लूका 13
13
मोन रुवाड़ एपे बङ रेदो नास ओःपे
1उना समेय हुडिञगन होर ईसु एते गामवादेयाकु, चि हुडिञगन गलील रे तहीः वन होर के परमेसर कथिर बलिदान रआ समेय रे पिलातुस ता गोच इरीवेःकुवाय। 2नुवां ओनाव केते ईसु ता उनकु के जबाब रे नुवां गामवाःकुवाय, “चिलि अपे सोमझाः कनापे, चि नोकु गलील रे तहीः वन एते, एटाः गलील रे तहीः वनकु एते ढेर पापी तहिकेनाकु चि उनकु के नुंका बलिदान गोच इरीवेःकुवाकु? 3इञ अपे एते गामवापेकानिञ चि बङा मुदा जदि अपे मोन कपे रुवाड़िया रेदो अपे सुबिन हों नुवां रिति एते नठाव वोःओपे। 4बङ रेदो चिलि अपे सोमझाः कनापे चि उनकु अठारो होर जेकर चेतान रे सिलोह रआ गुम्मट उयुःएना, अरो उनकु तेन गोच एनाकु, जरुसलेम रेन होर तहीः इकु एते ढेर गुनाहगार तहिकेनाकु? 5इञ अपे एते गामवापेकानिञ चि बङा, मुदा जदि अपे पाप एते मोन कपे रुवाड़िया रेदो अपे सुबिन हों इना रिति एते नठावोःओपे।”
बिन जो अंजीर दाड़ु रआ कहनी
6अरो ईसु ता नुवां कहनी हों गामवाःकुवाय, “जहय अंगुर बारगी रे रोवा लाःआय अरो उना बारगी रे मियाः अंजीर रआ दाड़ु तहिकेना। मालिक उना रे जो दंड़ा हेच्चेनाय, मुदा काय नामलाःआय। 7तोब मालिक ता बारगी रिई धंगोर एते गामवादेयाय, नेल, पेय बरीस एते इञ नियां अंजीर रआ दाड़ु रे जो दंड़ा हिजुः कनिञ, मुदा काइञ नमकाना, नुवां माः एपे चि नुवां ओते तहों, चिलिमेन टड़ाव एकाःआय? 8धंगोर ता उनी के जबाब एमाःदेयाय, ‘ए मुवार नुवां नियां बरीस अरो तही इरीवाम चि इञ नुवां रआ चइरो ओइर उर केते मैद लगाविञ। 9जदि नुवां हिजुः बरीस जो एमुः रेदोय बुगिन, बङ रेदो नुवां माः काःइञ।’”
जहुदी रआ जिराः हिलोः ईसु कुटकुटु एरा के बुगिन एदेयाय
10जिराः हिलोः ईसु बिनती ओड़ाः रे सिखाव कुकनकेनाय। 11ओन्डो मिहोर एरा तहिकेनाय जेकर रे अठारो बरीस एते मियाः कोमजोर कराव वनीः मुवां रावा लटकाव केनाय, अरो उनी कुबड़ी केनाय अरो जहां लेका ते हों सोझ वोःकाय दड़िवाकान केनाय। 12ईसु ता उनी के नेल केते होहो एदेयाय अरो गामवादेयाय “ए एरा आम अपन कुटकुटु एते बुगी एनाम।” 13तोब उनी ता उनी रे ती दोहोवेताय, अरो उनी एनेन गी सोझ एनाय, अरो परमेसर रआ बड़ाय कराव हेलावेनाय।
14 #
उठ 20:9,10; नियम 5:13,14 इनाते चि ईसु ता जिराः हिलोः उनी के बुगी लेदेयाय, बिनती ओड़ाः रिई मुध खिसाव केते होरकु एते गापाम हेलावेनाय, “छो हिलोः हेनाःआं जे रे कामि कराव चाहि इनाते इमिन हिलोः रे हेच केते बुगिन्नोःपे मुदा जिराः हिलोः बङा।”
15नुवां अयुम केते परभु ता जबाब एमाःकुवाय, “ए कपटाहाकु चिलि जिराः हिलोः अपे रे एते सुबिन होर अपन उरीच बङ रेदो, गधा के बथान एते राड़ा केते, दाः नुनू काकु इदी कुकाना? 16नोय एरा जे अबराहम बोंस रिई होपोन एरा हेकेय, जेके सयतान ता अठारो बरीस एते तोल दोहो लेदेयाय, चिलि उचित का तहिकेना जिराः हिलोः उनी के तोनोल एते राड़ा?” 17जोब उनी ता नुवां गानाम गाम्मेताय, दो उनी के सुबिन खोनोस वनकु लजाव एनाकु, अरो सुबिन भीड़ उना महिमा रआ कामि एते जे ईसु करावेकेनाय आनाद एनाकु।
राय रआ दाना रआ कहनी
(मती 13:31–32; मरकुस 4:30–32)
18अरो ईसु ता गामवाःकुवाय, “परमेसर रआ राइज चिलकाःआ? अरो इञ नियां ओकोय एते तुलायिञ? 19उना राय रआ मियाः दाना रआ लेका हेनाःआं, जेके जहय मनवां ता अगु केते अपन बारगी रे हेरएताय अरो उना हरा केते दाड़ु बाय एना अरो सिरमा रेन चेंड़े उना रआ डइर रे डेराय कनाकु।”
पिठा मोमो नाः जिनिस रआ कहनी
(मती 13:39)
20ईसु ता अरो गामवाःकुवाय, “इञ परमेसर रआ राइज ओकोय एते तुलायिञ? 21उना पिठा मोमो नाः जिनिस रआ लेका हेनाःआं, जेके जहय एरा ता इदिकेते पेय पसेरी आटा रे सुवेत कताय अरो उना सुबिन आटा मो एना।”
साकुप दुवेर
(मती 7:13–14,21–23)
22ईसु चट्टी-चट्टी अरो हातु-हातु होय केते सिखाववाते जरुसलेम सोझ सिनुः केनाय। 23दो जहय ता उनी एते कुली एदेयाकु, “ए परभु चिलि उद्धार ननाम वनकु हुडिञ गियाकु?”
उनी ता उनकु एते गामवाःकुवाय, 24“सुकड़ु दुवेर एते बोलोः रआ उपाय एपे, चिलिमेनचि इञ अपे एते गामवापेकानिञ चि बेचोट एते बोलोः कथिर चहाःआकु, अरो काकु दड़िवाःआ। 25जोब ओड़ाः रिई मुवार बिरीत केते दुवेर हंडेत कराव चुकाव एकाःआय, अरो अपे टांड़ी रे तिंगु केते दुवेर ठोकठोकाव केते गाम्मेपे, ‘ए मुवार आले कथिर निच वालेम’, अरो उनी जबाब एमुःआय ‘इञ अपे के काइञ सारी पेकाना, अपे कारे रेन हेकेपे?’ 26तोब अपे गापाम हेलाव ओःवोपे, ‘आले ता आम लोः जोम-नु एताले, अरो आम ता आले रआ छेउर रे सिखाव वेःलेयाम।’ 27#सिरिञ 6:8मुदा मालिक गाम वपेयाय इञ अपे के काइञ सारी पेकाना, अपे कारे रेन हेकेपे। ए पपाहा कामि वनकु अपे सुबिन इञ ठिनुः एते ओचोःपे। 28#मती 22:13; 25:30#मती 8:11,12ओन्डो इयाम अरो डाटा तोगोच होयुःआ, जोब अपे अबराहम अरो इसहाक अरो जाकूब अरो सुबिन परमेसर सोझ एते नधनी वनकु के परमेसर रआ राइज रे दुरुप, अरो अपन-अपन टांड़ी उडुङ वनकु लेका नेलेयापे। 29अरो पुरब-पछिम एते अरो उतर दछिन एते होर हेचकेते परमेसर रआ राइज रआ भोज रे समिलोःओकु। 30#मती 19:30; 20:16; मर 10:31अरो नेलपे जे होर तयोम रेकुवा उनकु लहा नोःओकु अरो जे होर लहा रेकुवा, उनकु तयोम ओ:ओकु।”
हेरोदेस रआ कपट
31उना घरीक हुडिञगन फरीसिकु ता हेचकेते ईसु के गामवादेयाकु, “नोन्डो एते उडुङ केते सेन जोनमी, चिलिमेनचि हेरोदेस आम के गोगोच कथिरोःकानाय।”
32ईसु ता उनकु एते गामवाःकुवाय, “सेनकेते उनी तुयू एते गामवायपे चि नेल ‘इञ तिहिञ अरो गापा मुवां रावाकु के उडुङ कुकानिञ, अरो हासु इकु के बुगी कुकानिञ, अरो पेय हिलोः अपन कामि पुराविञ।’” 33रेहोंगी इञ के तिहिञ अरो गापा अरो मेयांङ कामि कराव चित हेनाःआं का होय सकाःका चि जहय परमेसर सोझ एते नधनी वनीः जरुसलेम रआ टांड़ी रे गोजेयाकु।
जरुसलेम कथिर ईसु रआ बिलाप
(मती 23:37–39)
34“ए जरुसलेम! ए जरुसलेम! अपे जे परमेसर सोझ एते नधनी वनकु के गोच कुकानापे अरो जे परमेसर ता अपे ठिनुः कुल एनाय, उनी के दिड़ी एते चापात गोजेय कनापे। चिमिन इसा इञ ता चहाविनिञ चि जे लेका सिम आचरेन चेंगना के आच रआ फेकराः लतार हबरुत कुकानाय, इनका गी इञ हों अपे रेन होपोनकु के हबरुतकुञ, मुदा अपे ता नुवां कपे चहावेना। 35#सिरिञ 118:26नेलपे, अपे रआ मरंग बिनती ओड़ाः अपे कथिर उधनाव बागी नोःओ अरो इञ अपे एते गामवापेकानिञ, जोब तक अपे कपे गाम्मा ‘धेनया हेनाया उनी जे परभु रआ लुतूम एते दावराय काना’, तोब तक अपे इञ के अरो केहयो कपे नेलेञा।”
Currently Selected:
लूका 13: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
