Bhalawi 25
25
Chaka cha Saba
Kombukombu la Tolati 15:1-11
1Bambo Chapanga akumpwaghi Musa pa chitombi cha Sinai, 2“Ubhapwaghila Bhaizilaeli, ‘Pamwijingilaje mu nchi jeananumpekeya mwanganya, inchi jeni jipalika jighonalyaje ngati Sabato kwa ndandi jaka Bambo Chapanga. 3Ndemaje mighonda jinu kwa hyaka sita, mpandaji, nkulaghalyaji mizabibu jinu na kuhuna mahunu ghinu. 4Nambu chaka cha saba ipalika inchi jikubha na Sabato ja kupomulela, nde Sabato kwaka Bambo Chapanga. Ngamwipanda imbeju mu mighonda jinu, wala ngamwiheketa mambandi gha mizabibu jinu. 5Ngamwihuna wala kubheka akiba chokapi chela chekimeliki cheni, wala kuhuna na kusindika zabibu ambayu mwehapa ngachemwakulaghali mighonda jaki. Inchi jipalika jikubha na chaka cha kupomulela. 6Chokapi chela chechimela cheni mu chaka cha Sabato anachikubha chilebhi chinu mabheti, bhatumika bhinu bha chikambaku na bha chimbomba, bhatumika bhamubhaajili, na bhagheni bhabhatama pachilanda jinu. 7Bhelabhela inchi anajileha hinyama hinu ya kudimakika na hinyama ya muchitengu. Chindu chokapi chechimelaje mu inchi chiweza kuleleka.’ ”
Chaka cha Jubilii, yani hyaka hamsini
8Mwibhalanga hyaka saba ya Sabato, yani hyaka saba mala saba, anampata hyaka saba ya Sabato kwinu, na jumula jaki nde hyaka alobaini na tisa. 9Bhela, mu lichobha la komi la mwehi wa saba, ambalu nde Lichobha la Ujonganesu muntuma mundu kulapu lipenga mu inchi jokapi. 10Chaka cha hamsini ipalika mchitopilaje kwa kutangaza kulijeka kwa bhatumwa bhokapi mu inchi. Chaka chenihechi anachikubha chaka cha Jubilii kwinu. Kila jumu winu anaimpalika kukelabhuka kwa bhandu bha lukolu lwaki. 11Chaka chenihechi cha hamsini anachikubha Jubilii kwinu, ngamwipanda wala ngamwihuna chokapi chela chekimeliki cheni, wala ngamwihuna zabibu ambayu ngachemwikulaghalile. 12Kwa kubha chaka chenihechi nde Jubilii kwinu, bhela anachikubha chaka chihuhu kwinu. Henu mwikula chela chekimela cheni mungonda.
13Mu chaka chenihechi cha Jubilii, kila chindu chechahemaliwi chipalika mchikelabhuha kwaka mweni chaki.
14Bhela ngati anaundombasi njaku chokapi chela, au anauhemili chokapi chela kuhuma kwaka njaku, ngawamponja. 15Uhemala ngonda kuhuma kwa mwenehi kulengana na ubhalangiku wa hyaka baada ja Jubilii. Najombi alombisa kwaku kulengana na ubhalangiku wa hyaka yeihighalile ya kuhuna mahunu. 16Hyaka anaibhi yamaheli, ujonjukya bei, na hyaka inaibhi ichoku, uheliya bei, maghambu chela cheakulombasela chakaka nde mahunu ghaghaweza kuhunakika monihomu. 17Ngamwiponjana, nambu munjoghupa Chapanga winu. Nepani nde Bambo Chapanga, Chapanga winu.
Litatizu la chaka cha saba
18Bhela, njengalya amuli yangu, na kughakamu malaghalakilu ghangu, nahuli mpata kutama kwa lukwale mu inchi. 19Bhela inchi anajipiha mahunu ghaki nanamu anamkula na kutupila monihomu kwa lukwale.
20“Muweza kulalukila, ‘Bho, anatukula kike mu chaka cha saba, ngati ngacheitupalika kupanda mahunu wala kuhuna mahunu ghito?’ ” 21Nepani Bambo Chapanga ananumpengalya mu chaka cha sita, nahuli mighonda jinu jipiha mahunu gha kunjaghanila kwa hyaka itatu nakanope. 22Chikahi pamwipanda mu chaka cha nane, anamkula mahunu gha mwandi na ananjendalya pe kula hata mu chaka cha tisa pamwihuna mahunu ghinu.
23Ngonda waku ngawilombesa kwa mkataba wa kutamakila ng'o, maghambu mighonda nde mali ghango, na mabhanganya nde bhagheni na mwempeta mu inchi jango.
Kukelabhuha mighonda
24Pandu pokapi pala pa inchi pamwikamula kubha pinu, impalika mkubhaje na ntetu wa kujikombo inchi. 25Anakubhi jumu wa bhabhelakeka bha inchi jaku abhi kahochu na anaalombisi mali ghaki ghakumu, bhela, ndongu waki wa pambipi anaimpalika kukombola chela chealombisi ndongu waki. 26Anangati mundu jonihoju ngacheabhi na ndongu wa pambipi wa kuweza kukombola mali ghanihagha kwa ndandi jaki, nambu anaakangami mweni na kuweza kughakombola, 27bhela, abhalanga kabhete samani jaki kutumbu paakalombisi, na kulepa chela chechihighalile cha samani jaka mundu jola joakabhi andombasi mali ghanihagha, najombi anaaweza kukelabhuha kwaki. 28Nambu ngati ngacheabhi na uwezu wa kujikombola, bhela mali ghala ghaalombisi anaghajendalya kubha ghaka jola joahemile mbaka chaka cha uwangalalu wa Jubilii. Mali ghanihagha anaghalekakiwa mu chaka cha Jubilii, na kujendalela kubha ghaka jola joakalombise.
29Ngati mundu anaalombisi nyumba jejibhi mkati ja muchi ghouyongalitwi na lumatu, jombi aweza kujikombola mu chaka chimu kutumbu paakalombisi nyumba jeniheji. Kwa chaka chenihechi chokapi aweza kujikombola. 30Ngati nyumba jeniheji ngachejikombuliwi mu chaka chimu hechi, bhela, nyumba jeniheji jejibhi mkati ja muchi ghoubhi na lumatu, anajijendalya kubha jaka mundu jola joahemili mileli kwa ibhelelu yaki yokapi. Ngaipaliki kujikelabhuha mu chaka cha uwangalalu wa Jubilii. 31Nambu nyumba yeibhi kwijiji, yangakuyongalotwa na lumatu anaibhalangika ngati mighonda. Yeniheyi iweza kukombulewa, na iweza kulekakewa mu chaka cha Jubilii. 32Hata bhela, nyumba yeibhi mu michi ja Bhalawi, iweza kukombulewa mu chikahi chokapi chela. 33Bhela mali gha Bhalawi ghaweza kukombulewa, yani nyumba jejihemaliwi mu muchi wokapi ghola ghobhatama, ghalekakiwaje mu chaka cha Jubilii, maghambu nyumba yeibhi mu michi ja Bhalawi nde pandu pabhu kuhuma kwa bhandu bha Izilaeli. 34Nambu pandu pa kulekeha hinyama yabhu pabhatama Bhalawi ngapihemalewa, ndandi panihapa nde upwelelu wabhu mileli.
Kubhajahika akakahochu
35Ngati njaku anaabhi kahochu, hata anaalepali kulighoha mweni pachilanda jaku, ikupalika unjangatyaje nahuli ajendalya kutama, untendila ngati ngeni au mpeta indela joabhi kwaku. 36Ngawanjopa akulepa liba jokapi jela, nambu unjoghupa Chapanga waku, nahuli njaku najombi ajendalya kutama pachilanda jaku. 37Ngawanjahika mbija nahuli alepa na liba, wala ngawanjahika chilebhi nahuli alepa na liba. 38Nepani nde Bambo Chapanga, Chapanga waku, nenukuletiki kuhuma ku inchi ja Misili nahuli nukupekya inchi ja Kanaani, na nepani mbata kubha Chapanga waku.
Kubhalekakela kulijeka kwa bhatumwa
39“Ngati njaku joatama pambipi na wehapa anaabhi kahochu, anaalilombisi kwaku, ngawantenda akutumakya ngati mtumwa. 40Kwaku wehapa anaakubha ngati muhengalihengu waku au ngati mpeta indela. Jonihoju anaatumika mbaka chaka cha Jubilii. 41Panihapa jombi na bhana bhaki anabhalekakiwaje, najombi anaakelabhuka kwa bhandu bha lukolu lwaki, na koghabhi mali gha akatati bhaki. 42Maghambu Bhaizilaeli nde bhatumika bhangu bhanabhaletiki kuhuma ku inchi ja Misili, bhela, ngabhihemalewa ngati bhatumwa ng'o. 43Ngaubhatendela bhajaku kwa makili, nambu unjoghupa Chapanga waku. 44Ngati anaupala kubha na bhatumwa, bha chimbomba au bha chikambaku, ubhahemala kuhuma ku inchi yengi yeyukuyongalota. Kuhuma kwabhu uweza kubhaheme bhatumwa. 45Bhelabhela uweza kubhaheme bhatumwa kuhuma kwa bhagheni bhabhatama papamu na wehapa, na bhalongu bhabhu bhabhabhelakiki mu inchi jinu, nabhombi anabhakubha mali ghaku. 46Bhatumwa bhanihabha uweza kubhapekeha bhana bhaku kubha mali ghabhu mileli. Bhanihabha uweza kubhatenda kubha bhatumwa bhaku, nambu bhalongu Bhaizilaeli bhajaku, ngaubhatendela kwa makili.
47“Ngati ngeni au mpeta indela joatama pachilanda jaku anaabhi na hindu yamaheli, na Muizilaeli njaku anaabhi kahochu, na kulilombesa kwaka ngeni hoju au kwaka mpeta indela au kwa bhalongu bhabhu bha ngolu ya chigheni, 48anaajomwi kuhemalewa aweza kukombulewa, mundu jumu pachilanda ja bhalongu bhaki aweza kunkombola. 49Nijaja waki au binamu waki, au jokapi jola joabhi ndongu wa mwahi mu lukolu lwaki aweza kunkombola. Au anangati mweni abhi na hindu yamaheli, aweza kulikombola. 50Jombi papamu na joanhemi hoju, bhabhalanga hyaka kutumbu paakalilombisi kwaka mundu hoju mbaka chaka cha Jubilii. Samani ja kulekakewa kwaki anajilengana na ubhalangiku wa hyaka yeatumike. Chikahi cheabhi mtumwa waka bambo waki anachitumika ngati chikahi chaka mtumika wa kuajiliwa. 51Ngati anaihighali hyaka yamaheli kuhika mu chaka cha Jubilii, anaimpalika kulepa pakolongwa nakanopi, kubhokana na bei jejakatumiki kunhemela. 52Ngati hyaka yeihighalili nde ichokopi kuhika mu chaka cha Jubilii, anaahenga ubhalangiku waki, najombi anaalepa malepu ghaghapalika kwa ndandi ja kukombulewa kwaki. 53Chikahi chokapi paanakubha kwaka bambo waki, ipalika ahengiwaje ngati mtumika joajiliwe kila chaka. Mundu hoju joanhemili ngaantawala kwa makili. 54Nambu anangati mundu jonihoju au bhalongu bhaki ngachebhakombuliwi kwa indela jeniheji, bhela jombi papamu na bhana bhaki bhapalika bhalekakiwaje mu chaka cha Jubilii. 55Kwa kubha Bhaizilaeli nde bhatumika. Bhombi nde bhatumika bhangu bhanakabhohiki kuhuma ku inchi ja Misili. Nepani nde Bambo Chapanga, Chapanga waku.
Currently Selected:
Bhalawi 25: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.