Mateo 18
18
¿Jái'chogamaxa ỹátaqta p'asáiỹi da' l'amaqchic?
(Marcos 9.33-37; Lucas 9.46-48)
1Qana'chi so' nolo' saua' lapaxaguenataqa so' Jesús nichíideuo, qana'chi qoỹinatétac jeso'me, qoỹinaac:
—¿Jái'chogamaxa ỹátaqta p'asáiỹi da' l'amaqchic jen'me huétaaue da' l'onataxanaxac ñi' Dios 'me net'ague da' piỹem?
2Qana'chi so' Jesús ỹiỹáxana so' nootolec, qana'chi nichaalataxanánỹi na' laiñi jesaa'me. 3Qana'chi 'enaaco':
—Ỹátaqta 'eesa dójo' 'ami senapegalo da' 'uootaxa 'ami sa 'av'iỹílaqaỹa da' 'auadénaxachii ga' nootolec, qana'chi 'ami sa 'auañoxochii da' 'aunoxoñiiuó'o da' l'onataxanaxac ñi' Dios 'me net'ague da' piỹem. 4Qana'chi jega'me ỹátaqta ỹágueegue da' l'amaqchic da' huétaaue da' l'onataxanaxac ñi' Dios 'me net'ague da' piỹem, naqaiga jega'me sa n'amaqten qataxa v'iỹílaxa da' 'ená'am jénjo' nootolec. 5Qataxa ga' ỹasouaxat da' jaỹim 'equegue da' ỹaconguet ga' 'oonolec jénjo' nootolec, na'chaỹim 'me jaỹim ỹaconguet.
Da' huápiỹi lichic ga' siỹaxaua da' 'uo ga' ỹasouaxat
(Marcos 9.42-48; Lucas 17.1-2)
6Gamachaqaiga siỹaxaua da' 'uootaxa ỹasouaxateguet ga' jaloic ga' 'oonolec jénjo' qaỹa ga' l'amaqchic 'me jaỹim ỹ'amaqtéetac, qana'chi jega'me n'óota da' ỹátaqta qoỹasaxánỹi na' laiñi jaga' huaxai, qoỹicoñitot na' loqosot ga' 'elguec qa'. 7¡Ỹátaqta sa nó'in da' 'uo jen' siỹaxadipi 'me ỹasouaxateguet ga' lasouaxaset ga' laqáỹa jen' 'aléua! Jeda'me na'chi 'eeta't qomle da' 'uo. Qaláxasa ¡ỹátaqta choxodaicolec qomle ga' siỹaxaua 'me chiỹaqaỹi jénjo' janoicpi!
8Tadeno' na' 'adouaq 'uootaxa na' 'adichi da' ỹa'uo ga' 'adoic, qana'chi n'óota da' 'aucháxaỹi, qana'chi 'auasaxáiỹi. Qá'a ỹiỹamqáchiiñi da' 'aunoxoneuó'o da' nec'alaxa, temaqaidi da' 'oonolec na' 'adouaq qataxa na' 'adichi, qaláxasa sa 'ená'am da' 'am qoỹasaxánỹi ga' dóle' da' 'ocá'ñiilo naua' 'adoua' qataxa naua' 'adichil. 9Qataxa jañi' 'ad'aite, da' 'uootaxa naqañi ỹí'et ga' 'adoic, qana'chi n'óota da' 'anaqat, qana'chi 'auasaxáiỹi. Qá'a ỹiỹamqáchiiñi da' 'aunoxoneuó'o da' nec'alaxa, da' 'oonole jana' 'ad'aite, qaláxasa sa 'ená'am da' 'am 'ocá'ñiilo naua' 'ad'ai'te, da' 'am qoỹasaxánỹi ga' dóle' 'me huá'ña da' ỹa'uo da' ne'uaxánaguec ñi' Dios na' 'itaxalóxoicpi.
Qodaloqtenaxana jaso' n'aanaxate 'me ỹisómtac
(Lucas 15.3-7)
10'Ena't qomle da' 'au'otáñii ga' 'oonolec jen'me qaỹa ga' l'amaqchic. Qá'a jaỹim 'ami senapegalo da' na' netelqo'tpi 'me lamaxa'spi ñi' Dios, jen'me na'chi 'eeta't da' dasot'ot ñi' ỹit'a 'me net'ague da' piỹem. 11Qá'a jénjo' siỹaxaua lec'óxot, jen'me naga da' nec'alaxatéegue na' siỹaxadipi 'me daqat.
12'Ami ¿hua'ago' ga' 'éeta ga' 'adeenataxaquii? Da' 'uootaxa 'uo ga' siỹaxaua da' 'uo jaga' cien lalo n'aanaxate, qaláxasa da' 'uootaxa ỹisómaac jaga' 'oonole, ¿séetapega sa n'ónaxataleco' jega' soqoỹoqóchisee'mec 'aléua jaga' noventa y nueve n'aanaxatepi, ỹim, qana'chi jec da' nimitáaque jaga' 'oonole 'me ỹisómtac? 13Da' 'uootaxa ma'le ỹauana, qana'chi jega'me ỹátaqta jalcote da' netóotapeec jaso' 'oonole n'aanaxate, qaláxasa sa 'ená'am da' netóotapeec jaso' noventa y nueve 'me sa ỹisómaac. 14Naqaida da' 'éeta nataq'en ñi' 'adet'ai 'me net'ague da' piỹem, da' sa ỹiỹamaxaden da' daqat ga' 'oonolec jénjo' qaỹa ga' l'amaqchic.
Da' 'éeta da' qoỹichoxoden ga' naqáỹa
(Lucas 17.3)
15Ga' 'adaqáỹa da' 'uootaxa 'uo ga' 'am ỹ'ét'ec sa nó'in, qaláxasa n'óota da' 'andó'te' jega'me da' 'au'axátem ga' lesómaxac. Qana'chi jega'me da' 'uootaxa 'am ỹalaxaguet, qana'chi 'am 'adauéguec jega'me da' qoỹichoxoden. 16Qaláxasa jega'me da' sa 'am ỹalaxaguet, qana'chi 'am 'aviỹáxana ga' 'oonolec 'uootaxa gaua' laqáỹa' dos, qaidi ỹima jen'me 'ad'aqtaxanaxac ỹañoxot da' nateet'eguet da' l'aqtaxanaxa'j saua' dos 'uootaxa saua' tres 'me 'ad'aqtaxanaxa'u. 17Da' 'uootaxa sa ỹalaxagueta jegaa'me, qana'chi 'am n'óota da' 'au'aqtaxanóoue na' ỹima'a't 'amaqténataxanaxaicpi. Da' sa ỹalaxaguet jena'me, qana'chi jega'me 'ená'am qoỹin ga' sa ỹ'amaqten ñi' Dios, 'uootaxa jega'me ỹaconapeeguet jana' neseeténaqte ga' net'a Roma lé'ec.
18Ỹátaqta 'eesa dójo' 'ami s'axatema, ga' 'ami sa 'auasiñii jen' 'aléua, qaa'le nataq'en da' piỹem sa qoỹasen. Qataxa ga' 'ami 'auasiñíita jen' 'aléua, nataq'en da' piỹem qoỹaséeta.
19Nataq'en 'ami senapegalo da' 'uootaxa huo'oi gaua' dos da' 'oñíita naỹi da' maliaxa huétr'a jen' 'aléua da' 'uootaxa ỹátaqta qodetaxaỹapíỹi ga' qoỹiỹáxanaaque da' netamen, qana'chi ñi' ỹit'a 'me net'ague da' piỹem, jiñi'me ỹanéegue jega'me qoỹiỹáxanaaque. 20Qá'a jega'me huetr'ague gaua' dos, 'uootaxa tres, da' huet'a'salo ỹasouaxat da' jaỹim ỹ'amaqtéetrac, qana'chi jaỹim souetaavlo jegaa'me.
21Qana'chi so' Pedro davit'eguet so' Jesús da' ỹinat, 'enaaco':
—'Am ỹisaliaxanec, ¿jái'chogamaxa laỹóqte' da' s'iỹílaxalégue da' sichoxoden ga' ỹ'amaqténataxanaxaua da' 'uootaxa 'uo ga' jaỹim ỹ'ét'ec sa nó'in, séetapega siete da' s'iỹílaxalégue da' sichoxoden?
22Qana'chi so' Jesús 'enaaco':
—Jaỹim 'am senapéga da' 'ena't da' 'chi siete da' 'av'iỹílaxalégue da' 'auchoxoden. Mai'chi ỹóvi' setenta da' 'av'iỹílaxalégue ga' siete da' 'auchoxoden.
Qodaloqtenaxana so' namaxasec 'me sa dechoxodenataxan
23Chan'eesa dójo' l'onataxanaxac ñi' Dios 'me net'ague da' piỹem, jeda'me 'ená'am ga' net'a 'me sétaaque da' naloqtena't jaga' lavíỹaxasete ga' lamaxa'spi. 24Joca'li ma'le naloqteetapega't jaso'me navíỹaxasete, qana'chi qonauée'uo so' 'oonolec 'me ỹátaqta sa lec'oqtole jaso' lavíỹaxasete. 25Qaláxasa so' namaxasec qaga 'te ỹiseeténec jaso' lavíỹaxasete lat'édai. Qana'chi so' n'aco' damaxasoxolégue jeso'me da' qoỹimen da' 'chi qoỹi'uaquen da' nelatac, caa'ue jaso' loua qataxa saua' lec'óqo'te, qataxa ỹima so' loxot, da' qaidi ỹañoxot da' qoỹiseeten jaso' lavíỹaxasete. 26Qana'chi jeso'me namaxasec, jeso'me ỹisocoto naua' liliictel so' n'aco'. Qana'chi nachoxodenot, 'enaaco': “'Am ỹasoxola', jaỹim 'anpogoxói'ne' qomle, qaidi jaỹim sañoxot da' seseeten ỹima jañi' ỹavíỹaxasete.” 27Qana'chi jeso'me n'aco' ỹátaqta 'uo da' lichoxodénataxanaxac jeso'me. Qana'chi ỹichoxoden da' 'chi ỹapalaxat jaso' lavíỹaxasete. Ỹim, qana'chi ỹaxátac. 28Qaláxasa joca'li 'chi ỹinoxonéegue jeso'me namaxasec, qana'chi ỹilá'a so' laqáỹa l'onataxanaxaua 'me net'ot jaso' sa 'amaqtaq lavíỹaxasete jeso'me. Qana'chi naqpaxanot, ỹichiỹoq na' loqosot. Qana'chi 'enapéga, 'enaaco': “¡'Auseeten qomle jañi' 'adavíỹaxasete!” 29Qana'chi jeso'me laqáỹa, jeso'me ỹisóidiñi naua' liliictel, qana'chi nachoxodeetot jeso'me, 'enaaco': “Jaỹim 'anpogoxói'ne' qomle, qaidi sañoxot da' seseeten ỹima jañi' ỹavíỹaxasete.” 30Qaláxasa jeso'me 'chi namaxasec sa ỹ'ateguet. Na'chidáta da' jec. Qana'chi ỹamaxáaue jaso' cointáxanaxaqui, cha ỹivíd'a da' ỹiseeten ỹima jaso' lavíỹaxasete. 31Qana'chi jeso' laỹi l'onataxanaxau'pi joca'li ỹauáachiỹi dójo', qana'chi ỹátaqta jalcote da' laviliỹáxac. Qana'chi jec da' d'aqtaxaneuó'o so' n'aco', ỹ'axátem ỹima dójo' qoỹí'et. 32Qana'chi jeso'me 'aco' damaxasóxonee'ga jeso'me lamaxasec. Qana'chi 'enapéga, 'enaaco': “¡'Am ỹamaxasec, 'am 'itaxalóxoic! 'Am sichoxoden da' sapalaxat ỹima jaso' 'adavíỹaxasete, qá'a ỹátaqta jaỹim 'anachoxodeetapecot. 33'Am toqo' nataq'en ỹiuen da' 'auchoxoden so' 'adaqáỹa, 'auená'am da' 'am séet'ec da' 'am sichoxoden.” 34Qana'chi jeso'me 'aco' ỹátaqta dalemata. Qana'chi damaxasoxolégue da' qoỹa'uo da' ne'uaxánaguec jeso'me, cha ỹivíd'a da' ỹañoxot da' ỹiseeten ỹima jaso' lavíỹaxasete.
35Qana'chi so' Jesús 'enaaco':
—Naqaida qomle da' 'éeta da' 'oñíita ñi' ỹit'a 'me net'ague da' piỹem, da' 'uootaxa ñi' 'oonolec sa 'te da' ỹátaqta liquidiaqtéỹaxac da' ỹichoxoden ga' laqáỹa.
Currently Selected:
Mateo 18: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
