Utumbulilu 30
30
1Bhela Laheli paakaweni kubha ngacheambelake Yakobo bhana, akumboni wihu Lea, ndombu waki. Akumpwaghi Yakobo, “Umbekya bhana, nanga bhela, nepani anambotilaje.”
2Yakobo akamuyomili Laheli, na kumpwaghila, “Bho, nepani le mi pandu paka Chapanga, joakuhibhalakili ngawibheleka bhana?”
3Laheli akayangike, “Pambani abhi Biliha, mtumika wangu wa chimbomba. Ughonila naku kihyegha nahuli abhelaka bhana pandu pangu nepani, na kwa kupetela kwaki nepani nanatu nhweza kupata lubheleku.” 4Bhela Laheli akumpeki Yakobo Biliha akubha nhwanu wake. Na Yakobo akaghoni naku kihyegha. 5Biliha akapatiki chitumbu, na kumbelakela Yakobo mwana wa chikambaku. 6Panihapa Laheli akapwaghike, “Chapanga andendili lijambu lambone, ajowini sauti jangu, na kumbekeha mwana.” Bhela akundohiki mwana jonihoju lihina laki Dani. 7Biliha mtumika waka Laheli, akapatiki chitumbu kabhete, na kumbelakela Yakobo mwana wa kabhele wa chikambako. 8Laheli akapwaghike, “Ngomini ngondo ngolongwa na ndombu wango, nanatu nhwezike.” Bhela akundohiki lihina laki Nafutali.
9Lea paakaweni kubha akotwiki kubheleka, akuntoliki Zilipa, mtumika waki wa chimbomba, na kumpekeha Yakobo akubha nhwanu wake. 10Zilipa, mtumika waka Lea, akumbelakili Yakobo mwana wa chikambaku. 11Lea akapwaghike, “Bahati jambone!” Bhela akundohiki lihina laki Gadi. 12Zilipa, mtumika waka Lea, akumbelakili Yakobo mwana wa kabhele wa chikambaku. 13Lea akapwaghike, “Kwa ntundu bhole momeli na chiheko! Kwa ndandi akambomba anabhanoha chiheko.” Bhela akundohiki lihina laki Asheli.
14Chikahi cha kuhuna ingano, Leubeni akapiti kungonda na konihoku akajiweni mitela jejatumiki ngati mandunguluse, na kundetela Lea mabhu waki. Laheli akumpwaghi Lea, “Chondi, umbekya mitela jakumu jejatumiki ngati mandunguluse ghaka mwana wako.”
15Nambu Lea akumpwaghile, “Bho, lijambu lichoku lelo kunyaghula ndomi wango, na upala kabhete kujitola mitela jejitumika ngati mandunguluse ghaka mwana wango?”
Laheli akayangike, “Ngati anaumbekihi mitela jejitumika ngati mandunguluse ghaka mwana waku, Yakobo anaaghonila kwaku ikilu jenu.”
16Chikahi Yakobo paakakelawiki kuhuma kungonda pakamihi jela, Lea akapiti kunjopalela, akapwaghaje, “Lalenu ikupalika kughonela na nepani kihyegha, maghambu nukuhemili kwa mitela jejitumika ngati mandunguluse ghaka mwana wango.” Bhela Yakobo akaghonili naku kihyegha ikilu jela.
17Chapanga akunjowini Lea, najombi akapatiki chitumbu na kumbelakela Yakobo mwana wa kahanu wa chikambaku. 18Lea akapwaghike, “Chapanga ambekihi nhupu wangu, maghambu numpekihi ndomi wangu mtumika wangu wa chimbomba.” Bhela Akundohiki lihina laki Isakali. 19Lea akapatiki kabhete chitumbu, na kumbelakela Yakobo mwana wa sita wa chikambaku. 20Lea akapwaghike, “Chapanga ambekihi nhupu jamboni namaa. Chikahi chenjenu ndomi wangu anaandopilaje, maghambu numbelakili mwana wa sita wa chikambaku.” Bhela akundohiki lihina laki Zabuloni. 21Palongi akumbeliki mwali, na akundohiki lihina laki Dina.
22Panihapa Chapanga akunkombwiki Laheli, Chapanga akajowini malobhu ghaki na kumbopola lutumbu lwaki. 23Laheli akapatiki chitumbu, na kumbeleka mwana wa chikambaku, na kupwagha, “Chapanga amokili iyoni jango.” 24Akundohiki mwana hoju lihina laki Yusufu, akapwaghaje, “Chapanga na anyonjukyaje mwana jonge.”
Kujonjukeka kwa hinyama yaka Yakobo
25Bhela Laheli paakumbeliki Yusufu, Yakobo akumpwaghi Labani, “Unyetakalyaje mujaje kunyumba jango. 26Umbekya akabhahanu bhangu na bhana bhangu, bhandumakili kubhapata, moka nabho. Maghambu umanyi utumika wangu ghonukutumakile.”
27Nambu Labani akumpwaghile, “Chondi nukulobha umbekya mbekenyu ja kulongela lijambu limu, utama na nepani. Kwa ndandi manyi kwa indela ja mabhono kubha Bambo Chapanga ambengalili kwa ndandi jako. 28Uloghula malepu ghako, nanatu ananepaje.”
29Yakobo akumpwaghile, “Wehapa wamwete umanyi ntundu monukutumakile, na ntundu monighohili hinyana yaku. 30Kichokopi cheukabhi nachu mangane ja kuhika kwangu kijonjukiki namaa, najombi Bambo Chapanga akupengalili pokapi pambitaje. Nambu sajenu, bho, ananingalya lile mambu gha munyumba jangu namwete?”
31Labani akundalukile, “Nukupekya kike?”
Yakobo akayangike, “Ngawimbekeha chindu, nambu ngati anaunhengili lijambu limu haleli, ananyendalya kughadima na kughaghoha mapogha ghaku. 32Unyetakalya mbetaje mu mabhongelu ghaku ghokapi lalenu, mohaje hinyama yeibhi na madoa madoa au mabaka mabaka, kila chinyama chipili pachilanda ja mambeleli hagha, na kila imbuhi jejibhi na madoa madoa au mabaka mabaka. Ghanihagha nde anaghakubha malepu ghango. 33Bhela, machobha ghaghahika, ulongwana wangu anaubhonikanaje hotuhotu pawihikaje kulinga malepu ghango. Imbuhi jangu jokapi jangakubha na madoa madoa au mabaka mabaka, au limbelele langakubha lipili, yeniheyi anaibhalangika itehi kujibhakika.”
34Labani akapwaghike, “Nyetakela, na kubya ngati moupwaghile.” 35Nambu lichobha lela lela Labani akabhohiki imbuhi mapongu ghokapi ghaghabhi na misitali au madoa madoa, imbuhi yokapi imbomba yeikabhi na madoa madoa au mabaka mabaka, kila chinyama chechakabhi na lidoa lihuhu muhyegha jaki, na kila limbeleli lipili, akaghabhekiki pahi ja ulingalilu wa bhana bhaki. 36Bhela Labani akalitengiki na Yakobo kwa lujendu lwa mwanja wa machobha ghatatu pachilanda jaki na Yakobo, najombi Yakobo akahighalili kulidima lipogha laka Labani lelakahighali lela.
37Hata bhela, Yakobo akatoliki fitu ibhehi yeyahekitwi chikahi chela chela ya mikongu ja mlubina, mlozi na mwalamoni na kujibabua nahuli misitali mihuhu jibhonikanaje mu fitu yeniheyi. 38Bhela akaibhekiki fitu yeakaibabwi heyi pandu pa kukengela hinyama machi, pandu ambapu hinyama ikabhi ihika kunywa machi. Hinyama payahikiki kunywa machi, koni yakabya ipala kupata imbeju, 39hinyama heyi yakakwelakiki chikahi fitu heyi ikabya palongi jabhu, na hinyama yeyapatiki chitumbu palongi ja fitu yeniheyi, yakabheliki hinyama yeibhi na misitali, madoa madoa na mabaka mabaka.
40Yakobo akabhatengiki bhanambelele, na kubhalangiha sula yabhu ku hinyama yeibhi na misitali, na kila chinyama chipili chaka Labani. Bhela, Yakobo akatengiki libhongelu laki mweni, pangakuhangaghana na hinyama yaka Labani.
41Kila chikahi hinyama yeibhi na makili payapaliki kupata imbeju, Yakobo akaibhekiki fitu yela pandu pa kukengela hinyama machi, palongi ja hinyama heyi, nahuli ikwelakikaje pambipi na fitu yeniheyi. 42Nambu payahikiki hinyama yangakubha na makili ngacheabhekiki fitu yeniheyi. Bhela, hinyama yangakubha na makili yakabhi yaka Labani, na hinyama yeibhi na makili yakabhi yaka Yakobo. 43Bhela, kwa indela ajeji Yakobo akajendalili kuneng'anela namaa, akabhi na hinyama yamaheli, bhatumika bha chimbomba na bha chikambaku, ngamia na maponda.
Currently Selected:
Utumbulilu 30: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
