1 Abakorinzo 7
7
Amatinyu mukobuteeshanii
1Ne bulaano, khumakhuwa aka mwayambandiichiile: Nobulayi khumusaatsa okhulesnela elala akabakhasi. 2Nebutswa khulwa amakhuwa kobuheyi, buli musaatsa abe nomukhasi wuwe, khandi buli mukhasi abe nomusaatsa wuwe. 3Omusaatsa amukholelenje omukhasi akamukhoyela; nomukhasi yesi ario khumusaatsawe. 4Omukhasi shiali nobunyali khumubilikwe omwene ta, habula omusaatsawe; nomusaatsa yesi ario shiali nobunyali khumubilikwe omwene ta, habula omukhasiwe. 5Mureemananga ta, habula nimwakhaba nimufuchilisaniye okhulekhanakhwo eshise mbu mwihaane khukhusaaya, mana mube halala khandi, mbu Setani aleshe okhumuteema khulwa obureeruka bweenywe ta.
6Ne kano emboola shinga ouhaana omunwa butswa; shindaka bulaka tawe. 7Khane ndakheenya mbu bosi babe shingana isie. Nebutswa buli mundu ali neshihaanwashie eshirula khuNyasaye, oundi shino, oundi eshio.
8Ne emboolela abarateeshia kata okhuteeshibwa ta, nabakhasi abalekhwa bosi, mbu nobulayi khubo okhumenya shingana isie. 9Ne nibaba nibakhaywa okhwiruka, bateeshanie; shichila okhuteeshania khushila okhuyiitsanga khulwa obwikombi.
10Ne khubateeshania embalachilisia, kata shindi isie ta, habula Omwami, mbu omukhasi ararula khumusaatsawe ta. 11Nebutswa naba namurulakhwo, amenye ario narateeshibungwa ta, nohomba mbu asaasanibwe nomusaatsawe. Omusaatsa naye aramwilusia omukhasiwe tawe.
12Ne khubandi emboola khulwanje, narali Omwami ouboola ta, mbu omwana weefwe yesi naba nali nomukhasiwe ourali omusuubili ta, naye nafuchiilila okhumenya ninaye, kho aleshe okhumwilusia tawe. 13Kata omukhasi ouba nali nomusaatsawe ourali omusuubili ta, naye nafuchiilila okhumenya ninaye, kho aleshe okhurula khumusaatsawe oyo ta. 14Shichila omusaatsa ourali omusuubili ta yaahulilwa Nyasaye khulwa omukhasiwe; naye omukhasi ourali omusuubili ta yaahulilwa Nyasaye khulwa omwana weefwe; nebutswa abaana beenywe shibakhabeele abasiiyikhu ta; ne bulaano nabatakatifu. 15Ne oyo ourali omusuubili ta naba natsia, lekha atsie; nikali kario, omwana weefwe shiaba naboyilwe ta; habula Nyasaye yakhulanga okhumenya mumulembe. 16Okhuba iwe omukhasi, omanyile orie noba niwakhahonia omusaatsawo? Kata iwe omusaatsa, omanyile orie noba niwakhahonia omukhasiwo?
Liiba elia Omwami yakhulanjilamwo
17Habula mbu, shinga Omwami olwa yakabila buli mundu, khandi shinga Nyasaye olwa yalanga buli mundu, nindio akhoyile okhuchenda ario. Khandi nindio endachilisinjia endio mukanisa tsiosi. 18Aliho owalangwa nali omushebe? Aleshe okhwikhola shinga omusinde. Aliho owalangwa nali omusinde? Aleshe okhushebwa. 19Eshishebo shishili eshindu ta, khandi obusinde shishili eshindu ta, habula okhulindanga amalako kaNyasaye. 20Buli mundu atsiililile ario mumela eyo eya yalimwo olwa yalangwa. 21Walangwa olwa wali noli omusumba omukule? Shilili likhuwa ta; ne noba nonyala okhunyoola obulekhuule, obunyoole orio. 22Oyo owalangwa muMwami nali omusumba, niye omulekhuule wOmwami; khandi ario ye owalangwa nali omwibule, niye omusumba waKristo. 23Mwakulwa obukusii; murakwa abasumba babandu tawe. 24Baana beefwe, buli mundu atsiililile halala naNyasaye mumela eyo eya yalimwo olwa yalangwa.
Abarateeshania ta, nende abalekhwa
25Ne bulaano, khumakhuwa ka abo abali abashisila, shindi nelilako liosi liOmwami ta; ne ehaana obukhalachi bwanje, shinga olwa endi omundu omwisiikwa khulwa tsimbabasi tsiOmwami khwisie. 26Isie enduutsi mbu khulwa amatinyu akaliho, lino nelilayi, mbu omundu okhubeetsanga shinga olwa ali. 27Wabohwa khumukhasiwo? Oreenya okhubohololwa ta. Oli omundu ourabohwa khumukhasi ta? Oreenya omukhasi tawe. 28Ne noba noteeshia, shioba niwonoonile ta; kata omukhaana naba nateeshibwa, shiaba niyoonoonile ta. Ne abakhola bario balanyoola amatinyu mumibili chiabwe; ne ndakheenya okhumuhonia mukeenako.
29Baana beefwe, elia emuboolela ndielino; mbu eshise shiimbichiite; kho okhurula olwa leelo abali nabakhasi babe shinga ababula ninabo; 30nabo abalila, shinga abaralila ta; abeekhoya, shinga abareekhoya ta; abakulanga, shinga ababula emiandu; 31kata abo abeekhoonyela ebieshialo shinga abarabiikhoonyela muno ta; okhuba ikhola yeshibala shino yihweetsangaho.
32Nasi ndakheenya mbu mubule obuhendi bwosi. Oyo ourali nomukhasi ta ahendelanga akOmwami shinga olwa yakhanyala okhumuchamisia Omwami; 33ne oyo ouli nomukhasi ahendelanga akeshialo, shinga olwa yakhachamisia omukhasiwe; 34nomukhasiwe yesi abeetsanga niyeekabuule shikhabili mumwoyo. Ne omukhaana ourateeshibwa ta ahendelanga akOmwami, mbu abe omutakatifu omubili nende roho yosi; nebutswa oyo ouli nomusaatsa ahendelanga akeshialo, shinga olwa yakhachamisia omusaatsawe. 35Kano engaboola khulweenywe; shikali mbu emuboha buboha ta, habula khulwako akakhoyeele, khandi mbu mukhalabanilenje Omwami oburakoyakoyibungwa ta.
36Ne omundu yesi naba naluutsi mbu shiamukholelanga omushisila omwitsawe akali habwene ta, obwikombibwe nibuba nibushilaana, akhole aka yeenya, nikaba nikakhoyeele kario. Bateeshanie; shibuli obwonooni ta. 37Ne oyo owa omwoyokwe kuralila, oubula okhuhachilisibwa, ne nali nobunyali okhwiruka okhwenyakhwe, ne namalile okhurakhwo omwoyo khwikhuwa lino mbu okhulinda omushisilawe, kho akhola bulayi. 38Kho outeeshia omushisilawe akhola bulayi; khandi ouramuteeshia ta akhola bulayi okhushila.
39Omukhasi abeetsanga omubohe olwa omusaatsawe ashiliho mwoyo, ne omusaatsawe olwa aba namalile okhufwa, nomulekhuule ounyala okhuteeshibwa nende omundu owa omwene achama; habula mbu khukholelwe muMwami. 40Ne khulwanje enduutsi mbu yakhaba omusangaafu okhushila naba natong'a ario shinga olwa ali; ne esuubila mbu siesi endi nende Roho waNyasaye.
Currently Selected:
1 Abakorinzo 7: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975