Utumbulilu 49
49
Yakobo abhapengalela bhana bhake
1Bhela Yakobo akabhalohiki bhana bhaki na kubhapwaghila, “Mlibhonganaje papamu nahuli nhweza kumpwaghila lijambu lela leanalumpata mu machobha ghaghahika:
2Mlibhonganaje unjowanyaje, mwenga mabhana bhaka Yakobo.
Munjowanyaje Izilaeli tati wino.”
3“Leubeni, wehapa nde mbelakeka wangu wa kutumbula, na makili ghango,
Lipambiku la kutumbula la makili ghango,
Wehapa ubhapeta bhalongu bhako kwa ukolongwa na makile.
4Wehapa nde ngati machi gha mafuliku,
Nambu ngawikubhi unkolongwa kabhete,
Maghambu ukaghonili kihyegha na lidaba laka tati wako
Ena ukachijeghi uhakau chitanda chango.”
5“Simeoni na Lawi nde bhalongo.
Mapanga ghabhu bhatumila kuhengela uhakau.
6Nepani nganyingili mu mipangu jabhu,
Wala nganyingili pa libhonganu labhu,
Maghambu mu inyela yabhu bhakunkomiki mundu,
Na kwa ing'omu yabhu bhakahekiti mihipa ja magholu gha mapongu gha ng'ombi.
7Inyela yabhu na ipata masolu, maghambu yakabhi ngolongwa namaa,
Na inyela yabhu, kwa kubha yakabhi panga chiha.
Ananabhapechangana mu makabila ghaka Yakobo,
Na kubhagabhanya mu inchi ja Izilaeli.”
8“Yuda, bhalongu bhaku anabhakulumbalyaje.
Chiwoku chaku anachikubha pahingu ja maadui bhaku.
Na bhana bhaka tati waku anabhajinama palongi jako.
9Yuda nde ngati mwana wa lihimba,
Akahuma kubhenga na kughonela ngati lihimba,
Na ngati lihimba limbomba,
Bho, nde nane joaweza kulijumuha.
10Ndonga ja kikolongwa ngajibhoki kwaka Yuda,
Wala ndonga jaka mtawala pachilanda ja magholu ghake.
Mbaka paanahika mbelakeka ambaju nde jake,
Ambaju mataifa anaghatenda kuntii.
11Anaakongaje liponda laki pa mzabibu,
Na mwana liponda waki pa mzabibu unyahi nakanope.
Achapiki ingobhu yaki mu divai, na majoho ghaki mu mwahi wa zabibu.
12Mihu ghaki anaghakubha makeli kwa kunywa divai,
Na minu ghaki anaghakubha mahuhu kwa kunywa mahibha.”
13“Zabuloni anaatama mumaheku ja bahali,
Najombi anaakubha ngati bandali ja kujemakela sitima,
Na inchi jaki anajipakana na Sidoni.”
14“Isakali nde ngati liponda lelibhi na makile
Joaghonela pachilanda ja hibwahila yake.
15Nambu akaweni kubha pandu paki pa kupomulela nde panyahi
Na ntundu inchi jaki mojinyambile,
Akajinamishi ngongu waki kutotola chibwahila,
Na kulibhoha kwa ndandi ja lihengu ligumo.”
16“Dani anaatemula bhandu bhaki ngati moipalakila,
Ngati jumu wa makabila gha Izilaeli.
17Dani anaakubha ngati lijoka muindela,
Lijoka lelibhi na sumu munkeghi ja indela,
Joaluma magholu gha falasi muindela,
Nahuli jola joatama panani ja falasi ahabhukaje ungalaghaja.”
18“Wenga wa Bambo Chapanga, nepani nuulonda ukengaleku wako.”
19“Gadi anaalapulikaje na libhongelu la bhanyaghula,
Nambu jombi anaabhajengalya cha kunyuma na kubhaweza.”
20“Luhombi lwaka Asheli analupiha mahunu manyahi,
Najombi anaabhoha chilebhi chinohu chaka nkolongwa.”
21“Nafutali nde ngati chinyama chechilowakeka holoko jimbomba,
Jejibheleka bhana bhanyahi.
22Yusufu nde ngati nkongu wa mzabibu ghoupambika,
Mzabibu ghoupambika punkeghi ja chemuchemu, na mambandi ghaki kujaghanila mulumatu.
23Kwa mabhinilu bhahoma mshali bhakundapwile,
Bhakunhomili mshali na kung'aha namaa.
24Nambu mshali wake ukali ubhi wichu,
Mabhoku ghaki ghakapatiki makile,
kwa uwezu waka Chapanga Joabhi na Makile waka Yakobo,
Kwa lihina laka Mdima, Lindalaghu la Izilaeli.
25Ena, kwaka Chapanga waka tati waku joanaakujangatyaje,
Kwaka Chapanga Joabhi na Makile joakupengalela wehapa,
Kwa mbengalelu ya iyula jejihuma kunani,
Mbengalelu ya machi yeibhi pahi,
Na mbengalelu ya mabheli na ya chitumbo.
26Mbengalelu yaka tati waku nde ngolongwa,
Kupeta mbengalelu ya itombi ya mwande,
Kupeta hindu yeitokuleka ya itombi ya mwande,
Mbengalelu yeniheyi yokapi na itamaje panani jaka mmutu waka Yusufu,
Panani ja mmutu waka joala joakabhekakiki kubha nkolongwa pachilanda ja bhalongu bhake.”
27“Benyamini nde ngati nakawa ja muchitengu jejibhi na injala ngolongwa.
Lukela akula yeabhengike, na pakamihi agabhanya mateka.”
28Aghagha ghokapi nde makabila komi na ghabheli gha Izilaeli. Na ghanihagha nde ghaakaghapwaghili tati wabhu, na kubhapengalela, kila jumu wabhu ngati moikampalakile.
Kupotela na kutaghakika kwaka Yakobo
29Bhela Yakobo akabhalaghalaki, akapwaghaje, “Nepani nyenda kubhonganwa papamu na bhandu bhango. Ndaghaje pambipi na akatati bhango, mu likolu lelibhi mungonda waka Efuloni, wa likabila la Bhahiti, 30mu likolu lelibhi mungonda jaka Makipela, pambipi na Mamile ku inchi ja Kanaani, leakahemi Ibulahimu papamu na ngonda kwaka Efuloni, wa likabila la Bhahiti, kwa ndandi ja kutaghila. 31Konihoku nde Ibulahimu na Sala nhwanu waki kobhataghakike, konihoku nde kobhataghakiki Isaka na Lebeka nhwanu wake, na konihoku nde konuntaghiki Lea. 32Ngonda ghonihoghu papamu na likolu lelibhi mkati jaki lelakahemaliki kuhuma kwa Bhahiti.” 33Yakobo paakajomwi kulongela malobhi ghanihagha kwa bhana bhake, akakunjiki magholu ghaki pachitanda, na kupotela, na kubhonganwa kwa bhandu bhake.
Currently Selected:
Utumbulilu 49: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.
