लूका 11

पराथना रआ बबेत रे ईसु रआ सिखाव

(मती 6:9–13)

1ईसु जहन ठांव रे पराथनाय केनाय। जोब उनी पराथना मुडू एताय दो उनी रेन चेलाकु रे एते मिहोर ता उनी एते गामवादेयाय, “ए परभु जेलेका जोहन ता आचरेन चेलाकु के पराथना कथिर सिखाव वेःकुवाय, इनका गी आले केहों आम पराथना कराव सिखाव कलेम।”

2ईसु ता उनकु एते गाम वाःकुवाय, जोब अपे पराथनायपे दो गामपे,

“ए आबा,

आम रआ लुतूम रआ महिमा होयुःका,

आम रआ राइज हिजुःका।

3आले रआ दिन भोइर रआ जोजोम वनाः सुबिन हिलोः आले के एमालेम।

4अरो आले रआ पाप ता माफ कम,

चिलिमेनचि आले हों, अपन सुबिन बुराय कराव वनकु के माफ कुकानाले,

अरो आले के परीछा रे ओलोम पोड़ाव इरिवालेया।”

5तोब ईसु ता अपन चेलाकु के गामवाःकुवाय, “सोंचाव कोःपे चि अपे रे एते ओकोय हेकेय चि उनी रिई मिहोर गाति होयुः अरो उनी आधा निदा रे उनी ठिनुः सेन केते उनी एते गाम्‍माय ए गाति इञ के पेया पिठा एमाञ। 6चिलिमेनचि मिहोर होरा सेसेन वनीः गाति इञ ठिनुः हेच एकानाय, अरो उनी के खियाव कथिर इञ ठिनुः जहन्‍नाः बनुःआं। 7अरो उनी भीतरी एते जबाब एमामाय इञ के दुख ओलोम एमाञा, निमीः दो दुवेर हंडेत गिया, अरो इञ रेन होपोन इञ ठिनुः डिसना रे हेनाकुवा, इनाते इञ बिरीत केते आम के काइञ एम दड़िवामा? 8इञ अपे एते गाम कनिञ जदि उनी रिई गाति होयुः रेहों उनी बिरीत केते काय एमाया, रेहों गी घरी-घरी कोकोय रआ चलते उनी के जेतना जरुरी होयुःआ, इमिनुः बिरीत केते उनी एमायय। 9अरो इञ अपे एते गाम कनिञ, कोय्येपे, अपे के एमापेयाय; दंड़ायपे, नमुःआ, ठोकठोकाव एपे, अपे कथिर निच्‍चीयाय। 10चिलिमेनचि जे होर कोकोय चित तहीः कनाकु, नाम कनाकु, जे दंड़ाय कनाकु, उनकु नाम केकानाकु, अरो जे ठोकठोकाव चित तहीः कनाकु, उनकु कथिर दुवेर निच्‍चीयाय। 11अपे रे एते नुंकन आपु ओकोय हेनाःइचाय, चि जोब उनी रिई होपोन हाकु कोवेयाय, दो हाकु बदला रे उनी के बिञ एमायाय? 12बङ रेदो आंडा कोवेयाय दो उनी के कटकोमकिदिञ एमायाय? 13अपे कठिक होय केते हों, अपन होपोन के बुगिन जिनिस एएम सारीइ कनापे, दो सोवारगिये आबा अपन कोकोय वनकु के पबितर रावा चिलिमेन काय एमाकुवाय?”

ईसु अरो मुवां रावा रिई मुध बालजबूल

(मती 12:22–30; मरकुस 3:20–27)

14अरो मीः हिलोः ईसु मिहोर मनवां एते मुवां रावा के उडुङ एदेयाय। जे उनी के कोंदा बाय लेदेयाय, मुवां रावा उडुङ एनाय दो कोंदा गापाम हेलावेनाय अरो होरकु ता चकरीत एनाकु। 15#मती 9:34; 10:25मुदा उनी रे एते आधा गापाम हेलावेनाकु, नुवां दो बालजबूल लुतूम मुवां रावाकु रेन मरंग इनीः रआ देंगा ते मुवां रावाकु के उडुङ कुकानाय।

16 # मती 12:38; 16:1; मर 8:11 अरोकु ता उनी के परीछा कथिर उनी एते सोवाराग रआ जहन चिनहा कोवेःदेयाकु, जेकर एते नुवां पाता सेसेना चि उनी परमेसर ता उनी के कुल एकाःदेयाय। 17मुदा उनी ता उनकु रआ मोन रआ गानाम सारी केते उनकु एते गामवाःकुवाय, “जे राइज रे फूट होयुःका, उना राइज तहस-नहस कोःकाना; जे ओड़ाः रेन होर रे फूट होयुः काना, उना ओड़ाः रेन होर छितिर-बितिर कोःकानाकु। 18जदि सयतान गी अपन बिरोध रे होयुःआकु रेदो, उनकु रआ राइज चिलका बाय तहिना? चिलिमेनचि अपे इञ रआ बबेत रे दो गाम कनापे चि नोय बालजबूल रआ देंगा एते मुवां रावा उडुङ कुकानाय। 19जदि इञ बालजबूल रआ देंगा एते मुवां रावाकु के उडुङ कुकानिञ, दो अपे रेन चेलाकु ओकोय रआ देंगा एते उडुङ कुकानाकु? इनाते उनकु गी अपे के नेयाय पेयाकु। 20मुदा जदि इञ परमेसर रआ सकती एते मुवां रावाकु के उडुङ कुकानिञ, दो परमेसर रआ राइज अपे ठिनुः हेच तेबाः एकाना।”

21जोब बोलगार होर हथयार साप केते अपन ओड़ाः पहराय कनाय, दो उनी रआ सम्पति बुगिन ते बनचाव तहीः काना। 22मगर जोब उनी एते बड़हाव केते जहय अरो बोलगार लड़ाय केते उनी एते जिताव कोःकनाय, दो उनी रआ उना हथयार जे रे उनी रआ भोरोसा तहिकेना, रेच केकानाकु अरो उनी रआ सम्पति रेच केते हटिञ वकुकानाय।

23 # मर 9:40 जे इञ लोः बनुःकुवा उनकु इञ रआ खोनोस रे हेनाकुवा अरो जे इञ लोः काकु हविर काना, उनकु छितराव कनाकु।

आधा सुधराव रे बिपेत

(मती 12:43–45)

24“जोब घिन रावा मनवां रे एते उडुङ कोःकनाय, दो सनसुन ठांव रे तहीः कथिर दंड़ा बेराय कनाय अरो जोब काय नामकन रेदोय गामकानाय, इञ अपन उना मरी ओड़ाः रे जे ठिनुः एते ‘उडुङ किनिञ रुवाड़ जोनिञ।’ 25अरो हेचकेते झाड़ा-बुहारा अरो साजाव धजाव नाम कनाय। 26तोब उनी सेनकेते अपन एते बेचोट कठिक सात गो अरो मुवां रावाकु के लेयकेते हिजुःकाय, अरो उनकु उनी रे बोलो केते बोसाव जोन कनाकु, नियां लेका उनी मनवां रआ तयोम दसा पहिल एतेहों अरो बेचोट कठिक कोःकाना।”

धेनया ओकोय हेकेय?

27जोब उनी नुवां गानाम गाम एकेनाय रिगी भीड़ रे एते जहय एरा ता जोड़ राव एते गाम्‍मेताय, “धेनया हेनाःआं उनी एरा रआ होड़मो जे आम के जनमाव वेःमाय, अरो आम के तोवा अनुवाःमाय।”

28ईसु ता गाम्‍मेताय, “हें मुदा धेनया उनकु हेनाकुवा, जे परमेसर रआ बचन ओनाव कनाकु अरो मनाः कनाकु।”

सरग चिनहा रआ कोय

(मती 12:38–42)

29 # मती 16:4; मर 8:12 जोब मरंग भीड़ मीः ठिनुः हुन्डी इदीः केनाकु, दो ईसु गापाम हेलावेनाय, “नुवां जुग रेन होर कठिक हेनाकुवा, उनकु चिनहा कोय कनाकु, मुदा जोना रआ चिनहा ता बगी अरो जहन चिनहा उनकु के काबु एमाकुवा।” 30#जोना 3:4जेलेका जोना नीनवे रेन होरकु कथिर चिनहा ठहरावेनाय, इनका गी मनवा रिई होपोन हेरेल हों नुवां जुग रेन होरकु कथिर ठहराव वोःओय। 31#1 राजा 10:1–10; 2 इति 9:1–12सिबा नेयाय रआ हिलोः दछिन रिई रानी नियां पीढ़ी रेन होरकु लोः तिंगु केते नोंकु के दोसी ठहरावकुवाय, चिलिमेनचि उनी सुलेमान रआ गेयान ओनाव कथिर ओते रआ अतोम एते हेच्‍चेनाय आर नेलेयपे, नोन्डो उनी हेनाया जे सुलेमान एते हों किमती हेनाया। 32#जोना 3:5नीनवे रेन होर नेयाय रआ हिलोः नुवां समेय रेन होरकु रआ लोः तिंगु केते उनी के दोसी ठहरावियाकु, चिलिमेनचि उनकु ता जोना रआ परचार ओनाव केते मोन रुवाड़ेताकु अरो नेलपे, नोन्डो उनी हेनाया, जे जोना एते हों मरंग हेनाया।

होड़मो रआ डीबरी

(मती 5:15; 6:22–23)

33 # मती 5:15; मर 4:21; लूका 8:16 जहय होर डिबरी धराव केते मवनी रे काकु दोहोय काना ना दिरखा रआ लातार रे काकु दोहोय काना, मुदा दिरखा रे दोहोय कनाकु चि भीतरी हिजुः वनकु मसकल नाम्‍माकु। 34आम रआ होड़मो रआ डिबरी आम रआ मेत हेके, इनाते जोब आम रआ मेत बुगिन हेनाःआं दो आम रआ होड़मो हों मसकल हेनाःआं, मुदा मेत कठिक हेनाःआं दो आम रआ होड़मो हों लुबाः हेनाःआं। 35इनाते चेम्पोर तहीःपे चि जे मसकल आम रे हेनाःआं उना ओलो लुबाः ओःका। 36इनाते जदि आम रआ सुबिन होड़मो मसकल होयुःआ अरो उनी रआ जहन हिस्सा लुबाः का तहीःआ रेदो सुबिन एते सुबिन नुंका मसकल होयुःआ, जेलेका उना समेय होयुःआ जोब डिबरी अपन चमकाः एते अपे के मसकल एमापेकानाय।

धरम पोथी सिखाविकु अरो फरीसिकु के डपटाव वेःकुवाय

(मती 23:1–36; मरकुस 12:38–40)

37जोब ईसु गापाम केनाय, दो जहय फरीसी ता उनी के गोहराव एदेयाय चि इञ ठिनुः जोजोम हिजुःमी। ओन्डो भीतरी सेनकेते जोजोम कथिर दुरुप एनाय। 38ईसु जहुदिकु रआ रिवाज मोताबिक बिन उम तिगी जोम एकेनाय, उनी के नेल केते फरीसी चकरीत एनाकु। 39परभु ता उनी एते गामवादेयाय, ए फरीसिकु अपे डुभनी अरो थाड़ा ता चेतान-चेतान तेदो गसार कनापे, मुदा भीतरी रे काइ तही जोनकाना। इनका गी अपे रआ मोन रे ललाच अरो बुराय पेड़ेच एकाना। 40ए गवांरकु जे ता बहरी रआ हिस्सा बाय एकाःआय चिलि उनी ता भीतरी रआ काय बाय एकाःआय? 41मुदा हें भीतरी वनाः जिनिस ता दान एमकम, दो, नेलमी सुबिन्‍नाः आम कथिर सुध उतारोःओ।

42 # लेवी 27:30 ए फरीसिकु अपे रे हाय! अपे फुदेना अरो करी पता रआ अरो सुबिन रकम रआ आड़ाः-सेकाम रआ दसवांस एम कनापे, मुदा परमेसर रआ दुलार अरो नेयाय ता टलाव ककानापे, होयुःआ रेदो नुंका चहाः तहिकेना चि नियां हों करावियापे होनाङ अरो उना हों कपे बगिया होनांङ।

43ए फरीसिकु अपे रे हाय! अपे बिनती ओड़ाः रे मरंग-मरंग होर दुरुप ठांव अरो बाजार रे जोहार इरीः नाम कनापे। 44हाय! अपे के चिलिमेनचि अपे उना उकु मरघाटी रआ लेका हेनापेया, जे रे होर सेसेन कनाकु, मुदा काकु सारीइकाना।

45तोब मिहोर परमेसर रआ धरम पोथी सिखाव वनीः ता उनी के जबाब एमाःदेयाय, “ए गुरु नियां रआ गाम एते आम आले रआ निंदय कनाम।”

46ईसु ता गामवाःकुवाय, “ए परमेसर रआ धरम पोथी सिखाव वनकु अपे केहों हाय! अपे नुंका हम्बल जेके रिड़िम मसकिल हेनाःआं, होरकु रे लदिइ कनापे, मुदा अपे अपन उना हम्बल ता अपन मियाः अंगुर ते हों कपे जोटेतकाना। 47हाय! अपे के अपे उनकु परमेसर सोझ एते नधनी वनकु रआ मरघाटी बाय कनापे जे के अपे रेन आपु-आजाकु ता रु गोच लेदेयाकु। 48इनाते अपे गोवाही हेकेपे अरो अपन आपु-आजाकु रआ कामि एते सहमत गियापे चिलिमेनचि उनकु ता उनी के रु गोजेः एदेयाकु अरो अपे उनकु रआ मरघाटी बाय कनापे। 49इनाते परमेसर रआ बुधि तहों गाम्‍मेताय ‘इञ उनी ठिनुः परमेसर सोझ एते नधनी वनकु अरो कुलवानकु के कुलकुञ अरो होर उनकु रे एते आधा के गोच कुवाकु अरो आधा के सताव कुवाकु।’ 50ताकि जेतना गी परमेसर सोझ एते नधनी वनकु रआ मयम दुनिया रआ सिरजाव एते आतु एकाःआपे, सुबिन के लेखा नियां जुग रेन होरकु एते अगु नोःओ। 51#एटे 4:8; 2 इति 24:20,21हबिल रआ माः गोनोच एते लेयकेते जकरयाह रआ माः गोनोच तक, जे थान अरो पवितर ठांव रआ ताला रे घताव वेःकुवापे। इञ अपे एते असली गामवापे कनिञ नियां सुबिन रआ लेखा नियां जुग रेन होरकु एते अगु नोःओ।

52“परमेसर रआ धरम पोथी सिखाव वनकु अपे कथिर हाय! हाय! अपे ता गेयान वनाः ओड़ाः रआ ताला कुंजी दो अपन ती रे साप एतापे, मुदा खुद कपे बोलोः काना अरो ना एटाः होर के बोलोः रे रोकाव वेःकुवापे।”

53जोब ईसु ओन्डो एते उडुङ एनाय, दो धरम पोथी सिखाविकु अरो फरीसिकु उनी तयोम बेचोट पोड़ाव एनाकु अरो तीरोघोचो हेलावेनाकु चि उनी एते बेचोट गानाम रआ चरचायाकु। 54अरो घताव हेलावेनाकु चि उनी रआ जहन गानाम ता साप इयाले।

Currently Selected:

लूका 11: BIY

Highlight

Copy

Compare