मरकुस 10
10
एरा-हेरेल बपागीः रआ बबेत ईसु रआ सिखाव
(मती 19:1–12; लूका 16:18)
1ईसु ओन्डो एते बिरीत केते जहुदिया पोरदेस एते जरदन गाड़ा अना परोम दिसुम हेच्चेनाय, ओन्डो पहिल लेका बेचोट भीड़ उनी रआ तयोम एनाकु अरो उनी पहिल लेका उनकु के इनका गी उदुः हेलावेनाय।
2अरो फरीसिकु ईसु ठिनुः हेच केते उनी के परीछा कथिर कुलिएदेयाकु “चिलि आले रआ नियम रे उचित हेनाःआं चि हेरेल आच रिई एरा के बागियाय?”
3ईसु उनकु के उदुःवाःकुवाय, “मूसा अपे के चिलि हुकूम एमाःपेयाय?”
4 #
नियम 24:1–4; मती 5:31 उनकु गाम्मेताकु, “मूसा बागी रआ चिट्ठी ओओल अरो बागी रआ हुकूम एम एकाःआय।”
5ईसु गाम्मेताय, “अपे रआ मोन ढिठाय रआ चलते मूसा अपे कथिर नुवां हुकूम ओल एकाःआय। 6#एटे 1:27; 5:2 मुदा सिरजव रआ पहिल एते, जे लेका बचन रे ओल्लेकाना, ‘परमेसर एरा अरो हेरेल के बायेःकिनाय।’ 7#एटे 2:24 इनाते हेरेल अपन एंगा-आपु के बागी केते अपन एरा लोः तहिनोःओय अरो उनकिन बनार मीः होड़मो होयुःआकिन? 8इनाते उनकिन नेबरीक दो बार होर बङा मुदा मीः अकिन, 9इनाते जेके परमेसर जोड़ाव एकाःकिनाय, उनकिन के मनवां ओलोपे अलगकिना।”
10ओड़ाः रे चेला नुवां बबेत रे ईसु एते अरो कुलिएदेयाकु 11#मती 5:32; 1 कुरु 7:10,11उनी उनकु के गामवाःकुवाय, “जहय गी अपन एरा के बागी केते एटाः इनीः एते बपलाःआय दो, उनी पहिल नीः रआ बिरोध रे साप-जोटेत कनाय। 12अरो जदि एरा अपन हेरेल के बागी केते एटाः इनीः एते बपलाःआय दो, पहिल इनीः रआ बिरोध रे उनी साप-जोटेत कनाय।”
बालेच होपोनकु के आसरीबाद एएम
(मती 19:13–15; लूका 18:15–17)
13तोब होर ईसु ठिनुः होपोनकु के अगुकूकन केनाकु चि ईसु उनकु रे ती दोहोयाय, मुदा चेला उनकु के डपटाव हेलावेनाकु। 14ईसु गी नुवां नेल केते खिंस एनाय अरो उनकु एते गाम्मेताय, “होपोनकु के इञ ठिनुः हेच इरीवाकुपे अरो उनकु के ओलोपे रोकावकुवा चिलिमेनचि परमेसर रआ राइज नेकु होपोनकु लेकनकु कथिर गी हेनाःआं। 15#मती 18:3इञ अपे एते सच गामवापे कनिञ चि, जेगी परमेसर रआ राइज ता बालेच होपोन लेका काय गरहन नियाय, उनी उना रे केहयो काय बोलो दड़िवाःआ।” 16उनी कोंजोंग वेःकुवाय, उनकु रे ती दोहो केते उनकु के आसरीबाद एमाःकुवाय।
धनी धिंगाला अरो का मुडूः जीव
(मती 19:16–30; लूका 18:18–30)
17जोब ईसु ओन्डो एते उडुङ केते होरा एते सिनुः केनाय दो मिहोर उनी ठिनुः नीर अगुवेताय। उनी रआ लाहा रे ढुकू उकरुम केते उनी एते कुलिएदेयाय, “ए गुरु आम बुगिन होर हेकेम! का मुडूः जीवन आपनाव कथिर इञ चिलियिञ?”
18ईसु उनी एते गाम्मेताय, “आम इञ के बुगिन चिलिमेन गामवाञ कनाम? परमेसर के बागी केते जहय बुगिन बनुः कुवा। 19#उठ 20:13; नियम 5:17; उठ 20:14; नियम 5:18; उठ 20:15; नियम 5:19; उठ 20:16; नियम 5:20; उठ 20:12; नियम 5:16 आम परमेसर रआ हुकूम सारीइ कनाम; ‘ओलोम गोच कुवा, ओलोम साप-जोटेतिया, ओलोम कुमरुया, होसोड़ गोवाही ओलोम एमा, ओलोम बेदाकुवा, अपन एंगा-आपु रआ इजात-कदर दोहोयमी।’” 20उनी ईसु के गामवादेयाय, “ए गुरु, नियां सुबिन इञ हुडिञ एते गी मनाव हेच्चेकानिञ।”
21ईसु उनी के नेल केते दुलार एदेयाय अरो उनी के गामवादेयाय, “आम रे मियाः गानाम रआ कोमी हेनाःआं। दु सिनुःमी, जहन्नाः आम रआ हेनाःआं उना अखरीञ केते रेंगेच-रबंङकु के एमाकुम, आम के सोवाराग रे धन नमुःआं अरो हेच केते इञ रआ तयोम कोःमी।” 22नुवां अयुम केते उनी रआ चेहरा रोहोड़ेना अरो उनी उदास केते तोराया चिलिमेनचि उनी बेचोट धनी तहिकेनाय।
23ईसु चइरो ओइर नेल केते अपन चेला के गामवाःकुवाय, “धनगारकु के परमेसर रआ राइज रे बोलोः चिलका मसकिल मेनाःआं!”
24चेलाकु उनी रआ गानाम एते अचराज एनाकु। नुवां रे ईसु अरो उनकु एते गामवाःकुवाय, “ए बालेचइकु, परमेसर रआ राइज रे बोलोः कथिर चिलका मसकिल गिया! 25परमेसर रआ राइज रे धनगार के बोलोः एते उंट के सुइ रआ भुः रे एते परोम जोन सहज हेनाःआं।”
26उनकु बेचोट चकरीत केते अकु-अकु रे गापाम हेलावेनाकु, “दो अरो ओकोय बनचाव वोःओय?”
27ईसु उनकु सोझ नेल केते गाम्मेताय, “होर एते दो नुवां का होयुःआ मुदा परमेसर एते दो होयुःआ; चिलिमेनचि परमेसर एते सुबिन्नाः होय सकावोःओ।”
28पतरस उनी एते गागाम हेलावेनाय, “नेलमी, इञ दो सुबिन्नाः बागी केते आम रआ तयोम एकानिञ।”
29ईसु ता गाम्मेताय, “इञ आम के सच गी गाम वामकानिञ चि नुंका जहय गी बङा, जे इञ रआ अरो बुगिन खभेर कथिर, ओड़ाः, बोयहा-मिसी, एंगा-आपु, होन-होपोन अरो खेती-बारी बागी एकाःआकु, 30अरो नुवां समेय रे साव गुना काकु नाम्मा, ओड़ाः अरो बोयहा-मिसी अरो एंगाकु अरो होपोन अरो खेत, मुदा सताहट लोः हिजुः जुग रे का मुडूः रआ जीवन। 31#मती 20:16; लूका 13:30 मुदा बेचोट जे पहिल रेकुवा, तयोम ओ:ओकु अरो जे सुबिन एते तयोम अकु लहा नोःओकु।”
ईसु अपन गोजुः रआ अरो जुवेत बिरीत रआ बबेत रे तीसरा धांव उदुः
(मती 20:17–19; लूका 18:31–34)
32उनकु जरुसलेम सिनुः घरीक होरा रे तहिकेनाकु अरो ईसु उनकु रआ लहा-लहा सिनुः केनाय। चेला चकरीत एनाकु अरो जे उनी रआ तयोम-तयोम सिनुः केनाकु उनकु बोरोवन केनाकु। उनी अरो उनकु बारहों के इदिकेते उनकु लोः गापाम हेलावेनाय जे उनी रे हिजुःआनाः तहिकेना। 33“अयुमपे, अबुन जरुसलेम सिनुः कनाबु अरो मनवा रिई होपोन तेः के धोखा एते साप इरीयाकु मुध जाजककु अरो धरम पोथी सिखाविकु रआ ती रे सोंपावियाकु। उनकु उनी के गोच उतर लेका दंड एमायाकु अरो उनी के गइर-जहुदी#10:33 गइर-जहुदी एटाः जाइत, जे जहुदी ककु तहिकेना। रआ ती रे सोंपावियाकु। 34उनकु उनी के लेचेड़-लेचेड़ वयाकु, उनी रे बेच्चीयाकु, उनी के कोड़रा एते सोड़ेच्चीयाकु अरो गोजेयाकु अरो पेय हिलोः रआ तयोम उनी जुवेत बिरितताय।”
जाकूब अरो जोहन रआ गोहराव
(मती 20:20–28)
35जबदी रिई होपोन जाकूब अरो जोहन ईसु ठिनुः हेचकेते गाम्मेताकु, “ए गुरु, आले चहाःकनाले चि जहन्नाः गी आले आम एते कोयमाले उना आम आले कथिर कराव वलेम।”
36उनी उनकु एते गाम्मेताय, “अपे चिलिकाः चहाः कनापे चि इञ अपे कथिर कराविञ?”
37उनकिन उनी एते गाम्मेताकिन, “अलिञ के नुवां एमालिञमी, चि आम परमेसर रआ महिमा रे अलिञ के मिहोर आम रआ जोम ती सोझ रे अरो मिहोर आम रआ लेंगा ती सोझ रे दुरुपालिञ।”
38 #
लूका 12:50
ईसु उनकिन के गामवाःकिनाय, “अबेन कबेन सारीइकाना चि चिलिकाः कोय कनाबेन? जे दुख रआ डुभनी रे नुनू हेनाःआं चिलि अबेन नु दड़िवाःअबेन? अरो जे बतिसमा इञ अगु वनीः मेनाञा अबेन अगु दड़िवाःअबेन?”
39उनकिन उनी के गामवादेयाकिन, “अलिञ एते होय दड़ी नोःओ।”
ईसु उनकिन के गामवाःकिनाय, “जे डुभनी रे इञ नुनू मेनाञा अबेन नुयाबेन अरो जे बतिसमा इञ अगु रे मेनाञा उना अगुयाबेन। 40मुदा नुवां जेकर कथिर तेयार एकाना, उनी के बागी केते जहय के अपन जोम ती अरो लेंगा ती रे दुरुप इञ रआ कामि बङ कानाः। नुवां कामि परमेसर रआ हेके।”
41नुवां अयुम केते दसो चेला जाकूब अरो जोहन एते खिसावेनाकु।
42 #
लूका 22:25,26 ईसु उनकु के हेनात होहो केते गामवाःकुवाय, “अपे सारीइ कनापे चि जे नुवां गइर-जहुदिकु रेन हाकिमकु, मनवांकु रे अपन बोल एते सासन कनाकु अरो उनकु रे जे मरंग मेनाकुवा, उनकु हों होर चेतान रे हक दोहोय कनाकु। 43#मती 23:11; मर 9:35; लूका 22:26 मुदा अपे रे नुंका बनुःआं, जहय गी अपे होरकु रे मरंग बयुः चहाः कनापे अपे रिई धंगोर बयुःकाय। 44अरो जे अपे रे मुध बयुः चहाः कनाय उनी सुबिन रिई बन्धुवा बयुःकाय। 45चिलिमेनचि मनवा रिई होपोन तेः हों सेवा-सुसार इरीः काय हेच्चेकानाय, मुदा इनाते हेच्चेकानाय चि आच सेवा-सुसार कुवाय अरो बेचोट होर रआ छोड़ाव कथिर गोनोंग एम केते आच रआ जीव एएम।”
अंधरा के मेत एएम
(मती 20:29–34; लूका 18:35–43)
46उनकु जरीहो रे हेच्चेनाकु। जोब ईसु अरो उनी रेन चेला अरो मियाः मरंग भीड़ जरीहो एते उडुङएनाकु तोब तिमाइ रिई होपोन तेः हेरेल बरतीमाइ जे मिहोर अंधरा कोकोय वनीः, होरा रआ अतोम रे दुरुप केनाय। 47उनी नुवां ओनाव केते चि नासरत रिई ईसु हेकेय, होहो केते गागाम हेलावेनाय, “ए ईसु, दाऊद रिई होपोन हेरेल इञ रे दयायमी।”
48बेचोट होर ता उनी के डपटाव एदेयाकु चि हपे गी तहीःमी, मुदा उनी होहो-होहो केते गामवादेयाय, “ए दाऊद रिई होपोन हेरेल इञ रे दयायमी।”
49तोब ईसु तिंगु केते गाम्मेताय, “उनी के होहोयपे।” होर गी उनी अंधरा के होहो केते उनी एते गामवादेयाकु, “ढिड़ दोहोयमी! बिरितमी! उनी आम के होहो मिकानाय।”
50उनी आच रआ किचरीः गिड़ी केते एनेन गी बिरिततेनाय अरो ईसु ठिनुः हेनात हेच्चेनाय।
51ईसु उनी एते गाम्मेताय, “आम चिलिकाः चहाः कनाम चि इञ आम कथिर कराविञ?” अंधरा ईसु के गामवादेयाय, “ए गुरु, इञ नेनेल दड़िवाकाञ।”
52ईसु उनी के गामवादेयाय, “सेनजोन, आम रआ बिसवास आम के बुगी वेःमाय।”
उनी एनेन गी नेनेल हेलावेनाय, होरा रे उनी रआ तयोम सेसेन हेलावेनाय।
Currently Selected:
मरकुस 10: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
