Kubhoka 8
8
Lilapuliku la kabheli: Mahungula
1Bhela Bambo Chapanga akumpwaghi Musa, “Ujendaje kwaka Falao ukumpwaghilaje: Lendenu nde leapwagha Bambo Chapanga, ‘Ubhalekaje bhandu bhangu bhabhokaje, nahuli bhapata kunyojabhela. 2Ngati anaukaniki kubhalekakela bhabhokaje, lingalyaje, ananijilapulaje inchi jaku kwa kuleta mahungula. 3Nkoka Naili anautwelalaje mahungula, naghombi anaghajingala mbaka munyumba jaku na kuchumba chaku cha kughonela na pachitanda chaku, na munyumba ya bhatumika bhaku, na bhandu bhaku. Mahungula ghanihagha anaghajingalaje pa ihinja hinu na mu yombu hinu ya kuhunyila uhembi. 4Mahungula anaghakwelaje panani ja hyegha jaku, na panani ja bhandu bhaku na bhatumika bhaku bhokapi.’ ”
5Bambo Chapanga akumpwaghi Musa, “Umpwaghila Haluni, ‘Uhatambulaje chiwoku chaku chechibhili na ndonga panani ja mikoka, panani ja mikolulela na matanda, naghombi mahungula anaghapitalyaje na kujaghanila kila pandu mu inchi ja Misili.’ ” 6Bhela, Haluni akahatambwili chiwoku chaki chechibhili na ndonga panani ja machi ghokapi gha Misili, naghombi mahungula ghakapitalili na kuhyeka inchi jokapi ja Misili. 7Nambu bhahabhi bha ku Misili kwa uhabhi wabhu, nabhombi bhakaletiki mahungula panani ja inchi ja Misili.
8Bhela Falao akundohiki Musa na Haluni, na kubhapwaghila, “Mundobhaje Bambo Chapanga abhohaje mahungula kuhuma kwangu na kwa bhandu bhangu, nanatu ananabhalekakyaje bhandu bhinu bhajenda, nahuli bhakumbokihaje nyambiku Bambo Chapanga.”
9Musa akumpwaghi Falao, “Ena! Nukupekeha lujiniku lwa kuloghola kubha nde chikahi bhole cheupala kukulobhela wehapa, bhatumika bhaku, na bhandu bhaku, nahuli mahungula aghagha ghabhokaje kwinu na munyumba hinu. Nambu ghahighalyaje pela ghaghabhili mu nkoka Naili.”
10Falao akapwaghike, “Mnobhilaje chilabhu.”
Musa akayangike, “Anaikubha ngati moupwaghile, nahuli upata kumanya kubha njeta jongi jokapi joabhi ngati Bambo Chapanga, Chapanga witu. 11Mahungula anaghabhokaje kwaku, na mu manyumba ghaku, kwa bhatumika bhaku na kwa bhandu bhaku, anaghahighalyaje gha mu nkoka Naili pela.” 12Panihapa Musa na Haluni bhakabhokiki kunyumba jaka Falao, na Musa akundelili Bambo Chapanga aghabhohaje mahungula ghaakabhi aghaletiki kwaka Falao. 13Najombi Bambo Chapanga akatendiki lijambu lela leakalobhiki Musa, mahungula ghakahwili mu manyumba, muibhanja na mu mighonda. 14Bhandu bhakabhongini mahungula ghanihagha mapogha mapogha, na inchi jokapi ja Misili jakanungike. 15Nambu Falao paakaweni kubhili na mbanga, akautendiki mtima waki kubha kunonopa kabhete, bhela ngacheakabhajowanili Musa na Haluni, ngati Bambo Chapanga moakapwaghile.
Lilapuliku la katatu: Ipapane
16Bhela Bambo Chapanga akumpwaghi Musa, “Umpwaghila Haluni, ‘Uhatambulaje ndonga jaku na kululapula luhombi lwa ndema,’ na luhombi analung'anambukaje kubha ipapane mu inchi jokapi ja Misili.” 17Bhakatendiki bhenibhela, Haluni akahatambwili chiwoku chaki chechibhili na ndonga chela na kululapula luhombi lwa ndema, nalwombi lukang'anambwiki kubha ipapane na kubhahikila bhandu na hinyama. Luhombi lwokapi mu inchi jokapi ja Misili lukabhi ipapane. 18Nambu bhahabhi bha ku Misili, kwa uhabhi wabhu nabhombi bhakalengiki kulung'anambula luhombi kubha ipapane, nambu ngachebhawezike. Ipapane heyi yakajaghanili kwa bhandu na kwa hinyama. 19Panihapa bhahabhi bhala bhakumpwaghi Falao, “Aleli nde lihengu la chiwoku chaka Chapanga.” Nambu mtima waka Falao ukajendalili kubha wa kunonopa najombi ngacheanjowanili Musa na Haluni, ngati Bambo Chapanga moakapwaghile.
Lilapuliku la kachechi: Mabhembi
20Bhela Bambo Chapanga akumpwaghi Musa, “Chilabhu ujumukaje lukela pachibhombu unjendila Falao chikahi paajenda kunkoka na umpwaghilaje: Bambo Chapanga apwagha anana, ‘Ubhalekaje bhandu bhangu bhajendaje, nahuli bhapata kunyojabhela. 21Ngati ngawalekakeli bhandu bhangu bhabhokaje ananukuletilaje mabhongelu gha mabhembi panani jaku, kwa bhatumika bhaku, kwa bhandu bhaku na mu manyumba ghinu. Nyumba yokapi ya Bhamisili anaitwelilaje mabhembi, na hata luhombi lwokapi lwa inchi jokapi ja Misili. 22Nambu lichobha heli pandu pa Gosheni kobhatama bhandu bhangu ngakwikubhi na mabhongelu gha mabhembi, nahuli mpata kumanya kubha nepani Bambo Chapanga, mili mu inchi jenjeno. 23Nanatu ananabhatengaje pachilanda ja bhandu bhangu na bhandu bhako. Nginyulila heji ja kukangacha anajipitalyaje chilabhu.’ ” 24Bhela Bambo Chapanga akatendiki bhenibhela. Akaletiki mabhongelu makolongwa gha mabhembi ghakatwelili mu nyumba jaka Falao na mu manyumba gha bhatumika bhaki, kabheti inchi jokapi ja Misili jakayonangiki na mabhembi.
25Panihapa Falao akundohiki Musa na Haluni na kubhapwaghila, “Njendanyaje mukumbohila Chapanga winu nyambiku mu inchi jenjeno.”
26Nambu Musa akumpwaghile, “Ngabhela! Leniheli ngalikubhi wichu. Nyambiku jeanatumbokiha Bambo Chapanga, Chapanga witu, anaikubhaje lihakalilu kwa Bhamisili. Ngati anatubhohiki nyambiku ambayu nde lihakalilu palongi ja Bhamisili, bho, ngabhatulapuli kwa maganga? 27Itupalika tujendaje mwanja wa machobha ghatatu kuchingwenje nahuli kumbokela nyambiku Bambo Chapanga, Chapanga witu, ngati moakatulaghalakile.”
28Bhela Falao akapwaghike, “Ananundekakyaje njendaje kumbokela Bambo Chapanga, Chapanga winu nyambiku kuchingwenje hoku, nambu ngamwijenda kutali nakanope. Henu mnobhilaje na nepane.”
29Musa akayangike, “Chikahi pela panibhokaje, ananundobhaje Bambo Chapanga nahuli mabhongelu aghagha gha mabhembi ghabhokaje kwaka Falao, kwa bhatumika bhaki na kwa bhandu bhaki, chilabhu. Nambu Falao ngawatukolowa kabhete, kwa kulepalela kubhalekakela bhandu bhajendaje kumbokela Bambo Chapanga nyambiku.”
30Panihapa Musa akundekiki Falao na kundobha Bambo Chapanga. 31Bambo Chapanga akatendiki ngati Musa moakundobhile. Bambo Chapanga akaghabhohiki mabhembi kwaka Falao, na kwa bhatumika bhaki, na kwa bhandu bhaki, njeta libhembi hata limu lelakahighalile. 32Nambu hata chikahi chenjenu kabheti Falao akautendiki mtima waki kubha wa kunonopa, wala ngacheakajetakili Bhaizilaeli habha bhabhokaje.
Currently Selected:
Kubhoka 8: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
