Obadia 1
1
Okhutuutuyibwa khwaEdomu
1Libisulo liaObadia.
Kano niko aka Omwami NYASAYE aboola khukaEdomu; mbu
Khuhuliile omulome okurula khuMWAMI,
omurume arumilwe mumahanga, ari
Buushe! Chende khubuushe khumuseere lihe!
2Lola, ndalakhukhola omutuutu mumahanga; olalechelwa elala.
3Obwichinjimisii bwomwoyokwo bukhukaatiye,
iwe oumenya mumbangatsi etsiomunyanda,
owa eshimenyoshio shili hekulu,
oupaara mumwoyokwo ori
Ali heena oulanzisia hasi?
4Ne kata nokulukha ikulu shinga inditsukata;
kata eshitsushio nishirenjekhwa hakari wetsinyininyini,
ndalakhwisia okhurulayo;
nilwo olwa OMWAMI aboola.
5Abeebi nibaba nibakhwitsila,
kata abanyaka mushilo,
shibakheeba ebihela okhubeekusia?
Makowe, ukhalaakwe muno!
Abanochi beuinzabibu ribaba nibakhwitsila,
shibakhalekha tsinzabibu etsiakharulumwa?
6Makowe, ebindu biaEsau binyachilwe bunyaka!
Makowe, ebiolukoosibie ebiabiswa bikhaabilisibwa muno!
7Abeshisangoshio bosi bakhwilusiye okhuula khulwakho;
aba walia ninabo omuuma bakhukaatiye nibakhuhula;
abaliitsanga ebiliibwabio bakhurechile omubero;
mbu Abula obumanyilisii.
8OMWAMI asunga mbu Ne khunduukho eyo shindalatibia abachesi okhurula muEdomu nobumanyilisii okhurula mushikulu shiaEsau?
9Kata iwe, Temani, abalulubo balakoyaasibwa,
mbu buli mundu ourula khushikulu shiaEsau alaremwa niyeerwa
10Khulwa akamahababa akakholelwa omwana weenywe Yakobo tsisoni tsilakhufuunikha, ne olaakamibwa inziayo.
11Khunyanga olwa wasinjila elubeka,
khunyanga olwa abacheni bayila emianduchie,
abasuku nibeenjila mubilibwabie,
nibakhupila Yerusalemu ikha,
Iwe weenga shinga mulala khubo.
12Shiwali nokhoyile okhusangaalila khunyanga yomwana weenywe,
khunyanga yamasilake, ta;
kata okhwikhoyela abaana baYuda khunyanga yobumululwi bwabwe;
kata okhwisunganga khunyanga yamatinyu ta.
13Shiwali nokhoyile okhwinjila mushilibwa shiabandu tanje khunyanga yamaraba kabwe ta;
kata okhusangaalila obusandi bwabwe khunyanga yamaraba kabwe,
kata okhura omukhono khumiandu chiabwe khunyanga yamaraba kabwe ta.
14Shiwali nokhoyile okhusinjila hamasanganjila okhukhalaka abandube abeehonokokha ta;
kata okhwibalila abasuku abandube abatong'a khunyanga yamatinyu ta.
15Okhuba induukho yOMWAMI yili ahambi, khumahanga kosi;
shinga olwa wakhola, nindio olakholelwa;
ebikholebio bilakalukha khumurwekwo.
16Okhuba shinga olwa mwanyweela khushikulu shianje eshitakatifu,
nolwa amahanga kosi kalanyweetsanga;
balanywa, nibeekungumula,
nibaba shinga abaralikhwoho ta.
Okhuchinguulwa khwaIsiraeli
17Ne mushikulu shiaSayuni balabaho abeehonokooshe,
nashio shilaba eshitakatifu;
nabo abeinzu yaYakobo balalia emiandu chiabwe abeene.
18Inzu yaYakobo yilaba omulilo,
neinzu yaYusufu olumemu, neinzu yaEsau olububa;
tsilachisamba nitsichimala pe;
kata shialasikala omundu yesi oweinzu yaEsau ta;
okhuba OMWAMI niye ouboolile.
19AbeNegebu balalia eshikulu shiaEsau,
nabo abaShefela, eshialo shiabaFilisiti;
balalia liloba liaEfuraimu neliloba liaSamaria;
naye Benyamini alalia Gileadi.
20Abaare abomwihe lino abokhubaana baIsiraeli balalia Kanaani okhuula eSarefata;
nabo abaare baYerusalemu abali muSefaradi balalia amataala keNegebu.
21Abahonia balatikulukha khushikulu shiaSayuni okhuruka eshikulu shiaEsau;
ne obwami bulaba obwOMWAMI.
Currently Selected:
Obadia 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975