लूका 10
10
तीन कोरी बरो चेलाकु कुल्लेनाकु
1नियां गानाम रआ तयनोम परभु ता तीन कोरी बरो होर अरो तेयार वेःकुवाय, अरो जे-जे चट्टी अरो ठांव रे उनी आच सिनुः रे तहिकेनाय, ओन्डो उनकु के बबार होर केते अपन एते लहा कुलेःकुवाय। 2#मती 9:37,38ईसु ता उनकु एते गामवाःकुवाय, “जरोम खेती दो बेचोट हेनाःआं, मुदा इइर वनकु बेनहियार हुडिञ गियाकु। इनाते खेत रिई मुवार के गोहराव वेयपे चि उनी अपन खेती इइर कथिर बेनहियार के कुल ककुवाय। 3#मती 10:16नेलपे! इञ अपे के भेड़िकु रआ लेका हुंडरा रआ ताला रे कुल पेकानिञ। 4इनाते ना बगली, ना झोला, ना खरपा इदिइपे अरो होरा रे जहय केहों ओलोपे जोहार कुवा। 5जहन ओड़ाः रे सिनुःअपे, पहिल गामवाकुपे, ‘नुवां ओड़ाः रे सांति होयुःका।’ 6जदि ओन्डो जहय सांति रआ लाइख होयुःआकु, दो अपे रआ सांति उना रे ठहराव ओ:वो, बङ रेदो अपे ठिनुः हेच रुवाड़ जोना। 7#1 कुरु 9:14; 1 तिमु 5:18इना ओड़ाः रिगी तहीःपे अरो जहन्नाः उनकु एमापेयाकु इनागी जोम-नुयपे, चिलिमेनचि बेनहियार के अपन बोनी नमुः चही, ओड़ाः-ओड़ाः ओलोपे होनोर बेराया। 8जे चट्टी रे सिनुःअपे अरो ओन्डो रेन होर अपे के पुछाव पेयाकु, जहन्नाः अपे रआ लहा रे दोहोयाकु इनागी जोमपे। 9ओन्डो रेन हासु इकु के बुगी कुपे, अरो उनकु एते गाम वकुपे, ‘परमेसर रआ राइज अपे रआ हेनात हेच तेबाः एकाना।’ 10#कु.कामि 13:51मुदा जे चट्टी रे सिनुःअपे अरो ओन्डो रेन होर अपे के काकु सोवागत पेया दो उनकु रआ खोइर रे सेन केते गाम वकुपे। 11#मती 10:7–14; मर 6:8–11; लूका 9:3–5‘अपे रआ चट्टी रआ धुड़ी जे आले रआ बका रे लटकाव अनाः, आले अपे रआ लहा चेताव कथिर झराव ककानाले रेहोंगी नुवां सारी केपे चि परमेसर रआ राइज अपे रआ हेनात हेच तेबाः एकाना!’ 12#एटे 19:24–28; मती 11:24; मती 10:15इञ अपे एते गामवापे कनिञ चि नेनाय रआ हिलोः चट्टी रेन होर रआ दसा सोदोम रआ दसा एते बेचोट कठिक होयुःआ।
अबिसवासी चट्टी
(मती 11:20–24)
13 #
जसा 23:1–18; हेज 26:1—28:26; जोवे 3:4–8; आमो 1:9,10; जक 9:2–4 “हाय सरापित खुराजीन चट्टी, हाय सरापित बइतसयदा चट्टी अपे रे जे सोमोर्थ कामि केना, जदि उना सूर चट्टी अरो सयदा चट्टी रे कराव लेन रेदो ओन्डो रेन होर बेचोट पहिल एते गी सोक रआ बोरा उयु केते अरो अपन होड़मो रे तोरोच ओजोः केते चिमिस गी मोन रुवाड़ केयाकु होनांङ। 14मुदा नेयाय रआ हिलोः अपे रआ दसा एते सूर अरो सयदा रआ दसा ढेर सहाव लाइख होयुःआ। 15#जसा 14:13–15ए कफरनहूम रेन होर! चिलि अपे सोंचाः कनापे चि सोवाराग तक उठाव केपेयाय? उहुःउ अधोलोक तक अपे के लतार उयुः कपेयाय।”
16 #
मती 10:40; मर 9:37; लूका 9:48; जोह 13:20 ईसु अपन चेलाकु एते गामवाःकुवाय, “जे अपे रआ ओनाव कनाय, उनी इञ रआ ओनाव कनाय अरो जे आम के तुछ मिकानाय, उनी इञ के तुछ एञकनाय अरो जे इञ के तुछ एञकनाय, उनी इञ रिई कुलवानीः के तुछ एय कनाय।”
पेय कोरी बरो चेलाकु रआ रुवाड़ हिजुः
17उनकु पेय कोरी बारो चेलाकु आनाद कराव वते रुवाड़ एनाकु, अरो गापाम हेलावेनाकु, उनकु हेच केते ईसु के गाम वदेयाकु, “ए परभु आम रआ लुतूम एते मुवां रावा हों उडुङ निर कोःकानाकु।”
18ईसु उनकु एते गामवाःकुवाय, “इञ सयतान के बिजली रआ बराबोइर सोवाराग एते लातार उयुः वनीः नेलेय कनिञ। 19#सिरिञ 91:13नेलपे! इञ ता अपे के बिञ अरो कटकोमकिदिञकु के रेंवदाव रआ अरो बइरिकु रआ सुबिन बोल ता हराव कथिर हक एम एकावाःपिञ अरो जहन जिनिस एते अपे रआ जहन हइन का होयुःआ। 20रेहों नियां एते ओलोपे अनादित ओ:वो, चि अपे मुवां रावा के उडुङ कुकानापे, मगर नुवां एते अनादित वोःपे, चि अपे रआ लुतूम सोवाराग रे ओल एकाना।”
ईसु रआ रिझ ओः
(मती 11:25–27; 13:16–17)
21इमिन रिगी ईसु पबितर रावा रे रिझ एते पेड़ेच एनाय, अरो गाम्मेताय, “ए आबा, सोवाराग अरो ओते रिई परभु, इञ आम रआ इसतुतिइ कनिञ, चिलिमेनचि आम ता नुवां गानाम ता गेयान वनकु अरो सोमोझदारकु एते उकु दोहोतम अरो निरबुधिया रे दिसतार एताम। ए आबा चिलिमेनचि आम के नुवां गी बुगिन अटकारेना।
22 #
जोह 3:35;
जोह 10:15
“इञ रिई आबा ता सुबिन्नाः इञ के सोंपाव एकावादेञाय अरो जहय काकु सारी, चि होपोन ओकोय हेकेय, सिरीफ आबा अरो आबा ओकोय हेकेय, नुवां हों जहय काकु सरिइका सिरीफ होपोन हेरेल अरो उनी, जे रे होपोन हेरेल दिसतार कथिर चहाः कनाय।”
23तोब चेलाकु सोझ रुवाड़ केते एकला रे गामवाःकुवाय, “धेनया हेनाःआं उना मेत, नियां सुबिन गानाम ता नेनेल रआ बुगिन मोका नामकानाय! 24इनाते चि अपे एते गाम वपेकानिञ, अपे जे नेल कनापे उना बेचोट एते परमेसर सोझ एते नधनी वनकु अरो राजाकु नेनेल कथिरोःकेनाकु, मुदा काकु नेल दड़िवाता। जे गानाम अपे ओनाव कनापे उना उनकु ओनाव कथिरोःकेनाकु, मुदा काकु ओनाव दड़िवाता।”
दयालु सामरी रआ कहनी
25 #
मती 22:35–40; मर 12:28–34 अरो नेलपे मिहोर परमेसर रआ धरम पोथी सिखाव वनीः बिरीतेनाय अरो नुवां गामकेते उनी के परखाव हेलावेनाय, “ए गुरु का मुडूः जीवन ननाम कथिर इञ चिलियिञ?”
26ईसु ता उनकु के गामवाःकुवाय, “मूसा रआ नियम रे चिलिकाः ओल्लेकाना? अपे चिलका पोड़हाः कनापे?”
27 #
नियम 6:5;
लेवी 19:18
उनी ता जबाब एमाःदेयाय, “‘आम परभु अपन परमेसर एते अपन सुबिन हिरदय अरो अपन सुबिन जीव अरो अपन सुबिन सकती अरो अपन सुबिन मोन एते दुलार दोहोयमी।’ अरो ‘आसे-पासे रेन होर एते अपन लेका दुलार कुम।’”
28 #
लेवी 18:5
ईसु ता उनी के गामवादेयाय, “आम ता बुगिन जबाब एमाःदेञम। नुंकाय रेदोम आम आनाद जीवन नमाम।”
29मुदा उनी ता आच-आच तिगी धरमी ठहराः रआ हिछा एते ईसु के कुलिएदेयाय, “दो इञ रेन हातु रेन होर ओकोय कनकु?”
30ईसु ता जबाब एमाःदेयाय, “मिहोर होर जरुसलेम एते जरीहो रे सिनुः केनाय, चि डाकेतकु ता तुन्दरा केते उनी रआ किचरीः होलोच एदेयाकु, अरो माइर पीट केते रेजेः देयाकु अरो उनी के अदमोरा बागी केते तोराकुवा। 31अरो नुंका होय्येना चि इना होरा एते मिहोर जाजक सिनुः केनाय, मुदा उनी के नेल केते भेरंदागिच केते तोराया। 32इना रकम एते मिहोर मरंग बिनती ओड़ाः रे सेवा-सुसार वनीः लेवी उना ठांव रे हेच्चेनाय, उनी हों नेल केते भेरंदागिच केते तोराया। 33#2 इति 28:15मुदा समरिया रिई मिहोर होर सिनुः केनाय अरो ओन्डो हेच उडुङ एनाय, अरो उनी के नेल केते उनी रे सोग हेच्चेना। 34उनी ता उनी ठिनुः हेचकेते उनी रआ घाव रे सुनूम अरो अंगुर रास लगाव केते पाटी तोल्लेताय अरो अपन जनावार रे देचकेते धरमसला ओड़ाः रे इदी एदेयाय, अरो उनी रआ सेवा-सुसार एदेयाय। 35एटाः हिलोः उनी ता बरीया चांदी रआ टका उडुङ केते धरमसला ओड़ाः रिई मुवार के एमाःदेयाय, ‘अरो गामवादेयाय, नोय रआ सेवा-सुसार एयमी अरो जे गी आम रआ अरो लगाव ओ:वो, उना इञ रुवाड़ोःवोञ रे आम रआ भोराजाव वमिञ।’”
36ईसु नुंका गामकेते कुलिवेःकुवाय, “निमीः आम रआ सोमोझ रे जे डाकुतकु घेराव लेदेयाकु, नोकु तीनों रे एते उनी रेन हातु रेन होर ओकोय ठहरावेनाकु?”
37धरम पोथी सिखाव वनीः ता गामवादेयाय, “उनी गी जे ता उनी रे दया लाःआय।”
ईसु ता उनी के गामवादेयाय, “दु आम हों नुंका गी करावेम।”
ईसु मरथा अरो मरियम रआ ओड़ाः रे
38 #
जोह 11:1
जोब ईसु अरो उनी रेन चेला सिनुः केनाकु, दो उनकु मियाः हातु रे तोराकुवा, अरो मरथा लुतूम मिहोर एरा ईसु के अपन ओड़ाः रे सोवागत एदेयाय। 39मरियम लुतूम उनी रिई मिहोर मिसी तहिकेनाय। उनी परभु रआ बका ठिनुः दुरुप केते उनी रआ गानाम ओनाव एकेनाय। 40मुदा मरथा सेवा-सुसार कराव-कराव कदराव एनाय, अरो उनी ठिनुः हेचकेते गापाम हेलावेनाय, “ए परभु, चिलि आम के जहन्नाः हों चिन्ता बनुःआं, चि इञ रिई मिसी ता इञ के सेवा-सुसार कथिर एकला गी बागी एकाःदेञाम? इनाते उनी के गामवायमी चि इञ के देंगाञय!”
41परभु ता उनी के जबाब एमाःदेयाय, “मरथा ए मरथा आम बेचोट गानाम कथिर चिन्ताय कनाय, अरो कदराः कनाम, 42मुदा मियाः गानाम जरुरेत हेनाःआं अरो उना बुगिन एते बुगिन हिस्सा के मरियम ता सला एकावानाय, जे उनी एते रेच काकु दड़िवाःआ।”
Currently Selected:
लूका 10: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
