Bhalawi 8
8
Kuhimikwa kwaka Haluni na bhana bhaki
Kubhoka 29:1-37
1Bambo Chapanga akumpwaghi Musa, 2“Undetila Haluni na bhana bhaki ingobhu yabho, mahuta gha kupaka, ng'ombi likambaku kwa ndandi ja nyambiku ja mahoku, mambeleli makambaku ghabheli na chitonga chechibhi na mabumunda ghaghalenganakiwi panga na amila. 3Bhela ubhabhongana bhandu bhokape bhabhabhile pa ndyangu wa kujingalila pa Lihema Lihuhu.” 4Musa akatendiki ngati Bambo Chapanga moakundaghalakili, lipogha la bhandu lakabhonganiki papamu pu ndyangu wa kujingalila mu Lihema Lihuhu. 5Musa akalipwaghi lipogha, “Haleli nde Bambo Chapanga leakalaghalaki litendakikaje.”
6Bhela Musa akundetiki Haluni na bhana bhaki palongi, na kubhagholola kwa machi ngati mowabheli ntetu wabhu. 7Bhela Haluni akawatikwi likanzu na kulikonga kwa ulamba, akunhwatiki lijoho, na chizibau na kuchikonga kwa ulamba ghoulenganakiki wichu namaa mu chibhunu chaki. 8Akumbekiki chifuku panani ja pachihimba chaka Haluni na mkati ja chifuku hechi akabhekiki maganga ghabheli gha Ulimu na Tumimu gha kulaluki ghala ghaaghapala Chapanga. 9Kabheti Haluni akawatikwi mbumbu mmutu wake, na panani ja mbumbu, upambala wa palongi akabhekiki lilobha la zahabu lela, na litaji lihuhu lela, ngati Bambo Chapanga moakundaghalaki Musa.
10Bhela Musa akatoliki mahuta gha kupaka na kulipaka Lihema na kila chindu chechakabhi mkati jaki, bhela akaibhekiki palongi jaka Bambo Chapanga. 11Akamichiki mahuta ghakumu panani ja pandu pakubhokeha nyambiku mala saba, akapakihi mahuta pandu pakubhokeha nyambiku na yombu yaki yokapi papamu na liteleku na chitamilu chaki, nahuli kuibheka palongi jaka Bambo Chapanga. 12Akunjitalili mahuta ghakumu hagha panani ja mmutu waka Haluni, nahuli kumbeka palongi jaka Bambo Chapanga. 13Bhela Musa akabhaletiki bhana bhaka Haluni, na kubhawatika likanzu na kubhakonga ulamba na kubhawatika mbumbu, ngati Bambo Chapanga moakundaghalaki Musa.
14Bhela Musa akaletiki ng'ombi likambaku ja nyambiku ja kubhoha mahoku, najombi Haluni na bhana bhaki bhakabhekiki mabhoku ghabhu panani ja mmutu wa ng'ombi heji. 15Musa akachinjiki ng'ombi heji, akatoliki mwahi akaupakiti mu manyelu gha pandu pa kubhokeha nyambiku ipambala yokapi kwa lukonji lwaki nahuli kupagholola. Bhela akatoliki mwahi ghoukahighalili akaujitili pahi ja pandu pa kubhohakeha nyambiku ambaju akaibhekiki palongi yaka Bambo Chapanga nahuli kutenda ujonganeshu kwa ndandi jaki. 16Bhela Musa akatoliki mahuta ghokapi ghaghayongolota pandu pokapi pa mkati, mahuta ghaghayekalela imani, figu yokapi ibheli, na mahuta ghaki na kughajocha panani ja pandu pa kubhohakeha nyambiku. 17Nambu inyama ja ng'ombi heji, chingumba chaki na imahi ghaki, akaijochiki kwa moto kunja ja likambi, ngati moakalaghalakiwi na Bambo Chapanga. 18Bhela Musa akandetili limbeleli likambaku kwa ndandi ja nyambiku ja kujochakeka, Haluni na bhana bhake bhakabhekiki mabhoku ghabho panani ja mmutu wa limbeleli heli. 19Musa akalichinjiki na mwahi wa limbeleli heli akaumichiki mu ipambala yokapi ya pandu pokapi pa kubhokeha nyambiku. 20Akalihekiti limbeleli heli ipandi ipandi, na akaijochiki papamu na mmutu waki na mahuta ghaki. 21Bhela paakagholwi matumbu na magholu kwa machi, Musa akaijochiki yokapi heyi panani ja pandu pakubhokela nyambiku papamu na hindu yengi ya limbeleli heli ngati nyambiku ja kujochakeka. Jeniheji nde nyambiku jejibhohakeka kwa moto, jejibhi na unungilu wa kunyambiha Bambo Chapanga. Musa akatendiki ngati moakalaghalakiwi na Bambo Chapanga.
22Bhela akaliletiki limbeleli likambaku lengi, kwa ndandi ja kubhahimika kubha bhapenganyambiku palongi jaka Bambo Chapanga. Haluni na bhana bhaki bhakabhekiki mabhoku ghabhu panani ja mmutu wa limbeleli heli. 23Musa akalichinjiki limbeleli likambaku lela na kutola pandu pa mwahi wa limbeleli lela na kupaka panani ja likutu la kumalelelu laka Haluni na panani ja lukonji lukolongwa lwa chibhoku cha kumalelelu, na panani ja lukonji lukolongwa lwa chigholu cha kumalelelu. 24Bhana bhaka Haluni nabhombi bhakahikiki, najombi Musa akabhapakiki mwahi uchokopi panani ja makutu ghabhu gha kumalelelu, ngonji ikolongwa ya mu mabhoku ghabhu gha kumalelelu na mu ngonji ikolongwa ya magholu ghabhu gha kumalelelu. Mwahi ghowahighalili akaumichili mu ipambala yokapi ya pandu pa kubhokeha nyambiku. 25Akatoliki mahuta gha chinyama, mahuta gha nkela, mahuta ghokapi ghaghayongolota pandu pa mkati, mahuta ghaghahyekalela pandu panyahi pa imani, figu yokapi ibheli, papamu na mahuta ghaki na lipaja la chigholu cha kunyuma cha kumalelelu cha limbelei likambaku heli. 26Bhela, kuhuma mu chitonga cha mabumunda ghaghalenganakiwi panga amila, chechakabhi palongi jaka Bambo Chapanga, akatoliki libumunda limu, na lengi lelakalenganakiwi kwa mahuta gha zeituni, na libumunda lipepandau, akaibhekiti yokapi panani ja mahuta gha zeituni, na panani ja lipaja la chigholu cha kumalelelu la kunyuma. 27Akaibhekiki yokapi heyi mu mabhoku ghaka Haluni na bhana bhake, na kuikweha palongi jaka Bambo Chapanga kubha nyambiku ja kujinuliwa. 28Bhela Musa akaitoliki hindu yokapi heyi kuhuma mu mabhoku ghabhu na kuijocha panani ja pandu pa kubhohakea nyambiku papamu na nyambiku ja kujochakeka. Hajeji nde nyambiku ja kubhekakeka palongi jaka Bambo Chapanga, nde nyambiku jejibhowakeka kwa moto. 29Bhela Musa akatoliki chihimba chela, na kutenda nginyulila ja kumbokela Bambo Chapanga. Pandu pa limbeleli likambaku lela la kujinuliwa palongi jaka Bambo Chapanga nde lelakabhi laka Musa ngati Bambo Chapanga moakundaghalaki Musa.
30Bhela Musa akatoliki mahuta gha kupaka na mwahi kuhuma pandu pa kubhokeha nyambiku, akummichili Haluni na ingobhu yaki. Bhela Musa akumbekiki palongi jaka Bambo Chapanga Haluni na bhana bhaki papamu na ingobhu yabhu.
31Bhela Musa akumpwaghili Haluni na bhana bhaki, “Telaka inyama heji pu ndyangu wa Lihema Lihuhu na ukulaje panihapa papamu na libumunda kuhuma mu chitonga cha nyambiku ja kubhekakeka palongi jaka Bambo Chapanga, ngati monaghalakile, ‘Haluni na bhana bhaki anabhakulaje.’ 32Bhela ujochaje inyama na mabumunda ghaghahighalile. 33Ngamwibhoka pundyangu wa Lihema Lihuhu kwa machobha saba, mbaka lichobha linu la kubhekakeka palongi jaka Bambo Chapanga palikubha lihikiki, kwa ndandi chikahi chinu cha kubhekakeka palongi jaka Bambo Chapanga anachibya machobha saba. 34Lela lelitendakiki lalenu lakalaghalakiwi na Bambo Chapanga nahuli kutenda ujonganesu kwa ndandi jinu. 35Impalika mtama pundyangu wa Lihema Lihuhu ikilu na muhi kwa machobha saba, na kutenda lela Bambo Chapanga lealipala, nahuli ngamwipotela, kwa kubha leniheli nde lenaghalakiwi.” 36Bhela, Haluni na bhana bhake bhakahengiki mambu ghanihagha ghokapi ghabhalaghalakiwi na Bambo Chapanga kwa indela jaka Musa.
Currently Selected:
Bhalawi 8: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.