ᒨᓯᓯ ᐂᑉᐸᖏᑦ 18
18
ᔨᑐᕉᑉ ᐳᓛᕆᐊᕐᓂᖓ ᒨᓯᓯᒧᑦ
1ᒨᓯᓯᐅᑉ ᓴᑭᖓ ᔨᑐᕉ, ᑐᓂᕐᕈᓯᕐᑎᑦᓯᔨᐅᔪᖅ ᒥᑎᐊᓂᒥ, ᑐᓴᕋᒥ ᖃᓄᖅ ᒎᑎᐅᑉ ᐱᓇᓱᐊᕐᓯᒪᓂᖓᓂᒃ ᒨᓯᓯᒧᑦ ᐃᓴᕆᐊᓕᒥᐅᓪᓗ ᐃᓄᖏᓐᓄᑦ, ᖃᓄᕐᓗ ᐊᑕᓂᖅ ᐃᓴᕆᐊᓕᒥᐅᓂᒃ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᓂᖓᓂᒃ. 2#ᒨᓯᓯ ᐂᑉᐸᖏᑦ 2:21,22.ᑕᕝᕙ ᒨᓯᓯᐅᑉ ᓴᑭᖓ, ᔨᑐᕉ ᐸᕐᓇᓕᕐᐳᖅ, ᓯᐴᕋ ᒨᓯᓯᐅᑉ ᓄᓕᐊᖓ ᓇᒃᓴᕐᓗᓂᐅᒃ, ᑖᒃᑯᐊ ᕿᒪᒃᑕᐅᓯᒪᓚᐅᕐᒪᑕ, 3#ᐋᐴᓯᑕᓖᑦ 7:29.ᐃᕐᓂᖏᒃ ᒪᕐᕉᒃ ᐃᓚᒋᓪᓗᒋᒃ, ᐊᑎᖃᕐᑑᒃ ᒌᕐᓲᒻ ᐊᒻᒪᓗ ᐃᓕᓵ, (ᒌᕐᓲᒥᒃ ᐊᑦᑎᕋᒥᐅᒃ ᒨᓯᓯ ᐅᖃᓚᐅᕐᐳᖅ, “ᓄᓇᖃᕋᒪ ᐃᓅᖃᑎᑐᖃᕆᓐᖏᑕᓐᓂ”), 4ᐂᑉᐸᖓᑕᓕ ᐊᑎᖓ ᐃᓕᓵᐅᕗᖅ, (ᐃᓔᓯᕆᒥᒃ ᐊᑦᑎᕋᒥᐅᒃ ᒨᓯᓯ ᐅᖃᓚᐅᕐᐳᖅ, “ᓯᕗᓕᕆᓚᐅᕐᑕᒪ ᒎᑎᖓ ᐃᑲᔪᕐᑎᒋᕙᕋ, ᑖᑦᓱᒪᓗ ᓴᐳᑎᓪᓗᖓ ᐰᕉᑉ ᓴᕕᒃᔪᐊᖓᓂᑦ”). 5ᑕᕝᕙ ᔨᑐᕉ ᒨᓯᓯᐅᑉ ᓴᑭᖓ, ᒨᓯᓯᐅᑉ ᐃᕐᓂᖏᖕᓂᒃ ᓄᓕᐊᖓᓂᒡᓗ ᐃᓚᖃᕐᓗᓂ ᑎᑭᓕᕐᐳᖅ ᒨᓯᓯᒃᑯᑦ ᐃᓄᖃᖏᑦᑐᒥ ᑕᖕᒫᕐᓯᒪᑎᓪᓗᒋᑦ ᒎᑎᐅᑉ ᖃᖅᑲᖁᑎᖓᑕ ᑭᒡᓕᖓᓂ. 6ᔨᑐᕉᓕ ᑎᓕᓯᓚᐅᕐᐳᖅ ᒨᓯᓯ ᐅᖃᐅᑦᔭᐅᖁᓪᓗᒍ, “ᓴᑮᑦ ᔨᑐᕉ ᑎᑭᓕᕐᒪᑦ ᐃᓕᖕᓄᑦ ᓄᓕᐊᑦ ᐃᕐᓂᖏᓪᓗ ᒪᕐᕉᒃ ᐃᓚᒋᓪᓗᒋᑦ.” 7ᒨᓯᓯᐅᓪᓗ ᓴᑭᓂ ᐸᕐᕆᐊᕐᐹ, ᓵᖓᓄᓪᓗ ᐅᑯᓪᓗᓂ, ᒪᑭᓐᓇᒥ ᐃᕿᓪᓗᒍ ᑯᓂᒃᐹ, ᐃᒻᒥᖕᓄᓪᓗ ᖃᓄᐃᖏᒻᒪᖔᕐᒥᖕᓂᒃ ᐊᐱᕐᓱᖃᑦᑕᐅᑎᓚᐅᕐᓗᑎᒃ, ᑐᐱᕐᒧᑦ ᐃᑎᓕᕐᐳᑦ. 8ᒨᓯᓯᐅᓪᓗ ᓴᑭᓂ ᐅᓂᒃᑲᐅᑎᓕᕐᐹ ᐊᑕᓂᐅᑉ ᐱᓇᓱᐊᓚᐅᕐᑕᓕᒫᖏᓐᓂᒃ ᐰᕉᒧᑦ ᐄᑦᔨᑉᑎᒥᐅᓄᓪᓗ ᐃᓴᕆᐊᓕᒥᐅᑦ ᐱᑦᔪᑎᒋᓪᓗᒋᑦ, ᐅᓂᒃᑲᐅᑎᒋᓪᓗᓂᐅᒡᓗ ᐃᓴᕆᐊᓕᒥᐅᑦ ᖃᓄᖅ ᐅᖁᒤᑦᑐᒃᑰᕐᓯᒪᓂᖏᓐᓂᒃ ᐃᖏᕐᕋᓕᕐᑎᓪᓗᒋᑦ ᖃᓄᕐᓗ ᐊᑕᓂᕐᒧᑦ ᓴᐳᑎᔭᐅᓯᒪᓂᕐᒥᖕᓂᒃ. 9ᔨᑐᕉᓗ ᖁᕕᐊᓱᒻᒪᕆᓕᕐᐳᖅ ᐊᑕᓂᐅᑉ ᐱᐅᔪᐊᓗᖕᒥᒃ ᐱᓇᓱᐊᕐᓯᒪᓂᖓᓂᒃ ᐃᓴᕆᐊᓕᒥᐅᓄᑦ, ᐄᑦᔨᑉᑎᒥᐅᓂᓪᓗ ᐊᓂᑎᑕᐅᓯᒪᓂᖏᓐᓂᒃ. 10ᔨᑐᕉᓗ ᐅᖃᕐᐳᖅ, “ᐊᑕᓂᖅ ᓂᕐᑐᕐᑕᐅᓕ, ᐄᑦᔨᑉᑎᒥᑦ ᐊᓂᑎᑦᓯᓚᐅᕐᑐᖅ ᐰᕉᓪᓗ ᐱᔪᓐᓇᕐᓂᖓᓂᑦ! 11ᒫᓐᓇᓗ ᖃᐅᔨᕗᖓ ᐊᑕᓂᖅ ᐊᖏᓂᕐᓴᐅᖕᒪᑦ ᒎᑎᒋᔭᐅᔪᓕᒫᓂᑦ, ᐃᓄᐃᑦ ᐊᓂᑎᓚᐅᕐᒪᒋᑦ ᐄᑦᔨᑉᑎᒥᐅᑦ ᐱᔪᓐᓇᕐᓂᖏᓐᓂᑦ, ᑖᒃᑯᐊᓗ ᓂᑲᒋᔭᐅᖏᑦᑐᒻᒪᕆᐊᓘᑎᓪᓗᒋᑦ.” 12ᔨᑐᕉᓗ ᒨᓯᓯᐅᑉ ᓴᑭᖓ, ᑐᓂᕐᕈᑎᒃᓴᓂᒃ ᐃᑯᐊᓚᔭᒃᓴᓂᒡᓗ ᑐᓂᕐᕈᓯᓚᐅᕐᐳᖅ ᒎᑎᒧᑦ; ᐂᕉᓂᓗ ᕾᓚᐅᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐃᓚᒋᓪᓗᒋᑦ ᓂᕆᖃᑕᐅᓪᓗᑎᒃ ᑐᓂᕐᕈᑎᐅᔪᓂᒃ ᑕᒪᓐᓇᓗ ᑐᒃᓯᐊᕐᓂᕐᒧᑦ ᐃᓚᒋᔭᐅᑎᓪᓗᒍ ᐱᓂᐊᕐᓂᐅᓚᐅᐳᖅ ᒎᑎᐅᑉ ᓵᖓᓂ.
ᐋᖅᑭᒃᓱᐃᔨᓂᒃ ᑎᓕᓯᓂᖅ
ᒨᓯᓯ ᑕᓪᓕᒪᖏᑦ 1:9-18
13ᖃᐅᑎᓪᓗᒍ ᒨᓯᓯ ᐃᒃᓯᕙᓕᕐᐳᖅ ᐃᓄᖕᓂᒃ ᐋᖅᑭᒃᓱᐃᓂᕐᒥᒃ ᐱᓇᓱᐊᕐᓗᓂ, ᐃᓄᓕᕆᓚᐅᕐᐳᕐᓗ ᐅᓪᓛᒥᑦ ᐱᒋᐊᕐᓗᓂ ᐅᓐᓄᒧᑦ ᑎᑭᓪᓗᒍ. 14ᔨᑐᕉᓕ ᑕᑯᒐᒥ ᒨᓯᓯᐅᑉ ᐃᓄᖕᓄᑦ ᐱᓇᓱᐊᕆᐊᖃᕐᑕᖏᓐᓂᒃ, ᐊᐱᕆᓕᕐᐳᖅ, “ᖃᓄᐃᓕᐅᕋᓱᓕᕐᐱᑦ ᐃᓄᖕᓄᑦ? ᓱᖕᒪᑦ ᐃᓄᑑᓪᓗᑎᑦ ᑕᒪᑐᒥᖓ ᐱᓕᕆᕖᑦ? ᐃᓄᐃᑦ ᐅᓪᓛᒥᑦ ᐱᒋᐊᕐᓗᑎᒃ ᐅᓐᓄᒧᑦ ᑎᑭᓪᓗᒍ ᓇᖏᑐᐃᓐᓇᕐᐳᑦ ᐅᑕᖅᑭᓪᓗᑎᒃ ᐅᖃᖃᑎᖃᕈᒪᓪᓗᑎᒃ ᐃᓕᖕᓂᒃ?”
15ᒨᓯᓯᐅᑉ ᑭᐅᕚ, “ᑍᒤᓕᐅᕆᐊᖃᕋᒪ ᐃᓄᐃᑦ ᐅᕙᓐᓄᐊᖃᑦᑕᕐᒪᑕ ᖃᓄᖅ ᒎᑎᒧᑦ ᐱᖁᔭᐅᖕᒪᖔᕐᒥᒃ ᑐᑭᓯᔪᒪᓪᓗᑎᒃ; 16ᐊᑲᐅᖏᑦᔪᑎᒃᓴᖃᕐᑑᖕᓄᓪᓗ ᐃᓅᖕᓄᑦ ᒪᕐᕉᖕᓄᑦ ᐅᐸᒃᑕᐅᔭᕌᖓᒪ ᑐᑭᑖᕆᐊᖃᖃᑦᑕᕐᐳᖓ ᖃᓄᐃᓕᐅᕆᐊᖃᕐᒪᖔᑎᒃ, ᑐᑭᓯᑎᓪᓗᒋᓪᓗ ᖃᓄᖅ ᒎᑎᐅᑉ ᐱᖁᔭᖏᓐᓂᒃ ᒪᓕᒃᑕᐅᖁᔭᖏᓐᓂᒡᓗ.”
17ᒨᓯᓯᐅᓪᓕ ᓴᑭᖓᑕ ᔨᑐᕉᑉ ᐅᖃᐅᑎᕚ, “ᑕᒪᓐᓇ ᐱᓇᓱᐊᕐᓂᕆᔧᑦ ᓈᒻᒪᓈᕐᓯᒪᓐᖏᓚᖅ. 18ᑍᒤᓕᐅᕐᓂᐊᕈᕕᑦ ᐃᓕᖕᓂᒃ ᓱᒃᑯᑎᑐᐃᓐᓇᕐᓂᐊᕐᐳᑎᑦ, ᐃᓄᐃᓪᓗᑦᑕᐅᖅ. ᑕᒪᓐᓇ ᐃᓄᑑᑎᓗᒍ ᐃᓕᖕᓄᑦ ᐅᖁᒤᓗᐊᕐᐳᖅ, ᐃᓄᑑᓗᑎᓪᓗ ᑕᒪᑐᒥᖓ ᐱᓇᓱᐊᕈᓐᓇᑦᔮᓇᑎᑦ. 19ᒫᓐᓇᓕ ᐅᖃᐅᓯᕆᔭᓐᓂᒃ ᓈᓚᑦᓯᐊᓚᐅᕆᑦ ᐃᓱᒪᑖᑦᓯᐊᖁᓪᓗᑎᑦ, ᒎᑎᐅᓪᓗ ᐃᓚᒋᓂᐊᕐᐹᑎᑦ. ᓈᒻᒪᓈᑦᓯᐊᕐᐳᑎᑦ ᐃᓄᖕᓂᒃ ᐱᓇᓱᐊᕈᑦᔨᔨᐅᓗᑎᑦ ᒎᑎᐅᑉ ᓵᖓᓂ, ᐊᑲᐅᖏᑦᔪᑎᒋᔭᖏᓪᓗ ᒎᑎᒧᑦ ᑐᓂᖃᑦᑕᕐᓗᒋᑦ; 20ᐱᖁᔭᓂᒡᓗ ᐊᔪᕆᕐᑐᕐᑕᒃᓴᕆᕙᑎᑦ ᑐᑭᓯᑎᓪᓗᒋᓪᓗ ᖃᓄᖅ ᐃᓅᔪᒃᓴᐅᖕᒪᖔᑕ, ᖃᓄᐃᓕᐅᕐᑐᒃᓴᐅᖕᒪᖔᑕᓗ. 21ᐃᓄᖕᓂᓪᓕ ᓂᕈᐊᕐᑐᒃᓴᐅᕗᑎᑦ ᐱᔪᓐᓇᑦᓯᐊᕐᑐᓂᒃ, ᒎᑎᒥᒡᓗ ᓈᓚᑦᓯᐊᕐᑐᓂᒃ, ᐅᒃᐱᕆᔭᒃᓴᐅᑦᓯᐊᕐᑐᓂᒃ ᓯᓔᕐᕆᔭᐅᔭᖏᑦᑐᓂᒡᓗ; ᑍᒤᑦᑐᑦ ᑕᓯᐅᕐᑎᓐᖑᕐᑎᓚᐅᒃᑭᑦ ᐃᓄᖕᓄᑦ 1,000ᓄᑦ, ᐃᓚᖏᑦ 100ᓄᑦ, ᐃᓚᖏᓪᓗ 50ᓄᑦ, ᐃᓚᖏᓪᓗ 10ᓄᑦ. 22ᑖᒃᑯᐊᓗ ᑍᒤᑦᑐᑦ ᐃᓄᖕᓂᒃ ᐋᖅᑭᒃᓱᐃᔨᓐᖑᕐᑎᓚᐅᒃᑭᑦ ᑍᒤᖏᓐᓇᓕᕐᓗᑎᒡᓗ ᑍᒪᓐᖓᑦ, ᐃᕝᕕᓪᓕ ᐱᔭᕐᓂᕆᔭᐅᖏᑦᑐᓂᒃ ᑭᓯᐊᓂ ᑐᓂᓯᕕᐅᖃᑦᑕᓕᕐᓗᑎᑦ, ᑕᒪᒃᑯᐊᓕ ᐱᔭᕆᐊᑭᓐᓂᖏᑦ ᐃᒻᒥᖕᓂᒃ ᐱᓕᕆᐊᕆᔭᒃᓴᕆᕔᑦ; ᑕᒪᓐᓇ ᐃᓕᖕᓄᑦ ᐅᕿᓐᓂᕐᓴᐅᓕᖁᓪᓗᒍ, ᐅᖁᒤᑦᑐᓕᕆᓂᕐᒥᒡᓗ ᐃᓕᖕᓄᑦ ᐱᓇᓱᐊᖃᑕᐅᓕᕋᔭᕐᐳᑦ ᐃᑲᔪᕐᑎᒋᓕᕐᓗᒋᓪᓗ. 23ᑍᒤᓕᐅᕈᕕᑦ ᑕᕝᕙ, ᒎᑎᒧᑦ ᐱᖁᔭᐅᓯᒪᓂᕐᓂᒃ ᐱᓕᕆᑦᓯᐊᕈᓐᓇᕐᓂᐊᕐᐳᑎᑦ, ᐃᓕᖕᓂᒡᓗ ᓱᒃᑯᑎᑐᐃᓐᓇᖏᓪᓗᑎᑦ, ᐅᑯᐊᓗ ᐃᓄᓕᒫᑦ ᓮᒻᒪᑦᓯᐊᕐᓗᑎᒃ ᐊᖏᕐᕋᖃᑦᑕᕐᓂᐊᕐᐳᑦ.”
24ᒨᓯᓯᐅᓪᓗ ᓴᑭᒥ ᐅᖃᐅᓯᕆᔭᖏᑦ ᐃᓚᓕᐅᕐᐰᑦ, ᐱᓇᓱᐊᕈᑎᒋᓕᕐᓗᒋᓪᓗ ᐃᓱᒻᒥᕐᑐᐃᑦᔪᑎᒋᔭᖏᑦ. 25ᒨᓯᓯᓗ ᓂᕈᐊᕐᐳᖅ ᐊᖑᑎᓂᒃ ᐱᔪᓐᓇᑦᓯᐊᕐᑐᓂᒃ ᐃᓴᕆᐊᓕᒥᐅᓂᑦ, ᐃᓄᖕᓄᓪᓗ ᑕᓯᐅᕐᑎᓐᖑᕐᑎᓪᓗᒋᑦ, ᐃᓚᖏᑦ 1,000ᓄᑦ, ᐃᓚᖏᓪᓗ 100ᓄᑦ, ᐃᓚᖏᓪᓗ 50ᓄᑦ ᐃᓚᖏᓪᓗ 10ᓄᑦ. 26ᑖᒃᑯᐊᓗ ᐃᓄᖕᓄᑦ ᐋᖅᑭᒃᓱᐃᔨᒋᔭᐅᓕᓚᐅᕐᐳᑦ ᑍᒤᓕᐅᖏᓐᓇᓕᕐᓗᑎᒡᓗ ᑍᒪᓐᖓᑦ; ᐊᑲᐅᖏᑦᔪᑎᐅᔪᓪᓕ ᐱᔭᕐᓂᖏᑦᑐᑦ ᒨᓯᓯᒧᑦ ᑐᓂᖃᑦᑕᕐᐰᑦ, ᐱᔭᕆᐊᑭᓐᓂᕐᓮᓪᓕ ᐃᒻᒥᖕᓂᒃ ᐱᓇᓱᐊᖃᑦᑕᕐᓗᒋᑦ.
27ᑕᕝᕙ ᒨᓯᓯᐅᑉ ᓴᑭᓂ ᔨᑐᕉ ᐊᐅᓪᓚᕈᒪᓕᕐᒪᑦ ᑕᕝᕙᐅᕗᑏᕐᐹ, ᔨᑐᕉᓗ ᓄᓇᒥᓄᑦ ᐅᑎᓕᕐᐳᖅ.
Currently Selected:
ᒨᓯᓯ ᐂᑉᐸᖏᑦ 18: EAIB
Highlight
Share
Compare
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
