Kubhoka 6
6
1Bhela Bambo Chapanga akumpwaghi Musa, “Henu anaulolaje chindu cheananuntendila Falao, kwa ndandi ja chiwoku changu chechibhili na makili anaabhalekakyaje bhandu bhabhokaje, kwa chiwoku changu chechibhili na makili anaabhatopulaje bhabhokaje mu inchi jake.”
Chapanga andoha Musa
2Bhela Chapanga akumpwaghi Musa, “Nepani nde Bambo Chapanga. 3Nakumpitalili Ibulahimu, Isaka na Yakobo, ngati Chapanga Mweni Makili, nambu kwa lihina langu Bambo Chapanga, ngachenamanyakini kwabho. 4Kabheti nakatendiki lulaghilu lwangu na bhombi, kubha ananabhapekya inchi ja Kanaani, inchi jebhakabhi bhatama ngati bhaghene. 5Nakanopi ja ghanihagha, nyowini chilelu cha Bhaizilaeli, ambabhu Bhamisili bhabhajomalakela kuhenga lihengu la kung'ahakika, nanatu nulukombwiki lulaghilu lwangu. 6Bhela ubhapwaghila Bhaizilaeli, ‘Nepani nde Bambo Chapanga, nanatu ananumbohaje kuhuma mu utumwa wa Bhamisili. Nanatu ananumbeka kulijeka mbokaje kuhuma mu utumwa wabho, nanatu ananunkombulaje kwa chiwoku changu chechibhi na makile, na kwa matendu makolongwa. 7Ananuntolaje kubha bhandu bhangu, nanatu anangubha Chapanga winu. Nanamu anammanyeje kubha nepani nde Bambo Chapanga, Chapanga winu, nenumbohiki pahi ja ibwahila ya Bhamisili. 8Nanatu ananundetaje mu inchi jela jenakalapiki kumpekeha Ibulahimu, Isaka na Yokobo, ananumpekyaje inchi jeniheji jikubhaje jinu mabhete. Nepani nde Bambo Chapanga.’ ” 9Musa akabhalandili Bhaizilaeli mambu ghanihagha, nambu ngachebhunjowanile kwa ndandi ja mabhinilu makolongwa gha muntima na utumwa wa kunonopa.
10Bhela Bambo Chapanga akumpwaghi Musa, 11“Ujendaje ukumpwaghila Falao nkolongwa wa ku Misili, nahuli abhalekakyaje Bhaizilaeli bhabhokaje mu inchi jake.”
12Nambu Musa akumpwaghi Bambo Chapanga, “Ngati Bhaizilaeli ngachebhanyowanela nepani, bho Falao ananyowanyaje lelo? Nepani mili na chimama.”
13Bhela Bambo Chapanga akabhalaghalakili Musa na Haluni, kubhokana na Bhaizilaeli na Falao, nkolongwa wa Misili, najombi akabhalaghalakili kubhabhoha Bhaizilaeli kuhuma mu inchi ja Misili.
Akahokolu bhaka Musa na Haluni
14Aghagha nde mahina gha akahokolu bha lukolu yaka Izilaeli, bhana bha chikambaku bhaka Leubeni mbelakeka wa kutumbula wa chikambaku waka Izilaeli bhakabhili Henoki, Palu, Hesiloni, na Kalimi. Bhanihabha bhakabhili nde akahokulu mu lukolu yaka Leubeni. 15Bhana bha chikambaku bhaka Simeoni bhakabhili Yemueli, Yamini, Ohadi, Yakini, Sohali na Shauli. Shauli akabhi mwana waka mbomba Mkanaani. Bhanihabha bhakabhili nde akahokolu mu lukolu yaka Simeoni. 16Ghangani nde mahina gha bhana bha chikambaku bhaka Lawi kulengana na ibheleku yabhu, Gelishomu, Kohati na Melali. Lawi akatami hyaka mia jimu na selasini na saba. 17Bhana bha chikambaku bhaka Gelishomu, bhakabhili Libini na Shimei, kulengana na lukolu yabhu. 18Bhana bha chikambaku bhaka Kohati bhakabhili Amulamu, Ishali, Hebuloni na Uzieli. Kohati akatemi hyaka mia jimu na selasini na tatu. 19Bhana bha chikambaku bhaka Melali bhakabhili Mahili na Mushi. Bhanihabha nde akahokulu bha Bhalawi kulengana na ibheleku yabhu.
20Amulamu akuntowili Yokebedi, nihenga waki, najombi akumbelakili Haluni na Musa. Amulamu akatemi hyaka mia jimu na selasini na saba. 21Bhana bha chikambaku bhaka Ishali bhakabhi Kola, Nefegi na Zikili. 22Bhana bha chikambaku bhaka Uzieli bhakabhi Mishaeli, Elisafani, na Sitili.
23Haluni akuntowili Elisheba, mwali waka Aminadabu, ndombu waka Nashoni, najombi akumbelakili Nadabu, Abihu, Eleazali na Itamali. 24Bhana bha chikambaku bhaka Kola bhakabhi Asili, Elikana na Abiasafu. Bhanihabha nde bhabhakabhili akahokolu bha lukolu yaka Kola. 25Eleazali mwana waka Haluni akuntowili jumu wa akamwali bhaka Putieli, najombi akumbelakili Fenehasi. Bhanihabha nde bhabhakabhili akahokolu bha bhalongu bha Bhalawi, kulengana na lukolu yabhu.
26Abhabha nde Haluni na Musa bhalabhala, Bambo Chapanga bhaakabhapwaghile, “Mubhapihaje Bhaizilaeli kuhuma ku inchi ja Misili kulengana na makabila ghabhu.” 27Bhanihabha nde Musa jolajola, na Haluni jolajola bhabhakalongili na Falao nkolongwa wa ku Misili, kubha abhalekakyaje Bhaizilaeli bhabhokaje mu inchi ja Misili.
Bambo Chapanga andaghalakila Musa na Haluni
28Lichobha lela Bambo Chapanga paakalongili na Musa ku inchi ja ku Misili, 29akumpwaghile, “Nepani nde Bambo Chapanga. Umpwaghila Falao nkolongwa wa ku Misili mambu ghokapi ghanukupwaghila.”
30Nambu Musa akumpwaghi Bambo Chapanga, “Nepani nongela kwa chimama, bho, nkolongwa Falao ananyowanya nenga?”
Currently Selected:
Kubhoka 6: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
