Mateo 19
19
So' Jesús ỹ'axátetac da' lasoxoc ga' nañíi'me' jaga' loua ga' siỹaxaua
(Marcos 10.1-12; Lucas 16.18)
1Joca'li ỹimat da' ỹ'axátetac dójo' so' Jesús, qana'chi cá'ai di' Galilea da' ỹic'áta jidi'me 'aléua 'me huáaue di' Judea, jidi'me p'aiỹi da' néte' so' ñáchi Jordán. 2Qana'chi ỹátaqta jalcote so' siỹaxadipi 'me quétapegue' jeso'me. Huá'a, qana'chi nataden ỹima so' leuaxaicpi.
3Qana'chi 'uo so' fariseopi 'me nichíi'uo so' Jesús da' sétaaque da' 'uo ga' ỹachiỹoxotaỹi da' 'en lasouaxaset jeso'me. Qana'chi ỹinatétaco', 'enaaco':
—¿Séetapega qoỹaséet'em jodamaxa ga' siỹaxaua da' nañíi'me' jaga' loua da' 'uootaxa 'uo ga' gamachaqaiga lasouaxaset?
4Qana'chi so' Jesús 'enaaco':
—Séetapega 'eesa jodamaxa 'autaxaỹaxañii' naua' nidii's l'aqtaqa ñi' Dios jeda'me 'éeta jiñi'me joca'li ỹímta da' d'onataxan, qana'chi “ỹí'et so' siỹaxaua qataxa jaso' ỹauo.” 5Jiñi'me nataq'en 'enaaco': “Chan'eesa ga' siỹaxaua ca'ai gaua' let'al, da' qaidi l'acháqadiaxaua jaga' loua. Huá'a, qana'chi jegaa'me 'ená'am ga' 'oonolec siỹaxaua.” 6Qana'chi jegaa'me sa 'te da' sega'me dos. Na'chidáta da' 'ená'am ga' 'oonolec. Chan'eesa ga' siỹaxaua sa 'te da' ỹisoỹilo gaua' ỹ'onáxana't ñi' Dios.
7Qana'chi qoỹinat jeso'me, qoỹinaaco':
—¿Tóoqo'chi so' Moisés da' damaxasoxolégue da' qoỹanem jaga' noua jaga' lemalate da' qoỹiguem, ỹim, qana'chi qoỹiladéegue?
8Qaláxasa so' Jesús 'enaaco':
—Qá'a ỹasouaxat da' 'ami ỹátaqta sa nedámchiilo naua' 'adiquidiaqtéldii', chan'eesa 'ami ỹaseet'ema da' 'aviimii jaga' 'adouai. Qaláxasa so' 'uáichiiñi joca'li sa na'chi 'éet'ec dójo'. 9Qana'chi jaỹim 'ami senapegalo, ga' nañíi'me' jaga' loua, da' 'uootaxa sa huasoilégue da' lequeséeguetaxa jaga'me, qana'chi jega'me da' 'uootaxa huó'on, qana'chi 'ená'am ga' necachítapegue' jaga' sa loua. Qataxa jega'me 'uoneguet jaga' ỹauo 'me qoỹiguem, nataq'en jega'me 'ená'am ga' necachítapegue' jaga' sa loua.
10Qana'chi saua' lapaxaguenataqa 'enapega'to':
—Da' naq'áita dójo' da' lasoxoc ga' siỹaxaua qataxa jaga' loua, qana'chi sa nó'in da' huó'on ga' siỹaxaua.
11Qana'chi so' Jesús 'enaaco':
—Sa ỹima jen' siỹaxadipi da' ỹaỹáten dójo' s'axátetac, na'chínata jen'me ỹanem ñi' Dios da' ỹaỹáten ga' lasoxoc dójo'. 12Ỹodapecachi jen' lasoxoc 'me ỹí'et da' sa decó'o qa'en ga' siỹaxaua. Qá'a 'uo na' chi'ena da' sa ỹañoxot da' decó'o, qataxa 'uo na' 'chi n'onatac da' sa decó'o, qataxa 'uo na' mai'chi nachiỹoxola't da' sa huó'on, ỹasouaxat da' l'onataxanaxac ñi' Dios 'me net'ague da' piỹem. Qana'chi jega'me ỹañoxot da' ỹí'et dójo' s'axátetac, 'ónaxaic da' ỹí'et.
So' Jesús ỹanem da' 'ónaxaic ladíquiaxac so' ñoqolqapiolec
(Marcos 10.13-16; Lucas 18.15-17)
13Qana'chi 'uo so' qonauée'uo ñoqolqapiolec so' Jesús, qaidi jeso'me huaselelégue qataxa netameelégue. Qaláxasa saua' lapaxaguenataqa nelaqátrapega jen' nauéeuo na' ñoqolqapiolec. 14Qaláxasa so' Jesús 'enaaco':
—'Amachíit'a na' ñoqolqapi da' jaỹim nec'áte'uo. 'Ená'te da' 'au'oitapeeguet jena'me, qá'a ga' huétaaue da' l'onataxanaxac ñi' Dios 'me net'ague da' piỹem, jega'me 'ená'am ga' 'oonolec jena'me ñoqolqapi.
15Qana'chi huaselelégue ñi' 'oonolec jeso'me ñoqolqapiolec. Ỹim, qana'chi cá'ai jeso' 'aléua.
So' nesoq saliaxanec detaqátapegue' so' Jesús
(Marcos 10.17-31; Lucas 18.18-30)
16Qana'chi janac so' nesoq, nec'áte'uo so' Jesús. Qana'chi ỹinat, 'enaaco':
—'Am sóxodaic, 'am qanapaxaguenoqo't, ¿jái'chogamaxa ỹiỹamqáchiiñi da' sé'et, qaidi 'uo ga' ỹic'alaxa 'me qaỹa 'te loiquiaqa'?
17Qana'chi so' Jesús 'enaaco':
—¿Tóoqo'chi da' 'auéetapega jaỹim sóxodaic? Qá'a qaỹa 'te laqáỹa jiñi'me sóxodaic, 'oonolec Dios. Qaláxasa da' 'am sétaaque da' 'aunoxoneuó'o da' nec'alaxa, n'óota da' 'am ỹátaqta 'aualaxalégue jen'me lamaxasóxonaxacpi ñi' Dios.
18Qana'chi so' nesoq 'enaaco':
—¿Jái'chogamaxa?
Qana'chi so' Jesús 'enaaco':
—Sa 'aualaataxan; sa 'ancachí'ỹi' jaga' sa 'adoua; sa 'aucachi; sa 'au'axat ga' sa naqaiga; 19qataxa 'aualaxaguet ga' 'adet'a qataxa jaga' 'adat'e; qataxa 'auauotec ga' 'adaqáỹa, 'ená'am da' mai'chi 'anauotela't.
20Qana'chi so' nesoq 'enaaco':
—Já'a, ỹima jen'me ỹátaqta salaxalégue, chiỹoqót'a ca'li maliaxa jaỹim nootolec. ¿Jái'chogamaxa laqáỹa ga' souéetaaque?
21Qana'chi so' Jesús 'enaaco':
—Da' sétaaque ỹátaqta nalóchiiñi da' 'adasoxoc, n'óota da' 'oc, qana'chi 'aumen ỹima na' 'am huet'ot, qataxa 'auanóoue na' choxodaqpi, qaidi 'uo ga' 'adesaliaxa huet'ague da' piỹem. Qaláxasa qomle 'adem, qana'chi 'auanac, jaỹim 'oquegue.
22Qaláxasa joca'li demachíỹa dójo' so' nesoq, qana'chi ỹátaqta daquico, qá'a ỹátaqta saliaxanec jeso'me.
23Qana'chi so' Jesús 'enapegalo saua' lapaxaguenataqa, 'enaaco':
—Ỹátaqta 'eesa dójo' 'ami s'axatema, ỹátaqta 'uo da' laqalaic na' saliaxanqapi da' ỹinoxoneuó'o da' l'onataxanaxac ñi' Dios 'me net'ague da' piỹem. 24Jaỹim s'iỹílaxalégue da' 'ami s'aqtaxanema, da' ỹátaqta 'uo da' laqalaic jaga' naanáxanaq da' taa'uet jaga' l'aite jaga' náicaiỹi. Qaláxasa ỹágueegue da' laqalaic ga' saliaxanec da' ỹinoxoneuó'o da' l'onataxanaxac ñi' Dios 'me ỹimata'a'téna.
25Joca'li demachíchidiỹi dójo' saua' lapaxaguenataqa, qana'chi ỹátaqta let'ádaic da' ỹ'aalátr'ec. Qana'chi nenatétapega't, 'enapega'to':
—Da' na'chi 'éet'ec dójo', qana'chi ¿jái'chogamaxa qonec'alaxatéegue?
26Qana'chi so' Jesús ỹilapegoovlo jesaa'me, qana'chi 'enaaco':
—Jen' siỹaxadipi sa ỹañoxot dójo', qaláxasa ñi'me Dios 'me qaỹa 'te ỹaqalánaac.
27Qana'chi so' Pedro 'enaaco':
—'Am qadesaliaxanec, qo'mi ñ'ónaxataqañi ỹima jen'me qo'mi huet'oto, ỹim, qana'chi 'am qolaxague. ¿Jái'chogamaxa qomle ga' qo'mi qoỹanema?
28Qana'chi so' Jesús 'enaaco':
—Ỹátaqta 'eesa dójo' 'ami s'axatema, jega'me nolo' qomle ma'le qonadálaxat ỹima jen' 'aléua, qomle ma'le ỹivíta ga' lalóqo' jen' siỹaxaua lec'óxot da' nánỹi jaga' nes'ónaxaqui 'me qaỹa ga' 'ená'am da' li'ỹoxodic da' net'a, qana'chi 'ami 'me jaỹim 'oquiỹiỹi nataq'en 'oñíỹañiilo gaua' doce s'ónaxaqui' da' net'a, da' qaidi 'anmichii na' lec'oqtepi so' doce lec'oqtepi so' Israel. 29Qana'chi ỹima na' n'ónaxatañi na' l'acháqa'pi, 'uootaxa gaua' laqaỹadésoda li'mi qataxa gaua' laqaỹadésoda ỹauo', 'uootaxa let'a qataxa jaga' lat'e, 'uootaxa jaga' loua qataxa gaua' lec'óqo'te, 'uootaxa ga' n'aléua, ỹasouaxat da' jaỹim 'equegue, qana'chi jega'me ỹóvi' qomle ga' cien jen'me qoỹanempi. Nataq'en qoỹanem jeda'me nec'alaxa 'me qaỹa 'te loiquiaqa'. 30Qaláxasa ỹátaqta jalcote qomle jen'me naỹi 'uáueegue 'me p'áteegue qoỹin qomle, qataxa ỹátaqta jalcote qomle jen'me naỹi p'áteegue 'me 'uáueegue qoỹin qomle.
Currently Selected:
Mateo 19: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
