1 Abakorinzo 9
9
Akakhoyeele omurume
1Isie shindi omulekhuule? Shindi omurume? Shindamulola Yesu Omwami weefwe? Shimuli inywe emilimo chianje muMwami? 2Ne kata abandi nibaraluutsi mbu endi omurume ta, khwinywe endi endio; shichila inywe ninywe iseyi yoburume bwanje muMwami.
3Obwiteetsi bwanje imbeli wa abo abanyenesa mbwobuno, 4mbu Ifwe shikhunyala okhuliitsanga nokhunywa ta? 5Shikhunyala okhuchenda nomukhasi ouli omukhaana weefwe, shinga abandi bosi abokhubarume olwa bakholanga, nende abaana babwe Omwami, nende Kefa? 6Nohomba nisie nende Baranaba fwenyene abaranyala okhumenya oburakhola emilimo ta? 7Ali heena omusikari outsia mwihe niyeerunjila omwene? Ali heena ouraaka emitsabibu, omwene naraliakhwo khubiamo ta? Ali heena owayanga lituuli, omwene naranywa khumabeele kalio tawe? 8Emboolanga amakhuwa kano shinga omundu namundu? Nohomba amalako kosi shikaboola kario? 9Shichila liahandiikwa mumalako kaMusa, mbu Orabohanga ing'ombe omunwa olwa yihuulanga imele ta. Netsing'ombe etsia Nyasaye apaarangakhwo, 10nohomba aboola ario khulweefwe butswa? Toto, liahandiikwa khulweefwe; okhuba oulima akhoyile okhulima nanaayanga; kata ouhuula ahuule nanaayanga okhuliakhwo. 11Nikhuba nikhwamuraachiile ebindu biaroho, nelikhuwa likhongo nikhuba nikhuchesa ebindu bieenywe biomubili noho? 12Abandi olwa bakabana obunyali buno khwinywe, ifwe shikhubashila? Nebutswa shikhwayeekhoonyela obunyali obwo ta; ne khwifwilanga amakhuwa kosi, mbu kaleshe okhwikalila amakhuwa amalayi kaKristo.
13Shimumanyile mbu abakholanga obukhalabani bweihekalu baliitsanga khubindu biomuhekalu, nabo abakhalabanilanga eshimalilo shiemisango banyoolanga omukabo kwabwe khushimalilo tsana? 14Khandi nolwa Omwami yakasia likhuwa, mbu abeelwatsanga Amakhuwa amalayi banyoolenje ebiokhwikhoonyela khuMakhuwa amalayi tsana. 15Habula isie shindayeekhoonyela likhuwa liosi mu ako ta; kata shihandiika endi nanwa mbu mana kakholwe kario khulwanje, tawe; okhuba kakhaba amalayi nindakhafwa, okhushila ako. Abulaho ounyala okhufubia obwiyitsiali bwanje buno ta. 16Shichila nimba nindilwatsa Amakhuwa amalayi, shimba nende eshiokhwiyitsialila ta; khatimba ekhole; ne ndilituukhana amasila nimba ninjweya okhwilwatsa Amakhuwa amalayi kano. 17Shichila nimba nikhola endio khulwa okhuchama khwanje omwene, enyoola omushaara; ne nikhurali khwokhuchama khwanje omwene ta, nobusinjili obwa ndaheebwa. 18Kho omushaara kwanje kuli kurie? Ngwokuno, mbu olwa ndilwatsanga endio Amakhuwa amalayi, enjile Amakhuwa amalayi kanyooleshe harali obukusii bwosi ta, endeshe okhumalila elala kosi akali mubunyali bwanje khulwa Amakhuwa amalayi.
19Okhuba kata olwa ndali omulekhuule khubandu bosi, ndeekhola omusumba wabosi, mbu embanyoole abanji. 20KhubaYahudi, ndeekhola shingana omuYahudi, mbu enyoole abaYahudi; khubali abasumba bamalako, shingana omusumba wamalako, omwene nindali omusumba wamalako ta, mbu embanyoole abali abasumba bamalako; 21khubali elwanyi wamalako, shingana ouli elwanyi wamalako, nindali elwanyi wamalako imbeli waNyasaye ta, habula endi omusumba wameebaalo kaKristo; mbu embanyoole abali elwanyi wamalako. 22Khubateshele mumwoyo, ndeekhola shingana omuteshele mumwoyo, mbu embanyoole abali abateshele mumwoyo. Ndeekhola owetsimela tsiosi khubandu bosi, mbu munjila tsiosi ehonie abandi khubo. 23Ne ako kosi engakholanga khulwa Amakhuwa amalayi, mbu esanjenje muko.
24Khane shimumanyile mbu abeelukhanga mubutiebani beelukha bosi, ne ounyoola amatani nimulala? Mwilushe murio, mbu munyoole. 25Khandi buli mundu oulwana mumabwi yeerukanga mumakhuwa kosi. Nabo bakhola mbu bafuhwe olusimbi olwitsa okhusasikha; neefu, olusimbi olurasasikha ta. 26Niko akachila ndilukhanga endio, ne shindilukhanga shinga oukorwa elia ekhola ta; ekhupanga endio tsifuusi, ne shinga oukhupilanga ahakhaya butswa tawe. 27Nebutswa enyasinjia omubili kwanje ninguruka; mbu olwa ndiliba nimalile okhwilwatsila abandi, isie omwene endeshe okhulobwa.
Currently Selected:
1 Abakorinzo 9: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975