लूका 9
9
बारहों चेला के कुकुल
(मती 10:5–15; मरकुस 6:7–17)
1अरो ईसु ता बारहों चेला के होहो केते, उनकु के सुबिन मुवां रावाकु के अरो हासु-दुकूकु के बुगी कथिर सोमोर्थ अरो हक एमाःकुवाय। 2अरो ईसु ता परमेसर रआ राइज रआ खभेर परचार कथिर अरो हासु-दुकूकु के बुगी कराव कथिर कुलेःकुवाय। 3ईसु ता उनकु एते गामवाःकुवाय, “होरा कथिर जहन्नाः ओलोपे इदिया, ना ठेंगा, ना झोला, ना पिठा, ना टका अरो होरोः सोनोः बगी केते एटाः सोनोः बङा 4जे ओड़ाः रे होर अपे के सोवागत पेयाकु एंडेगी तहीःपे, जोब तक चि उना हातु एते कपे बिदाःका। 5#कु.कामि 13:51#लूका 10:4–11जदि होर अपे के काकु सोवागत पेया, दो उनकु रआ हातु एते उडुङ ओःवोपे रे, उनकु के गोवाही एएम कथिर अपे रआ बका रआ धुड़ी झराव केपे।”
6उनकु बारहों चेला तोराकुवा अरो बुगिन खभेर ओनाव वते, अरो होरकु के बुगी कराव वते, हातु-हातु होनोर तहिएनाकु।
हेरोदेस रआ घबराः
(मती 14:1–12; मरकुस 6:14–29)
7 #
मती 16:14; मर 8:28; लूका 9:19 अरो गलील रिई राजपाल हेरोदेस, उना सुबिन गानाम रआ चरचा अयुम केते दुबिधा रे पोड़ाव एनाय, चिलिमेनचि हुडिञगन होर गाम्मेकेनाकु, चि जोहन बतिसमा गोच वनकु रे ते जुवेत बिरीत एकानाय। 8हुडिञगन होर गाम एकेनाकु, चि एलियाह परमेसर सोझ एते नधनी वनीः दिसतार एकानाय, अरो हुडिञगन होर गाम एकेनाकु, चि पुरखा आगमजानी रे ते जहय जुवेत बिरीत एकानाय। 9तोब हेरोदेस ता गाम्मेताय, “जोहन रआ दो इञ बोहोः खंडा इरीवेःकुविञ अरो नोय ओकोय हेकेय, जेकर बबेत रे नुंकान गानाम अयुम कनिञ?” अरो उनी ईसु के नेनेल कथिर चहाः केनाय।
पांच हजार एते ढेर होर के खियाव वेःकुवाय
(मती 14:13–21; मरकुस 6:30–44; जोहन 6:1–14)
10अरो कुलवान चेलाकु रुवाड़ केते जे उनकु कराव लाःआकु, उना उदुःवादेयाकु अरो ईसु उनकु के छिनगाव केते बइतसयदा लुतूम चट्टी रे इदी वेःकुवाय। 11नुवां गानाम सारी केते भीड़ ईसु रआ तयनोम एनाकु। अरो उनी आनाद एते उनकु लोः नपाम्मेनाय अरो परमेसर रआ राइज रआ गापाम हेलावेनाय अरो जे बुगीः चहाः केनाकु, उनकु के बुगी वेःकुवाय।
12जोब सिंगी बोंगा झिरिहिरी इदीः केनाय दो बारहों चेलाकु हेच केते उनी के गाम वदेयाकु, “भीड़ के बिदाकुम चि चइरो ओइर रआ हातु अरो टोला रे सेन केते तहीःआकु अरो जोजोम रआ उपाय जोनाकु, चिलिमेनचि अबु नोन्डो सनसुन ठांव रेबुना।”
13ईसु ता उनकु के जबाब एमाःकुवाय, “अपे गी उनकु के जोजोम वनाः एमाकुपे।”
उनकु ता गामवादेयाकु, “आले ठिनुः पांच गो पिठा अरो बरीया हाकु के बागी केते अरो जहन्नाः बनुःआं, मुदा आले सेन केते नोकु सुबिन होरकु कथिर जोजोम वनाः किरीञ केयाले, दो होय दाड़ी नोःओ।” 14एरा के बागी केते हेरेल एकेन गिनती रे लगेभगे पांच हजार तहिकेनाकु।
तोब उनी ता अपन चेलाकु एते गामवाःकुवाय, “उनकु के पचास-पचास केते धइर-धइर दुरुपकुपे।”
15उनकु ता इनकागी सुबिन के दुरुप वेःकुवाकु। 16तोब उनी ता उना पांच गो पिठा अरो बरीया हाकु लेयकेते सिरमा सोझ नेलकेते धेनयाबाद एताय। अरो खेचाः-खेचाः केते चेलाकु के एम इदिवाःकुवाय, चि होरकु के हटिञ वकुवा। 17तोब सुबिन जोम केते बी एनाकु, सारेच अनाः खेचाः तेः, बारो खन्ची सरेच्चेना।
ईसु गी मसी हेकेय जे बनचाव वनीः हेकेय
(मती 16:13–20; मरकुस 8:27–30)
18जोब ईसु एकला रे पराथनाय केनाय, अरो चेला उनी रआ गाति रे तहिकेनाकु, दो उनी ता उनकु के कुलिवेःकुवाय, “होर इञ के चिलिकाः मेताञ कनाकु, चि इञ ओकोय हेकेञ?”
19 #
मती 14:1,2; मर 6:14,15; लूका 9:7,8 उनकु ता जबाब एमाःदेयाकु, “जोहन बतिसमा एएम वनीः अरो ओकोय-ओकोय एलियाह, अरो ओकोय नुवां चि मरीवान परमेसर सोझ एते नधनी वनकु रे एते जहय जुवेत बिरीत एकानाय नुंका मेनकानाकु।”
20 #
जोह 6:68,69 ईसु उनकु के कुलिवेःकुवाय, “मुदा अपे इञ के चिलिकाः मेताञ कनापे?”
पतरस ता जबाब एमाःदेयाय, “आम मसी हेकेम जे आले रिई बनचाव वनीः, अरो आम परमेसर एते कुल एकानाम।”
अपन गोजुः रआ बबेत ईसु रआ आगमजानी एताय
(मती 16:21–28; मरकुस 8:31—9:1)
21ईसु ता उनकु के चेतोवन एम केते गामवाःकुवाय, चि नुवां जहय के ओलोपे उदुःवाकुवा। 22अरो ईसु ता चेलाकु के गामवाःकुवाय, “मनवा रिई होपोन हेरेल कथिर सारिगी हेनाःआं चि नोय बेचोट दुख उठावियाय अरो मुधकु, अरो महाजाजक, अरो धरम पोथी सिखाविकु उनी के तुछ सोमझाव केते गोजेयाकु, अरो उनी पेय हिलोः रे जुवेत बिरीताय।”
23 #
मती 10:38; लूका 14:27 उनी ता सुबिन के गामवाःकुवाय, “अगर जहय इञ रआ तयनोम हिजुः चहाःअय दो, अपन-अपन तिगी इनकार एपे, अरो गोजुः तक अपन दुख रुपी कुरुस उठाव केते इञ तयनोम कोःपे। 24#मती 10:39; लूका 17:33; जोह 12:25चिलिमेनचि जहय अपन जीव बनचाव चहाःअय उनी, उना आततियाय, मुदा जहय इञ कथिर अपन जीव आततियाय, इनागी उनी के बनचावियाय। 25अगर होर सुबिन दुनिया ता नाम कियाय, अरो अपन रावा गवांवियाय अरो अपन हानि उठावियाय दो उनी के चिलि फयदा होयुःआ? 26जहय इञ अरो इञ रआ सिखाव एते लजाःअकु, मनवा रिई होपोन हों, जोब उनी पबितर दूतकु रआ गाति रे आच रिई आपु रआ महिमा लोः हिजुःआय, तोब उनी हों उनी एते लजाव वोःओय। 27इञ अपे एते सच गामवापे कनिञ, चि जे नोन्डो तिंगु एकानाकु उनकु रे एते आधा नुंका हेनाकुवा, चि जोब तक परमेसर रआ राइज काकु नेल केया, तोब तक काकु गोजुःआ।”
ईसु रआ रुप बदलाव ना
(मती 17:1–8; मरकुस 9:2–8)
28नुवां गानाम ता जहन मीः हापता तयनोम उनी पतरस, जोहन अरो जाकूब के गाति इदिकेते पराथना कथिर टोंगरी रे तोराया। 29जोब उनी पराथनाय केनाय, दो उनी रआ चेहरा रआ रुप बदलावेना अरो उनी रआ किचरीः फिट-फिट पुन्डी केते चमकाः लगावेना। 30अरो नेलपे मूसा अरो एलियाह नोकिन बनार हेरेल ईसु लोः नधनी केनाकिन, 31नोकिन सोवारागदूत महिमा सहित नेल इरीनाकिन, अरो ईसु रआ गोजुः रआ चरचाय केनाकिन, जे जरुसलेम रे पुरावोः वनाः तहिकेना। 32पतरस अरो उनी रेन गाति नींद एते भराव केनाकु, अरो जोब चेहाव एनाकु, दो ईसु रआ महिमा अरो उनकिन बनार हेरेल के जे उनकिन गाति रे तिंगु केनाकिन नेलेः कुवाकिन। 33जोब उनकिन, उनकिन ठिनुः एते सिनुः हेलाव एनाकिन, दो पतरस ता ईसु के गामवादेयाय, “ए मालिक, अबु के नोन्डो तहीः बुगिना इनाते अलिञ पेया तम्बु बाय इयालिञ, मियाः आम कथिर, मियाः मूसा कथिर, अरो मियाः एलियाह कथिर।” उनी काय सारीइ केनाय, चि चिलिकाः गाम एकेनाय।
34उनी नुवां गाम एकेनाय, रिगी मियाः रिम्बील ता हेचकेते ओन्डो उम्बुल एदेयाय अरो जोब उनी रिम्बील एते डबाव वोःकेनाय दो बोरो वनाकु। 35#जसा 42:1; मती 3:17; 12:18; मर 1:11; लूका 3:22#2 पत 1:17,18तोब उना रिम्बील एते नुवां सबद उडुङएना, “नोय इञ रिई होपोन हेरेल अरो इञ रिई सला वनीः हेकेय, नोय रआ अयुम्मेपे!”
36नुवां सबद होयता गी ईसु एकला नामेः एदेयाकु, अरो उनकु हपे तही एनाकु अरो जहन्नाः नेल लाःआकु उनी के जहन गानाम उना हिलोः जहय के काकु गाम।
मुवां रावा गाइर वनीः होपोन के बुगी कराव
(मती 19:14–18; मरकुस 9:14–27)
37एटाः हिलोः जोब ईसु अरो पेय चेला टोंगरी एते अरगु एनाकु, दो मियाः मरंग भीड़ उनी एते, हेच नपाम एनाकु। 38अरो नेलकुपे भीड़ रे एते मिहोर होर ता कुर्री केते गामवादेयाय, “ए गुरु इञ आम के गोहराव मिकानिञ चि इञ रिई होपोन रे दया नजेर एम चिलिमेनचि नोय इञ रिई होपोन मिहोर गियय! 39अरो नेल मियाः मुवां रावा उनी के सबेय कनाय अरो उनी अचाका कुर्रीइ कनाय अरो मुवां रावा उनी के नुंका ऐंठावेय कनाय, चि उनी रआ मोचा रे बोटो उडुङ ओःका अरो उनी के थोसड़ाव केते मसकिल एते बगीइ कनाय। 40इञ ता आमरेन चेलाकु एते गोहराव वेःकुइञ चि उनी के उडुङ इयाकु, मुदा उनकु काकु उडुङ दड़िवादेया।”
41तोब ईसु ता गामवाःकुवाय, “ए अबिसवासी अरो भटकाव होरकु इञ चिमिन हिलोः तक अपे लोः तहिनोःओञ अरो अपे रआ सहाविञ? अपन होपोन हेरेल के नोन्डो अगुइमी।”
42उनी के अगुइ केन गियय रिगी, मुवां रावा ता उनी के जकड़ाव केते ऐंठाव अरो तावाः एदेयाय, मगर ईसु ता घिन रावा के डपटाव एदेयाय अरो धिंगाला तके बुगिन केते, उनी रिई आपु तेः के जिमा वदेयाय। 43तोब सुबिन होर परमेसर रआ सुबिन एते महान सोमोर्थ एते चकरीत एनाकु।
अपन गोजुः रआ बबेत ईसु दोबोरा आगमजानी तय
(मती 17:22–23; मरकुस 9:30–32)
सुबिन होर ईसु रआ सुबिन कामि एते चकरीत ओःकेनाकु तोब उनी अपन चेला एते गामवाःकुवाय। 44अपे नियां गानाम ओयहर इयापे नहाः चिलिमेनचि मनवा रिई होपोन हेरेल के मनवांकु रआ ती रे सापइरियाकु। 45मुदा चेलाकु नुवां गानाम ता काकु सोमझाः केना, अरो नुवां उनकु एते उकु तहिएना, चि उनकु उना काकु सारी दड़िवाःआ अरो उनकु नुवां गानाम रआ बबेत रे उनी एते कुलि कथिर बोरोय केनाकु।
सुबिन एते मरंग ओकोय
(मती 18:1–5; मरकुस 9:33–37)
46 #
लूका 22:24
मिसा नुंका ना चि चेलाकु रे नुवां झमेला होयुः लगावेना, चि अबु रे एते मरंग ओकोय हेकेय। 47ईसु ता उनकु रआ मोन रआ बिचार सारीएताय, अरो मिहोर बालेच होपोन के अगु केते अपन हेनात तिंगु एदेयाय, 48#मती 10:40; लूका 10:16; जोह 13:20तोब ईसु चेलाकु एते गामवाःकुवाय, जहय इञ रआ लुतूम एते नोय होपोन के गरहन एयकानाकु, उनी इञ के गरहन एञकनाय। अरो जहय इञ के गरहन एञकानाकु, उनी इञ रिई कुकूल वनीः परमेसर के गरहन एयकानाकु, चिलिमेनचि जे अपे रे सुबिन एते हुडिञ एते हुडिञ हेनाया इनिगी सुबिन एते मरंग हेनाया।
जे बिरोध रे बनुः कुवा, उनकु इञ सोझ अकु
(मरकुस 9:38–40)
49तोब जोहन ता ईसु के गामवादेयाय “ए मालिक, आले ता मिहोर होर के आम रआ लुतूम एते मुवां रावाकु के उडुङ एते नेल एकाःदेयाले अरो आले ता उनी के रोकाव एदेयाले, चिलिमेनचि उनी अबुन रिई गाति बङ हेकेय।”
50ईसु ता उनकु के गामवाःकुवाय, “उनी के ओलोपे रोकाविया, चिलिमेनचि जे अबुन रआ खोनोस रे बनुः इचाय, उनी अबुन सोझ हेनाया।”
सामरिकु ईसु के काकु गरहन
51जोब ईसु के सोवाराग सिनुः रआ हिलोः पुराव वोः रआ तहिकेना, दो उनी ता जरुसलेम सिनुः रआ बिचार एताय। 52ईसु ता अपन लहा खभेर एएम वनकु के कुलेःकुवाय, उनकु समरिया रआ मियाः हातु रे तोराकुवा, चि उनी कथिर ठांव तेयार इयाकु। 53मुदा समरिया रेन होर उनी के काकु बोलो इरीवादेया, चिलिमेनचि उनी जरुसलेम सिनुः केनाय। 54#2 राजा 1:9–16नुवां नेल केते उनी रेन चेला जाकूब अरो जोहन ता गामवादेयाकिन, “ए परभु चिलि आम चहाः कनाम चि आले हुकूम एम्माले, चि सिरमा एते सेंगेल उयुः केते उनकु के भसाम ककुम?”
55मुदा उनी ता रुवाड़ केते उनकु के डपटाव वेःकुवाय, अरो गामवाःकुवाय अपे कपे सारीका चि अपे चिलकन रावा रेन कनपे। चिलिमेनचि मनवा रिई होपोन हेरेल होरकु के जीव ता नास कथिर बङा मगर बनचाव कथिर हेच एकानाय।#9:55 जे ईसु गाम एकाःआय उना जहन-जहन मरी पोथी रे बनुःआं 56अरो उनकु जहन हातु रे तोराकुवा।
ईसु रेन चेला बयुः रआ गोनोंङ
(मती 8:19–22)
57जोब उनकु होरा एते सिनुः केनाकु, दो जहय ता ईसु एते गामवादेयाय, “जे-जे ठिनुः आम सिनुःआम, इञ आम रआ तयोम कोःओञ।”
58ईसु ता उनकु एते गामवाःकुवाय, “तुयूकु रआ भुलकाः अरो सिरमा रेन चेंड़ेकु कथिर खोंधाः होयुःका, मुदा मनवा रिई होपोन हेरेल कथिर बोहोः दोहो कथिर हों ठांव बनुःआं।”
59उनी ता एटाः होर एते गामवादेयाय, “इञ रआ तयनोम कोःमी।”
उनी ता गामवादेयाय, “ए परभु, इञ के पहिल सेनइरी वञमी चि अपन आपु के तोपायिञ।”
60ईसु ता उनी के मेताःदेयाय, “गोच इनीः के अपन मुरदा तोपा इरीवाकुमी, मुदा आम सेन केते परमेसर राइज रआ गानाम ओनाव वकुम।”
61 #
1 राजा 19:20
अरो मिहोर ता हों गामवादेयाय, “ए परभु इञ आम रआ तयनोम कोःओञ मुदा पहिल इञ के सेन इरीवाञमी, चि अपन ओड़ाः रेन होरकु एते बिदा कोय केते हिजुःइञ।”
62ईसु ता उनी एते गामवादेयाय, “जहय हर सियुः घरीक लकठा साप केते तयोम नेल रुवाड़ कनाय, उनी परमेसर रआ राइज रिई लाइख बनुः इचाय।”
Currently Selected:
लूका 9: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
