लूका 8

ईसु के सुसार वन एराकु

1इना तयनोम ईसु चट्टी-चट्टी अरो हातु-हातु परचार करावाते अरो परमेसर रआ राइज रआ खभेर उदुः वते होनोर हेलावेनाय। उनकु बारहों चेलाकु हों ईसु लोः तहिःकेनाकु, 2#मती 27:55,56; मर 15:40,41; लूका 23:49अरो आधा एरा हों तहिकेनाकु, जे मुवां रावा एते अरो हासुदुकू एते बुगी लेःकुवाय, अरो उनकु नेकु हेकेकु, मरियम जे मगदलना हातु रिई गामुः केनाय जेकर रे एते सात गो मुवां रावाकु उडुङ केनाकु, 3अरो हेरोदेस रेन भन्डारी खोजा रिई एरा तेः जोअना, अरो सूसन्‍नाह, अरो बेचोट एते एटाः एराकु नोकु अपन सम्पति रे एते ईसु अरो चेलाकु के सुसार कुकनकेनाकु।

बिहेन हेहेर वनीः रआ कहनी

(मती 13:19; मरकुस 4:19)

4जोब मरंग भीड़ मीः ठिनुः एनाकु अरो चट्टी-चट्टी रेन होर उनी ठिनुः हिजुः केनाकु, दो ईसु ता मियाः कहनी रे गाम वाःकुवाय,

5“मिहोर बिहेन हेहेर वनीः बिहेन हेहेर उडुङ एनाय। हेहेर घरीक आधा होरा रआ आतोम रे उयुःएना, अरो बका एते रेंवदाव एताकु अरो सिरमा रेन चेंड़े ता हलङ एताकु। 6आधा रुगड़ी ओते रे उयुःएना अरो ओमोनेना, मुदा हाल का तहिकेना इनाते रोहोड़ेना। 7हुडिञगन झुड़ रआ ताला रे उयुःएना अरो झुड़ ता मिसा एते हरा केते उना तेन एताय। 8हुडिञगन बुगिन ओते रे उयुःएना अरो हरा केते साव गुना अनाज पयदा होय्येना।”

नुवां गाम केते उनी ता जोड़ राव एते गामवाःकुवाय, “जेकर अयुम कथिर लुतूर हेनाःआं उनकु ओनाव केपे!”

कहनी रआ मोतलोब

(मती 13:10–17; मरकुस 4:10–12)

9चेलाकु ता ईसु एते कुलिएदेयाकु, नुवां कहनी रआ चिलि ओरोथ हेके? 10#जसा 6:9ईसु ता गामवाःकुवाय, “अपे के परमेसर रआ राइज रआ भेद रआ सोमोझ एमएकावाःपिञ, अरोकु के, कहनी रे ओनाव वकुकानाकु, जेकर एते चि

“नेल केते हों काकु नेल दड़िवाकाना

अरो ओनाव केते हों काकु सोमझाव दड़िवाकाना।

बिहेन हेहेर वनीः रआ कहनी रआ ओरोथ

(मती 13:18–23; मरकुस 4:13–20)

11“कहनी रआ ओरोथ नुवां हेके, बिहेन परमेसर रआ बचन हेके। 12होरा रे उयुः अनाः बिहेन उनकु हेकेकु, जे मनवां बचन ओनाव एताकु; मुदा सयतान हेच केते उनकु रआ मोन रे एते बचन ता ओचोः कताय, चि जहां रे नुंका ओलो होयुःका चि उनकु बिसवास केते उद्धार नाम्‍माकु। 13रुगड़ी ओते रेन उनकु हेकेकु, जे ओनाव कनाकु अरो आनाद एते बचन दो, गरहन कनाकु। मुदा अकु रआ मोन रे बचन रआ रेहेत का होयुः ते उनकु हुडिञ समेय तक बिसवास दोहोय कनाकु, अरो परीछा रआ समेय बहकाव कोःकानाकु। 14झुड़ रे उयुः अनाः बिहेन, उनकु हेकेकु जे बचन ओनाव कनाकु, मुदा लहा सेन केते चिन्ता अरो धन अरो जिनगी रआ सुख-बिलास रे दाः कोःकानाकु अरो उनकु पकानिका काकु बाय दड़िवाकाना। 15अरो बुगिन ओते रे उयुः वनाः बिहेन उनकु हेकेकु जे बचन ओनाव केते उना बुगिन खरा मोन एते बचन ओनाव केते अरो हिरदय रे दोहो केते धीरज एते फोल अगुइ कनाकु।

डीबरी रआ कहनी

(मरकुस 4:21–25)

16 # मती 5:15; लूका 11:33 “जहय डिबरी धराव केते बसन एते काकु हरुप काना, अरो न परकोम रआ लातार रे दोहोय कनाकु, मुदा दिरखा रे दोहोय कनाकु चिलिमेनचि भीतरी हिजुः वनकु मसकल नाम्‍माकु।

17 # मती 10:26; लूका 12:2 “जे उकु हेनाःआं, उना दिसतार ओःओ अरो जे हरुप एकाना, उना ओटाःओ। 18#मती 25:29; लूका 19:26इनाते चेम्पोर तहीःपे, चि अपे करा लेका एते ओनाव कनापे? जेकर ठिनुः हेनाःआं, उनी के अरो एमायाय अरो जेकर ठिनुः बनुःआं उना हों जे उनी ठिनुः हेनाःआं उना हों अगु रुवाड़ियाय।”

ईसु रिई एंगातेः अरो बारेकु तेः

(मती 12:46–50; मरकुस 3:31–35)

19ईसु रिई एंगातेः अरो बोयहा तेः उनी एते नपाम्‍मोः हेच्‍चेनाकु। मुदा भीड़ रआ चलते उनी ठिनुः उनकु काकु तेबाः दड़िवाता। 20होरकु ता ईसु एते गामवादेयाकु, “आम रिई एंगाम अरो बोयहाम टांड़ी रेकुवा उनकु आम एते नपाम्‍मोः कथिरोः कनाकु।”

21ईसु ता जबाब एमाःकुवाय, “इञ रिई एंगाञ अरो इञ रेन बोयहा उनकु हेकेकु, जे परमेसर रआ बचन ओनाव कनाकु, अरो उनी रआ मनावोः कनाकु।”

आंधी ता थिरावेताय

(मती 8:23–27; मरकुस 4:35–41)

22ईसु मीः हिलोः अपन चेलाकु लोः डोंगा रे दुरुप एनाय अरो उनकु के मेताःकुवाय अबु समुदर रआ आना परोम सिनुःआबुन। उनकु डोंगा रड़ा केते चलाव एताकु। 23डोंगा सेसेन केना इमिन रे ईसु गितीच एनाय। तोब समुदर रे आंधी हेच्‍चेना। डोंगा दाः एते पेड़ेच इदीःकेना अरो उनकु संकट रे पोड़ावेनाकु। 24चेलाकु ता ईसु ठिनुः हेचकेते उनी के चेहाव एदेयाकु अरो गामवादेयाकु, “ए मालिक! ए मालिक! आले डुबाः कनाले!”

उनी बिरीत एनाय अरो आंधी अरो हलकाव ता डपटावेताय, उना आंधी थिरावेना अरो हलकाः सिचसोड़ोच एना। 25तोब उनी ता अपन चेलाकु तेः के मेताःकुवाय, “अपे रआ बिसवास कारे तहिकेना?”

ईसु अरो उनी रआ सकती एते उनकु बोरो वनाकु अरो उनकु चकचिवह केते अकु-अकु रे नुवां गापाम तहिएनाकु, “नोय ओकोय हेकेय? नोय आंधी अरो हलका हों हुकूम एम कनाय अरो उना उनी रआ हुकूम मनाः काना।”

मिहोर होर रे एते मुवां रावाकु के उडुङ वेःकुवाय

(मती 8:28–34; मरकुस 5:1–20)

26अरो उनकु गलील दिसुम एते डोंगा रे देच केते आना परोम गिरासेनिया पोरदेस रे तेबाःएनाकु। 27जोब ईसु अतोम रे अरगु एनाय, दो उना चट्टी रिई मिहोर मनवां उनी लोः नपाम्मेनाय, जेकर रे मुवां रावा तहिकेनाकु। उनी बेचोट हिलोः एते ना किचरीः होरोः ओःकेनाय ना ओड़ाः रे तहीः केनाय मुदा मरघाटी रे तहीः केनाय। 28उनी ईसु के नेल केते कुर्री बिरीत एनाय अरो उयुः केते जोड़ राव एते गामवादेयाय, “ईसु परमपरधान परमेसर रिई होपोन तेः हेरेल! इञ के आम एते चिलि कामि? आम के गोहराव मिकानिञ, इञ के ओलोम सताविञा,” 29चिलिमेनचि ईसु घिन रावाकु के उनी मनवां एते उडुङओः रआ हुकूम एमाकुकन केनाय। मुवां रावाकु उनी के घरी-घरी जकड़ाव केय केनाकु अरो कबजा रे दोहो कथिर होर उनी के सिकड़ी अरो बेरी एते तोल केय केनाकु; मुदा उनी आच रआ तोनोल ता सीत केकान केनाय अरो मुवां रावाकु उनी के टोंगरी रे इदी केय केनाकु।

30ईसु ता मुवां रावाकु एते कुलिवेःकुवाय, “अपे रआ चिलि लुतूम हेके?”

उनकु ता गाम वदेयाकु, “पलटन”, चिलिमेनचि उनी मनवां रे बेचोट-एते मुवां रावाकु बोलो केनाकु। 31उनकु ता ईसु के गोहराव एदेयाकु, चि “आले के अनथाह गड़हा रे सिनुः रआ हुकूम ओलोम एमालेया।”

32ओन्डो टोंगरी रे सुकरी रआ मियाः मरंग गोहड़ा अतिञ केनाकु, इनाते उनकु ता उनी एते गोहराव एदेयाकु चि आले के उनकु सुकरी रे बोलो इरीवालेम। ईसु ता मुवां रावाकु के सेन इरीवाःकुवाय। 33तोब मुवां रावाकु उनी होर रे एते उडुङ केते सुकरी रे तोराकुवा अरो उनकु गोहड़ा खंड़हर रे उयुः केते, समुदर रे डुबाव गोच्‍चेनाकु।

34गोरखिवानकु नुवां जे नुंका होयकेना नेल केते निरेत्‍ताकु अरो चट्टी रे अरो हातु रे सेन केते उना रआ खभेर उदुः एताकु। 35होर नुवां जे होयकेना उना नेनेल उडुङएनाकु अरो ईसु ठिनुः हेच केते जे होर एते मुवां रावाकु उडुङ केनाकु, उनी के ईसु रआ बका ठिनुः किचरीः होरोः केते अरो चेंठा दुरुप एते नामेः देयाकु। दो बोरो वदेयाकु। 36अरो नेनेलवानकु ता उनकु के उदुःवाःकुवाकु चि उनी मुवां रावा रआ सताव वनीः होर चिलका एते बुगी एनाय। 37तोब गिरासेनिया पोरदेस रेन हेनात-जपाः रेन सुबिन होरकु ता ईसु एते गोहराव एदेयाकु चि आले ठिनुः एते सेनजोनमी, चिलिमेनचि उनकु रे मरंग भोय पेड़ेच केना। इनाते उनकु डोंगा रे देच केते चइल एताकु। 38जे होर रे एते मुवां रावाकु उडुङ केनाकु, उनी ईसु एते गोहराव हेलावेनाय चि, “इञ के आम रआ गाति रे तही इरीवाञमी।”

मगर ईसु ता उनी के बिदा केते, गामवादेयाय, 39“अपन ओड़ाः रुवाड़ जोनमि अरो होरकु एते उदुःवाकुम चि परमेसर ता आम कथिर चिलकान कामि एकाःआय।”

उनी सेन केते सुबिन चट्टी रे परचार हेलावेनाय चि ईसु ता इञ कथिर चिलकन मरंग-मरंग कामि एकाःआय।

याइर रिई गोच कुरी अरो मिहोर रोग वनीः एरा

(मती 9:18–26; मरकुस 5:21–43)

40जोब ईसु गलील रुवाड़ हेच्‍चेनाय, दो होरकु ता उनी एते आनाद एते नपाम एनाकु, चिलिमेनचि सुबिन उनी रआ आसरा नेनेल केनाकु। 41इमिताः जाइर लुतूम मिहोर होर जे बिनती ओड़ाः रिई सरदार तहिकेनाय हेच्‍चेनाय अरो ईसु रआ बका रे उयुः केते उनी एते गोहराव कराव हेलावेनाय, चि “इञ रआ ओड़ाः देलांङ”, 42चिलिमेनचि उनी रिई बारो बरीस रिई कुरी होपोन गोजुः लेका केनाय, जे मियाः उतरगी तहिकेनाय।

जोब ईसु सिनुः केनाय, तोब होर उनी के नेनेल कथिर सिमिर-सिमिर वोःकेनाकु। 43भीड़ रे मिहोर एरा तहिकेनाय जेके बारो बरीस एते मयम अतुः रआ रोग तहिकेना अरो अपन जिनिवेत वनाः सुबिन्‍नाः रानु-मुरगन करावानकु रआ तयोम खरचा चबा लाःआय, रेहों गी जहय ता ककु बुगी दड़िवादेया। 44उनी ईसु रआ तयोम एते हेच केते उनी रआ किचरीः रआ मुडू जोटेतेताय अरो एनेन गी उनी रआ मयम अतुः अटकावेना। 45नुवां रे ईसु ता गामवाःकुवाय, “इञ के ओकोय ता जोटेत एदेञाय?”

जोब सुबिनकु गामवादेया, “बङा,” दो पतरस गामवादेयाय, “ए मालिक, आम रे दो भीड़ सटाव बेराः कनाकु अरो आम रे तकिच बेराः कनाकु।”

46मगर ईसु ता गामवाःकुवाय, “जहय इञ के जोटेत एकाःदेञाय, चिलिमेनचि इञ दो सारीएतिञ चि इञ रे एते सोमोर्थ उडुङ एकाना।” 47जोब एरा ता नेलेःदेयाय, चि इञ काइञ उकु दड़िवाता तोब बोरोय वते अरो थड़थड़वाते हेच्‍चेनाय। अरो उनी रआ बका रे उकरुम केते सुबिन होरकु रआ हेनात उदुःएताय, चि उनी ता चिलि कारन एते उनी के जोटेत एदेयाय अरो चिलका एनेन गी बुगी एनाय। 48ईसु ता उनी के गामवादेयाय, “होपोन एरा आम रआ बिसवास गी आम के बुगी एकाःमाय सांति एते सेन जोनमी।”

49ईसु नुवां गाम्‍मेकेनाय रिगी जहय ता बिनती ओड़ाः रिई मुध ठिनुः एते हेच केते गामवादेयाय, “आम रिई होपोन एरा गोच्‍चेनाय, गुरु के दुख ओलोम एमाया।”

50ईसु ता नुवां अयुम केते जाइर के जबाब एमाःदेयाय, “ओलोम बोरोया, सिरीफ बिसवास दोहोयमी, दो उनी बुगी नोःओय।”

51ओड़ाः रे हेचकेते, ईसु ता पतरस, जोहन, जाकूब अरो कुरी रिई एंगा-आपु तेः के बागी केते एटाः होर जहय के अकु लोः भीतरी काय हेच इरीवाःकुवाय। 52सुबिन होर उनी कथिर खोभराव-खोभराव ते इयाम हेलावेनाकु, तोब ईसु ता गामवाःकुवाय, “ओलोपे इयाम्‍मा, उनी काय गोच एकानाय-मगर गितीच एकानाय!”

53उनकु नुवां सारी केते चि नोय गोच एकानाय, ईसु के लंदा वदेयाकु। 54मुदा ईसु उनी रआ ती साप्पेताय अरो गामवादेयाय, “ए कुरी, बिरीतमी!” 55तोब उनी रआ जीव रुवाड़ हेच्‍चेना अरो उनी एनेन गी बिरीत दुरुप एनाय अरो ईसु ता हुकूम एमाःदेयाय, चि उनी के जहन्‍नाः जोजोम कथिर एमायपे। 56उनी रेन एंगा-आपु तेः चकरितेनाकिन अरो ईसु ता उनकिन के चेतावेः किनाय, चि नुवां जे गी होय एकाना जहय के ओलोबेन उदुःवाकुवा।

Currently Selected:

लूका 8: BIY

Highlight

Copy

Compare