मरकुस 3
3
सोपोच ती वनीः होर के बुगिन कराव
(मती 12:9–14; लूका 6:6–11)
1तयोम ते ईसु बिनती ओड़ाः रे तोराया, ओन्डो मिहोर तहिकेनाय जेकर ती सोपोच तहिकेना, 2अरो हुडिञगन होरकु उनी रे दोस लगाव कथिर खोनोस दंड़ाय केनाकु चि नेलेयपे, उनी जिराः हिलोः उनी के बुगी एयकानायचि बङा। 3ईसु सोपोच ती वनीः होर के गामवादेयाय, “ताला रे तिंगुःमी” 4अरो उनी ता उनकु एते गामवाःकुवाय, “अबुन रआ नियम चिलिकाः उदुःकाय, जिराः हिलोः बुगिन कराव उचित हेनाःआं चि कठिक कथिर, जीव बनचाव चि गोगोच?” ते उनकु हपे तहिएनाकु। 5ईसु उनकु रआ मोन केटेच नेल केते ठोस एनाय, उनकु के खिसते चइरो ओइर नेलएताय अरो उनी मनवां के गामवादेयाय, “आम रआ ती जिलिंगएम।” उनी ती जिलिंग एताय अरो उनी रआ ती बुगिन्ना। 6तोब फरीसी टांड़ी उडुङ केते एनेन गी हेरोदेस#3:6 हेरोदेस जहुदी होर के सासन एएम वनीः रोमि राजा राजा के गाति एएम जहुदिकु लोः गाति केते ईसु रआ बिरोध रे अकु-अकु रे सलाह-बिचार एकेनाकु चि ईसु के करा लेका गोजेयाबुन।
ईसु रआ तयोम रे दोल होय्येनाकु
7ईसु आचरेन चेला लोः समुदर सोझे तोराकुवा अरो गलील पोरदेस रे अरो जहुदिया पोरदेस रे बेचोट होर उनी रआ तयोम सेसेन हेलावेनाकु, 8अरो जहुदी पोरदेस, जरुसलेम चट्टी, इदुमिया पोरदेस, जरदन गाड़ा रआ परोम अरो सूर अरो सयदा चट्टी हेपेनात पोरदेस रेन एते मियाः मरंग दोल ईसु रआ हेनात हेच्चेनाकु। बेचोट होर नुवां ओनावकेते हेच्चेनाकु चि उनी चिलका अचराज रआ कामि कनाय। 9#मर 4:1; लूका 5:1–3 उनी आचरेन चेला के गामवाःकुवाय, दोल रआ एते मियाः हुडिञ डोंगा इञ कथिर तेयार तहीःका, चिलिमेनचि उनकु इञ के ओलोकु धकाञका। 10चिलिमेनचि ईसु गी बेचोट होर के बुगी लेःकुवाय, इनाते जेगी होर हासु रुवाते गइर केनाकु, उनी के जोटेत कथिर उनी रे सिमिर-सिमिर वोः केनाकु। 11घिन रावा सापवान होर, जोब ईसु के नेलेय केनाकु, दो उनी रआ लाहारे उयुःजोन केनाकु अरो कुर्री केते गाम्मेकेनाकु चि “आम परमेसर रिई होपोन हेकेम।” 12उनी उनकु के मुरुख चेतोवन एमाकुकन केनाय चि, इञ ओकोय हेकेञ उना ओलोपे उदुःइञा।
बारो के कुल कथिर ठहराव
(मती 10:1–4; लूका 6:12–16)
13उना तयोम ईसु टोंगरी रे देच एनाय, जे के उनी चहाः केनाय उनकु के आच ठिनुः होहोवेःकुवाय अरो उनकु उनी ठिनुः हेच्चेनाकु। 14अरो ईसु बारो हेरेल के सलावेःकुवाय अरो उनकु कुलवानकु गाम्मेनाकु चि उनकु उनी रआ गाति रे तहिनाकु अरो कुलकुवाय चि उनकु परचार इयाकु। 15अरो होर एते मुवां रावा के उडुङ रआ हक दोहोयाकु। 16ईसु ता नोकु के सलावेःकुवाय; सिमोन रआ लुतूम पतरस दोहोवेताय। 17अरो जबदी रिई होपोन हेरेल जाकूब अरो जाकूब रिई बोयहा तेः जोहन जेकर लुतूम उनी बुअनरगीस दोहोवेताय, जेकर मने गरजाव रिई होपोन हेरेल, 18अरो अन्धरियास, फिलिपुस, बरतुलमय, मती, थोमा, हलफइ रिई होपोन हेरेल जाकूब, तदाय, सिमोन जे उना जहुदी रिई मिहोर तहिकेनाय जे इसराइल दिसुम रआ आजादी चहाः केनाय, 19अरो जहुदा इसकोरोती जे ईसु के धोखा एते सापइरिएदेयाय।
ईसु अरो बालजबूल
(मती 12:22–32; लूका 11:14–23; 12:10)
20तयोम ते ईसु ओड़ाः रे हेच्चेनाय; अरो नुंकान दोल जमा एनाकु चि उनकु पिठा हों काकु जोम दड़िवाता। 21तोब उनी रेन घाराना नुवां अयुम्मेताकु, ते उनकु सासप कथिर उडुङएनाकु; चिलिमेनचि उनकु गाम्मेकेनाकु चि “उनी रआ मोन रआ ठेकान बनुःआं।”
22 #
मती 9:34; 10:25 धरम पोथी सिखाविकु हों जे जरुसलेम एते हेच्चेनाकु, नुवां गाम्मेकेनाकु, “ईसु रे बालजबूल हेनाया जे मुवां रावाकु रिई सरदार रआ देंगा ते मुवां रावाकु के उडुङ कुकानाय।”
23इनाते उनी उनकु के हेनात होहोकेते उनकु एते हुडिञ-हुडिञ कहनी एते गागाम हेलावेनाय, “सयतान चिलका सयतान के उडुङ दड़िवायाय? 24जदि जहन राइज रे फुट होयुःआ, रेदो उना राइज चिलका असतिर तहिना? 25अरो जदि जहय रआ ओड़ाः रे फुट होयुःआ, दो उना ओड़ाः चिलका असतिर तहिना? 26इनाते जदि सयतान रआ राइज रे लड़ाय होयकेते राइज रे फुट होयुः रेदो राइज चिलका बाय तहिना? उनकु रआ दो आखरीगी होयजोना।”
27“मुदा जहय होर उनी बोलगार के ओड़ाः रे बोलो केते उनी रआ माल ककुरेच दड़िवाःआ, जोब तक चि उनी बोलगार के काकु तोलेया; तोब उनी रआ ओड़ाः रेच दड़िवाःआकु।”
28“इञ असलीगी अपे एते गामवापे कनिञ चि मनवां रआ पाप अरो परमेसर रआ निन्दा वेदेयाकु, उनकु के सुबिन रआ छमा नमुःआ, 29#लूका 12:10 मुदा जेगी पबितर रावा रआ बिरोध निन्दायाकु, उना केहयो हों का छमा नोःओ, उना गुनाह रआ जुगनजुग गुनाहगारी ठहराव वोःओय।” 30ईसु नुंका गाम्मेताय चिलिमेन उनकु नुवां गाम कनाकु चि “उनी रे घिन रावा हेनाया।”
ईसु रिई एंगातेः अरो बोयहा तेः
(मती 12:46–50; लूका 8:19–21)
31तोब ईसु रिई एंगातेः अरो ईसु रेन बोयहा-मिसी तेः हेच्चेनाकु अरो टांड़ी रे तिंगु केते उनी के होहो कथिर कुलेः देयाकु। 32दोल उनी रआ हेपेनात दुरुपकेनाकु अरो उनकु उनी एते गामवादेयाकु, “नेलमी, आम रिई एंगाम आर बोयहा-मिसी टांड़ी रे आम के दंड़ाम कनाकु।” 33उनी उनकु के जबाब एमाःकुवाय, “इञ रेन एंगाञ अरो इञ रेन बोयहा-मिसी ओकोय कनकु?” 34अरो उना रे जे उनी रआ हेनात रे दुरुपकेनाकु नेल केते गाम्मेताय, “नेलपे इञ रेन एंगाञ अरो इञ रेन बोयहा-मिसी नोकु कनकु! 35चिलिमेनचि जहय गी परमेसर रआ मरजी रे सेनाकु इनकुगी इञ रेन बोयहा अरो मिसी अरो एंगाञ हेकेकु।”
Currently Selected:
मरकुस 3: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
