मरकुस 13
13
मरंग बिनती ओड़ाः उयुःओः रआ आगमजानी
(मती 24:1,2; लूका 21:5,6)
1जोब ईसु मरंग बिनती ओड़ाः राचा एते उडुङ ओःकेनाय दो उनी रेन चेला एते मिहोर उनी एते गामवादेयाय, “ए गुरु! नेलमी, चिलकान मरंग दिड़ी अरो चिलकान बुगिन बंगला हेके!”
2ईसु उनकु एते गामवाःकुवाय, “चिलि अपे नुवां मरंग-मरंग बंगला नेल कनापे? नोन्डो जहन दिड़ी रे दिड़ी हों काकु बगिया, सुबिन धसावियाकु।”
दुख अरो बिपेत
(मती 24:3–14; लूका 21:7–19)
3जोब ईसु मरंग बिनती ओड़ाः रआ हेनात, जायतून टोंगरी रे दुरुप केनाय, दो पतरस, जाकूब, जोहन अरो अन्धरियास एटाः रे सेन केते उनी एते कुलिएदेयाकु 4“आले के उदुः वलेम चि नुवां सुबिन गानाम चिमिस होयुःआ? जोब नुवां सुबिन गानाम पुरावोः रे होयुःआ, उना समेय रआ चिलि चिनहा होयुःआ।”
5ईसु उनकु के गामवाःकुवाय, “चेम्पोर तहीःपे चि जहय अपे के ओलोकु भरमावपेका। 6बेचोट होर इञ रआ लुतूम एते हेचकेते गाम्माकु, ‘इञ मसी हेकेञ!’ अरो बेचोट के भरमावपेयाकु। 7जोब अपे लपड़ाय रआ चरचा ओनावियापे अरो लपड़ाय रआ अफवाह ओनावियापे, दो ओलोपे घबराव वोःओ, चिलिमेनचि नियां रआ होयुः जरुरी गिया, मुदा उना समेय का मुडू नोःओ। 8चिलिमेनचि जाइत-जाइत रे अरो राइज-राइज रे लड़ाय कथिर बिरितताकु। सुबिन ठांव रे भुइडोल होयुःआ अरो अकाल होयुःआ। नुवां दो दुख रआ एटेच होयुःआ नहाः।
9 #
मती 10:17–20; लूका 12:11,12 “मुदा अपे अपन बबेत रे चेम्पोर तहीःपे चिलिमेनचि होर अपे के कछेरी रे सोंपाव पेयाकु अरो अपे के पंचेत ओड़ाः रे रु पेयाकु, इञ रआ कारन ते हाकिमकु अरो राजाकु रआ लहा रे तिंगु पेयाकु, दो उनकु कथिर गोवाही होयुःआ। 10मुदा जरुरी हेनाःआं चि पहिल बुगिन खभेर सुबिन जाइतकु रे परचार एपे। 11जोब उनकु अपे के इदिकेते सोंपाव पेयाकु, दो पहिल एते ओलोपे चिन्ताया चि इञ चिलिकाः गाम्मीञ। मुदा जहन्नाः गी आम के इना समेय उदुःवामाय इनागी गाम्मी; चिलिमेनचि गागाम वनीः आम बङ हेकेम, मुदा पबितर रावा हेकेय। 12बोयहा, अपन बोयहा के अरो आपु होपोन के गोगोच कथिर सोंपाव पेयाकु। होपोन आच रिई एंगा-आपु रआ खोनोस रे बिरीत तिंगु नोःओकु अरो उनकु के गोच इरीकुवाकु। 13#मती 10:22 अरो इञ रआ लुतूम रआ बबेत सुबिन होर अपे एते खिंस दोहोयाकु; मुदा जे मुडूः तक धीरज दोहोयाय उनी रआ उद्धार होयुःआ।
मरंग दुख बिपेत रआ समेय
(मती 24:15–28; लूका 21:20–24)
14 #
दानि 9:27; 11:31; 12:11 “इनाते जोब अपे उनी भयभयान नठाव कराव वनीः घिन जिनिस#13:14 नुवां गानाम, दानियेल रआ पोथी रे ओल आना आगमजानी रआ मेनाःआं। नुवां गानाम, दानियेल 9:27, 11ः31, 12ः11 रे नमुःका। जहां रे उचित बनुःआं ओन्डो तिंगु नेलेयापे। पोड़हाः इकु नियां सोमझाव कोःपे। तोब जे जहुदिया पोरदेस रेपेया, उनकु टोंगरी रे निर जोनपे; 15#लूका 17:31 जे छनमिन चेतान रे मेनायां, उनी अपन ओड़ाः एते जहन्नाः इदी कथिर लातार अरगु केते भीतरी अलोय सिनुःकाय। 16अरो जे खेत रे हेनाया, उनी अपन किचरीः इदी कथिर अलोय रुवाड़काय। 17उना हिलोः रे जे भारी होड़मो वनीः अरो तोवा अनु वनीः कथिर का सहावनाः हिलोः लेका होयुःआ। 18अरो पराथना केपे चि नुवां रबंङ समेय रे ओलो होयुःका। 19#दानि 12:1; दि.बचन 7:14 चिलिमेनचि उना हिलोः नुंकन कोसोट रआ समेय होयुःआ चि परमेसर जे हिलोः दुनिया सिरजाव लाःआय, इना हिलोः एते निमीः तक ना होय्येकाना अरो ना केहयो होयुःआ। 20जदि परभु उना हिलोः ता काय घटाव लेः रेदोय जहय मनवा हों काकु बनचाव वोःओ होनङ; मुदा उनकु सला इकु रआ चलते जे के परमेसर सला एकाःकुवाय, उनी, उना हिलोः ता घटाव एकाःआय।
21“उना समेय जदि जहय अपे एते गाम्माकु, ‘नेलपे, मसी नोन्डो मेनायां!’ अरो, ‘नेलपे, हान्डे हेनाया!,’ दो ओलोपे बिसवासिया। 22चिलिमेनचि झुठा मसी अरो परमेसर सोझ एते नधनी वान मेन केते बेदा कनाकु उनकु हेच तिंगु नोःओकु, चिनहा अरो चकरीत कामि उदुः इयाकु, चि जदि होय सकाः रेदो सला एकानाकु उनकु केहों भरमाव कुवाकु। 23दो अपे चेम्पोर तहीःपे; नेलपे, इञ अपे के सुबिन गानाम पहिल एते गी उदुः एकावाःपिञ।
होर रिई होपोन रआ अरो हिजुः
(मती 24:29–31; लूका 21:25–28)
24 #
जसा 13:10; जोवे 2:10,31; 3:15; दि.बचन 6:12;
जसा 13:10; हेज 32:7 “उना हिलोः रे, उना बिपेत तयोम सिंगी बोंगा रआ मरसल लुबाः वोःओ, अरो निदा बोंगा मरसल काय एमुःआय। 25#जसा 34:4; दि.बचन 6:13; जोवे 2:10 अरो सिरमा एते इपिल उयुः लगावोःओकु, अरो सिरमा रआ बोल झकझोरावियाय। 26#दानि 7:13; दि.बचन 1:7 तोब मनवा रिई होपोन तेः के मरंग सोमोर्थ अरो महिमा रे रिम्बील रे हिजुः वते नेलेयाकु। 27उना समेय उनी आचरेन दूत के कुल केते, ओते रआ नियां अतोम एते सिरमा रआ आना अतोम तक, चइरो कोना एते आचरेन सला इकु होर के जवरा कुवाय।
अंजीर दाड़ु रआ हुडिञ कहनी
(मती 24:32–35; लूका 21:29–33)
28“अंजीर रआ दाड़ु एते नुवां हुडिञ कहनी सिखाःपे। जोब उना रआ डइर बलेच कोःकाना अरो सेकाम फुनहुर उडुङओः काना; दो अपे सारी केकानापे चि जेठ मेहना हिजुः काना। 29इना लेका गी जोब अपे नियां गानाम होयुः नेल्लापे, दो सारी केपे चि उना हेनात गिया, दुवेर रीगी हेनाःआं। 30इञ अपे के सच गामवापे कनिञ चि नियां पिड़ही रेन होर रआ जुवेत तहीः रिगी नुवां सुबिन गानाम घटाव वोःओ। 31सिरमा अरो ओते ओचोः जोना, मुदा इञ रआ गानाम केहयो का टलाव वोःओ।
चेहट तहीःपे
(मती 24:36–44)
32 #
मती 24:36
“उना हिलोः अरो उना घरीक रआ बबेत रे जहय काकु सारीकाना, ना सिरमा रेन दूत, ना परमेसर रिई होपोन हेरेल, सिरीफ परमेसर आपु सारी कनाय। 33चेम्पोर ओःपे, चिरगर तहीःपे; चिलिमेनचि अपे कपे सारीइकाना चि उना समेय चिमिस हिजुःआ। 34#लूका 12:36–38 नुवां उनी होर लेका हेनाःआं, जे पोरदेस सिनुः समेय आच रआ ओड़ाः बागी केते, आचरेन बन्धुवा के हक एमाकुवाय। मिमीः होर के कामि उदुःवाःकुवाय अरो दुवेर रे पहरावानीः के चिरगर तहीः रआ हुकूम एमाःदेयाय। 35अपे कपे सारीइकाना चि ओड़ाः रिई मुवार चिमीताः हिजुःआय, अयुप बङ रेदो आधा निदा, बङ रेदो सिम रआ बेरा, बङ रेदो सेताः। इनाते चिरगर तहीःपे। 36नुंका ओलो होयुःका चि उनी अचाका हेच केते अपे के गितीच गी नामपेयाय। 37अरो जे इञ अपे एते गामवापे कनिञ, उना सुबिन होर के गामवापे कनिञ; चेम्पोर तहीःपे!”
Currently Selected:
मरकुस 13: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
