मरकुस 9
9
1ईसु उनकु के गामवाःकुवाय, “इञ अपे के असली गामवापेकानिञ हें, चि जे नोन्डो तिंगु एकानाकु, उनकु रे आधा होर नुंका हेनाकुवा चि जोब तक परमेसर रआ राइज सोमोर्थ लोः हिजुः वते काकु नेल केया, तोब तक गोनोच हिरगीस काकु नेल्ला।”
ईसु रआ रुप बदलाव
(मती 17:1–13; लूका 9:28–36)
2 #
2 पत 1:17,18 छो हिलोः रआ तयोम ईसु, पतरस, जाकूब, जोहन के गातिवेःकुवाय अरो मियाः जहन सनसुन उसुल टोंगरी रे इदी वेःकुवाय। ओन्डो उनकु रआ हेनात रे उनी रआ रुप बदलावेना। 3अरो उनी रआ किचरीः नुंका चमकाः लगावेना अरो नोन्डो तक फिट-फिट पुन्डी वेना चि, दुनिया रेन धोबी नुंका हों काकु पुन्डी दड़िवाकाना। 4चेलाकु के मूसा अरो एलियाह नेल एनाकिन, उनकिन ईसु लोः नधनी केनाकिन। 5इनाते पतरस ईसु के गामवादेयाय, “ए गुरु, अबुन रआ नोन्डो तहीः बुगिन हेनाःआं; इनाते अबु तीन गो तम्बु बाययियाबु; मियाः आम कथिर, मियाः मूसा कथिर अरो मियाः एलियाह कथिर।” 6उनी काय सारीइ केनाय चि, चिलिकाः गाम्मीञ; चिलिमेनचि उनकु बेचोट बोरोवानाकु।
7 #
मती 3:17; मर 1:11; लूका 3:22 तोब मियाः रिम्बील उनकु के उम्बुल वेःकुवाय, उना रिम्बील एते गानाम उडुङएना, “नोय इञ रिई दुलारा होपोन हेकेय, नोय रआ अयुमपे।” 8तोब उनकु एकाएक चइरो ओइर नेल्लेताकु अरो ईसु के बागी केते आच लोः अरो जहय के काकु नेलेःकुवा।
9टोंगरी एते अरगुः बेरा ईसु उनकु के हुकूम एमाःकुवाय चि, जोब तक मनवा रिई होपोन हेरेल गोच केते काय जुवेत बिरितताय, तोब तक जहन्नाः अपे नेल एकाःआपे उना जहय के ओलोपे उदुः वकुवा।
10उनकु नुवां गानाम मोन रे दोहो केते; अकु-अकु गापाम हेलावेनाकु, “गोच वनकु रआ जुवेत बिरीत रआ चिलि ओरोथ हेनाःआं?” 11#मला 4:5; मती 11:14 अरो उनकु उनी एते कुलिएदेयाकु, “धरम पोथी सिखाविकु चिलिमेन गामकानाकु चि, पहिल एलियाह रआ हिजुः दरकार हेनाःआं?”
12उनी उनकु के जबाब एमाःकुवाय, “एलियाह सचमुच पहिल हेच केते सुबिन्नाः सुधरावियाय, मुदा मनवा रिई होपोन रआ बबेत रे नुवां चिलिमेन ओल्लेकाना चि, उनी बेचोट दुख उठावियाय, तुछ लेखा नोःओय? 13मुदा इञ अपे के गामवापे कनिञ, चि एलियाह दो हेच चुकावेनाय, उनकु उनी लोः मनमाना बेवहार एताकु, जेलेका उनी रआ बबेत रे धरम पोथी रे ओल्लेकाना।”
मुवां रावा होपोन के बुगिन एदेयाय
(मती 17:14–21; लूका 9:37–43)
14जोब ईसु अरो नेकु पेय चेला अरोकु चेला ठिनुः हेच्चेनाकु, दो नेलेःकुवाय चि उनकु चइरो ओइर मरंग भीड़ लगावेकानाकु अरो धरम पोथी सिखाविकु चेला लोः रेनाटेटाः कनाकु। 15जोब एनेन गी ईसु के नेल केते भीड़ बेचोट चकरीत एनाकु, उनी सोझ नीर इदिकेते उनी के जोहार एदेयाकु। 16ईसु चेलाकु के कुलिवेःकुवाय, “अपे धरम पोथी सिखाविकु लोः चिलिमेन वाद बिवाद कनापे?”
17भीड़ रे ते मिहोर उनी के जबाब एमाःदेयाय, “ए गुरु, इञ अपन होपोन हेरेल रे जेकर रे कोंदा रावा सामाव एकानाय, आम ठिनुः अगुएकाःदिञ। 18जे ठिनुः गी कोंदा रावा उनी के सबेय केनाय एन्डेगी तवाः एयकेनाय, उनी रआ मोचा एते बोटो उडुङ ओःकेना अरो डाटा तोगोच एकेनाय आर सुकड़ाव इदीः केनाय। इञ आमरेन चेला के मेताःकुविञ चि उनी कोंदा रावा के उडुङ कायपे, मुदा उनकु काकु उडुङ दड़िवादेया।”
19नुवां अयुम केते ईसु उनकु के जबाब एम केते गामवाःकुवाय, “ए अबिसवासी होर, इञ चिमिन हिलोः तक अपे रआ गाति रे तहिनोःओञ? चिमिन हिलोः तक अपे रआ सहाविञ? उनी के इञ ठिनुः अगुइपे।” 20तोब उनकु उनी के ईसु ठिनुः अगुवेदेयाकु; जोब उनी के नेलेःदेयाय, दो उनी कोंदा रावा एनेन गी उनी के ऐंठावेदेयाय, उनी ओते रे उयुःएनाय, मोचा रे फेन अतुः अरो लोटपोटावोः लगावेनाय। 21ईसु उनी रिई आपु तेः के कुलिएदेयाय, “नोय रआ दसा चिमिन हिलोः एते हेनाःआं?” आपु तेः गामवादेयाय, “बालेच एतेगी।” 22“कोंदा रावा उनी के गोगोच कथिर करा हिलोः सेंगेल रे अरो करा हिलोः दाः रे उयुः एयकेनाय, जदि आम जहन दड़िवायाम रेदो, आले रे सोगाव केते आले के देंगा लेम!”
23“ईसु”, उनी के गामवादेयाय, “जदि आम जहन दड़िवाःआम रेदो? नुवां चिलि गानाम हेके! बिसवास वनकु कथिर सुबिन्नाः होय सकावोःओ।”
24बालेच होपोन रिई आपु तेः एनेन गी होहो केते गामवादेयाय, “ए परभु इञ बिसवास कनिञ, इञ रआ अबिसवास ओचोःओः रआ उपायेम।”
25जोब ईसु नेल्लेताय चि होर नीर अगु केते भीड़ लगाव कनाकु दो, उनी घिन रावा के नुवां गामकेते डपटाव वेदेयाय, “ए कोंदा अरो बेहरा रावा, इञ आम के हुकूम एमाम कनिञ, उनी रे ते उडुङ जोनमी, उनी रे केहयो ओलोम बोलोनोःओ!”
26तोब उनी जोड़ ते कुर्री केते अरो उनी के बेचोट ऐंठावकेते, उडुङ एनाय अरो उनी बालेच होपोन गोच इनीः लेका चिटपट एनाय, नोन्डो तक चि होर गापाम हेलावेनाकु चि “उनी गोच्चेनाय!” 27ईसु उनी के ती रे साप केते उनी के बिरिततेदेयाय, उनी तिंगु वेनाय।
28जोब ईसु ओड़ाः रे हेच्चेनाय दो उनी रेन चेला एकला रे उनी एते कुलिएदेयाकु, “आले उनी के चिलिमेन काले उडुङ दड़िवादेया?”
29ईसु उनकु के गामवाःकुवाय, “नुवां लेका मुवां रावा बिन पराथना अरो उपास केते अरो जहन उपाय एते काकु उडुङओःओ।”
ईसु अपन गोजुः रआ बबेत दोबोरा उदुः
(मती 17:22,23; लूका 9:43–45)
30अरो उनकु ओन्डो ते तोराकुवा, अरो गलील पोरदेस सोझ ते होयकेते सिनुः केनाकु, उनी काय चहाः केनाय चि जहय सरीयाकु। 31चिलिमेनचि उनी आचरेन चेला के सिखाव कुकनकेनाय। उनकु के गाम वाःकुकेनाय, “मनवा रिई होपोन के मनवांकु रआ ती रे सापइरियाकु, उनी के रु गोजेयाकु; पेय हिलोः रआ तयोम जुवेत बिरितताय।”
32मुदा नुवां गानाम उनकु रआ सोमोझ रे का हेचकेना अरो उनकु उनी एते कुली कथिर बोरोय केनाकु।
सुबिन एते मरंग ओकोय
(मती 18:1–5; लूका 9:46–48)
33अरो उनकु कफरनहूम पोरदेस रे हेच्चेनाकु, ओड़ाः रे हेचकेते उनी उनकु एते कुलिवेःकुवाय, “होरा रे अपे चिलि गानाम कथिर बिवाद एकेनापे?”
34 #
लूका 22:24
उनकु हपे तहिएनाकु, चिलिमेनचि होरा रे उनकु गी अकु-अकु रे नुवां नधनी लाःआकु चि, अबुन रे ते मरंग ओकोय हेकेय। 35#मती 20:26,27; 23:11; मर 10:43,44; लूका 22:26 तोब उनी दुरुप केते बारहों चेला के होहोवेःकुवाय अरो उनकु एते गामवाःकुवाय, “जदि जहय मरंग बयुः चहाःआय, दो सुबिन एते हुडिञ अरो सुबिन रिई धंगोर बयुःकाय।” 36अरो उनी मिहोर बालेच होपोन के इदिकेते उनकु रआ ताला रे तिंगु एदेयाय अरो उनी के कोजोंग रे दोहो केते उनकु के गामवाःकुवाय, 37#मती 10:40; लूका 10:16; जोह 13:20 “जहय गी इञ रआ लुतूम एते नुंकान बालेच होपोन रे ते जहय मिहोर के हों पुछाव वेय कनाय, उनी इञ के पुछाव वेञकानाय; अरो जहय गी इञ के पुछाव वेञकानाय, उनी इञ के बङा, मुदा इञ के कुकूल वनीः के पुछाव एयकानाय।”
जे इञ रआ खोनोस रे बङा उनी इञ लोःआय
(लूका 9:49–50)
38तोब जोहन ता उनी के गामवादेयाय, “ए गुरु, आले मिहोर होर के आम रआ लुतूम एते मुवां रावा के उडुङ एते नेलेःदेयाले अरो आले उनी के रोकाव एदेयाले, चिलिमेनचि उनी आले रआ तयोम काय हिजुः केनाय।”
39ईसु ता चेलाकु के गामवाःकुवाय, “उनी के ओलोपे रोकाविया,” चिलिमेन नुंका जहय बङा जे इञ रआ लुतूम एते सोमोर्थ रआ कामियाय अरो एनेनगी इञ के कठिक गाम दड़िवाःआय। 40#मती 12:30; लूका 11:23 चिलिमेनचि जे अबुन रआ खोनोस रे बनुः इचाय उनी अबुन सोझ हेनाया। 41#मती 10:42 जहय गी मीः डुभनी दाः अपे के इना सारी केते नुनू कथिर एमापेयाय चि आम मसी रिई हेकेम रेदो इञ अपे के सच गामवापे कनिञ, उनकु जहन रिति एते गी अपन परतिफोल नाम्माकु।
ठोकोरा रआ कारन ओलोपे बयुःआ
(मती 18:6–9; लूका 17:1,2)
42जे इञ रे बिसवास करावान, नोकु हुडिञकु रे ते जहय मिहोर के ठोकोरा एमाय कनाकु, दो उनी के नुवां बुगिन होयुःआ चि मरंग जाता उनी रआ होटोः रे तोल केते अरो उनी के गहिड़ समुदर रे डुबाव काया 43#मती 5:30 जदि आम रआ ती आम कथिर पाप रआ कारन बयुः काना, रेदो उना खन्डाकाम। लुलहा केते का मुडूः जीवन रे बोलोः आम कथिर नियागी भला मेनाःआं, चि बनार ती तहिकेते नरक रआ सेंगेल रे संजोः, जे केहयो गी का इड़िचोःका। 44[ओन्डो उना रेन तिजु काकु गोजुःका अरो सेंगेल हों का इड़िचोःका।]#9:44 नुवां पद हुडिञगन ती एते का ओल्लेकाना 45जदि आम रआ बका आम कथिर पाप रआ कारन बयुः काना, रेदो उना खन्डाकाम। लंगड़ा केते का मुडूः जीवन रे बोलोः आम कथिर नियागी भला मेनाःआं, चि बनार बका तहिकेते नरक सेंगेल रे संजोः। 46[ओन्डो उना रेन तिजु काकु गोजुःका अरो सेंगेल हों का इड़िचोःका।]#9:46 नुवां पद हुडिञगन ती एते का ओल्लेकाना 47#मती 5:29 जदि आम रआ मेत आम कथिर पाप रआ कारन बयुः काना, रेदो उना उडुङकम। काना केते परमेसर रआ राइज रे बोलोः आम कथिर नियागी भला मेनाःआं, चि बनार मेत तहिकेते आम नरक सेंगेल रे संजोः। 48#जसा 66:24 ओन्डो उना रेन तिजु काकु गोजुःका अरो सेंगेल हों का इड़िच्चोःका।
49“चिलिमेनचि सुबिन मीः-मीः होर सेंगेल एते सुध वोःओकु जे लेका बुलूंङ एते बलिदान सुध केनाकु।#9:49 बुलूंङ एते बलिदान सुध केनाकु। जहुदिकु कथिर परमेसर रआ हुकूम तहिकेना चि उना बलिदान बुलूंङ एते सुध कुकानाय। लेव्यव्यवस्था 2ः13। 50#मती 5:13; लूका 14:34,35 बुलूंङ बुगिना, जदि बुलूंङ रआ अपन सिबिल सिठा कोःओ, रेदो उना चिलि जिनिस एते बुलूंङ लेकायापे? अपन चइल-चलन रे बुलूंङ लेका सिबिल दोहोयपे अरो अबुन मेल-मिलाप ते तहीःआबुन।”
Currently Selected:
मरकुस 9: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
