1 Abakorinzo 4
4
Obukhalabani bwabarume
1Kho abandu bapaare khwifwe shinga olwa khuli abakhalabani baKristo khandi abasinjilili bamabiso kaNyasaye. 2Kho ngaho, omusinjilili akhoyile okhunyoolwa nali omwisiikwa. 3Ne khulwanje nelikhuwa lituutu muno okhunoonelesibwa nineenywe, kata mushiina shiabandu; kata shindinoonelesinjia omwene ta. 4Shimanyile likhuwa liosi libii elia endi ninalio ta; ne elo shilichila nimbasilibwa obulunjishi tawe; habula ounoonelesinjia nOmwami. 5Khulwako murakhalaka likhuwa liosi induukho niyirashioola ta, okhuula olwa Omwami yeetsa; naye alakhosia obulafu khukabisilwe akeshiilima, nalolosia tsiyemi tsiemioyo; mana buli mundu alanyoola obupaakwibwe oburula khuNyasaye.
6Ne amakhuwa ako, baana beefwe, engachelile khwisie omwene nende Apolo, khulweenywe, mbu mwechele khwifwe oburasiisia akeenako akahandiikwa tawe; mbu mundu yesi khwinywe aleshe okhwichinjimisia nachama mulala okhushila oundi. 7Oukhukhulunduyia iwe niwina? Kata nishiina eshia oli ninashio, eshia oraheebwa ta? Ne noba niwaheebwa, wiyitsialanga mbushiina, shinga ouraheebwa ta?
8Khane mumalile okhwikura; mumalile okhuyindihala; mumalile okhwikhola abaruchi aharali ifwe ta! Mbula, shiakhuha mwaba abaruchi toto, mbu mana neefu khuruche nineenywe halala. 9Okhuba enduutsi mbu Nyasaye yakhulolosiye ifwe abarume olunyuma lwabosi, shinga abakhalachiilwe eshiina shiokhufwa okhuba khukholwa eshilolelo imbeli weshialo, nabamalaika, nende abandu. 10Ifwe khuli abasilu khulwa Kristo, ne inywe muli abarechelefu muKristo! If we khuli abateshele, inywe muli abamaani! Inywe muli noluyali, neefu nikhufwolwa! 11Kata okhuula khushise shiabulaano, ifwe khubeetsanga inzala, obuloho nibukhulia; khubeetsanga eshihechenye, nikhuupwa tsikhofi, nikhubula eshimenyo; 12khunyakhananga nikhukhola emilimo namakhono keefwe. Nikhunyekwa, khusabanga ikhabi; nikhusandibwa, khwifwilanga; 13nikhuchiikhwa, khuboolanga amalayi; khukholungwa shinga amakokha ke-shialo, kata shinga amakhokoro keshibala, okhuula hulaano.
14Shihandiika amakhuwa kano okhumufwimbia emirwe ta, habula okhumuchesiyia, shinga olwa muli abaana banje abaheelwa. 15Shichila kata olwa mwakhaba nimuli nabeebaali abarabalikha ta muKristo, ne shimuli nabaseenywe abanji ta; okhuba muKristo Yesu ndamwibula khunjila yeinjiili. 16Khulwako emusaaya mbu mulonde ikhola yanje. 17Niko akachila nimurumiile Timotseo; niye omwana wanje omuheelwa omwisiikwa muMwami; ne alamwitsusinjia khubiima bianje ebili muKristo shinga olwa embeechesinjia hosi hosi mubuli kanisa. 18Baliho abandi abeechinjimisiye, nibakaala mbu shinzitsa tawe. 19Nebutswa ndaleetsa bwangu, Omwami naba niyeenya ario; mana ndalamanya abo abeechinjimisia shinga olwa bali, khulwa amakhuwa kabwe ta, habula khulwa obunyali bwabwe. 20Okhuba obwami bwaNyasaye shibuli obwamakhuwa ta, nebutswa nobwobunyali. 21Kho mwenya murie? Mbu emwitsile nindi nolusaala, nohomha nobuheeli nende omwovo omuholo?
Currently Selected:
1 Abakorinzo 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975