେମ୍ ଡୁତା ମାରି ଜାଏସା ଆରାକ୍ । 19ନ ତ ମାପ୍ରୁନା ନିୟମ୍ ଗୁଲାଇ ମାଗ'ତୁନ । ଗୁତୁନ୍ ନିୟମ୍ ଗୁଲାଇ ମା ଡ'ନା: ‘ଆରେମଲେ ଆଅଡାବ', ଆଜାଲିଗା', ଆଡୁଂଗାଲ', ପଲୁସାକି ଆସୁନ', ଆପାଲ୍ରେମ ଆନାଡୟ', ମାରି ନନା ୟଂବାନା ତୁମ' ମାନ୍ଲା’ ଡ'ସେକ୍ ଡୁତା” ଡ'ସେକ୍ ସୁନ' ।
20ସା' ମାଇ ଆମାଇ ସୁନ' “ଅ ଗୁରୁ, କେନ୍ ଗୁଲାଇ ତୁମ' ଡାଉବାଂସା' ନିଂ ମାନ୍ସେକ୍ ଡୁତିଂ” ଡ' ସୁନ' ।
21ସା' ଜିସୁଲା ଆମାଇ ଆଲାତ୍ ଡେମ'ସେକ୍ ଜୁଲ' । ଜୁଲ'ସେକ୍ ଆମାଇ ସୁନ' “ନ ମୁଇଉ ଡିନ୍ଡେମ୍ ଅରଇ' । ନ ଉଇସେକ୍ ନନ୍ବକ୍ ମାମା ଡୁତା ଗୁତୁନ୍ ଗୁଲାଇଉ ସୁଂଅଁ'ସେକ୍ ଗୁତୁନ୍ ସୁଂଅଁ'କୁନୁଂ ଡାବୁ ଆଗରିବ୍ରେମ୍ ବାନ୍ଟାଲ'ବେ' । ଡୁ'ତୁନ୍ ଡେମ'ନା ସରଗ୍ବକ୍ ମାପ୍ରୁ ଆନ ଅବୁଦି ଦନ୍ସମ୍ପତି ବେ'ତ । ତିର୍ଗି' ନ ଆନିଂ ତେଂଗି' ସା'ବା” ଡ'ସେକ୍ ସୁନ' ।
22ସା' ଗୁତୁନ୍ ଅଂଅଁ'ସେକ୍ ମାଇନା ସାର୍ମ' ଇନ୍ସର୍ ଉଇଗା' । ଆମାଇ ଅବୁଦି ଦନ୍ସମ୍ପତି ଡୁକୁଗା'ସା' ସିନ୍ତାଲ'ସେକ୍ ଡୁଂଗା' ।
23ସା' ଗୁଲାଇର ଅଂଅଁ'ସେକ୍ ଡୁକୁନୁଂବକ୍ ଜିସୁଲା ଗୁରୁଂ ଜୁଲ'ସେକ୍ ଆମାଇନା ସିସ୍ୟଲେ ସୁନ' “ଅବୁଦି ସାକାର୍ସେକ୍ ଡୁକୁନୁଂ ରେମଲେ ମାପ୍ରୁ ଅ'ରଇଁୟ'କୁନୁଂ ରାଜିବକ୍ ଉଇପୁଲେଇ ଅବୁଦି କସ୍ଟ” ଡ'ସେକ୍ ସୁନ' ।
24ମାଇ ସୁନ'କୁନୁଂ ଅଂଅଁ'ସେକ୍ ମାଇନା ସିସ୍ୟଲେ ଗୁଲାଇର କାବା ଡେଂଉଇଗା' । ସା' ଜିସୁଲା ଆମା'ଏ ସୁନ' “ଅ ଗୁବୁଲେ, ମାପ୍ରୁ ଅ'ରଇଁୟ'କୁନୁଂ ରାଜିବକ୍ ଉଇପୁଲେଇ ଅବୁଦି କସ୍ଟ । 25ମୁଇ ଉନ୍ଟ୍ ସୁଜିନା କାନାକୁରୁଂ ଗୁଗାଇପୁଲେଇ ମି କସ୍ଟ ଡେନ୍ତା ଗୁତୁନ୍କୁରୁଂ ଅଦିକ୍ ମୁଇନ୍ଡା ସାକାର୍ବାଇ' ରେମ ମାପ୍ରୁନା ରାଜିବକ୍ ଉଇପୁଲେଇ କସ୍ଟ ଡେନ୍ତା” ଡ'ସେକ୍ ସୁନ' ।
26ସା' ଜିସୁନା ସିସ୍ୟଲେ ଗୁଲାଇର ଗୁତୁନ୍ ଅଂଅଁ'ସେକ୍ କାବାକାବା ଡେଂସେକ୍ ମା'ଏ ମା'ଏନ୍ ବିତ୍ରେ ଅ'ସୁନୁଗା' “ଡୁ'ତୁନ୍ ଡ'ନା ଜା ରକ୍ୟା ବୁମ୍ବାମ୍ ଗଂତାଲେଇ?” ଡ'ସେକ୍ ସୁନ' ।
27ସା' ଜିସୁଲା ଆମା'ଏ ସର୍ମଡ' ଜୁଲ'ସେକ୍ ସୁନ', “ରେମଲେ କେନ୍ ଗୁଲାଇ ଡିନ୍ଡେମ୍ ଆଗଂତା ମାତର୍ ମାପ୍ରୁ ଆଗଂତା ଡ'ସେକ୍ ଆରାକ୍; ମାସା'ଡ'ନା ମାଇ ଗୁଲାଇ ଡିନ୍ଡେମ୍ ଗଂତା” ଡ'ସେକ୍ ସୁନ' ।
28ସା' ପିତର୍ଲା ସୁନ' “ଜୁ, ଆନ ତେଂଗି' ସୁସାପୁଲେଇ ନେଇ ଗୁଲାଇ ଅଡକ୍ସୁଂଅଁ'ତୁନେଇ” ଡ'ସେକ୍ ସୁନ' ।
29ସା' ଜିସୁଲା ଆମା'ଏ ସୁନ' “ନିଂ ଆପେ ସତ୍ ସୁନ'ତିଂ, ଜାଏସା ମୁଇନ୍ଡା ନିଂପୁଲେଇ ମାରି ମାପ୍ରୁନା ବାନିକବର୍ ସୁଁସୁପୁଲେଇ ଆମାଇନା ଡିଂଅଁ, ଆତୁନାଲେ ଆବ'ରେଲେ, ଆୟଂଆବା, ଆଉଁନେ ମାରି ଗୁଲାଇ ଦନ୍ସମ୍ପତି ଅଡକ୍ସୁଂଅଁ'ସେକ୍ ଆନିଂ ତେଂଗି' ସାକ୍ନା, 30କେନ୍ ଦର୍ତନିବକ୍ ମାଇ ଡୁକୁନୁଂବେଲା ଅବୁଦି କସ୍ଟ ଆମାଇ ବେ'ତ ଡ'ନାସା ମାପ୍ରୁ ଆମାଇ ବ'ବ୍ନା ଉକ୍ବ'ସୁଗ ଡିଂଅଁସାରୁ, ବୁୟାଂଏଁ ତୁନାଲେ, ୟଂବା, ଉଁ'ଉଁଡେଇଁ ମାରି ଜମିବାଡି ଗୁଲାଇ ଆ'ନା ବେ'ତ, ମାରି ମାଇ ଗୁଇ'ନା ମାପ୍ରୁ ଅ'ରଇଁୟ'କୁନୁଂ ରାଜିବକ୍ ଆମାଇ ମଡୁନମ୍ ଜିବନ୍ସା ବେ'ତ” ଡ'ସେକ୍ ସୁନ' । 31#ମାତିଉ 20:16; ଲୁକ 13:30ଜିସୁଲା ମାରି ସୁନ' “ସିଁସେଇଁ ଡୁକୁନୁଂ ଅବୁଦି ରେମଲେ ତିର୍ଗି'ତା ମାରି ତିର୍ଗି' ଡୁକୁନୁଂ ଅବୁଦି ରେମଲେ ସିଁସେଇଁତା” ଡ'ସେକ୍ ସୁନ' ।
ନିଂ ମି ଗୁଇ'ତିଂ ଡ'ସେକ୍ ଜିସୁଲା ଆମାଇନା ସିସ୍ୟଲେ ମାର୍ ମୁସ ସୁଁସୁଡେନ୍
(ମାତିଉ 20:17–19; ଲୁକ 18:31–34)
32ଜିସୁଲେ ଗୁଲାଇର ଜିରୁସାଲମ୍ ମୁନା'ଉଂଗମ୍ବକ୍ ଉଇଡେଂକୁନୁଂବେଲା ଜିସୁଲା ମା'ଏନ୍ ସିଁସେଇଁ ସିଁସେଇଁ ଉଇଡେଂକୁ । ମାଇ ଜିରୁସାଲମ୍ ଉଂଗମ୍ବକ୍ ଉଇଡେଂକୁସା' ମାଇନା ସିସ୍ୟଲେ କାବା ଡେଂଉଇଗା' ମାରି ମାଇବୁରଂ ଉଇଡେଂକୁନୁଂ ଗୁଲାଇର ବୁତୁଂଗା' । ମାସା'ଡ'ନା ଆତା ଉଇନା ଆମାଇ କସ୍ଟ ବିବେ'ପୁଲେଇ ଅବୁଦି ଦାଇରେମ୍ ଡୁତା ଡ'ସେକ୍ ମା'ଏ ଗୁଲାଇର ମାଗ'କୁସା' ବୁତୁଂକୁଗା' । ମା'ଏ ଉଇଡେଂକୁନୁଂବେଲା ଜିସୁଲା ଆମାଇନା ବାରଲକ୍ ସିସ୍ୟଲେ ୱାୟ'ସେକ୍ ଆତା ଉଇନା ମାମା କସ୍ଟ ଆନିଂ ବାମ୍ତା ଡ'ସେକ୍ ମାର୍ ମୁସ ସୁଁସୁ ମୁଲାୟ' । 33ମାଇ ସୁନ' “ଜୁ, ଆ'ନା ନେଇ' ଗୁଲାଇର ଜିରୁସାଲମ୍ ମୁନା'ଉଂଗମ୍ବକ୍ ଉଇଡେନ୍ତୁନେଇ' । ନିଂ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ, ନେଇ' ଆତା ଡେଲ'ନା ମୁନା'ପୁଜାରିଲେନ୍ ମାରି ଜିଉଦିରେମଲେନା ନିୟମ୍ ଅମାକ୍ରେମେନ୍ ତିତିବକ୍ ମୁଇନ୍ଡା ଆନିଂ ଅସବ' ବେ'ତ । ମା'ଏ ଆନିଂ ବିସାର୍ନା ଡେମ'ସେକ୍ ଆମାଇ ଅଡାବ'ସୁଂ ଡ'ସେକ୍ ଜାଜା ଜିଉଦିରେମଲେ ଆରାକ୍ ମା'ଏନା ତିତିବକ୍ ବେ'ତ । 34ଗୁତୁନ୍ ରେମଲେ ଆନିଂ ଅ'କିୟାଲିତା, ବୁଇ'ତୁର୍ତ, ବୁକ୍ତ ତିର୍ଗି' ମା'ଏ ଆନିଂ ଅଡାବ'ସୁଂତ, ମାତର୍ ତିନ୍ଦିନ୍ବକ୍ ନିଂ ମାରି ବୁରତିଂ” ଡ'ସେକ୍ ସୁନ' ।
ମାପ୍ରୁନା ରାଜିବକ୍ ଆଜା ମୁନା'ରେମ୍ସୁଗ ଅଲେଇ'ତ?
(ମାତିଉ 20:20–28)
35ତିର୍ଗି' ଜେବଦିନା ଉଁ'ଉଁପା ଇମ୍ବାୟ ଜାକୁବ୍ଲା ମାରି ଜଅନ୍ଲା ଜିସୁନ୍ବକ୍ ସାକ୍ସେକ୍ ସୁନ' “ଅ ଗୁରୁ, ନନ୍ବକ୍ ମାମା ନାଂ ଲୁ'ତୁନାଂ, ଗୁତୁନା ନ ଡେମ୍ବେ” ଡ'ସେକ୍ ସୁନ' ।
36ସା' ଜିସୁଲା “ନିଂ ପାପୁଲେଇ ମା ଡିନ୍ଡେମ୍ ଡୁତା ଡ'ସେକ୍ ଆପା ମୁନ୍?” ଡ'ସେକ୍ ଅ'ଗଁସ୍ଲା'ଗା' ।
37ସା' ମାଇପା ସୁନ' “ନ ରାଜି ଅ'ରଇଁୟ'ସେକ୍ ରାଜା ଏକ୍ନା ଆନାଂ ଇମ୍ବାୟବକ୍ ଆମୁଇନ୍ଡା ନନା ସୁସୁମ୍ତିକୁରୁଂ ଆମୁଇନ୍ଡା ନନା ବାସାକ୍ତିକୁରୁଂ ଅଲେଇ'ଲେଇ” ଡ'ସେକ୍ ସୁନ' ।
38 #
ଲୁକ 12:50
ସା' ଜିସୁଲା ସୁନ' “ପା ମା ଲୁଡ'ତୁପା ଗୁତୁନ୍ ମା ଡ'ସେକ୍ ଆମାକ୍ତୁପା । ଆନିଂ ଆ'ଇ କସ୍ଟ ବାମ୍ତା ଆଇ'ତୁନ୍ କସ୍ଟ ଆଇଁ ଗଂତୁପା ଇ? ଆନିଂ ଅବୁଦି କସ୍ଟ ବେଡ'ସେକ୍ ରେମଲେ ଅଡାପ୍ତ, ଡୁ'ତୁନ୍ସୁଗ ପା ଗୁଗୁଇ' ଗଂତୁପା ଇ?” ଡ'ସେକ୍ ସୁନ' ।
39ସା' ମାଇପା “ଅଁ'ଅଁ, ନାଂ ଗଂତୁନାଂ” ଡ'ସେକ୍ ସୁନ' । ସା' ଜିସୁଲା ଆମାଇପା ସୁନ' “ଆନିଂ ଆ'ଇ କସ୍ଟ ବାମ୍ତା ଆଇ'ତୁନ୍ସୁଗ କସ୍ଟ ପା ଆଇଁ ଗଂତୁପା । ମାରି ଆନିଂ ଅବୁଦି କସ୍ଟ ବେଡ'ସେକ୍ ରେମଲେ ଅଡାପ୍ତ, ଡୁ'ତୁନ୍ସୁଗ ପା ଗୁଗୁଇ'ସା ଗଂତୁପା, ଗୁତୁନା ସତ୍ । 40ମାତର୍ ଆମୁଇନ୍ଡା ସୁସୁମ୍ତି ଆମୁଇନ୍ଡା ବାସାକ୍ତି ଅଲେଇ'ପୁଲେଇ ନିଂନା ଅଦିକାର୍ ଆଡୁତା । ମାତର୍ ମାପ୍ରୁ ଜାଜାପୁଲେଇ ସିରେଲ' ବୁଂଅଁ'ତା ମା'ଏଉ ବାମ୍ତା” ଡ'ସେକ୍ ସୁନ' ।
41ଡୁ'ତୁନ୍ଉ ସୁନ'କୁନୁଂ ପାଲ୍ ଦସ୍ଲକ୍ ଡୁକୁନୁଂ ସିସ୍ୟଲେ ଅଂଅଁ'ସେ'ଗା ଆଜାକୁବ୍ଲା ମାରି ଆଜଅନ୍ଲା ଗିସେ'ଗା' । 42#ଲୁକ 22:25,26ସା' ଜିସୁଲା ଆମା'ଏ ଆଗୁଲାଇର ୱାୟ'ସେକ୍ ସୁନ' “ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ଆମା'ଏ ମା'ଏନା ରାଜାଲେ ମାରି ମୁନା'ରେମେ ସାସନ୍ ଡେମ'ସେକ୍ ମା'ଏନା ମୁନ୍ସୁଗ ଆରେମଲେ ମାମା ଡେମ୍ ଡ'ସେକ୍ ଅ'ଡେମ୍ ଗଂତା । ଡି'କେନା ମା'ଏ ମା'ଏନା ବପୁ ଅସୁଇ'ତ । କେନ୍ ଗୁଲାଇ ପେ ମାକ୍ତୁପେ । 43#ମାତିଉ 23:11; ମାର୍କ 9:35; ଲୁକ 22:26ମାତର୍ ପେ ମା'ଏ ଡିନ୍ଡେମ୍ସୁଗ ଆଡେମ' । ପେ ମି ଡୁକୁନା ଡେନ୍ତା ଡ'ନା, ପେନ୍ ବିତ୍ରେ ଜାଜା ନିଂ ମୁନା'ରେମ୍ ଏତିଂ ଡ'ସେକ୍ ମୁନ୍ ଡେଂଗୁତା ଡ'ନା ମା'ଏ ଗୁଲାଇରନା କାମ୍ରେମ୍ସୁଗ ଏ ଡୁତା । 44ନିଂ ଆଗୁଲାଇର ଜିନ୍ସେକ୍ ମୁନା'ରେମ୍ ଏତିଂ ଡ'ସେକ୍ ଜାଏସା ଏତ୍ଗୁତା ଡ'ନା ମାଇ ଗୁଲାଇରନା ଗୁପାମ୍ରେମ୍ସୁଗ ଡୁକୁନା ଡେନ୍ତା । 45ଜୁ, ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ଆକେ ରେମଲେ ଆନିଂ ସେବା ଡେମେଇ' ଡ'ସେକ୍ ସାକ୍ ଆଡୁତା ମାତର୍ ଆପାଲ୍ ରେମଲେ ସେବା ଡିନ୍ଡେମ୍ପୁଲେଇ ମାରି ମାଇନା ଜିବନ୍ ବେଡ'ସେକ୍ ଅବୁଦି ରେମଲେବକ୍ ରକ୍ୟା ଡିନ୍ଡେମ୍ପୁଲେଇ ସା'ଗୁତା” ଡ'ସେକ୍ ସୁନ' ।
ଜିସୁଲା ଆବାର୍ଟିମୟଲା କାନାମ'ବାଇ'ବକ୍ ବଲ୍ ଡିନ୍ଡେମ୍ଡେନ୍
(ମାତିଉ 20:29–34; ଲୁକ 18:35–43)
46ମା'ଏ ଉଇରେମ୍ ଜିରିଅ ଡ'ସେକ୍ ମୁଇ ଉଂଗମ୍ବକ୍ ଡେଲ' । ତିର୍ଗି' ଜିସୁଲା ମାଇନା ସିସ୍ୟଲେ ମାରି ଅବୁଦି ରେମଲେବୁରଂ ଗୁତୁନ୍ ଉଂଗମ୍କୁରୁଂ ଡୁଂଡୁଂବେଲା ଟିମାୟନା ଉଁ'ଉଁ କାନାମ'ବାଇ' ବାର୍ଟିମୟଲା ମନ୍ଜାକୁରୁଂ ମାଂନି ଲୁଡ'ସେକ୍ ଲେଇ'କୁ । 47ସା' ନାଜରିତ୍ ଉଂଗମ୍ନା ଜିସୁଲା ଆତୁନ୍ରି'ତା ଉଇଡେନ୍ତା ଡ' ମାଇ ଅଂଅଁ'ସେକ୍ “ଅ ଦାଉଦ୍ନା ଉଁ'ଉଁ, ଅ ଜିସୁ, ଆନିଂ ଦୟା ଡେମ୍!” ଡ'ସେକ୍ ସୁନ' ।
48ରେମଲେ ଗୁତୁନ୍ କାନାମ'ଡା କିରକୁନୁଂ ଅଂଅଁ'ସେକ୍ “ନ ଜୁକ୍ଲା” ଡ'ସେକ୍ ତର୍ଞେ'ଗା' । ମାତର୍ ମାଇ “ଅ ଦାଉଦ୍ନା ଉଁ'ଉଁ ନ ଆନିଂ ଦୟା ଡେମ୍” ଡ'ସେକ୍ ଅବୁଦି ଡକ୍ତି'ତା ମାରି ସୁନ' ।
49ମାଇ କିରକୁନୁଂ ଜିସୁଲା ଅଂଅଁ'ସେକ୍ ତଂଗା' । ତଂସେକ୍ “ଆମାଇ ନିଂବକ୍ ସା'ବା ଡ'ସେକ୍ ସୁଁ” ଡ'ସେକ୍ ସୁନ' । ସା' ରେମଲେ ଆମାଇ ସୁନ' “ଆବୁତୁଂଗା', ଜିସୁଲା ଆନ ୱାୟ'ତା, ନ ତଂସେକ୍ ଉୟା” ଡ'ସେକ୍ ସୁନ' । 50ଗୁତୁନ୍ ଅଂଅଁ'ସେକ୍ ବାର୍ଟିମୟଲା ମାଇନା କୁକୁଇକୁନୁଂ ଇମ୍ପ' ଅଡକ୍ସୁଂଅଁ'ସେ'ଗା ସେଟ୍ଟ' ତଗ୍ଡାଗ୍ସେକ୍ ଜିସୁନ୍ବକ୍ ସା'ଗା' ।
51ସା' ଜିସୁଲା ଆମାଇ ସୁନ' “ନିଂ ନପୁଲେଇ ମା ଡେମ୍ ଡ'ସେକ୍ ଏତ୍ଗୁତୁନ” ଡ'ସେକ୍ ସୁନ' ।
ସା' ଗୁତୁନ୍ କାନାମ'ଡା ସୁନ' “ଅ ଗୁରୁ, ନ ନିଂନା ମ' ଅ'ତାର' ବେ' ” ଡ'ସେକ୍ ସୁନ' ।
52ସା' ଜିସୁଲା ଆମାଇ ସୁନ' “ନ ଉୟାବେ, ନ ବାନି ଡେଂନ । ମାସା'ଡ'ନା ନ ଆନିଂ ମାଇ ବାନି ଡେମ୍ତ ଡ'ସେକ୍ ବିସ୍ବାସ୍ ଡେମ'କୁନସା' ବାନି ଡେଂନ” ଡ'ସେକ୍ ସୁନ' । ସା' ମାଇନା ମ' ସେଟ୍ଟ' ତାର୍ଗା' । ମାରି ମାଇ ଗୁଲାଇ ଜୁଜୁ ଗଂଗା' । ସା' ମାଇ ମା'ଏବୁରଂ ଆଜିସୁଲା ତେଂଗି' ଉଇଗା' ।
Currently Selected:
ମାର୍କ 10: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
