ZAA 'BƆGƲ 20
20
Zezwi yɛ glu 'wlʋ
1'Dimasɩɛ zlɩgö -papapii, Magödalaa Mali -sɔ-a 'wʋ, 'n ɔ ji-e -ma lesikpa yawʋ mö. 'Misikpoko 'köbhɔ-ɔ -bhla, ɔ yɩlɩ-ɛ -bha lesikpa ngo'o, kpiyi wa 'sunʋ la-a -bha 'wʋ 'sanɩɔ -bha 'ye. 2Ɔ 'libhï-a sɛcɛ 'wʋ, 'n ɔ ji-e -ma Simo Piɛlɩ -yɛ Zezwie 'wʋbhlinɩnyɔ -mɔbha -ɔ Zezwi 'jɩbha-a 'sɔ ghlɩ. Ɔ nɛ -bha wa de: “Wa yɛ -ma lesikpa 'mö Nyininyɔɔ -gazɛ -sa 'bhë, la wa zʋɛ yɛ -aa -bha de -ji.” 3Piɛlɩ -yɛ Zezwie 'wʋbhlinɩnyɔ -mɔbha 'sɔ 'wlʋ-a 'pɩ 'n wa ji-e -ma lesikpa yawʋ mö. 4Wa 'sɔ -kpɔ 'n wa -wʋ la-a kpata 'mö guanɩ 'le, Zezwie 'wʋbhlinɩnyɔ -mɔbhaa sɛcɛ 'tɛ-a 'mö Piɛlɩɛ -leyie bhla, 'n ɔ ji-e -ma lesikpa yawʋ nyini -tɩtɛ-ɛ. 5Ɔ kwlinɩ-a 'wlu, ɔ pöplanɩ-ɛ -ma lesikpa 'mö, 'n ɔ ji-a -yʋkʋpɩ -ɩ pö-ö -bha yɩlɩ. Ɔ'ɔ-a 'mö -ma pla. 6'N Simo Piɛlɩ ji 'yɛ-a -nɩ nyini. Ɔ pla-a -ma lesikpa 'mö, 'n ɔ ji-a -yʋkʋpɩ yɩlɩ. 7'N ɔ ji 'yɛ-a lokwi wa gwanɩ la-a Zezwie 'wlu yɛ yɩlɩ, ɛ -yɛ -yʋkʋpɩ 'sɔ 'nɩ 'wʋ 'slonʋɔ, ɛ 'mamanɩɔ-ɔ 'wʋ ɛ pö -bha kaböde. 8'N Zezwie 'wʋbhlinɩnyɔ -ɔ nyini la-a -tɩtɛ-ɛ -ma lesikpa yawʋ ji 'yɛ-a -nɩ -ma pla. Ɔ yɩlɩɩ-a, 'n ɔ jiɩ-a 'dɛdɛ'ɛ la. 9-Ma ɩ 'mö wa'a la -bhla -ma -Lagɔwɛlɩɛ 'bɔgʋ 'möö köbhë -a nʋ-a glu Zezwi ji-a 'wlʋɔ 'mö 'nʋ. 10'N Zezwie 'wʋbhlinɩngwa la'a ji-a 'ligbë'ë nimï mö.
Zezwi yɛ ɔjɩ Magödalaa Mali 'ji tuluanɩ
11-Bhaa do'o Mali glɩ la -ma 'pɩ, -bha lesikpa yawʋ 'n ɔ -wʋ-a wi 'le. Ɔ-ɔ -sɩbha wi 'le, 'n ɔ ji-a 'wlu kwlinɩ ɔ 'yɛ -ma lesikpa 'mö pöplanɩɛ yɛ. 12Ɔ yɩlɩ -ma -Lagɔzuzuku 'sɔ, ɩ ka -banɩ 'pʋpʋɩ 'mö, la wa 'pua la-a Zezwie -gazɛ yɛ ɩ glɩ -bha, -bhlʋ glɩ -ma ɛ 'wluo kwanɩbhɛyɩ, -möma glɩ -ma ɛ bhɩɛ kwanɩbhɛyɩ. 13'Mɩ zuzuku la'a nɛ -bha ɔ de naa: “'Nglɔ, 'manɩɛ yɛ -n -wʋ-a wi 'le 'nɩ?” Ɔ nɛ: “Na Nyininyɔɔ -gazɛ wa -sa-a ma'a, la wa zʋɛ yɛ n'n -bha de -jie yɛ n -wʋ-a wi 'le.” 14Ɔ gba-a -sɩbha, ɔ 'bhɩlɔ-a 'mö, Zezwi 'nɩgbö -bha 'n ɔ jio-a yɩlɩ. Ɔ'ɔ la-a 'mö sɛ -ji naa Zezwi-i -bha. 15Zezwi nɛ -bha ɔ de naa: “'Nglɔ, 'manɩɛ yɛ -n -wʋ-a wi 'le 'nɩ? -Mɔ -n -wʋ-a 'nama 'le 'nɩ?” Mali -tɔnʋ la -ma 'lagblɛ'ɛɛ libhonʋnyɔ laa yɛ, ɔ nɛ -bha ɔ de: “-Abhiyi, -nmö -nyɔɔ -yɛ mö-ö, la -n zʋɔ-a yɛ -slʋnʋ'ʋ -bha de n 'kɔ ye mö.” 16Zezwi nɛ -bha ɔ de: “Mali!” Mali 'bhɩlɔ-a 'mö, ɔ nɛ -ma eblegbʋ 'mö ɔ de: “Ghlabuni!” Ɩ zɔmö-ö -yɛ-a naa: “-Abhitɩbha!” 17Zezwi nɛ -bha ɔ de: “-Nn zʋ'ʋ cɛ -nɩ, n'n-n -bhla -ma na -Tɩbha yawʋ mö. Ghlɩ -ma na -dagwie -n 'kʋa 'dɩ -sanɩ naa: -Ma na -Tɩbha -ɔ glɩnɩ 'yɛ-a a -Tɩbhaa yawʋ n -wʋ-a mö 'le, -ma na -Lagɔ -ʋ glɩnɩ 'yɛ-a a -Lagɔɔ yawʋ n -wʋ-a mö 'le.” 18Magödalaa Mali -sɔ-a 'wʋ, 'n ɔ ji-e -ma Zezwie 'wʋbhlinɩngwa ghlɩ, 'n ɔ jua-a 'dɩ -sanɩ naa: Nyininyɔ ɔ yɩlɩ -bha, wɛlɩ ɔ gba 'yɛ-a ɔ de 'n ɔ jiɩ-a -sa.
Zezwi yɛ ɔjɩ ɔ 'wʋbhlinɩngwa 'ji tuluanɩ
19'Mɛ Dimasɩ la'a -bhlʋɔ -dudo'o, -budu -ʋʋ 'mö Zezwie 'wʋbhlinɩngwa glɩ la-a, ʋ klanɩ 'gbɔ-ɔ 'zwiföaa -gugu yɛ. Zezwi ji-a, ɔ 'nɩgbö-ö -bha wa nyɩdɩ, ɔ nɛ: “A ghlɩ -gömöwlonɔ!” 20Ɔ gba-a -sɩbha, 'n ɔ ji-a ɔ 'wʋbhlinɩngwa ɔ -kɔtɩ -yɛ ɔ gbaközɔmö 'sɔ 'ji tuluanɩ. Wa yɩlɩ-a Nyininyɔ, 'mʋna 'kada 'lɩbhʋa -bha. 21Zezwi nɛ 'sɔdo'o -bha wa de naa: “A ghlɩ -gömöwlonɔ. Sa na -Tɩbha tia'a-a, -sɩbha n tiaya 'yɛ-ɛ na-a.” 22Ɔ gba-a -sɩbha 'bhë, 'n ɔ jua-a nyɔmʋ -gömö 'pa. Ɔ nɛ -bha wa de: “Zuzu 'Wlawla jiya -gömö. 23-Wa la'a -waa 'jinylolie gbʋ a ji-a 'ji 'tatinɩɛ, 'ji -Lagɔ jiʋ-a 'tatinɩɛ. -Wa la'a -waa 'jinylolie gbʋ a 'na-a 'ji 'tatinɩ-ɛ, -Lagɔ 'na 'yɛ -nɩ ɩ gbʋ 'ji 'tatinɩ.”
24La Zezwi 'yɛ-a ji, ɔ tiatiangwa kugbïa 'sɔɔ gla'aa -bhlʋ, Toma -ɔ wa la 'yɛ-a puyi 'nɩ la -bha -wʋ. 25Ɔ ji-a, 'n Zezwie 'wʋbhlinɩngwa -mʋabha jio-a 'dɩ -sanɩ, wa nɛ: “-A yɛ Nyininyɔ yɩlɩ 'bhë.” Wa gba-a -sɩbha, Toma nɛ: “N nɩ -lɛ -ma ɔ cɛ'ɛ lɔkɔ wa kʋnʋ-ɔ -maa 'bɩ yɩlɩ, n nɩ -lɛ -ma 'mɩ lɔkɔɔ -dʋɩ 'mö na wlijeyi fa, n nɩ 'yɛ -lɛ -ma ɔ gbaközɔmö na -kɔta zʋ 'bhë, n 'na 'kɩ dlɩ 'wʋ -ka.” 26'Ylɩ -ngbɔta 'plɩ-a, Zezwie 'wʋbhlinɩngwa glɩ -ma -budu'u 'sɔ, Toma kökamö, -buduo klanɩ 'gbɔ-ɔ 'n Zezwi ji-a pla, 'n ɔ ji-e -bha wa nyɩdɩ 'nɩgbö, ɔ nɛ: “A ghlɩ -gömöwlonɔ.” 27Ɔ gba-a -sɩbha 'bhë, ɔ nɛ -bha Tomaa de naa: “Nyinianɩ la'a -na -kɔta, zʋa -ma na gbaközɔmö, -nn 'tumanɩ dlɩ 'mö -nɩ -kɩɩ dlɩ 'wʋ.” 28Toma nɛ -bha ɔ de: “Na Nyininyɔ, na -Lagɔ.” 29Zezwi nɛ: “Yɩlɩ -n -yɩlɩ'ɩ-aa yɛ -n ka'a-a dlɩ 'wʋ. -Wa la'a -wa nɩ'ɩ-a yɩlɩ 'bhë -wa ka'a-a dlɩ 'wʋ, 'mʋna 'lɩbhʋa.”
30'N Zezwi ji-e -bha ɔ 'wʋbhlinɩngwaa 'ji 'klʋ bhatɩ -mɩmɩɛ -bɛ nɛ nʋnʋ, -ɩɩ wɛlɩ-ɩ 'nɩ-ɛ ma'a 'bɔgʋ la'a 'mö 'cɛlɩɔ. 31-Ma ɩ 'mö, -wʋʋ yɛ -mɩ la'a 'cɛlɩɔ-a -nɩ-ɛ, a 'kɩ dlɩ 'wʋ -ka naa, Zezwi, mɔ-ɔ -yɛ-a Puanyɔ -ɔ -Lagɔ -sa-a -bha, mɔ-ɔ -yɛ-a -Lagɔɔ Gu, 'n a -kɩɩ dlɩ 'wʋ -ka, a 'yɛ -ma ɔ 'nglɩ 'mö 'kɔgwlɛpɩ ghlɩnɩ.
Currently Selected:
ZAA 'BƆGƲ 20: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
