1 Abakorinzo 8
8
Akebiliibwa ebiemisango echimaliilwe ebifwanani
1Ne bulaano, khumakhuwa kebindu biemisango echimaliilwe ebifwanani; Khumanyile shinga olwa khuli nobumanyi fwesi. Obumanyi buchinjimisinjia, ne obuheeli buumbakhanga. 2Omundu yesi naba nakaala mbu wamanya likhuwa, aba nashili okhumanya likhuwa liosi shinga olwa limukhoyeele okhumanya. 3Ne omundu naba namuheela Nyasaye, omwene amumanyishilanga Nyasaye.
4Kho khumakhuwa akokhulia ebindu biemisango echimaliilwe ebifwanani, khumanyile mbu eshifwanani shishili eshindu mushibala ta, khandi mbu abulaho nyasaye undi ta, habula niMulala. 5Shichila kata nibaba nibaliho abalangwa mbu abanyasaye, kata mwikulu kata mushibala; shinga olwa baliho abanyasaye abanji nende abaami abanji; 6nebutswa khwifwe aliho Nyasaye mulala, mbu Seefwe, owa amakhuwa kosi karulakhwo, neefu nikhuchooma khuye; khandi aliho Omwami mulala, mbu Yesu Kristo, owa amakhuwa kosi keetsa khululwe, neefu nikhubaho khululwe.
7Nebutswa shibali bosi abali nobumanyi obwo ta; ne abandi, abanala akebifwanani okhuula bulaano, bashiliitsangakhwo nibapaara shinga olwa shili eshindu shiomusango okumaliilwe eshifwanani; mana emioyo chiabwe, olwa chili emiteshele chionoonekhanga. 8Ne ebiliibwa shibilikhusitia khuNyasaye ta; nikhuba nikhuralia, shikhukosia eshindu ta, kata nikhuba nikhulia shikhumeetekha eshindu ta. 9Ne mubeetsenje meeso, obulel huule bweenywe obwo buleshe okhwisichirasia abateshele mumioyo. 10Shichila omundu naba nakhulola iwe ouli nobumanyi, niwikhaale noliitsanga muhekalu yeshifwanani, naye nali omuteshele mumwoyo, shiyakhanyoola itswoni ario okhulia khubindu biemisango echimaliilwe ebifwanani? 11Okhuba khulwa obumanyi bubwo, oyo ouli omuteshele mumwoyo atiba, omwana weefwe owa Kristo yafwila. 12Kho olwa mwonoonelanga abaana beefwe nimusaalisia emioyo chiabwe echili emiteshele chirio, habwenaho mumwonoonelanga Kristo. 13Niko akachila, eshiokhulia nishiba nishimwisichirasia omwana weefwe, shindalaliakhwo inyama inziayo tawe, mbu endeshe okhumwisichirasia omwana weefwe.
Currently Selected:
1 Abakorinzo 8: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975