ମାର୍କ 11
11
ଜିସୁଲା ଗଦ ବାଗ୍ବକ୍ ଲେଇ'ସେ'ଗା ଜିରୁସାଲମ୍ ମୁନା'ଉଂଗମ୍ବକ୍ ଉଇଡେନ୍
(ମାତିଉ 21:1–11; ଲୁକ 19:28–40; ଜଅନ୍ 12:12–19)
1ଜିସୁଲେ ଜିରୁସାଲମ୍ ମୁନା'ଉଂଗମ୍ବକ୍ ଡେଲ'ସା' ଆତା ଜିତ କୁନ୍ଡାପାଲି ଡୁକୁନୁଂ ବେତ୍ପାଗି ମାରି ବେତନିଆ ଡ'ସେକ୍ ଇମ୍ବାରୁ ଉଂଗମ୍ ଉନ୍ତୁ' ସା'ଗା'। ସାକ୍ସେକ୍ ଆମାଇନା ସିସ୍ୟଲେ ଇମ୍ବାୟବକ୍ ବେନ୍ଟାୟ'ସେକ୍, 2ଆମାଇପା ମା ସୁନ' ଡ'ନା “ପା ଉଇବେଲା ମୁଲ୍ ଇମ୍ବ'ନ୍ ଉଂଗମ୍ ଜୁତୁପା ଗୁତୁନ୍ ଉଂଗମ୍ବକ୍ ଗାୟା । ପା ଆତୁନ୍ ଉଂଗମ୍ ଗାଇନା ଆତା ଜାଏସା ମଲିନେଇ'ବାଇ' ମୁଇ ଉଁ'ଉଁଗଦ ଆତା ତୁଲ'କୁନୁଂ ଜୁତୁପା । ଗୁତୁନା ତକ୍ପିଡ'ସେକ୍ ଆକେ ରିଂଅଁ' ସା'ବା । 3ଜାଏସା ଆପା ମାସା' ତକ୍ପି ଡେନ୍ତୁପା? ଡ'ନା ନେଇନା ଗୁରୁ ଜିସୁଲା ଦର୍କାର୍ ଡ'ତା, ସୁରୁଇ' ରିଂଅଁ' ବେ'ତ ଡ'ସେକ୍ ସୁଁ” ଡ' ବେନ୍ଟାୟ' ।
4ସା' ମାଇପା ଇମ୍ବାୟ ଉଇସେକ୍ କୁରୁଂନା ଡିଂଅଁନ୍ ଡାନ୍ଡର୍କନ୍ଡେକ୍ ମୁଇ ଉଁ'ଉଁଗଦ ତୁଲ'କୁନୁଂ ଜୁଲ' । 5ଜୁଲ'ସେକ୍ ତକ୍ପି ଡେଂକୁସା' ଆତା ତଂକୁନୁଂ ରେମଲେ “ମାପୁଲେଇ ଆଉଁ'ଉଁଗଦ ତକ୍ପି ଡେନ୍ତୁପା?” ଡ'ସେକ୍ ଅ'ଗଁସ୍ଲା'ଗା' । 6ସା' ଜିସୁଲା ସୁନ'କୁନୁଂସୁଗ ମାଇପା ସୁନ'ସା' ରେମଲେ ରିଂଅଁ' ଉୟା ଡ' । 7ସା' ମାଇପା ଗୁତୁନ୍ ଉଁ'ଉଁଗଦ ଜିସୁନ୍ବକ୍ ରିଂଅଁ' ସା'ଗା' । ରିଂଅଁ' ସାକ୍ସେକ୍ ସିସ୍ୟଲେ ଉଁ'ଉଁଗଦନା ଗି'ଡାଂବକ୍ ମା'ଏନା ଇମ୍ପ'ସେନ୍ଡି ବେସାଗ' । ସା' ଜିସୁଲା ଗୁତୁନ୍ ଗଦନ୍ ଗି'ଡାଂବକ୍ ଲେଇ'ଗା' । 8ମାରି ଅବୁଦି ରେମଲେ କୁରୁଂବକ୍ ମା'ଏନା ଇମ୍ପ'ସେନ୍ଡିଲେ ବେସାଗ'ବେଡ'; ମାରି ଏନ୍ତୁକ୍ର ଅବୁଦି ସାର୍ଦାକ୍ସେକ୍ ବୁରଂବକ୍ ଡୁକୁନୁଂ ଡାଉଡାଉ ସୁଲପ୍ନା ଉଲାକ୍ପା'ବାଇ' ଡେନ୍ତାଲେ ସେବ'ସେକ୍ ଜିସୁଲା ଉଇଡେଂକୁନୁଂ କୁରୁଂବକ୍ ବୁଂଅଁ' । 9ରେମଲେ ଆଜିସୁଲା ଲାଡ'ସେକ୍ ଅ'ମନ୍ଜାଲ' ରିଂଅଁ' ଉଇଡେଂକୁ । ଗୁତୁନ୍ ଲାଡ'କୁନୁଂ ରେମଲେ ଅବୁଦି ସାର୍ଦାକ୍ସେକ୍ ଡକ୍ତି'ତା କିରକ୍ସେକ୍ ସୁନ'
“ଅସାନା!
ପ୍ରବୁନା ଇମିବକ୍ ଜା ସୁସାପ୍ଡେନ୍ତା ଆମାଇ ମାପ୍ରୁ ଆସିର୍ବାଦ୍ ଡେମେଇ'!
10ଇନ୍ତେକନ୍ଡେ'କା ନେ'ନ୍ ତୁତା ଦାଉଦ୍ଲା ରାଜା ଏକୁନୁଂସୁଗ ଆ'ନା ନେଇ'ନା ରାଜା ଜା ଏତା ଆମାଇ ମାପ୍ରୁ ଆସିର୍ବାଦ୍ ଡେମେଇ'!
ସରଗ୍ବକ୍ ଡୁକୁନୁଂ ଆମାପ୍ରୁ ଅସାନା!” ଡ'ସେକ୍ ମା'ଏ ଡକ୍ତି'ତା କିରକ୍ସେକ୍ ସୁନ' ।
11ଡୁ'ତୁନ୍ଉ ଜିସୁଲେ ଜିରୁସାଲମ୍ ମୁନା'ଉଂଗମ୍ବକ୍ ଡେଲ' । ଡେଲ'ସେକ୍ ମାଇ ମାପ୍ରୁନା ମନ୍ଦିର୍ ବିତ୍ରେ ଗାଇଗା' । ଗାଇସେକ୍ ଆତା ମାଇ ଗୁଲାଇ କୁନ୍ଡା ଗୁରୁଂ ଜୁଲ' । ଜୁଲ'ସେକ୍ ଅବୁଦି ମୁନ୍ଡିଗା' ଡ'ସେକ୍ ଜିସୁଲା ମାଇନା ବାରଲକ୍ ସିସ୍ୟଲେବୁରଂ ବେତନିଆ ଉଂଗମ୍ବକ୍ ଉଇଗା' ।
ଜିସୁଲା ଆଲିଅଇ ସୁଲପ୍ ଆନା ବୁଂବୁଂଡେନ୍
(ମାତିଉ 21:18,19)
12ମାରି ବେରା ଇନ୍ଜୁର୍ ବେତନିଆ ଉଂଗମ୍କୁରୁଂ ତୁର୍ସେକ୍ ଉଇଡେଂକୁନୁଂବେଲା ଆମାଇ କୁଡୁଗା' । 13ସା' ସୁଲୁଂକୁରୁଂ ଅବୁଦି ଉଲାକ୍ପା' ଡୁକୁନୁଂ ମୁଇ ଲିଅଇ ସୁଲପ୍ ମାଇ ଜୁଲ' । ଜୁଲ'ସା' ଡ ଆତା ସୁସୁମ୍ପୁଲେଇ ଲିଅଇ ବାମ୍ତାମା'ନ୍ଡେ ଡ'ସେକ୍ ଉଇଗା' । ସା' ଲିଅଇ ସୁ'ଉନ୍ବେଲା ଆରାକ୍ସା' ଉଲାକ୍ଉ ଡୁକୁଗା' । 14ସା' “ଇନ୍ଡଇ'ଏସା ନ ଆସୁ'ଉଗା', ମାରି ନ ସୁ'ଉକୁନୁଂ ଇନ୍ଡଇ'ଏସା ରେମଲେ ଆସୁମେଇ'” ଡ'ସେକ୍ ଜିସୁଲା ସୁନ'କୁନୁଂ ମାଇନା ସିସ୍ୟଲେ ଅଂଅଁ' ।
ଜିସୁଲା ମନ୍ଦିର୍ବକ୍
(ମାତିଉ 21:12–17; ଲୁକ 19:45–48; ଜଅନ୍ 2:13–22)
15ମା'ଏ ଜିରୁସାଲମ୍ ଉଂଗମ୍ବକ୍ ଡେଲ'ସେ'ଗା ଜିସୁଲା ମାପ୍ରୁନା ମନ୍ଦିର୍ବକ୍ ଉଇଗା'ସା' ଆତା ସୁସପ୍ ମୁମୁଇ'ରେମ୍, ସୁଂସୁଂଆ'ରେମ୍ ଅବୁଦିର ଡୁକୁଗା'ସା' ଆଗୁଲାଇର ଜିସୁଲା ଞନ' ଅ'ତୁର' । ମାରି ଆତା ଡାବୁ ବାଦ୍ଲାଇବାର୍ରେମଲେନ୍ ପାଟା ମାରି ପାରା ସୁଂସୁଂରେମେନା କର୍ଜି ଗୁଲାଇ ଉଇଜୁର' ପାର୍ଲେୟଁ' ସୁଂଅଁ' । 16ମାରି ମାପ୍ରୁନା ମନ୍ଦିର୍ ରି'ତା ଜାଏସା ମାସା ରିଂଅଁ' ଆଉଇଏଇ' ଡ'ସେକ୍ ମାଇ ଆରେମଲେ ପିଟାୟ'ବେଡ' । 17ତିର୍ଗି' ଜିସୁଲା ଆରେମଲେ ଅମାକ୍ବେଲା ଡି'କେନ୍ ସୁନ':
“ମାପ୍ରୁନା ଉଲାକ୍ବକ୍ ଡି'କେନ୍ ଲେକ୍ଲ'ତା, ନିଂନା ମନ୍ଦିର୍ ଗୁଲାଇ କୁନ୍ଡାନ୍ ରେମଲେ ସାକ୍ସେ'ଗା
ପାର୍ତନା ଡିନ୍ଡେମ୍ନା ଡିଂଅଁ ଡ'ସେକ୍ ସୁନ୍ତ ।
ମାତର୍ ପେ ଡୁଂଗାରେମ୍ନା ଡିଂଅଁସୁଗ ଡେମ'ତୁପେ” ଡ'ସେକ୍ ଆମା'ଏ ସୁନ' ।
18ଜିସୁଲା ମାପ୍ରୁନା ମନ୍ଦିର୍ବକ୍ ଗାଇସେକ୍ ଡୁ'ତୁନ୍ ଡେମ'କୁନୁଂ ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମେ ଅଂଅଁ' । ଅଂଅଁ'ସେକ୍ ଆମାଇ ମି ଅଗୁୟ'ନା ଡେନ୍ତା ଡ'ସେକ୍ ମା'ଏ ଗୁଲାଇର ଅଇଁୟ' । ମାତର୍ ଜିସୁଲା ଅମାଗ'କୁନୁଂ ତୁମ' ଗୁଲାଇ ସବ'ସେକ୍ ଆମାଇ ତେଂଗି' ରେମଲେ ଗୁଲାଇର ଉଇଡେନ୍ତାସା' ମା'ଏ ଆମାଇ ବୁତୁଂଗା' ।
19ମୁନ୍ଡି'ଗା'ସା' ଜିସୁଲା ମାଇନା ସିସ୍ୟଲେବୁରଂ ଜିରୁସାଲମ୍ ମୁନା'ଉଂଗମ୍କୁରୁଂ ବାଇରି ଉଇଗା' ।
ଗୁଇ'କୁନୁଂ ଲିଅଇ ସୁଲପ୍
(ମାତିଉ 21:19–22)
20ବେରା ଇନ୍ଜୁର୍ ମା'ଏ ଜିରୁସାଲମ୍ ଉଂଗମ୍ବକ୍ ମାରି ସୁସାପ୍ ଡେଂକୁନୁଂବେଲା ଜିସୁଲା ସୁନ'କୁନୁଂ ଆତୁନ୍ ଲିଅଇ ସୁଲପ୍ ବାଗ୍ବକ୍କୁରୁଂ ରେ'ଗି ମିସ୍ତେ ଗୁଇ'କୁନୁଂ ଜୁଲ' । 21ତୁଗଲା ଜିସୁଲା ଆସୁଲପ୍ ସୁନ'କୁନୁଂ ପିତର୍ଲା ଆ'ନା ଏତ୍ସେ'ଗା ଆଜିସୁଲା ସୁନ' “ଅ ଗୁରୁ, ଜୁ, ତୁଗଲା ନ ଆନାବୁଂଅଁ'କୁନୁଂ ଗୁତୁନ୍ ଲିଅଇ ସୁଲପ୍ ଇନ୍ସର୍ ଉଇଗା'” ଡ'ସେକ୍ ସୁନ' ।
22ସା' ଜିସୁଲା ଆମା'ଏ ସୁନ' “ଆମାପ୍ରୁ ପେ ବିସ୍ବାସ୍ ଡେମ୍ । 23#ମାତିଉ 17:20; 1 କରି 13:2ନିଂ ଆପେ ସତଇସା ସୁନ'ତିଂ, ପେ ଲୁଡ'କୁନୁଂ ଗୁଲାଇ ମାପ୍ରୁ ବେ'ତକି ଆରାକ୍ ଡ'ସେ'ଗା ଜିବନ୍ ବିତ୍ରେ ମଏତ୍ବାର୍ ଆମାଇ ବଲ୍ ବିସ୍ବାସ୍ ଡେମ'ନା, ଆକେନ୍ କୁନ୍ଡା ନ ଇଂକେକୁରୁଂ ତୁର୍ସେକ୍ ସମ୍ଦର୍କିନ୍ଡାକ୍ବକ୍ ଲ'ଗା ଡ'ନା ପେ ସୁନ'କୁନୁଂସୁଗ ଡେନ୍ତା । ଆମାପ୍ରୁ ଜା ବଲ୍ ବିସ୍ବାସ୍ ଡେମ୍ତ ମାଇପୁଲେଇ ମାପ୍ରୁ ଗୁଲାଇ ଡିନ୍ଡେମ୍ ଗଂତା । 24ଡୁ'ତୁନ୍ସା' ନିଂ ଆପେ ସୁନ'ତିଂ, ପେ ପାର୍ତନା ଡିନ୍ଡେମ୍ବେଲା ମା ଲୁଡ'ନାସା ଗୁତୁନ୍ ମାଇ ଆନେଇ' ବେ'ତ ଡ'ସେକ୍ ପେ ବିସ୍ବାସ୍ ଡେମ'ସେକ୍ ଲୁଡ'ନା ସତଇସା ଆପେ ମାପ୍ରୁ ଗୁତୁନା ବେ'ତ । 25-26#ମାତିଉ 6:14,15ପେ ପାର୍ତନା ଡିନ୍ଡେମ୍ବେଲା ପେବୁରଂ ଜାଜା ଗିସେ'କୁନୁଂ ମାମା ଡୁକୁନା ସିଁସେଇଁ ପେ ମାଇନ୍ବକ୍ ଉଇସେକ୍ ବିଡ୍ବାର୍ ଡୁତା । ପେ ମା'ଏବୁରଂ ଡୁ'ତୁନ୍ ଡେମ'ନାଉ ସରଗ୍ବକ୍ ଡୁକୁନୁଂ ପେନା ବା ପେ ଅଲିରାକ୍ବାଇ' କାମ୍ ଡେମ'କୁନୁଂ ଗୁତୁନ୍ ଗୁଲାଇ କେମା ଡେମ୍ତ” ଡ'ସେକ୍ ସୁନ' ।
ଜା ଆନ ସୁନ'ସେକ୍ ବେନ୍ଟାୟ'ସା' ମାପ୍ରୁନା ମନ୍ଦିର୍ବକ୍ ଗାଇସେକ୍ ଆସୁସପ୍ରେମ୍ ଆସୁଂସୁଂରେମ୍ ଞନ'ନ ଡ'ସେକ୍ ଆଜିସୁଲା ଅ'ଗଁସ୍ଲା'ଗ୍ଡେନ୍
(ମାତିଉ 21:23–27; ଲୁକ 20:1–8)
27ମା'ଏ ଜିରୁସାଲମ୍ ଉଂଗମ୍ବକ୍ ମାରି ସା'ଗା' । ସା' ଜିସୁଲା ମନ୍ଦିର୍ବକ୍ ବୁଲ୍ଲ'କୁନୁଂବେଲା ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମେ ମାରି ମୁନା'ରେମେ ଗୁଲାଇର ମାଇନ୍ବକ୍ ସା'ଗା' । 28ସାକ୍ସେ'ଗା “ଆରେମଲେ ଞୁଞପୁଲେଇ ଜା ଆନ ଅଦିକାର୍ ବେଡ'ସା' ଆଗୁଲାଇର ଞନ'ନ? ଡି'କେନ୍ ଡେମ୍ ଡ'ସେକ୍ ଆନ ଜା ବେନ୍ଟାୟ'?” ଡ'ସେକ୍ ଅ'ଗଁସ୍ଲା'ଗା'।
29ସା' ଜିସୁଲା ଆମା'ଏ ସୁନ' “ନିଂସା ଆପେ ମୁଇ ଅ'ଗଁସ୍ଲାକ୍ତିଂ । ପେ ଆନିଂ ଗୁତୁନ୍ ସୁନ'ନା ଜା ଆନିଂ ଅଦିକାର୍ ବେଡ'ତାସା' ନିଂ କେନ୍ ଗୁଲାଇ ଡିନ୍ଡେମ୍ ଡେନ୍ତିଂ ଡ'ସେକ୍ ଆପେ ସୁନ୍ତିଂ । 30ମାପ୍ରୁ ବେନ୍ଟାୟ'ସା' ଜଅନ୍ଲା ଆରେମଲେ ଡାଗ୍ବକ୍ ବାପ୍ତିସ୍ମା ବେଡ'କି ରେମଲେ ବେନ୍ଟାୟ'ସା' ବାପ୍ତିସ୍ମା ବେଡ'? ପେ ଆନିଂ ସୁଁ” ଡ'ସେକ୍ ସୁନ' ।
31ସା' ମାପ୍ରୁଲା ବେନ୍ଟାୟ' ଡ'ସେକ୍ ସୁନ'ନା ମାସା' ପେ ଆଜଅନ୍ଲା ବିସ୍ବାସ୍ ଆଡେମ୍ତୁପେ ଡ'ସେକ୍ ମାଇ ଆନେଇ' ସୁନ୍ତ । 32ମାରି ରେମଲେନ୍କୁରୁଂ ଡ'ସେକ୍ ସୁନ'ନା ଜଅନ୍ଲା ମୁଇନ୍ଡା ବାବବାଦିଲା ଡ'ସେକ୍ ରେମଲେ ବିସ୍ବାସ୍ ଡେମ'ତାସା' ରେମଲେ ଆନେଇ' ଗିସେକ୍ସେକ୍ କୁଇଁତ ଡ'ସେକ୍ ମା'ଏ ଆରେମଲେ ବୁତୁଂଗା' । ଡି'କେନ୍ ମା'ଏ ମା'ଏନ୍ ବିତ୍ରେଉ ଅସୁନୁଗା' ।
33ସା' ମା'ଏ ଆଜିସୁଲା ସୁନ' “ନେଇ ଆମାକ୍ତୁନେଇ” ଡ'ସେକ୍ ସୁନ' । ସା' ମାଇ ଆମା'ଏ ସୁନ' “ଡୁ'ତୁନ୍ ଡ'ନା ଜା ଆନିଂ ଅଦିକାର୍ ବେଡ'ସା' ନିଂ ଡି'କେନ୍ ଗୁଲାଇ ଡିନ୍ଡେମ୍ ଡେନ୍ତିଂ ଡ'ସେକ୍ ନିଂସା ଆପେ ଆସୁନ୍ତିଂ” ଡ'ସେକ୍ ସୁନ' ।
Currently Selected:
ମାର୍କ 11: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
