ମାର୍କ 12
12
ଟାକ୍ରିବାଇ' ଡିନ୍ଜାବୁର୍ ଜାଗ୍ବାର୍ଏ
(ମାତିଉ 21:33–46; ଲୁକ 20:9–19)
1ଜିସୁଲା ଉ'ସୁରାମ୍ ଉଡ'ସେକ୍ ଆମା'ଏ ମାରି ଅମାକ୍ ମୁଲାୟ' । ମାଇ ସୁନ' “ମୁଇନ୍ଡା ରେମ ସିନିପ୍କୁର୍ ସିପ୍କୁର' ଡଂକୁର'ସେକ୍ ମୁଇ ଡିନ୍ଜାବୁର୍ ଅ'ରଇଁୟ'ସେକ୍ ଅଂଗୁର୍ ଉନ'ବୁଂଅଁ' । ଗୁତୁନ୍ ଡିନ୍ଜାବୁର୍ବକ୍ ମାଇ ଅଂଗୁର୍ ରଡାକ୍ପୁଲେଇ ବୁଡାଲା ତମ୍ଲେଇଁବକ୍ କାନାଲ' ବୁଂଅଁ' । ମାରି ଜାଗ୍ବାର୍ରେମେ ଡୁକୁପୁଲେଇ ମୁଇ ତୁନୁଂତାସା ଅ'ରଇଁୟ'ବୁଂଅଁ' । ଅ'ରଇଁୟ'ସେକ୍ ଗୁତୁନ୍ ଡିନ୍ଜାବୁର୍ କକ୍ସେକ୍ ଡେମ୍ନେଇ', ବୁଲୁଗା' ଡ'ନା ବାନ୍ଟାକ୍ସେକ୍ ସୁମ୍ନେଇ' ଡ'ସେକ୍ ଜାଗ୍ବାର୍ପୁଲେଇ ଆରେମଲେ ସୁନ'ସେ'ଗା ମାଇ ସୁଲୁଂ ରାଜିବକ୍ ଡୁଂଗା' । 2ଡୁଂସେ'ଗା ଅଂଗୁର୍ ମୁମୁଇ'ବେଲା ଡେଂଗା'ସା' ନିଂନା ବାନ୍ଟା ଲୁଲୁ' ଉୟା ଡ'ସେକ୍ ଆମାଇନା ଗତିରେମ୍ ଆମୁଇନ୍ଡା ମା'ଏନ୍ବକ୍ ବେନ୍ଟାୟ' । 3ସା' ଗୁତୁନ୍ ଅଂଗୁର୍ ଜାଗ୍ବାର୍ରେମେ ଆତୁନ୍ ଗତିରେମ୍ ସବ'ସେକ୍ ବୁକ୍ସଲ' ତିସଲ'ସେ'ଗା ସର ତିତିଉ ବେନ୍ଟାୟ' ବେଡ' ।
4ସା' ମାର୍ ଆମୁଇନ୍ଡା ଗତିରେମ୍ ମାଇନା ବାନ୍ଟା ଲୁଲୁ' ବେନ୍ଟାୟ' । ସା' ଆମାଇସା ସବ'ସେକ୍ ଆବ'ବ୍ ବୁଗ'ସେ'ଗା ଅବୁଦି ସୁମ୍ବୁର' ଆସାଂଅଁ'ସେକ୍ ଅ'ଗେୱାଲ' ଞନ'ବେଡ' । 5ସା' ମାର୍ ଆମୁଇନ୍ଡା ବେନ୍ଟାୟ'ସା' ମା'ଏ ସବ'ସେ'ଗା ଅଡାବ' ସୁଂଅଁ' । ମାରି ମାଇ ଆମାଇନା ଗତିରେମେ ଆମୁଇନ୍ଡା ଆମୁଇନ୍ଡା ଅବୁଦି ପାଲି ଡି'କେନ୍ ବେନ୍ଟାୟ'ବୁଂଅଁ'ସା'ଏସା ମା'ଏ ଆଏନ୍ତୁକ୍ର ବୁଗ' ଆଏନ୍ତୁକ୍ର ଅଡାବ' ସୁଂଅଁ' ।
6ତିର୍ଗି' ମା'ଏନ୍ବକ୍ ବେନ୍ଟାଇବାର୍ପୁଲେଇ ମାଇନ୍ବକ୍ ମୁଇନ୍ଡାଉ ଉଁ'ଉଁନ୍ଡେଇଁ ଡୁକୁ । ଆତୁନ୍ ଉଁ'ଉଁନ୍ଡେଇଁ ମାଇ ଅବୁଦି ଆଲାତ୍ ଡେମ'ସେକ୍ ଡୁକୁ । ଆନିଂନା ଉଁ'ଉଁ ବେନ୍ଟାୟ'ନା ମା'ଏ ଆମାଇ ମାନ୍ତା ଡ'ସେକ୍ ଏତ୍ସେ'ଗା ତିର୍ଗି' ଆମାଇସା ବେନ୍ଟାୟ' ।
7ସା' ଆମାଇ ଜୁଲ'ସେକ୍ ଗୁତୁନ୍ ଜାଗ୍ବାର୍ରେମେ ‘ଜୁ, କେନ୍ ଡିନ୍ଜାବୁର୍ନା ଅଦିକାର୍ ଆମାଇଉ ଡେନ୍ତା । ଲବେ, ଆମାଇ ଅଡାପ୍ସୁଂନେଇ', ଡୁ'ତୁନ୍ ଡେମ'ନା କେନ୍ ଗୁଲାଇନା ଅଦିକାର୍ ନେଇ'ନା ଡେନ୍ତା’ ଡ'ସେକ୍ ମା'ଏ ଅଇଁୟ' । 8ଅଇଁୟ'ସେକ୍ ମା'ଏ ଆମାଇ ସବ' ଅଡାବ'ସେକ୍ ମାଇନା ମଟ୍ ଡିନ୍ଜାବୁର୍ ବାଇରି ଅଡକ୍ସୁଂଅଁ' ।”
9ସା' “ଗୁତୁନ୍ ସାକାର୍ ସାକ୍ସେକ୍ ଆମା'ଏ ମା ଡେମ୍ତ ଡ'ସେ'ଗା ପେ ଏତ୍ଗୁତୁପେ?” ଡ'ସେକ୍ ଜିସୁଲା ଅ'ଗଁସ୍ଲା'ଗା' । ଅ'ଗଁସ୍ଲାକ୍ସେକ୍ ଜିସୁଲାଉ ମାରି ସୁନ' “ଗୁତୁନ୍ ସାକାର୍ ସାକ୍ସେକ୍ ଆମା'ଏ ଆଗୁଲାଇର ଅଡାବ'ସେକ୍ ଗୁତୁନ୍ ଡିନ୍ଜାବୁର୍ ଜାଗ୍ବାର୍ପୁଲେଇ ଆପାଲ୍ରେମ ବେ'ତ” ଡ'ସେକ୍ ସୁନ' । 10ଜିସୁଲା ଆମା'ଏ ସୁନ':
“ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ପେ ପଡ୍ ଆଡୁତୁପେସା ଇ?
ଗୁତୁନ୍ବକ୍ ଲେକ୍ଲ'ତା: ‘ବ'ସିଂରେମ୍ ଇମ୍ବ'ନା ବୁରେ ଅଲିରାକ୍ବାଇ' ଡ'ସେକ୍ ଅଡକ୍ସୁଂଅଁ'କୁ, ଗୁତୁନ୍ ବୁରେଉ ଆ'ନା ବ'ସିଂବେଲା ଗଡିକ୍ବକ୍ ବୁଂବୁଂପୁଲେଇ ଅବୁଦି ବଲ୍ବାଇ' ବୁରେ ଡ'ସେକ୍ ବୁଂଅଁ'ତା' ।’
11ପ୍ରବୁଉ ଡି'କେନ୍ବାଇ' ଡିନ୍ଡେମ୍ ଗଂତା ।
ଗୁତୁନ୍ ଜୁଲ'ସେକ୍ ନେଇ' ଗୁଲାଇର କାବା ଡେଂଉଇତୁନେଇ' ।”
12ଜିସୁଲା ଆନେଇ'ଉ ଉ'ସୁରାମ୍ସୁଗ ଅ'ପୁୟ'ସେକ୍ ସୁନ'ତା ଡ' ଜିଉଦିରେମଲେନା ମୁନା'ରେମେ ମାଗ'ସା' ଆଜିସୁଲା ସବ୍ନେଇ' ଡ'ସେକ୍ ଏତ୍ଗା' । ମାତର୍ ଆରେମଲେ ବୁତୁଂସେକ୍ ମା'ଏ ମାଇନ୍କୁରୁଂ ଡୁଂଗା' ।
ଆକାଇସର୍ଲା ସିସ୍ତୁ ବିବେ'ନା ବଲ୍ କି ଆସାର୍ ଡ'ସେକ୍ ଆଜିସୁଲା ଅ'ଗଁସ୍ଲାକ୍ଡେନ୍
(ମାତିଉ 22:15–22; ଲୁକ 20:20–26)
13ତିର୍ଗି' ମା'ଏ ଆପାରୁସିଦଲ୍ନା ରେମଲେ ମାରି ଆଏରଦିୟ ଦଲ୍ନା ରେମଲେ ଜିସୁନ୍ବକ୍ ବେନ୍ଟାୟ' । ମାସା'ଡ'ନା ମାଇ ଅଇଁବେଲା ମାମା ପାଲ୍ ତୁମ' ଅ'ତୁର'ନା ମାଇ ଅଲିରାକ୍ବାଇ' ସୁନ' ଡ'ସେକ୍ ସବ୍ନେଇ' ଡ'ସେ'ଗା ବେନ୍ଟାୟ' । 14ବେନ୍ଟାୟ'ସା' ମା'ଏ ଜିସୁନ୍ବକ୍ ସାକ୍ସେକ୍ ଆମାଇ ସୁନ' “ଅ ଗୁରୁ, ନ ଅବୁଦି ବଲ୍ରେମ୍ ଡ'ସେକ୍ ନେଇ ମାଗ'ତୁନେଇ । ମୁନା'ରେମ୍ ଡାଉରେମ୍ ଡ'ସେକ୍ ଆଜାଏସା ନ ପାଲ୍ ଆଜୁତୁନ, ଆଗୁଲାଇର ସମାନ୍ ଜୁଲ'ତୁନ । ରେମଲେ ମି ଡୁକୁନା ଡେନ୍ତା ଡ'ସେକ୍ ମାପ୍ରୁ ସୁନ'କୁନୁଂ ନ ଆନେଇ ବଲ୍ ଅମାଗ'ତୁନ । ମାରି ନ ସତ୍ ସୁନ୍ତୁନ' ଡ'ସେକ୍ସା ନେଇ ମାଗ'ତୁନେଇ । ସା' ଆ'ନା ନ ସୁଁ #12:14 କାଇସର୍: ରମିୟ ଦେସ୍ନା ଆମୁନା' ରାଜାଲା କାଇସର୍ ଡ'ସେକ୍ ରେମଲେ ୱାୟ'କୁ । ଆକାଇସର୍ ରାଜା ସିସ୍ତୁ ବେଡ'ନା ନେଇ'ନା ନିୟମ୍ବକ୍ ଡୁକୁନୁଂସୁଗ କି ଆରାକ୍? 15ନେଇ ବେ'ତୁନେଇ କି ଆବେ'ତୁନେଇ” ଡ'ସେ'ଗା ମା'ଏ ଅ'ଗଁସ୍ଲା'ଗା' । ସା' ମା'ଏ ମି ଏତ୍ସେ'ଗା ସୁନ'ତା ଡ'ସେକ୍ ଜିସୁଲା ମାଗ'ସେକ୍ ଆମା'ଏ ସୁନ' “ଆଜା ପେ ନାଡାୟ'ତୁପେ? ମାସା' ପେ ଡି'କେନ୍ ଅଇଁୟ'ସେକ୍ ଆନିଂ କସ୍ଟ ବେ'ତୁନେଇ ଡ'ସେକ୍ ଏତ୍ଗୁତୁପେ? ମୁଇ ରୁପାନ୍ ଡାବୁ ଆକେ ରିଂ, ନିଂ ଜୁଲ'ସେ'ଗା ସୁନ୍ତିଂ” ଡ'ସେକ୍ ସୁନ' ।
16ସା' ମା'ଏ ମୁଇ ରୁପାନା ଡାବୁ ରିଂଅଁ' ବେଡ' । ରିଂଅଁ'ବେଡ'ସା' ମାଇ ଆମା'ଏ ଅ'ଗଁସ୍ଲା'ଗା' “ଜାନା ପଟ୍ ମାରି ଇମି କେନ୍ ଡାବୁବକ୍ ଲେକ୍ଲ'ତା?” ଡ'ସେକ୍ ଅ'ଗଁସ୍ଲା'ଗା' ।
ସା' ମା'ଏ “କାଇସର୍ନା” ଡ'ସେକ୍ ସୁନ' ।
17ସା' ଜିସୁଲା ଆମା'ଏ ସୁନ' “ଆକାଇସର୍ଲା ମା ବିବେ'ନା ଡୁତା ଗୁତୁନା ଆମାଇ ବେ' ମାରି ଆମାପ୍ରୁ ମା ବିବେ'ନା ଡୁତା ଗୁତୁନା ଆମାପ୍ରୁ ବେ' ଡ'ସେକ୍ ସୁନ ।”
ସା' ଜିସୁଲା ଡି'କେନ୍ ସୁନ'କୁନୁଂ ମା'ଏ ଅଂଅଁ'ସେକ୍ ଗୁଲାଇର କାବା ଡେଂଉଇଗା' ।
ରେମଲେ ଗୁଇ'ସେକ୍ ମାରି ବୁରତାକି ଆରାକ୍ ଡ'ସେକ୍ ସୁଁସୁଡେନ୍
(ମାତିଉ 22:23–33; ଲୁକ 20:27–40)
18 #
ପେରିତ 23:8
ମାରି ସାଦୁକି ଦଲ୍ନା ରେମଲେ ଜିସୁନ୍ବକ୍ ସା'ଗା' । ସାଦୁକିଲେ ମା ଏତ୍ତା ଡ'ନା ମୁଇନ୍ଡା ରେମ ଗୁଇ'ନା ତିର୍ଗି' ଆବୁରତା ଡ'ସେକ୍ ଏତ୍ଗୁତା । ମା'ଏ ଜିସୁନ୍ବକ୍ ସାକ୍ସେକ୍ ଡି'କେନା ସୁନ', 19“ଅ ଗୁରୁ, ଇନ୍ତେକନ୍ଡେ'କା ମସାଲା ଅମାଗ'ତା ମୁଇନ୍ଡା ଇଂଗେରା ୱାଇବୁଇ'ସେ'ଗା ଉଁ'ଉଁ ମବୁନାମ୍ ଗୁଇ'ନା ମାଇନା ବୁୟାଂ ଆତୁନ୍ ସେଲାନ୍ଲା ବୁଂଅଁ'ସେ'ଗା ମାଂଡେଇଁନା ପୁନ୍ଜିସୁଗ ଅ'ତନନା ଡେନ୍ତା ଡ'ସେକ୍ ଅମାଗ'ତା । 20ଡୁ'ତୁନ୍ ଡ'ନା ଜୁ, ମୁଇ ଡିଂଅଁବକ୍ ସାତ୍ଲକ୍ ମା'ଏ ବୁନୁୟାଂଏଁ ଡୁକୁଗା' । ସା' ମୁଲ୍ନା ବୁୟାଂଡେଇଁ ସେଲାମ୍ବୁଇ' ରିଂଅଁ'ସେକ୍ ମୁଇସା ଉଁ'ଉଁ ମବୁନାମ୍ ଗୁଇ'ଉଇଗା' । 21ସା' ଆକୁନୁଇ'ଡେଇଁ ଆମାଇ ତେୟଁ'କୁନୁଂ ବୁୟାଂଡେଇଁ ବୁଂଅଁ' । ସା' ମାଇସା ଉଁ'ଉଁ ମବୁନାମ୍ ଗୁଇ'ଗା' । ସା' ମାର୍ ମୁଇନ୍ଡା ଆମାଇପା ତେୟଁ'କୁନୁଂ ବୁୟାଂଡେଇଁ ଆତୁନ୍ ରାନ୍ଡିଲା ବୁଂଅଁ' । ସା' ମାଇସା ଉଁ'ଉଁ ମବୁନାମ୍ ଗୁଇ'ଗା' । ସା' ମାର୍ ମୁଇନ୍ଡା ବୁୟାଂଡେଇଁସା ବୁଂଅଁ'ସେକ୍ ଡୁ'ତୁନ୍ଉ ଗୁଇ'ଗା' । 22ଡୁ'ତୁନାଉ ଆତୁନ୍ ସେଲାନ୍ଲା ବୁଂଅଁ'ସେ'ଗା ଗୁଲାଇର ମା'ଏ ବୁନୁୟାଂଏଁ ଉଁ'ଉଁ ମବୁନାମ୍ଉ ଗୁଗୁଇ' ଆର୍ଗା' । ତିର୍ଗି' ଗୁତୁନ୍ ସେଲାନ୍ଲାସା ଗୁଇ'ଗା' । 23ଜୁ, ଆମାଇ ସାତ୍ଲକ୍ ବୁନୁୟାଂଏସା ବୁଂଅଁ'କୁ । ଡୁ'ତୁନ୍ ଡ'ନା ତିର୍ଗି'ସୁମଂ ରେମଲେ ଗୁଇ'ସେକ୍ ବୁରବେଲା ଗୁତୁନ୍ ସେଲାନ୍ଲା ଜାନା କୁନୁଇ' ଏତା?” ଡ'ସେକ୍ ମା'ଏ ସୁନ' ।
24ସା' ଜିସୁଲା ଆମା'ଏ ସୁନ', “ପେ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ମାରି ମାପ୍ରୁନା ବପୁସା ମମୁନାକ୍ ଡୁତୁପେସା' ପେ ବୁଲ୍ବାଇ' ମାଗ'ତୁପେ । 25ମାସା'ଡ'ନା ତିର୍ଗି'ସୁମଂ ରେମଲେ ଗୁଇ'ସେକ୍ ବୁରବେଲା ମା'ଏ ଆଇ'ପର୍ ଆୱାଇବୁଇ'ତା । ମା'ଏ ଗୁଲାଇର ସରଗ୍ନା ଦୁତଲେସୁଗ ଡେନ୍ତା । 26ରେମଲେ ଗୁଇ'ସେକ୍ ବୁରତାକି ଆରାକ୍ ଡ'ସେକ୍ ମାସା' ପେ ମମୁନାକ୍ରେମ୍ସୁଗ ଅଇଁୟ'ତୁପେ । ମସାଲା ଲେକ୍ଲ'ସେକ୍ ବେଡ'କୁନୁଂ ଉଲାକ୍ବକ୍ ଡୁକୁନୁଂ ଗୁରାଇ'ସୁଲପ୍ନା ଉ'ସୁରାମ୍ବକ୍ ମାପ୍ରୁ ମା ସୁନ'ତା ଡ'ସେକ୍ ପେ ବଲ୍ ପଡ୍ ଆଡୁତୁପେ ଇ? ଗୁତୁନ୍ ଉଲାକ୍ବକ୍ ମାପ୍ରୁ ଆମସାଲା ସୁନ'କୁନୁଂ ଡି'କେନ୍ ଲେକ୍ଲ'ତା: ‘ନିଂ ଅବ୍ରାଆମ୍ନା ମାପ୍ରୁ, ଇସାକ୍ନା ମାପ୍ରୁ, ମାରି ଜାକୁବ୍ନା ମାପ୍ରୁ ’ 27ଡୁ'ତୁନ୍ ଡ'ନା ମା'ଏ ମାପ୍ରୁନ୍ବକ୍ ଉଇସେକ୍ ବଲ୍ ଡୁତା। ସା' ମାପ୍ରୁ ଗୁଇ'କୁନୁଂ ରେମଲେନା ମାପ୍ରୁ ଆରାକ୍ । ମାତର୍ ମାଇ ବୁରକୁନୁଂ ରେମଲେନା ମାପ୍ରୁ । ସା' ପେଉ ବୁଲ୍ ଏତ୍ଗୁତୁପେ” ଡ'ସେକ୍ ସୁନ' ।
ଇମ୍ବ'ନା ମୁନା' ନିୟମ୍?
(ମାତିଉ 22:34–40; ଲୁକ 10:25–28)
28ଡି'କେନା ମା'ଏ ଜିସୁଲାବୁରଂ ଅଇଁୟ' କିରକ୍ସେକ୍ ଡୁକୁନୁଂବେଲା ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ମୁଇନ୍ଡା ଆତା ଅଂଅଁ'ସେକ୍ ଡୁକୁ । ସା' ଜିସୁଲା ଗୁଲାଇ ବଲ୍ ସୁନ'ତା ଡ'ସେକ୍ ମାଇ ମାଗ' । ମାଗ'ସେକ୍ ଜିସୁନ୍ବକ୍ ସାକ୍ସେକ୍ “ମାପ୍ରୁ ଡେମ୍ ଡ'ସେକ୍ ବେଡ'କୁନୁଂ ଗୁଲାଇ ନିୟମ୍ବକ୍ ଇମ୍ବ'ନା ମୁନା'ବାଇ'” ଡ'ସେକ୍ ଅ'ଗଁସ୍ଲା'ଗା'।
29ସା' ଜିସୁଲା ଆମାଇ ସୁନ' “ମାପ୍ରୁ ଡେମ୍ ଡ'ସେକ୍ ବେଡ'କୁନୁଂ ଗୁଲାଇ ନିୟମ୍ବକ୍ ଇମ୍ବ'ନା ମୁନା' ଡ'ନା ‘ଅ ଇସ୍ରାଏଲ୍ ରେମଲେ, ପେ ଅଂ, ନେଇ'ନା ପ୍ରବୁ ମୁଇଉ ଡୁତା, ମାଇଉ ନେଇ'ନା ମାପ୍ରୁ । 30ଆନନା ପ୍ରବୁ ଆମାପ୍ରୁ ନନା ଜିବନ୍ ବିତ୍ରେକୁରୁଂ, ନନା ଗୁଲାଇ ଜିବନ୍ ମାଇପୁଲେଇଉ ବେଡ'ସେକ୍, ଗୁଲାଇ ବୁଦିଗିୟାନ୍ ଗୁଲାଇ ଏତ୍ବକ୍, ମାରି ଆନ ବେଡ'କୁନୁଂ ବୁଦିଗିୟାନ୍ ଗୁଲାଇ ଆମାଇ ବେଡ'ସେକ୍ ନ ଆମାଇ ଆଲାତ୍ ଡିନ୍ଡେମ୍ ଡୁତା’ ଡ'ସେକ୍ ଲେକ୍ଲ'ତା । 31ମାରି ମୁଇ ମୁନା'ବାଇ' ନିୟମ୍ ମା ଡ'ନା, ‘ନ ଆନିଜର୍ନା ଜିବନ୍ ମି ଆଲାତ୍ ଡେମ୍ବର୍ଗୁତୁନ ଡୁ'ତୁନାଉ ନ ଇନ୍ତୁସିଂଡାନ୍ଡର୍ସିଂନା ରେମଲେବକ୍ସା ଆଲାତ୍ ଡେମ୍ ।’ କେନ୍ ଇମ୍ବାର୍ ନିୟମ୍ ଗୁଲାଇ ନିୟମ୍କୁରୁଂ ଅବୁଦି ମୁନା'ବାଇ' ମାରି ମାସା ଆରାକ୍” ଡ'ସେକ୍ ଜିସୁଲା ସୁନ' ।
32ସା' ଗୁତୁନ୍ ନିୟମ୍ ଅମାକ୍ରେମ୍ ଆଜିସୁଲା ସୁନ' “ନ ସତ୍ ସୁନ'ନ ଗୁରୁ, ନେଇ'ନା ମାପ୍ରୁ ମୁଇଉ । ମାରି ମାପ୍ରୁ ଡ'ସେକ୍ ପାଲ୍ ମାପ୍ରୁ ଜାଏସା ଆଡୁତା । 33ରେମଲେ ନିଜର୍ନା ଜିବନ୍ ବିତ୍ରେକୁରୁଂ ଆମା'ଏନ୍ ପ୍ରବୁ ଆମାପ୍ରୁ ଆଲାତ୍ ଡିନ୍ଡେମ୍ନା ମାରି ମା'ଏନ୍ ଜିବନ୍ ଗୁଲାଇ ମାଇପୁଲେଇଉ ବିବେ'ନା ମାରି ଆମାଇ ଆ'ଇ ଆଲାତ୍ ଡିନ୍ଡେମ୍ ଗଂତା ଆଇ'ତୁନ୍ ଆମାଇ ଆଲାତ୍ ଡିନ୍ଡେମ୍ନା ମାରି ଆମା'ଏ ବେଡ'କୁନୁଂ ବୁଦିଗିୟାନ୍ ଗୁଲାଇ ଆମାଇ ବିବେ'ନା ମାରି ନିଜର୍ନା ଜିବନ୍ବକ୍ ମି ଆଲାତ୍ ଡେମ୍ବର୍ଗୁତା ଡୁ'ତୁନାଉ ଆପାଲ୍ ରେମଲେସା ଆଗୁଲାଇର ଆଲାତ୍ ଡେମ'ନା ମାପ୍ରୁ ଜୁଲ'ସେକ୍ ଅବୁଦି ସାର୍ଦା ଡେନ୍ତା । ମାରି ମାପ୍ରୁନା ନିୟମ୍ବକ୍ ଲେକ୍ଲ'କୁନୁଂସୁଗ ଗୁଲାଇ ଗିଗେକୁରୁଂ ଆମାପ୍ରୁ ରେମଲେ ଆଲାତ୍ ଡିନ୍ଡେମ୍ନା ମାରି ଆପାଲ୍ ରେମଲେ ଆଲାତ୍ ଡିନ୍ଡେମ୍ନାଉ ଆମାଇ ଅବୁଦି ସାର୍ଦା ବେ'ତ ” ଡ'ସେକ୍ ସୁନ' ।
34 #
ଲୁକ 10:25–28
ସା' ଜିସୁଲା ମାଇ ବଲ୍ଟା ସୁନ'ତା ଡ' ମାଗ'ସେକ୍ ଆମାଇ ସୁନ' “ନସା ମାପ୍ରୁନା ରାଜିବକ୍ ଉଇପୁଲେଇ ଅବୁଦି ସୁଲୁଂ ଆରାକ୍ବେ” ଡ'ସେକ୍ ସୁନ' । ତିର୍ଗି' ଜାଏସା ଆଜିସୁଲା ମାସା ଅ'ଗଁସ୍ଲାକ୍ ଆଗଂତା ।
କିରିସ୍ଟଲା ଜାନା ଉଁ'ଉଁ ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 22:41–46; ଲୁକ 20:41–44)
35ମାରି ଜିସୁଲା ମାପ୍ରୁନା ମନ୍ଦିର୍ବକ୍ ଅମାକ୍ ଡେଂକୁନୁଂବେଲା ଆରେମଲେ ସୁନ' “କିରିସ୍ଟଲା ଦାଉଦ୍ନା ଉଁ'ଉଁ ଡ'ସେକ୍ ନିୟମ୍ ଅମାକ୍ରେମ୍ ମି ସୁନ୍ତଲେଇ? 36ପବିତ୍ର ଆତ୍ମା ସୁଁ ଡ'ସେକ୍ ସୁନ'ସା' ଦାଉଦ୍ଲା ଡି'କେନା ସୁନ':
‘ଆନନା ଦାଇରେମେ
ନନା ଗୁତାସୁଂ ଆଲୁଂ ବୁଂବୁଂପନ୍ତେକ୍
ନ ନିଂନା ସୁସୁମ୍ତିକୁରୁଂ ଲେଇ'କୁଲା ଡ'ସେକ୍
ପ୍ରବୁଲା ଆନିଂନା ପ୍ରବୁଲା ସୁନ'’ ଡ'ସେକ୍ ସୁନ' ।
37ଜୁ, ଦାଉଦ୍ଲା ଆକିରିସ୍ଟଲା ‘ପ୍ରବୁ’ ଡ' ୱାୟ'ତା ଡ'ନା କିରିସ୍ଟଲା ମି ଦାଉଦ୍ନା ଉଁ'ଉଁ ଏତାଲେଇ'?” ଡ'ସେକ୍ ସୁନ' ।
ନିୟମ୍ ଅମାକ୍ରେମେ ଡିନ୍ଡେମ୍ସୁଗ ପେ ଆଡେମ' ଡ'ସେକ୍ ଜିସୁଲା ସୁଁସୁଡେନ୍
(ମାତିଉ 23:1–36; ଲୁକ 20:45–47)
ରେମଲେ ଅବୁଦିର ମାଇନା ତୁମ' ଅବୁଦି ସାର୍ଦା ଡେଂସେକ୍ ଅଂଅଁ' ଲେଇ'କୁ ।
38ମାରି ଜିସୁଲା ଆମା'ଏ ଅମାକ୍ ଡେଂକୁନୁଂବେଲା ସୁନ' “ନିୟମ୍ ଅମାକ୍ରେମେ ଡିନ୍ଡେମ୍ସୁଗ ପେ ଆଡେମ' । ମାସା'ଡ'ନା ମା'ଏ ଲାଂବାଇ' ସକା ଅଲୁକ୍ସେକ୍ ଉର୍ଗୁଡ'ସେକ୍ ଆନେଇ ମୁନା'ରେମ୍ ଡ' ଗୁଲାଇର ମାଗ'ସେକ୍ ଆନେଇ ସୁନ୍ଡ୍ରଲେଇ' ଡ'ସେକ୍ ଆରେମଲେ ଅସୁଇ'ପୁଲେଇ ଆଟ୍ବକ୍ସା ଅବୁଦି ରେମଲେ ଲେଇ'କୁନୁଂବକ୍ସା ବୁଲ୍ତ । 39ମାରି ମା'ଏନ୍ ପାର୍ତନା ଡିଂଅଁବକ୍ସା ମାରି ଜାଜା ବଜି ଡେମ'କୁନୁଂବକ୍ସା ମୁନା'ରେମେ ଲିଲେଇ'ପୁଲେଇ ବୁଂଅଁ'କୁନୁଂ ତାନ୍ବକ୍ ଉଇସେକ୍ ଲିଲେଇ'ପୁଲେଇ ମା'ଏ ଅବୁଦି ମୁନ୍ ଡେନ୍ତା । 40ମାରି ମା'ଏ ରାନ୍ଡିସେଲାନେନା ଗୁଲାଇ ନାଡାୟ' ରିଂତା ମାରି ମା'ଏନ୍ ଡିଂଅଁସା ରିଂଅଁ' ଡୁଂତା । ମାରି ରେମଲେ ମାଇ ବଲ୍ବାଇ' ରେମ ଡ' ସୁନେଇ' ଡ'ସେକ୍ ମା'ଏ ଲାଂବାଇ' ପାର୍ତନା ଡେମ୍ତ । ଡି'କେନ୍ବାଇ' ରେମଲେବକ୍ ମାପ୍ରୁ ଅବୁଦି ମୁନା'ବାଇ' ଡନ୍ଡ୍ ବେ'ତ ” ଡ'ସେକ୍ ଜିସୁଲା ସୁନ' ।
ଗୁଇ'ସିଂକୁଇ'ନା ଇମ୍ବାରୁ ଲୁକୁ'ଡାବୁ
(ଲୁକ 21:1–4)
41ପାର୍ତନା ଡିଂଅଁବକ୍ ଡାବୁ ବୁଂବୁଂପୁଲେଇ ବୁଂଅଁ'କୁନୁଂ ପେଡିକନ୍ଡେକ୍ ଜିସୁଲା ଲେଇ'ସେକ୍ ରେମଲେ ଅବୁଦିର ଅବୁଦି ଅବୁଦି ଡାବୁ ବୁଂବୁଂବେଲା ମାଇ ଜୁଲ'କୁ । 42ମାତର୍ ମୁଇନ୍ଡା ଗରିବ୍ବାଇ' ଗୁଇ'ସିଂକୁଇ' ସାକ୍ସେକ୍ ମାଇନା ତିତିବକ୍ ଉନାସୁଗ ଡୁକୁନୁଂ ଇମ୍ବାରୁ ଲୁକୁ'ଡାବୁ ଗୁତୁନ୍ ପେଡିବକ୍ ବୁଂଅଁ' ।
43ସା' ଜିସୁଲା ଗୁତୁନ୍ ଜୁଲ'ସେକ୍ ଆମାଇନା ସିସ୍ୟଲେ ୱାୟ'ସେକ୍ ସୁନ' “ଜୁ, ଆମା'ଏ ଆଗୁଲାଇର ଜିନ୍ସେକ୍ କେନ୍ ଗରିବ୍ବାଇ' ଗୁଇ'ସିଂକୁ'ୟା ଗୁତୁନ୍ ଡାବୁ ବୁଂବୁଂନାବକ୍ ଲାବ୍ ବୁଂଅଁ' ଡ'ସେକ୍ ନିଂ ଆପେ ସତଇସା ସୁନ'ତିଂ । 44ମାସା'ଡ'ନା ମା'ଏ ଗୁଲାଇର ମା'ଏନ୍ବକ୍ ଲଲ'କୁନୁଂ ରିଂଅଁ'ସେକ୍ ବୁଂଅଁ'ତା ମାତର୍ କୁନା ଅବୁଦି ଗରିବ୍ବାଇ'ରେମ ଡ'ନାସା' ମାଇ ସୁମ'ସେକ୍ ବୁରପୁଲେଇ ଡୁକୁନୁଂ ଗୁଲାଇ ରିଂଅଁ'ସେକ୍ ବୁଂଅଁ'” ଡ'ସେକ୍ ସୁନ' ।
Currently Selected:
ମାର୍କ 12: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
