1 Abakorinzo 3
3
Abasanjilani mumilimo chiaNyasaye
1Nasi, baana beefwe, shindanyala okhusungana nineenywe shingana ousungana nende abeshiroho ta, habula abomubili, kata abali abatoro mumakhuwa kaKristo. 2Ndamunyweesia amabeele, ne shindamuliisia ebiliibwa; okhuba shimwakhabinyalile tawe; toto, ne kata bulaano shimunyala ta; 3okhuba mushilinji mumela yomubili; shichila olwa imbalikha nobusoolo bishili mwinywe, kho shimuli abomubili, nimuchendanga shinga abandu nabandu? 4Okhuba olwa mulala aboola ari Isie endi owaPaulo; noundi, ari Isie endi owaApolo; shimuli butswa abandu? 5Ne Apolo niwina? Kata Paulo niwina? Mbula, nabakhalabani abachila nimwasuubila; buli mulala shinga Omwami olwa yamuheelesia. 6Isie ndaraaka, Apolo natsushiilila amatsi; ne Nyasaye niye owachikhusia. 7Kho ouraaka shiali eshindu, kata outsushiilila amatsi, tawe; habula Nyasaye oukhusinjia. 8Ne ouraaka nende outsushiilila amatsi nabalala; ne balanyoola buli mundu omurungokwe, obunyakhanibwe shinga olwa bwalinji. 9Shichila ifwe khuli abasanjilani mumilimo chiaNyasaye; inywe muli inimilo yaNyasaye: muli inyumbashe yaNyasaye.
10Khulwa obukoosia bwaNyasaye obwa ndaheebwa, isie ndakhupa omuse shinga omuumbashi omusitsa; mana oundi yoombakhakhwo. Nebutswa buli mundu ayililisie bulayi shinga olwa yoombakhakhwo. 11Kubulaho omuse kundi okwa omundu yesi anyala okhuupa ta, habula okwenokwo okumalile okhuupwa, nikwo Yesu Kristo. 12Ne omundu yesi naba niyoombakha khumuse okwo itsahaabu, ifeetsa, amachina kobukusi obutinyu, emisaala, obunyasi, kata olububa, 13emilimo chiabuli mundu chilimanyishila ebulafu; okhuba Induukho yene yilichilolosia, shichila eyene yilafwimbulilwa mumulilo; nakwo omulilo kulateema emilimo chiabuli mundu shinga olwa chili. 14Emilimo chiomundu yesi echia yoombakhakhwo nichiba nichilimenya, alanyoola omurungo. 15Emilimo chiomundu yesi nichiba nichiliyia, ye alafwilwa; ne omwene alahonibwa, habula shinga oubiriile mumulilo.
16Shimumanyile mbu muli ihekalu yaNyasaye, khandi mbu Roho waNyasaye amenyanga mwinywe? 17Omundu yesi naba nasasia ihekalu yaNyasaye, naye Nyasaye alimusasia ye; okhuba ihekalu yaNyasaye neindakatifu; ne ninywe ihekalu tsana.
18Omundu yesi aleshe okhwikaatia. Oundi yesi khwinywe naba niyeelola mbu nomuchesi mushialo muno, asiluhale, mbu mana achesihale. 19Okhuba obuchesi bweshialo shino nobusilu imbeli waNyasaye. Shichila kahandiikwa, kari Atiilanga abachesi mubuchesichesi bwabwe. 20Khandi kari Omwami wamanya obukanakanii bwabachesi, shinga olwa buli obukhaya. 21Khulwako, omundu yesi aleshe okhwiyitsialila abandu. Okhuba biosi nebieenywe; 22kata nali Paulo, kata Apolo, kata Kefa; kata eshialo, kata obulamu, kata okhufwa; kata ebiliho bulaano, kata ebiitsa okhubaho; biosi nebieenywe; 23neenyu muli baKristo; naye Kristo nowaNyasaye.
Currently Selected:
1 Abakorinzo 3: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975