Kubhoka 19
19
Bhaizilaeli pa chitombi cha Sinai
1Lichobha la kutumbula la mwehi wa tatu kutumbula Bhaizilaeli pabhakabhokiki ku inchi ja ku Misili, lichobha heli, bhakahikiki ku lipololu la ku Sinai. 2Pabhakabhokiki ku Lefidimu, bhakahikiki ku lipololu la ku Sinai, na Bhaizilaeli bhakatemi palipololu pala pachitumbula chitombi. 3Bhela Musa akakweliki panani ja chitombi kuketangana na Chapanga.
Panihapa Bambo Chapanga akundohiki Musa kuhuma pachitombi pala, akapwaghaje, “Ubhapwaghilaje anana lubheleku lwaka Yakobo, bhandu bhaka Izilaeli, 4‘Mwehapa mbweni monakabhatendili ku Misili hoku, na ntundu monakuntolile mwehapa ngati ngwahi mojitolela bhana bhaki mu mapapanilu ghaki, na kundeta mwehapa kwangu. 5Henu ngati anankamwili chakaka na kulighoha lulaghilu langu, panihapa mwehapa anamkubhaje bhandu bhangu bhahaghulika pachilanda ja mataifa ghokapi. Maghambu ndema wokapi nde wangu nepane, 6mwehapa anamkubhaje kwangu ukolongwa wa bhapenganyambiku na litaifa lihuhu.’ Ghangani nde malobhi ghaubhapwaghilaje Bhaizilaeli.” 7Panihapa Musa akakelawike, akabhalohiki bhazee bha Izilaeli na kubhapwaghila mambu ghokapi ghaakalaghalakiwi na Bambo Chapanga aghapwaghaje. 8Bhandu bhokapi bhakajetakili kwa papamu, bhakapwaghaje, “Anatutendaje kila chindu Bambo Chapanga cheapwaghike,” Najombi Musa akakelawihi mayangu ghabhu kwaka Bambo Chapanga.
9Bambo Chapanga akumpwaghi Musa, “Ananukuhikilaje mu lihundi la kutopa, nahuli panilongilaje na wehapa Bhaizilaeli bhanyowanyaje ghambwagha na wehapa kila chikahi bhabhekaje lihobhalelu labhu kwaku mileli.”
Panihapa Musa akumpwaghi Bambo Chapanga ghala ghabhakapwaghiki bhandu. 10Bhela Bambo Chapanga akumpwaghi Musa, “Ujendaje kwa bhandu ukabhagholulaje lalenu na chilabhu. Ubhapwaghilaje bhachapaje ingobhu yabhu, 11bhakubhaje tayali kwa lichobha la pamalabhu, kwa ndandi lichobha heli, nepani Bambo Chapanga ananhulukaje panani ja chitombi Sinai pamihu gha bhandu bhokapi. 12Wehapa ubhabhekilaje bhandu malindakanilu kuchiyongolota chitombi. Ubhapwaghilaje, ‘Ndingalyaje, ngamwikwela pachitombi au kuchikamula. Mundu jokapi joanakamulaje chakaka anaakomakikaje. 13Mundu jokapi ngaankamula mundu joalombwike malindakanilu hoju, anakomakikaje kwa kulapulika maganga au nkoha akubhi nde mundu au nde chinyama, ngayilame.’ Nambu chikahi mbata pajijendalyaje kujemba kwa sauti ngolongwa, bhandu bhokapi anabhaheghalyaje pachitombi.”
14Bhela Musa akahulwiki pachitombi na kubhajendela bhandu, akabhagholwili, nabhombi bhakachapiki ingobhu yabhu. 15Panihapa Musa akabhapwaghi bhandu, “Mlibhekaje tayali kwa ndandi ja lichobha la pamalabhu. Mwanalomi jokapi ngayighonela kihyegha na mbomba.”
16Lukela lichobha la katatu kukabhili na kulundamila na unang'anu wa hitobhi papamu na lihundi la kutopa panani ja chitombi, na sauti ngolongwa namaa ja mbata. Kila mundu joakabhili palikambi akabhaghije. 17Bhela Musa akabhalongwihi bhandu kuhuma palikambi na kujenda kuhimangana na Chapanga, nabhombi bhakajemiki pachitumbula chitombi. 18Chitombi cha Sinai chakabhili chiyekaliwi na lyohi, kwa ndandi Bambo Chapanga akahelili panani jake mu moto. Lyohi la moto ghonihoghu ukakweliki kunani ngati lyohi la nvuni ukolongwa na chitombi chokapi chakabhaghiji kwa makili namaa. 19Sauti ja mbata jakajendallili kujonjukeka nakanopi. Musa akalongili na Chapanga. Najombi Bambo Chapanga akamuyangiki Musa kwa sauti. 20Bambo Chapanga akahelili panani ja chitombi cha Sinai, konihoku Bambo Chapanga akundohiki Musa akwelaje panani pachitombi. Panihapa Musa akakweliki pachitombi. 21Bhela Bambo Chapanga akumpwaghi Musa, “Hulukaje pahi ukabhakanakyaje bhandu ngabhilomboka malindakanilu kuhika kumona nepani, anabhatendiki bhenibhela bhamaheli bhabhu anabhapotilaje. 22Hata bhapenganyambiku, anabhanheghalile nepani Bambo Chapanga, ibhapalika kuligholola, anangati ngachebhatendiki bhenibhela nepani Bambo Chapanga, ananabhalapulaje.”
23Musa akumpwaghi Bambo Chapanga, “Bhandu ngabhawezi kukwela chitombi Sinai kwa ndandi wehapa wamwete ukatulaghalakili, ukapwaghaje, ‘Tubhekaje malindakilu kuchiyongolota chitombi, na kuchitenga ngati pandu pahuhu.’ ”
24Bambo Chapanga akamuyangike, “Hulukaje pahi, na ukahikaje na Haluni. Nambu ubhahibhalakyaje bhapenganyambiku papamu na bhandu bhangi ngabhilomboka malindakanilu na kuhika kwangu nepani Bambo Chapanga, anabhatendiki bhenibhela ananabhalapulaje.” 25Bhela Musa akahelili na kubhapwaghi Bhaizilaeli mambu ghokapi ghaakalaghalakiwi na Bambo Chapanga.
Currently Selected:
Kubhoka 19: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
