ZAA 'BƆGƲ 21
21
-Bha Tibeliadɩɛ -bada yawʋ Zezwi yɛ -bha ɔ 'wʋbhlinɩngwa 'wʋ ghlanɩ
1-Mɩ la'a 'plɩ-a 'bhë-ë, 'n Zezwi ji-e -bha -gömö ɔjɩ ɔ 'wʋbhlinɩngwa 'ji tuluanɩ, -bha Tibeliadɩɛ -bada yawʋ. Sa ɔ tuluatuluanʋa-a ɔjɩ 'ji -sɩbha la'a: 2'Ylɩ -bhlʋ, Simo Piɛlɩ-ɛ, Toma -ɔ wa la 'yɛ-a puyi-e, Natanayɛlɩ -ɔ glɩnɩ-ɛ -ma Kanaa 'gbë 'möö nɩkpɛ, -ma Galilee dʋdʋ -gömö. Zebedee 'gwie -yɛ Zezwie 'wʋbhlinɩngwa -mʋmʋa 'sɔ 'sɔ 'n wa glɩ-ɛ -bha. 3Simo Piɛlɩ nɛ -bha wa de naa: “N yɛ 'nyi -dɔɔ mö.” Ɔ gba-a -sɩbha, wa nɛ: “Möö -a -nyɛmö ji -bha.” Wa -sɔ-a 'wʋ wa mö-a, 'n wa ji-a 'gɔlʋ 'mö -gbla. -Bhaa dʋdʋ la'a wa -dɔ-a 'nyi, wa'a-a -lu 'lɩbha.
4Zlɩ bhɩa-a 'mö, Zezwi 'nɩgbö -bha 'nyie 'kïkë -gömö, 'n wa jio-a yɩlɩ. Ɔ 'wʋbhlinɩngwa 'nɩ la sɛ -ji naa, Zezwi-i -bha. 5Zezwi nɛ -bha wa de naa: “'Gwieyi, a'aa cɛ lililu -ka-a?” Wa nɛ: “'Bhëbhë!” 6Ɔ nɛ: “A 'pa -ma 'gɔlʋɔ linɩkpɛsɔ pɩa 'bɩ -dada, a ji -lu ghlɩ.” 'N wa jia-a -ma 'pa. 'Ma -dada, zibhï a ye-a 'möö yɛ wa'a la a 'nyi 'möö -sasɩɛ bhɛlɩ. 7Zezwie 'wʋbhlinɩnyɔ -ɔ ɔ 'jɩbha-a tenyi yɩlɩɩ-a 'wʋ-ɔ, ɔ nɛ -bha Piɛlɩɛ de naa: “Nyininyɔ -bha.” Piɛlɩ 'nʋɩ-a, wlu ɔ 'dɩɔ la-aa yɛ, 'n ɔ ji-a ɔ -bana 'mö 'pa 'bhë 'n ɔ ji-e -ma 'nyi 'mö bhlinɩ. 8Zezwie 'wʋbhlinɩngwa -mʋabhaa -nɩ-ɛ, -dada 'yeo-o zibhï 'mö, wa -wʋ-a 'tɩtlɩ 'le, 'n wa ji-a 'kïkë ghlɩ. Wa'a la 'kïkë yawʋ 'yu -wʋ, plɩ'ɩɛ gwlɩ -ngbïë swɩ 'wʋ wa -wʋ la -bha.
9Wa 'wlʋ-ɔ -ma 'gɔlʋ 'mö, wa 'sibhë-a yɛ, -bha 'kïkë -gömö -kosu glɩ -bha, zibhï 'nguo-o -ma ʋ 'mö, 'fʋlo glɩ -bha, 'n wa jiɩ-a yɩlɩ. 10Zezwi nɛ -bha wa de naa: “Zibhï a 'lɩbha-a -la -sɩka'a, a la'a -bha ɩ gla'a zibhï ja.” 11Ɔ gba-a -sɩbha, 'n Simo Piɛlɩ ji-e -ma 'gɔlʋ 'mö -gbla, ɔ 'tɩtlɩ-a -dada 'n ɔ -nyaa 'sɔ ji-e -ma 'kïkë -gömö nyini, a ka zibhï ja 'kadɩɛ gwlɩ -ngbisɔ zibhï ja kugbïa ta 'mö. Ɩ -di-e -sɩbha 'wʋ 'bhë-ë, -dada 'nɩ-ɛ 'kpɔ do. 12Zezwi nɛ -bha wa de naa: “A ji a 'yɛ li.” Ɔ 'wʋbhlinɩngwa -ji la sɛ naa Nyininyɔ -bhaa yɛ, wa gla'aa nɩkpɛ -bhlʋɔ 'bhë 'nɩɔ-ɔ ngli 'jɩbha naa: “-Mɔ -n glɩnɩ-a 'nɩ?” 13Zezwi nyini-e -bha wa yawʋ, ɔ 'libhï-a 'fʋloko 'wʋ, ɔ 'libhï 'yɛ-a zibhï 'wʋ 'n ɔ jua-a 'ye 'nyɛ. 14Zezwi -yɛ la glu 'wlʋ, 'wʋ tado'o ɔ tuluanɩ-ɛ la'a -sɩbha ɔjɩ ɔ 'wʋbhlinɩngwa 'ji.
Sa Zezwi gba-a Piɛlɩɛ de
15Wa bhɩa-a lilie 'ji-e, 'n Zezwi ji-a Simo Piɛlɩ ngli 'jɩbha. Ɔ nɛ: “Zaa 'gu Simo, -n -jɩbha'a -wa la'a 'bhuoo bhla 'nɩ-ɩ?” Ɔ nɛ: “Nn, Nyininyɔ, -n -ji sɛ naa n -jɩbhamö.” Zezwi nɛ -bha ɔ de: “Zʋ na wligwie 'ji.” 16'Sɔdo'o, 'n Zezwi jio-a ngli 'jɩbha. Ɔ nɛ: “Zaa 'gu Simo, -n -jɩbha'a 'nɩ-ɩ?” Piɛlɩ nɛ: “Nn, Nyininyɔ, -n -ji sɛ naa n -jɩbhamö.” Zezwi nɛ -bha ɔ de: “Zʋ na 'bhlabhlɩ 'ji.” 17Tado'o 'n Zezwi jio-a ngli 'jɩbha. Ɔ nɛ: “Zaa 'gu Simo, -n -jɩbha'a 'nɩ-ɩ?” Zezwi 'jɩbha-a -sɩbha Piɛlɩ ngli 'wʋ ta naa: “-N -jɩbha'a-a”, kalɛ-ɛ 'lɩbha-a Piɛlɩ. Ɔ nɛ -bha ɔ de: “Nyininyɔ, -n -ji -li 'bhuo, -n -ji sɛ naa n -jɩbhamö.” Zezwi nɛ -bha ɔ de: “Zʋ na 'bhlabhlɩ 'ji. 18'Dɩɛ -dɩ n -nyɛmö -bha naa, la -n -wʋ la-a -gbɔta 'wʋ, -na bhë-ë nyʋnanɩ la-a yawʋ ma -n -yɛ 'jɩbha, 'n -n mö-ö -ma. -N -yɛ-a 'mö gɔ-ɔ, -kɔtɩ -n ji-a tulua kabönɩkpɛ -kamö yawʋ nyʋnanɩ ma -nn -lɛ-a 'jɩbha, 'n ɔ -kamö-ö -ma kwa.” 19-Ma wɛlɩkïbhï la'aa 'mö, sa Piɛlɩ ji-a 'mö tlɩtlɩnɩɛ ɔ 'yɛ -Lagɔɔ 'ghlinɔ tulua, 'mɩ Zezwi tuluanɩɔ-a 'ji. Ɔ bhɩa-a wɛlɩ la'aa gbagbɩɛ 'ji, ɔ nɛ -bha Piɛlɩɛ de naa: “Ji'i 'bɩ.”
Sa Zezwi gba-a ɔ 'wʋbhlinɩnyɔ ɔ 'jɩbha-a tenyie gbʋ
20Wa-a mö 'le, Piɛlɩ yɩlɩ-a nimï-ë, 'n ɔ ji-a Zezwie 'wʋbhlinɩnyɔ ɔ 'jɩbha-a yɩlɩ, ɔ -ganʋa. La wa -wʋ la-a li 'le, 'mɔ ɔ 'wʋbhlinɩnyɔ la'a mɔ-ɔ pita-a -bha Zezwie 'köklɩ 'ji ɔjɩ yɛ 'n ɔ ji-a nʋ naa: “Nyininyɔ, a'a -mɔ -jimö-a 'pɛlʋ 'paa 'nɩ?” 21Piɛlɩ yɩlɩɔ-a, ɔ nɛ -bha Zezwie de naa: “Nyininyɔ, -mɔ la'aa -nɩ 'na-a? -Mɩ jio-a ghlɩɛ 'nɩ?” 22Zezwi nɛ -bha ɔ de naa: “N -yɛ 'jɩbha naa, ɔ -bhlɩ n 'yɛ nimï ji nʋ-ɔ, -mɩ -yɩlɩmö-a 'wʋ 'nɩ? -Nmöö -nɩ, ji'i 'bɩ.” 23'Mɩ 'dɩ, 'mɩ wa -sa-a mɩ-ɩ ba-a -ma -Lagɔgwie nyɩdɩ naa, 'mɔ ɔ 'wʋbhlinɩnyɔ la'a 'na la tlɩ. -Mɩlado'o, Zezwi 'nɩɩ-ɩ -sɩbha Piɛlɩɛ de gba naa: “Ɔ 'na tlɩ” nʋ, sa'a ɔ gba la-a naa: “N -yɛ 'jɩbha naa, ɔ -bhlɩ n 'yɛ nimï ji nʋ, -mɩ -yɩlɩmö-a 'wʋ 'nɩ?” 24'Mɔ Zezwie 'wʋbhlinɩnyɔ la'a mɔ-ɔ -sa-a dɩ la'a, mɔ-ɔ 'cɛlɩɩ 'yɛ -bha. -Aa 'bhï -ji sɛ naa, ɔ -sasadɩ 'dɛdɛɛ -bha.
25-Li -mɩmɩɛ -bɛ Zezwi nʋ 'yɛ -bha, wa -kɩɩ la -bhlʋ -bhlʋ 'cɛlɩ, na dlɩ naa 'bɔgʋɩ wa ji la-a 'cɛlɩɛ ɩ -zunʋ yɛ ɩ 'na la ma'a 'pɩ 'wʋ mlinɩ.
Currently Selected:
ZAA 'BƆGƲ 21: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
