लूका 14
14
फरीसी रआ ओड़ाः रे ईसु
1अरो ईसु जिराः हिलोः फरीसिकु रेन मुधकु रे एते जहय रआ ओड़ाः जोजोम तोराया, अरो उनकु उनी रआ दोस नेनेल रे तहिकेनाकु। 2ओन्डो मिहोर मनवां ईसु रआ लहा रे तहिकेनाय, जे के बका ती रे फुलन रोगी तहिकेना। 3इना रे ईसु ता परमेसर रआ धरम पोथी सिखाव वनकु के अरो फरीसिकु एते गामवाःकुवाय, “चिलि नियम रआ रिति, जिराः हिलोः बुगी कराव उचित हेनाःआं चि बङा?”
4मुदा उनकु हपे गी तहिएनाकु, तोब ईसु ता उनी के जोटेत केते बुगी एदेयाय, अरो सेनइरी वदेयाय। 5#मती 12:11अरो उनी ता गामवाःकुवाय, “अपे रे एते नुंका ओकोय हेनापेया, जेकर होपोन बङ रेदो उरीच इन्दरा रे उयुःवोय, अरो उनी के जिराः हिलोः उनी के एनेन टांड़ी काकु उडुङ इया?”
6उनकु नुवां गानाम रआ जहन जबाब काकु एम दड़िवाता।
नमरता अरो मेहमानकु रआ सेवा-सुसार
7जोब ईसु ता नेलेःकुवाय चि नेवतेहेर होर चिलका मुध-मुध ठांव सला केकानाकु, दो उनी उनकु के मियाः कहनी ओनावाःकुवाय। 8#बु.बचन 25:6,7“जोब जहय अपे के बपलाः रे होहो पेयाकु, दो मुध ठांव रे ओलोपे दुरुपा, जहां ठिनुः उनका ओलो होयुःका चि उनी ता अपे एते हों जहय मरंग के नेवता एम एकावाःकुवाय। 9तोब जे अबेन बनार के नेवता एम एकावाःबेनाय, हेचकेते आम एते गामवामाय ‘उनी के ठांव एमायमी’, अरो तोब आम के लाजाव केते सुबिन एते तयोम ठांव रे दुरुप पोड़ाव वोःओ। 10मुदा जोब आम के नेवता एमामाकु, दो सेन केते सुबिन एते तयोम ठांव रे दुरुपमी, जेकर एते नेवता एएम वनीः हेचकेते आम एते नुवां गामवामाय, ‘ए गाति लहा सेन केते दुरुपमी’, नियां रकम सुबिन मेहमानकु रआ लहा आम रआ मइन होयुःआ। 11#मती 23:12; लूका 18:14चिलिमेनचि अपन तिगी मरंग बयुःकानाय, उनी के हुडिञ बयेयाय, अरो जहय आच तिगी हुडिञ बयुःआय, उनी के मरंग बयेयाय।”
12तोब ईसु ता अपन नेवता एएम वनीः एते हों गामवादेयाय, जोब आम सिंगी रआ बङ रेदो निदा रआ भोज एमाकुवाम, दो आमरेन गातिकु, बङ रेदो बोयहाकु, बङ रेदो कुटुमकु, बङ रेदो हेनात-जपाः रेन धनगार के ओलोम होहोकुवा, जहां ठिनुः ओलो नुंका होयुःका चि उनकु हों आम के नेवता एमामाकु, अरो आम केहों बदला एएम होयुःआ। 13मुदा जोब आम भोज एमाकुवाम, दो रेगेंच-रबंङकु, लुलहाकु, लंगड़ाकु, अरो अंधराकु के होहोकुम। 14तोब आम धेनया होयुःआम चिलिमेनचि उनी ठिनुः आम के बदला एएम कथिर जहन्नाः बनुःआं, मुदा आम के धरमिकु रआ जुवेत बिरीतोः रे परमेसर नियां रआ बदला एमामाय।
मरंग भोज रआ कहनी
(मती 22:1–10)
15ईसु लोः जोजोम इकु रे एते मिहोर ता नुवां गानाम अयुम केते, उनी एते गामवादेयाय, धेनया हेनाया उनी जे परमेसर रआ राइज रे भोज जोमाय।
16ईसु ता उनी एते गामवादेयाय, “जहय मनवां ता मरंग भोज दोहोवेताय अरो बेचोटकु के होहोवेःकुवाय। 17जोब जोजोम वनाः तेयार एना, दो उनी ता आचरेन बन्धुवा के नेवतेहेर होरकु के गाम कुलेःकुवाय, हिजुःपे निमीः जोजोम वनाः तेयार एकाना। 18मुदा उनकु सुबिन एते सुबिन का हिजुः रआ बहना कराव हेलावेनाकु, पहिल वनीः ता उनी एते गामवादेयाय, ‘इञ दो खेत किरीञ एकाःइञ अरो जरुरेत हेनाःआं चि उना नेल्लीञ, इञ आम के गोहराव मिकानिञ इञ के माफ काइञमी।’ 19एटाः इनीः ता गाम्मेताय, ‘इञ दो पांच जोड़ा उरीच किरीञ एकाःकुञ अरो उनकु के परखाव सिनुःकानिञ, इञ आम के गोहराव मिकानिञ इञ के माफ काइञमी।’ 20अरो मिहोर ता गाम्मेताय, ‘इञ दो नेबरीक बपला एकानिञ, इनाते इञ काइञ हेच दड़िवाःआ।’ 21उनी बन्धुवा ता हेचकेते आच रिई मुवार के नुवां गानाम उदुःवादेयाय। तोब ओड़ाः रिई मुवार ता खिंस एनाय अरो आचरेन बन्धुवा एते गामवाःकुवाय, ‘चट्टी रआ सड़क अरो छेउर रे एनेन सेनकेते रेगेंच-रबंङकु, लुलहाकु, अंधराकु अरो लंगड़ाकु के होहो अगुकुपे।’ 22बन्धुवा ता अरो गाम वदेयाकु, ‘ए मुवार जेलेका आम ता गाम लाःआम इनका गी कराव एकाःआले, रेहों गी ठांव हेनाःआं।’ 23मुवार ता बन्धुवा एते गामवाःकुवाय, ‘सड़क रे अरो बारगी रआ हेनात-जपाः सेन केते होरकु के भीतरी हिजुः कथिर मजबुर केते अगुकुम, ताकि इञ रआ ओड़ाः पेड़ेचियाकु।’ 24इञ अपे एते गाम वपेकानिञ, चि ‘उनकु नेवतेहेर होरकु रे एते जहय इञ रआ भोज ता काकु चखाया।’”
चेला बयुः रआ गोनोंङ
(मती 10:37–38)
25जोब मरंग भीड़ ईसु लोः सिनुः केनाकु, दो ईसु ता तयनोम नेल रुवाड़ केते, उनकु एते गामवाःकुवाय। 26#मती 10:37“जदि जहय इञ ठिनुः हेनात हिजुःआकु अरो आचरेन माय-आबा अरो एरा अरो होपोन अरो बोयहा अरो मिसी अरो नोन्डो तक चि अपन जीव के हों इञ एते हों ढेर पेयार इयाकु, उनकु इञ रेन चेला काकु होय दड़िवाःआ। 27#मती 10:38; 16:24; मर 8:34; लूका 9:23अरो जहय अपन दुख रआ कुरुस गोः केते इञ रआ तयोम काय सेन कनाय, उनी इञ रिई चेला काय होय दड़िवाःआय। 28अपे रे एते ओकोय हेनाया जे गुम्मट बबय कथिरोःकाय, अरो पहिल दुरुप केते खरचा काय जोड़ावियाय चि पुराव कथिर टका इञ ठिनुः हेनाःआं चि बनुःआं? 29जहां ठिनुः नुंका ओलो होयुःका चि जोब उना, नेव उर केते अरो तेयार काय दड़िवाःआय, दो सुबिन नेनेल इकु नुवां गाम केते उनी के लेचेड़-लेचेड़ वयाकु। 30नोय मनवां बबय दो हेलावेनाय, लिकिन काय तेयार दड़िवाताय? 31बङ रेदो ओकोय नुंकान राजा हेकेय, जे एटाः राजा एते लड़ाय कथिर सिनुः काय, अरो पहिल दुरुप केते काय बिचार इयाय चि जे बीस हजार पलटन इदिकेते लड़ाय कथिर हिजुः कनाकु, चिलि इञ अपन दोस हजार पलटन इदिकेते उनकु लोः लड़ाय कथिर दड़िवाःआय, चि बङा? 32बङ रेदो उनी संगिञ तहीः रिगी उनी दूतकु के मेल कथिर कुलि कुलकुवाय। 33इना लेका गी अपे रे एते जहय अपन सुबिन्नाः काय तेयाग इयाय, उनी इञ रिई चेला काय होय दड़िवाःआय।”
सिठा बुलूंङ
(मती 5:13; मरकुस 9:50)
34बुलूंङ बुगिना, मुदा जदि बुलूंङ रआ अपन सिबिल सिठा कोःवो, रेदो उना चिलि जिनिस एते बुलूंङ लेका नोःओ। 35उना ना दो ओते रआ अरो मइद रआ कामि रे हिजुःका, उना दो होर टांड़ी गिड़ी ककानाकु। जेकर अयुम रआ लुतूर हेनाःआं उनकु ओनाव केपे।
Currently Selected:
लूका 14: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
