1 Abakorinzo 6
6
Obusitaachi imbeli wababula obusuubili
1Omundu yesi khwinywe oufunaana likhuwa nowashie, yakhatsaalikha okhumusitaaka imbeli wa abo ababula obulunjishi, ne naramwinjilila imbeli wabatakatifu ta? 2Kata shimumanyile mbu abatakatifu baliyaasia eshialo? Ne eshialo nishiba nishiliyaasibwa nineenywe, shimukwanile okhwahukhasia ebiina ebitiiti? 3Shimumanyile mbu khuliyaasia abamalaika? Ne shikhulashila muno okhuyaasia akomubulamu buno? 4Ne nimuba nimukhoyile okhuyaasia akomubulamu buno, mureetsangaho abo ababula oluyali mukanisa babe abayaasii noho? 5Emboola endio okhumufwimbia emirwe. Khane nolwa kali, mbu mwinywe abulaho kata omundu mulala omuchesi owakhanyala okhwahukhasia amakhuwa hakari wabaana babwe ta? 6Habula mbu omundu ayaalana nomwana wabwe, imbeli wabarasuubila ta? 7Mbula, habwenaho mumalile okhuhulwa, olwa muyaalananga murio. Shibwakhaba obulayi nimufuchiilila okhukholelwa akarali habwene ta? Shibwakhaba obulayi nimufuchiilila okhukatswa ebindu? 8Nebutswa inywe abeene mukholanga akarali habwene ta, khandi mukatsanga; ne mukholelanga kata abaana beenywe murio. 910Kata shimumanyile mbu ababula obulunjishi shibalilaamilwa obwami bwaNyasaye ta? Mureekaatia ta; mbu abasooti shibalilaamilwa obwami bwaNyasaye ta, kata abeenamila ebifwanani, kata abaheyi, kata abeelaasi, kata abatanyana, kata abeebi, kata abalangukhu, kata abameesi, kata abanyechi, kata abanuuli tawe. 11Ne abandi khwinywe mwalinji murio; ne inywe mwoosibwa, khandi mwaahulwa, khandi mwabasilibwa obulunjishi muliira liOmwami Yesu Kristo, khandi muRoho waNyasaye weefwe.
Okhuheelesia Nyasaye oluyali mumubilikwo
12Ebindu biosi bifuchiililwa khwisie; ne shibili biosi ebili nobukhoonyi ta. Biosi bifuchiililwa khwisie; ne shifuchiilila okhurukwa neshindu shiosi ta. 13Ebiliibwa biliho khulwa inda, khandi inda yiliho khulwa ebiliibwa; ne Nyasaye alibiakamia biosi, inda nende ebiliibwa. Ne omubili shikuliho khulwa obuheyi ta, habula khulwa Omwami; khandi Omwami aliho khulwa omubili. 14Ne Nyasaye yamulamusia Omwami mukhufwa, khandi alikhulamusia ifwe ario khulwa obunyalibwe. 15Khane shimumanyile mbu emibili chieenywe nebiungo biaKristo? Nasi kho embukule ebiungo biaKristo nimbikhol ebiungo biomutamba noho? 'A, nahatuutu ta. 16Kata shimumanyile mbu owungasibwa khumutamba aba ninaye omubili mulala? Okhuba yasunga mbu Abo bombi balaba omubili mulala. 17Ne owungasibwa khuMwami aba ninaye roho ndala. 18Mwihaanye obuheyi. Buli shionoono eshia omundu akhola shibeetsanga elwanyi womubilikwe; ne ouheya yoonoonela omubili kukwe omwene. 19Kata shimumanyile mbu omubili kweenywe neihekalu yaRoho Omutakatifu ouli mwinywe, owa mwaheebwa nende Nyasaye? Kata inywe shimuli emiandu chieenywe abeene ta; 20okhuba mwakulwa obukusiikho mumuheelesie Nyasaye oluyali mumubili kweenywe.
Currently Selected:
1 Abakorinzo 6: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975