Utumbulilu 18
18
Chilanga chaka mwana kwaka Ibulahimu
1Bambo Chapanga akumpitali Ibulahimu pambipi na mialoni ja Mamile, chikahi paakabhi atami pundyangu wa lihema laki chikahi cha kupyopa cha muhe. 2Ibulahimu paakajinwi mihu ghaki, akabhaweni bhandu bhatatu bhajemiki palongi jaki. Pala pala akakembili imbelu kuhuma pundyangu wa lihema laki na kujenda kubhajopalela. Na paakabhahikili akachikimi ukutama, 3na kupwagha, “Bambo bhangu, nepani nuntumika wino. Chondi nunjopa ngamwimbeta, nambu nhwika kwangu. 4Anabhundetila machi machokopi nahuli nchamba magholu ghinu, na mpomulyaje pahi ja nkongu aghoghu. 5Nyetakalyaje nundetila chilebhi kichokopi nkulaje, nahuli mpata makili gha kujendalela na mwanja winu, maghambu nhwikiki kwaka mtumika winu.”
Nabhombi bhakayangike, “Ena, uhenga ngati moupwaghile.”
6Panihapa Ibulahimu akajombatiki kujingila mulihema laka Sala, na kupwagha, “Utola kilu komi na sita ya uhembi unyahi, ukandaje na ulenganakya mabumunda manyata.” 7Kabhete Ibulahimu akakembili kujenda ku lipogha la ng'ombi na kuhaghula litoli linyahi, lelinenipe na kumpekeha mtumika waki, najombi akajombatiki kujenda kuchinja na kuteleka. 8Panihapa Ibulahimu akatoliki siagi na mahibha, na inyama jela jejaandaliwe, na kuibheka palongi ja bhaghene. Pabhakabhi bhakula, Ibulahimu akajemiki pambipi nabhu kubhatumakila pahi ja nkongo.
9Bhagheni bhala bhakundalukile, “Bho, nhwanu waku Sala abhi kwako?”
Ibulahimu akayangike, “Abhi kola, mkati ja lihema.”
10Panihapa Bambo akapwaghike, “Chakaka anangelabhuka kabhete kwaku mu chikahi ngati chenjenu mu chaka chechihika, na nhwanu waku Sala anaabya na mwana wa chikambako.”
Sala akabhi abhajowanela kundyangu wa lihema lelakabhi kunyuma jake. 11Ibulahimu na Sala bhakabhi bhasejike, na bhakabhi bhakongapile, na Sala akabhi akotwiki mambu gha ntetu wa akambomba. 12Bhela, Sala akahekiki chumuntima waki, akapwaghaje, “Nepani ngongapili anana, na ndomi wangu asejike, bho, ananhweza le kuhekalela lijambu alele?”
13Panihapa Bambo Chapanga akumpwaghi Ibulahimu, “Bho, maghambu kiki Sala atehi kuheka na kupwagha, ‘Bho, nepani le nhweza kupata mwana, koni nzejike?’ 14Bho, kubhi le na lijambu lokapi lela langakuwezikana kwaka Bambo? Anangelabhuka kabhete mu chikahi ngati chenjenu mu chaka chechihika, na Sala anaapata mwana wa chikambako.”
15Bhela Sala akatehi kujoghopa maghambu akatehi kukoloha, na kupwagha, “Nepani ngachenahekike.”
Nambu Bambo Chapanga akumpwaghile, “Ena, ukahekike.”
Ibulahimu aulobhela muchi wa Sodoma
16Bhela bhandu bhanihabha bhakabhokiki konihoku, na kulingalila mihu ghabhu ku muchi wa Sodoma, najombi Ibulahimu akabhokiki papamu nabhu nahuli kubhahindakila. 17Panihapa Bambo Chapanga akapwaghike, “Bho, nunhiya le Ibulahimu lijambu lembangiki kulihenga? 18Chakaka Ibulahimu anaakubha litaifa likolongwa na lelibhi na makili, na kupetela kwaki mataifa ghokapi gha pundema anaghapengalikaje. 19Maghambu nunhawi jombi nahuli abhalonguhaje bhana bhaki na bhandu bha munyumba jaki kumtii Bambo, bhabya bhalongwana na kuhenga ghambone, nahuli Bambo atimizaje chilanga chaki kwaka Ibulahimu.”
20Panihapa Bambo Chapanga akapwaghike, “Kwa kubha chilelu kwa muchi wa Sodoma na Gomola chitehi kujonjukeka, na mahoku ghabhu ghajonjukiki nakanope, 21bhela, ananhelalaje sajenu nahuli monaje ngati ghabhaghahenga hagha nde chipemu cha chilelu chechinhikile, na ngati ngabhela, anamanyaje.”
22Panihapa bhandu bhanihabha bhakabhokiki panihapa na kujenda ku Sodoma, nambu Ibulahimu akabhi akali ajemiki palongi jaka Bambo. 23Bhela, Ibulahimu akunheghali Bambo na kumpwaghila, “Bho, anaubhayonanga le bhandu bhabhajetakaliwi palongi jaku papamu na bhandu bhahakau? 24Bho, ngati anakubhi na bhandu bhabhajetakaliwi palongi jaku hamsini mu muchi ghonihoghu, chakaka le anauyonanga muchi wokapi na wala ngawauleki kwa ndandi ja bhandu bhabhajetakaliwi palongi jaku hamsini habha bhabhabhi monihomo? 25Ngawihenga bhenibhela, kubhakoma bhandu bhabhajetakaliwi palongi jaku papamu na bhahakau, kubhahengela bhabhajetakaliwi palongi jaku kulengana na bhahakau. Ngabhela! Bho, Mtemula wa ndema wokapi le ngayihengi lelipalika palongi jaki?”
26Bambo Chapanga akapwaghike, “Ngati anambatiki bhandu bhabhajetakaliwi palongi jangu hamsini mu muchi wa Sodoma, ananuleka muchi ghonihoghu wokapi kwa ndandi jabhu.”
27Panihapa Ibulahimu akapwaghiki kabhete, “Sajenu nepani mi na ukangamalu wa kulongela na Bambo, hata ngati nepani nde luhombi na ilihu pela. 28Bho, ngati anabhakepiki bhandu nhwanu mu bhandu hamsini, anauyonanga le muchi wokapi maghambu bhakepiki bhandu nhwano?”
Bambo akayangike, “Ngati ananabhahimani bhandu alobaini na nhwanu bhabhajetakaliwi palongi jangu mu muchi ghonihoghu, nganauyonange.”
29Ibulahimu akajonjuki kabhete kupwagha, “Bho, ngati anabhapatakini bhandu alobaini pela?”
Bambo akayangike, “Kwa ndandi ja bhandu alobaini habha, nganauyonange.”
30Ibulahimu akapwaghike, “Chondi Bambo nukujopa ngawihakalila, nambu uneka nongila kabhete. Bho, ngati anabhapatakini bhandu selasini pela konihoko?”
Bambo akayangike, “Nganauyonangi muchi ghonihoghu ngati anabhapatakini bhandu selasini konihoko.”
31Ibulahimu akapwaghike, “Sajenu kwa kubha mi na ukangamalu nakanopi wa kulongela na Bambo, bho, ngati anabhapatakini bhandu bhambone ishilini pela konihoko?”
Bambo akayangike, “Kwa ndandi ja bhandu bhambone ishilini habha, nganauyonange.”
32Ibulahimu akapwaghike, “Chondi Bambo, nukujopa ngawiyoma, nambu uneka nongilaje mala punkamu pela. Bho, ngati anabhapatakini bhandu bhambone komi pela konihoko?”
Bambo akayangike, “Kwa ndandi ja bhandu bhambone komi habha, nganauyonange.” 33Bhela Bambo paakajomwili kulongela na Ibulahimu, akabhokike, najombi Ibulahimu akakelawiki kunyumba jake.
Currently Selected:
Utumbulilu 18: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
