Utumbulilu 33
33
Yakobo ahimangana na Esau
1Yakobo akalingalili, na kumbona Esau akahikaje papamu na bhandu mia ncheche. Panihapa akabhagabhinyi bhana bhaki pachilanda jaka Lea, Laheli na bhatumika bhaki bhabheli bha chimbomba bhala. 2Akabhabhekiki bhatumika bha chimbomba bhala na bhana bhabhu palongi, na Lea na bhana bhaki kunyuma jabhu, na Laheli na Yusufu kunyuma nakanope. 3Yakobo mweni akapetiki palongi jabhu, na kujenda kuchikama mbaka pahi kwa utopelu mala saba, mbaka paakahikiki pambipi na mbeli waki Esau. 4Nambu Esau akakembili imbelu kujenda kunjopalela Yakobo, na kunkumbatila, na kundamukila kwa upalu muhingu, na bhokapi bhabheli bhakalelike. 5Esau paakalingalili na kubhabhona akambomba bhala na bhana, akalalukile, “Bhanganya abhabha bhaubhi nabhu akanane?”
Yakobo akayangike, “Abhabha nde bhana ambabhu Chapanga ampekihi mtumika waku kwa chihomu chaki.” 6Bhela bhatumika bha chimbomba bhala na bhana bhabhu bhakaheghalili na kuchikama mbaka pahi kwa utopelu. 7Bhelabhela Lea na bhana bhaki nabhombi bhakahikiki kuchikama mbaka pahi kwa utopelu. Na pakujomukela bhakahikiki Yusufu na Laheli, nabhombi bhakachikimi mbaka pahi kwa utopelu. 8Esau akalalukile, “Ubhi na ndandi bhole kwa mabhongelu ghokapi ghala ghanhimangini nako?”
Yakobo akayangike, “Nahuli mbata chihomu palongi jaku wehapa, wa bambo wangu.”
9Nambu Esau akapwaghike, “Ndongu wango, nepani tayali mili na mali ghamaheli. Ghaubhi naghu wehapa ghabya ghaku wamwete.”
10Yakobo akapwaghike, “Ngabhela! Anangati chakaka ujetakili kunyopalela, bhela, nukulobha ujopalyaje nhupu wango. Kwa ndandi kukubhona pamihu jaku, nde ngati kupabhona pamihu jaka Chapanga, maghambu unyopalili kwa wamboni ukolongwa. 11Chondi ujetakyaje nhupu ghonetiki kwako, maghambu Chapanga ambekihi chihomu chamaheli, nanatu mili na mali ghamaheli.” Kwa kubha Yakobo akatehi kupembalakela kwa ntundu ghonihoghu, Esau akajopalile. 12Bhela Esau akapwaghike, “Kambokaje tujendalya na mwanja, nanatu ananukulongulyaje.”
13Nambu Yakobo akayangike, “Umanyi kubha bhana abhabha nde bhang'eng'a, bambo wango, na mambelele na ng'ombi yemi nayu itenda kujongeha. Ngati anaipelikwi kwa manyata hata ngati kwa lichobha limu pela, hinyama yokapi anaipotilaje. 14Chondi bambo wango, nukulobha ulongulyaje palongi jaka mtumika waku, nanatu ananyengalyaje mbolimboli kwa lujendu lwa mabhongelu ghaghabhi palongi jangu, na lujendu lwa bhana, mbaka panihikaje kwaka bambo wangu ku Seili hoku.”
15Esau akapwaghike, “Bhela nukulekila bhandu bhangu bhakumu papamu na wehapa.”
Yakobo akalalukile, “Kubhi na ndandi bhole ja kuhenga bhenibhela? Uneka pela mbata chihomu pamihu jaka bambo wango.” 16Bhela, Esau akakelawiki lichobha lela lela kujenda mbaka ku Seili. 17Nambu papamu na ghanihagha, Yakobo akapiti ku Sukosi, pandu paakalichengili matamu kwa ndandi jaki na indamba kwa ndandi ja hinyama yaki. Nde ndandi pandu panihapa pakalowakiki muchi wa Sukosi.
18Yakobo akahikiki kwa lukwale mbaka ku muchi wa Shekemu, ghoubhi mu inchi ja Kanaani, paakahikiki kuhuma ku Padani Alamu, na kubheka likambi palongi ja muchi ghonihoghu. 19Akahemili chibhanja kuhuma kwa bhana bhaka Hamoli, tati waka Shekemu, kwa bei ja ipandi mia jimu ja madini gha feza. 20Akachengiki konihoku pandu pa kubhokela nyambiku kwa maganga, na kupaloha Eli Elohe Izilaeli, yani, Chapanga nde Chapanga wa Izilaeli.
Currently Selected:
Utumbulilu 33: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
