Fulatika Maxaafa 15
15
Muusexxanna Maaramixxa Faaro
1Ookkoneechchi uduma Muusenna Isira'eelik ardi konneechchi butta hexxeexxe faaronni Duuchchi Woddika Gootta faarsine:
«Ulfinnik lummedhe'e
fadhachchokanna fadhachcho gulufeemmaka
Abbaayya giddo fuggussemmaxxee
Duuchchi Woddika Gootta faarsaannen.
2Duuchchi Woddiki Gootti hunna anxenna anxe faaron;
isinna ani'a anjiralloke kade;
Isi anke Magenon, isoonna galateeffatannon;
anke annike Magenon;
aninna iso'o kubbisannonn.
3Duuchchi Woddik Gootti gootaken;
summi isikinna Duuchchi Woddike Goottan.
4Feri'oonka loliinka mannanna insa'neexxa fadhadiinxa gaarruwwa abbaayya giddo fuggusse;
filemeeka Feri'oonik ja'laabuwwinna Eritiriinxe Abbaayya'n lixe.
5Dhi'motik wodi'inna insa'nee buqe;
kinjiinshanna dhimote'n linxe.
6«Ee, Duuchchi Woddike Goottaa,
middixxi anga atixxi gaachchanik ulfaatte:
Ee, Duuchchi Woddike Gootta
middixxi atixxe anga naapha buttuchchite.
7Atike birasa'eeke luminninni,
Naapha atika gonbisseten.
Aare atixxa wocci assitette;
isenna insa'nee huuriinsha itte.
8Atixxe sanoke hafuurinni wodi'uwwi tuuleme;
yaasumuwwikinna gimotishsha toggi hiyye uurre;
dhi'motik wodi'inna liggiddi hiyye.
9«Naaphi Gussee insa'nee abidannon,
‹booji'o insa'neexxa qodemmannon.
Isinna lubbo anxi goddite celqe hitaa;
wolaantichcha ankanna dobennexxi
anga anxinna insa'nee kutti assitaan.›
10Ati kinni hafuura atika uffuu hitette;
abbaayyatinna insa'nee buqqe;
jabake woduwwi giddonna sibljiinsha linxe.
11«Ee, Duuchchi Woddike Gootta
wele magenuwwinaa'n atishsha ayyete hedhe?
Woyyumati ulfaateek
gaachchaannik sodaachchisaak
masso yaanuwwa assaak
atishsha ayyete hedhe?
12Atinna atixxa middixxa anga diriirsitette,
buttatinna insa'nee liqiinsite.
13«Sinsinne affebaaxxe atixxe jaalalanni,
woddeteka arda atika akeekkatton.
Atike uduudinni insa'nee
atike Woyyichchi Galdumiba'a akeekkatton.
14Gosa gosak arduwwi tennee laqe'e culphise;
Filisxeemik arda'ninna ciniinto dagge.
15Ookkone wodda Eedoomik akeekisanjuwwinna qexeri hiyye;
Mo'aabike akeekisanjuwwa'ninna culphisa dagge;
Kenaanik ardinna wexeqeme.
16Ee, Duuchchi Woddike Gootta atik ardi sa'aa qico'n
Woddettek atiki ardi sa'aa qico'n
weekenshatinna allayyi insa'ne'ni dagaan;
atixxe hirrexxe hunnanaa'n kexxeexxa
bucuqqi hiyyabaake kinjo kande gante.
17Ee, Duuchchi Woddike Gootta
atike galduma kado'a fi'litetteke booncho'n,
Koo Duuchchi Woddike Gootta anga atixxi ijaarteeke mine'n
atike qadaadixxe kooba'n, insa'nee iyyedaggatton, insa'nee kaassatton.
18Duuchchi Woddik Gootti
duuchchi woddinaa'n duuchchin woddi'a moya» hiyye.
19Feri'oonik fadhadi isixxi fadhadiinxi gaaruwwanna fadhado gulufammak isik manni abbaayya giddi'a e'yee wodda, Duuchchi Woddik Gootti abbaayyatika wode'e insa'ne hana illee iima hiisse; Isira'eelk ardi kinni abbaayya giddo bago buttininaa'n me'a'n sa'e. 20Aaroonixxi dayyo, wabeekkitte Maaryaami okole ifika adhite; wele melaallenna okole adhdhite utaalda'n isee hordoffe. 21Maariyaaminna insa'ne'n:
«Fadhachchokanna fadhachcho gulufemmaka,
abbaayya giddo fugguse'e;
Ulfinnik lummedheeka
Duuchchi Woddika Gootta faarse» hita'n insa'ne'a faarsite.
Maarakanna Elmika Wode'e
22Ookkoneechchi uduma Muuse Isira'eelika arda Eritiriinxe Abbaayyabaa'n Suuri hiyyendaaxxe qiilla gammoojjeba'a akeekee'naa me'e; insa'nenna sase barra qiilla gammoojje giddo wodiibelo me'ine. 23Insa'nenna Maara hinaaba dangee wodda ookkone boonchiki wodi'i qaraara'neeke kademmaxxee ha'watee dandeeneba'a. Iikki boonchinna Maara hiyyemeechchi tennexxeetemman. 24Ardikinna Muuse'n adhuma'n, «Maachcho ha'winanno?» Hiyye.
25Muusenna Duuchchi Woddike Goottiba'a raare; Duuchchi Woddiki Goottinna haqichcho mitte iso'n leellishe; Muusenna okkonee haqichcho buttii'n aadheexxi wode'eke'n darbee wodda wodi'ikinna ha'watee elooke kade.
Ookko Duuchchi Woddiki Gootti seerakanna aada insa'ne'a ugge; ookkonna insa'nee hega uude. 26«Duuchchi Woddika Gootta atike Magenka haaso'a xonxommachchoti laqqinoole, ille isixxi edonna eloxxa assinoole, ajajuwwa isika dho'o hitine laqqinoolenna seera isika duuchchanna heqqexxinoole, ani Duuchchi Woddike Gootti ha'nooke fayyisallo kadeennexxe'e Gibtseke arda'n iyyedagenneka hoone dhukkubanna ha'no'n iyyedagabe'non.»
27Ookkoneechchi uduma Eelimi hiyyemaaba'a dange; ookkonna tommenna lame muummenna torbaane tomme meexxetiki heqichchuwwi hedhemman; insa'nenna ookko wodi'ii bira qecceence offolle.
Currently Selected:
Fulatika Maxaafa 15: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
