मरकुस 14

ईसु के गोगोच रआ बिचार एताकु

(मती 26:1–5; लूका 22:1,2; जोहन 11:45–53)

1 # उठ 12:1–27 बार हिलोः रआ तयोम, पसका पोरोब अरो बिन जोजो वनाः पिठा ललात रआ पोरोब होयुःआनाः तहिकेना। मुध जाजककु अरो धरम पोथी सिखाविकु, इना गानाम रआ दंड़ा रे तहिकेनाकु चि उनी के छल एते साप केते गोजेया। 2मुदा उनकु होरकु गाम एकेनाकु, “पोरोब हिलोः बङा,” “नुंका ओलो होयुःका चि उनकु लोः झमेला होयुःका।”

बेतनिया रे ईसु के मियाः एरा सुनूम दुल एदेयाय

(मती 26:6–13; जोहन 12:1–8)

3 # लूका 7:37,38 जोब ईसु बयतनियाह हातु रे सिमोन कोढ़ रोगी वनीः ओड़ाः रे मन्डी जोम्‍मेकेनाय, दो मिहोर एरा संगमरमर दिड़ी रआ सिसी रे असली जठामांसी लुतूम रआ बेचोट किमती रआ सो सुनूम अगु केते हेच्‍चेनाय अरो सिसी होटोः एते पोहाः केते सुनूम ता उनी रआ बोहोः रे दुल कताय। 4मुदा आधा होर अकु-अकु खिसाव केते गागाम हेलावेनाकु, “नुवां सोः सुनूम चिलिमेन नास एताय 5चिलिमेनचि नुवां सो सुनूम दो पेय साव चांदी रआ टका ते हों ढेर गोनोंङ एते अखरीञ केते रेंगेच-रबंङ होर के हटिञ वाकुवा होनङ!” अरो उनकु उनी के डपटाव हेलावेनाकु।

6ईसु ता गामवाःकुवाय, “उनी के बागी कायपे! उनी के चिलिमेन अंड़िसेय कनापे? उनी दो इञ लोः भलाय एकाःआय। 7#नियम 15:11 चिलिमेनचि रेंगेच-रबंङ होर दो सुबिन हिलोः अपे लोः तहीः कनाकु अरो अपे जोब चहाःआपे तोब उनकु एते भलाय कामि दड़ी वाःआपे; मुदा इञ अपे रआ गाति रे सुबिन हिलोः काइञ तहिनोःओ। 8जेतना उनी दड़िवाताय, उनी इमिनुः एताय। उनी इञ के तोपा रआ तेयार एते गी पहिल इञ रआ होड़मो रे सोः सुनूम लगावेताय। 9इञ अपे के सच गी गामवापे कनिञ, चि सुबिन दुनिया रे, जहां रे हों बुगिन खभेर परचार इयाकु, ओन्डो उनी रआ नियां कामि रआ बाखान हों ओयहर रे करावियाकु।”

जहुदा इसकोरोती ईसु के धोखा ते सापइरी कथिर तेयार एनाय

(मती 26:14–16; लूका 22:3–6)

10तोब जहुदा इसकोरोती जे बारहों चेला रे ते मिहोर तहिकेनाय, मुध जाजककु ठिनुः तोराया चि ईसु के उनकु रआ ती रे धोखा ते सापइरी कुवाय। 11उनकु नुवां अयुम केते खुस एनाकु अरो उनकु टका एएम रआ वादा एताकु। उनी मोका दंड़ा हेलावेनाय चि उनी के करा लेका सापइरी कुविञ।

ईसु चेलाकु लोः पसका रआ अखरी भोज जोजोम

(मती 26:17–25; लूका 22:7–14,21–23; जोहन 13:21–30)

12बिन जोजो वनाः पिठा रआ पोरोब जे पसका रआ मीः हिलोः पहिल, जेकर रे होर पसका रिई भेड़ी होपोन बलिदान कुकनकेनाकु, उनी रेन चेलाकु उनी एते कुलिएदेयाकु, “आम कारे चहाः कनाम चि अबुन सेन केते आम कथिर पसका जोजोम कथिर तयनात इयाले?”

13उनी आचरेन चेला रे एते बार होर के नुवां गाम केते कुलेःकिनाय, “चट्टी रे सिनुःबेन अरो मिहोर दाः रआ घेयला रिम केते सिनुः नमेयाबेन, उनी रआ तयोम कोःबेन; 14अरो उनी जे ठिनुः बोलो नोःओय उना ओड़ाः रिई मुवार के गामवायबेन, ‘गुरु गामकानाय, इञ रआ मेहमान कोठरी करेःआ, जेकर रे इञ अपन चेला लोः पसका जोमिञ?’ 15उनी आच तिगी अपे के मियाः मरंग बुगिन सजाव धजाव वनाः मरंग कोठरी उदुः वपेयाय, ओन्डो अबुन कथिर तयनात एपे।”

16चेला तोराकिना अरो चट्टी सेन केते जेलेका उनी गाम लाःआय, इनका गी नाम्‍मेताकिन; अरो उनकिन पसका भोज जोजोम कथिर तयनात एताकिन।

17जोब सिंगी बोंगा ढरकावेनाय, दो उनी बारहों चेलाकु लोः हेच्‍चेनाय। 18#सिरिञ 41:9 जोब उनकु दुरुप केते जोम्‍मेकेनाकु, दो ईसु गामवाःकुवाय, “इञ अपे के सच गामवापे कनिञ चि अपे रे ते मिहोर, जे इञ रआ गाति रे जोम कनाय, इञ के सापइरिञाय।”

19उनकु उदास एनाकु अरो मिमीः होर केते उनी एते कुलिएदेयाकु, “चिलिकाः इञ हेकेञ?”

20अरो उनी उनकु एते गामवाःकुवाय, “उनकु बारहों रे ते मिहोर हेनाया, जे इञ लोः थाड़ा रे ती संजो एकाःआय। 21मनवा रिई होपोन दो गोचजोनाय, जेलेका चि उनी रआ बबेत रे धरम पोथी रे ओल्‍लेकाना, मुदा उनी होर कथिर कोसोट मेनाःआं जेकर ती एते होर रिई होपोन के साप इरीयाय। उनी होर कथिर बुगिन होयुःआ होनांङ चि उनी रआ जनम गी का होय लेनका।”

परभु भोज

(मती 26:26–30; लूका 22:14–20; 1 कुरुन्थी 11:23–25)

22जोब उनकु जोम्‍मेकेनाकु रिगी, ईसु पिठा साप्पेताय अरो धेनयाबाद केते खेचाःएताय अरो उनकु के एमाःकुवाय अरो गाम्‍मेताय, “ने, नुवां इञ रआ होड़मो हेके।”

23अरो उनी डुभनी साप केते धेनयाबाद एताय अरो उनकु के एमाःकुवाय; उनकु सुबिन उना एते नु एताकु। 24#उठ 24:8; जिरमि 31:31–34 अरो उनी उनकु एते गामवाःकुवाय, “नुवां इञ रआ मयम हेके, जे बेचोट होर कथिर अतुय कनिञ, इञ रआ मयम परमेसर रआ करार रआ चिनहा हेके। 25इञ अपे के सच गी गामवापे कनिञ चि अंगुर रआ रस उना हिलोः तक अरो केहयो काइञ नुयां, जोब तक परमेसर रआ राइज रे नवां काइञ नुयां।”

26अरो उनकु भोजोन सिरिञ केते टांड़ी जायतून रआ टोंगरी रे रकाप्पेनाकु।

ईसु पतरस के चेताव एदेयाय

(मती 26:31–35; लूका 22:31–34; जोहन 13:36–38)

27 # जक 13:7 तोब ईसु उनकु एते गामवाःकुवाय, “अपे सुबिन ठोकोरा जोम्‍मापे, चिलिमेनचि धरम पोथी रे ओल्‍लेकाना; ‘इञ गोरखी वनीः के गोजेयिञ अरो भेड़ी छितीर-बितीर वोःओकु।’ 28#मती 28:16 मुदा इञ जुवेत बिरीत रआ तयोम अपे एते पहिल गलील पोरदेस सिनुःइञ।”

29पतरस ईसु एते गामवादेयाय, “सुबिन होर बागी केते नीर दो नीर जोन्‍नाकु, मुदा इञ ठोकोरा काइञ जोम्‍मा।”

30ईसु उनी के गामवादेयाय, “इञ आम के सच गाम वामकानिञ चि तिहिञ गी नियां निदागी सिम बार इसा राः एते पहिल, आम तीन इसा इञ के काइञ सारी मिकाना मेन ते गाम्‍माम।”

31मुदा पतरस अरोगी जोड़ एम केते गाम्‍मेताय, “जदि इञ के आम लोः गोजुः हों होयुःआ, रेहों इञ आम के काइञ सारी मिकाना मेन ते काइञ गाम्‍मा!” इना लेका गी सुबिन चेला हों गाम्‍मेताकु।

गतसमनी रे ईसु रआ पराथना

(मती 26:36–46; लूका 22:39–46)

32इना तयनोम उनकु गतसमनी लुतूम बगेयचा हेच्‍चेनाकु अरो ईसु आचरेन चेला के गामवाःकुवाय, “नोन्डो दुरुप तहीःपे, जोब तक इञ पराथनायिञ।” 33अरो उनी पतरस, जाकूब, जोहन के आच लोः इदी वेःकुवाय अरो बेचोट गी दुखी अरो बेयाकुल एनाय, 34तोब ईसु ता अपन चेला के मेताःकुवाय; इञ रआ जीव बेचोट उदासेना नोन्डो तक चि इञ रआ जीव उडुङओः लेका अटकार वोःकाना अपे नोन्डो गी ठहराःपे, अरो इञ लोः जगवार तहीःपे।

35अरो उनी मीःजंग लहा बड़हावेनाय अरो ओते रे उकरुम केते पराथना हेलावेनाय, चि जदि होय सकाः रेदो नुवां संकट रआ समेय इञ एते ओचोः जोनका, 36अरो गाम्‍मेताय, “ए आबा,” ए आपुञ, “आम एते सुबिन्‍नाः होय सकावोःओ! नुवां दुख रआ डुभनी इञ ठिनुः एते ओचोःएम, रेहों जेलेका इञ चहाः कनिञ उनका बङा, मुदा जे लेका आम चहाः कनाम इनका गी होयुःका।”

37तोब उनी आचरेन चेला ठिनुः हेच्‍चेनाय अरो उनकु के गितीच नाम केते पतरस के गामवादेयाय, “ए सिमोन, आम गितीच एकानाम? चिली आम मीः घरीक हों इञ लोः जगवार तहीः कम दड़िवाता? 38जगवार तहीः अरो पराथना चित तहीः, चि अपे परीछा रे ओलोपे उयुःओ। रावा दो तेयार हेनाःआं, मुदा होड़मो कोमजोर गिया।”

39अरो ईसु तोराया अरो उना लेका गी पराथना एताय। 40उनी हेच केते उनकु के गितीच गी नामेःकुवाय, चिलिमेनचि उनकु रआ मेत नींद एते पेड़ेच केना। उनकु काकु सारी केना चि उनी के चिलि जबाब एमायाबुन 41उनी पेय इसा हेचकेते उनकु एते गामवाःकुवाय, “निमीः तक गितीच गियापे? निमीः तक सुसताः कनापे? चे! समेय हेच तेबाःएना। नेलपे! मनवा रिई होपोन पापिकु रआ ती रे सापइरिइ कनाकु। 42बिरितपे, अबुन सिनुःअबु! नेलपे, इञ के सासप इरीवानीः हेनात हेच तेबाः एकानाय!”

ईसु के धोखा एते साप इरीदेयाकु

(मती 26:47–56; लूका 22:47–53; जोहन 18:3–12)

43उनी नुवां गाम एकेनाय रिगी, जहुदा जे बारहों चेला रे ते मिहोर तहिकेनाय, आच लोः मुध जाजककु अरो धरम पोथी सिखाविकु अरो मुध होर सोझ एते कुल वन मियाः मरंग भीड़ लेयकेते हेच तेबाःएनाय, जे तलवाइर अरो ठेंगा साप लाःआकु। 44उनी के सापइरी वनीः उनकु के नुवां पता एमाः कुकेनाय चि जे के इञ चुमायिञ इनिगी हेकेय, “उनी के साप केते लहा-तयनोम नेल इदिइपे।”

45जहूदा हेच्‍चेनाय अरो एनेन गी उनी ठिनुः सेन केते गामवादेयाय, “ए गुरु!” अरो उनी के चुमाएदेयाय। 46तोब उनकु ईसु के साप केते अकु रआ कबजा रे एदेयाकु, 47उनकु रे ते जे हेनात तिंगु तहिकेनाकु, मिहोर तलवाइर ओर केते मुध जाजक रिई बन्धुवा रे छेंव चलावेताय अरो उनी रआ लुतूर माः सीत एताय। 48ईसु उनकु के गामवाःकुवाय, “चिलि अपे डाकु सारी केते इञ के सासप कथिर तलवाइर अरो ठेंगा सापकेते उडुङ हेच्‍चेकानापे? 49#लूका 19:47; 21:37 इञ दो रोज हिलोः अपे के मरंग बिनती ओड़ाः रआ राचा रे परचार एकेनिञ अरो अपे इञ के कपे सापलेदेञा। मुदा नुवां इनाते होयुः काना, चि पबितर पोथी रे ओल्‍लेकाना पुराव वोःओ।”

50तोब सुबिन चेला उनी के बागी केते नीर चबाएनाकु।

51मिहोर धिंगाला कोरा अपन ठेठगें होड़मो रे मलमल पेछोरी उयु केते ईसु रआ तयनोम सेसेन केनाय। उनकु उनी के सबेःदेयाकु। 52मुदा उनी मलमल पेछोरी बागी केते ठेठगें गी नीर एनाय।

ईसु के जहुदी कछेरी ठिनुः अगुदेयाकु

(मती 26:57–68; लूका 22:54–55,63–71; जोहन 18:13,14,19–24)

53अरो उनकु ईसु के मुध जाजक रआ ओड़ाः ठिनुः इदिएदेयाकु; सुबिन मरंग जाजककु अरो मुध होर अरो परमेसर रआ बचन सिखाविकु ओन्डो जमावेनाकु। 54पतरस संगिञ-संगिञ एते उनी रआ तयोम-तयोम मुध जाजककु रआ राचा भीतरी तक तोराया अरो सिपाहिकु रआ गाति रे दुरुप केते सेंगेल जुरुः केनाय। 55मुध जाजककु अरो मरंग पंचेत रेन सुबिन होर ईसु के गोच उतर कथिर उनी रआ खोनोस रे गोवाही दंड़ाय केनाकु, मुदा काकु नाम दड़िवाता। 56बेचोट होर उनी रआ खोनोस रे झुठ-मुठ रआ गोवाही एम एकेनाकु, मुदा उनकु रआ गोवाही मीः लेका का तहिकेना।

57तोब आधा होर बिरीत केते उनी रआ खोनोस रे नुवां झुठ-मुठ गोवाही एम्‍मेताकु, 58#जोह 2:19 “आले नोयते नुवां गानाम अयुम्‍मेताले, ‘इञ ती एते बायवानाः नुवां मरंग बिनती ओड़ाः धसाविञ अरो पेय हिलोः रे एटाः अनाः तिंगुयिञ, जे ती एते का बाय एकाना।’” 59इना रे हों उनकु रआ गोवाही मीः लेका का तहिकेना।

60तोब मुध जाजक ताला रे तिंगु केते ईसु एते कुलिएदेयाय, “आम जहन्‍नाः जबाब कम एमुःका? नोकु होर आम रआ खोनोस रे चिलि गोवाही एम कनाकु।”

61मुदा ईसु हपे गी तहिएनाय, जहन जबाब काय एमाःकुवाय। मुध जाजक उनी के अरो मिसा कुलिएदेयाय, “चिली आम इसतुति लाइख परमेसर रिई होपोन तेः मसी हेकेम?”

62 # दानि 7:13 ईसु गामवाःकुवाय, “इञ हेकेञ,” “अरो अपे मनवा रिई होपोन तेः हेरेल के सुबिन एते बोलगार परमेसर रआ जोम ती सोझ रे दुरुप अरो सिरमा रआ लिम्बीर लोः हिजुः नेलेयापे।”

63नुवां रे मुध जाजक ता आच रआ सोनोः ओड़ेच केते गाम्‍मेताय, “निमीः दो अरो गोवाह रआ चिलि कामि हेनाःआं! 64#लेवी 24:16 अपे, नुवां परमेसर रआ निन्दा गानाम अयुम्‍मेतापे। अपे रआ चिलि राय मेनाःआं!”

अरो उनकु सुबिन गाम्‍मेताकु चि नोय दोसीदार मेनायां अरो नोय के गोगोच हेनाःआं।

65तोब ओकोय दो उनी रे बेबेच अरो ओकोय उनी रआ मोचा हरुप अरो उनी के घुसा मइर एदेयाकु अरो उनी एते गागाम हेलावेनाकु, “अगर आम आगमजानी हेकेम रेदो उदुःएम, ओकोय रुवेःमाय?” सिपाहिकु उनी के साप केते चटाः एदेयाकु।

पतरस रआ मुकराः

(मती 26:69–75; लूका 22:56–62; जोहन 18:15–18,25–27)

66जोब पतरस लातार राचा रे तहिकेनाय, दो मुध जाजक रेन धंगरीन रे ते मिहोर ओन्डो हेच्‍चेनाय।

67अरो पतरस के सेंगेल जुरुः नेल केते उनी के मीः टक नेल केते गागाम हेलावेनाय, चि “आम दो उनी नासरत रिई ईसु रआ गाति रे तहिकेनाम।”

68उनी मुकरावेनाय अरो गाम्‍मेताय, “इञ काइञ सारीइकाना अरो काइञ सोमझाःका चि आम चिलिकाः गामकानाम।” अरो उनी टांड़ी दुवेर तोराया; सिम ता राःएताय।

69उनी धंगरीन उनी के नेल केते उनकु के जे हेनात रे तिंगुकेनाकु, गापाम हेलावेनाय, “नोय उनकु रे एते मिहोर हेकेय!” 70मुदा उनी अरो मुकरावेनाय। मीःजंग तयोम रे उनकु जे हेनात रे तिंगु तहिकेनाकु अरो पतरस के गामवादेयाकु, “निचित गी आम उनी रे ते मिहोर गलील रिई हेकेम।”

71तोब उनी आच तिगी सरफावोः अरो किरया जोजोम हेलावेनाय, “इञ उनी होर के, जेकर आम चरचाय कनाम काइञ सारीइकाना!”

72तोब एनेन गी अरो मिसा सिम राःएताय। पतरस के उना गानाम जे ईसु उनी के गामवादेयकेनाय ओयहर हेच्‍चेना; “सिम बार इस्सा राः एते पहिल आम पेय इस्सा इञ के मुकराव वोःओम।” उनी नुवां गानाम ता सोंचाव केते इयाम हेलावेनाय।

Currently Selected:

मरकुस 14: BIY

Highlight

Copy

Compare