मरकुस 11
11
जरुसलेम रे ईसु हिजुः रआ खुसी मनाव
(मती 21:1–11; लूका 19:28–40; जोहन 12:12–19)
1जोब उनकु जरुसलेम रआ हेनात जायतून टोंगरी रआ बेतफगे अरो बयतनियाह हातु रआ हेनात हेच्चेनाकु दो उनी आचरेन चेला रे एते बार होर के नुवां गामकेते कुलेःकिनाय, 2“हेनात हातु रे सिनुःबेन अरो उना हातु रे तेबाः तागी, मियाः गधा होपोन जे तोल एकानाय, उनी रे जहय काकु देच्चेकाना। उनी के राड़ा केते अगुइबेन। 3जदि अबेन के जहय कुलिबेनाय, ‘नोय के चिलिइ कनाबेन? दो गामवाकुबेन परभु के नोय रआ दरकार मेनाःआं’ अरो उनी होर गधा के एनेन गी नोन्डो कुल कयाय।”
4उनकिन सेन केते उनी गधा होपोन के दुवेर हेनात सड़क अतोम रे तोल नामेःदेयाकिन। अरो उनकिन राड़ाय केनाकिन 5उनकु ओन्डो तिंगु तहिकेनाकु जहय गागाम हेलावेनाकु, “नोय के चिलिइ कनाबेन? गधा होपोन के चिलिमेन राड़ाय कनाबेन?”
6जे लेका ईसु गाम लाःआय इना लेका गी उनकिन उनकु के गामवाःकुवाकिन अरो उनी गधा के सेन इरीवादेयाकु। 7उनकिन गधा होपोन के ईसु ठिनुः अगु केते, अकिन रआ किचरीः उनी रे डबाव एदेयाकिन अरो ईसु गधा होपोन रे दुरुप एनाय। 8तोब बेचोट होर अकु रआ किचरीः होरा रे अटेत एताकु अरो होर दाड़ु रआ हेरयार ढेवराः छोरा अगु केते अटेत एताकु। 9#सिरिञ 118:25,26 जे ईसु रआ लहा-लहा सेन इदिइ केनाकु अरो तयोम-तयोम सेन अगुइ केनाकु, उनकु होहो-होहो गामइदिइ केनाकु, “होसान्ना#11:9 होसान्ना परमेसर रआ इसतुति! धेनया हेनाया उनी जे परभु रआ लुतूम एते हिजुःकाय! 10आले रिई पुरखा दाऊद रआ राइज जे हिजुःका, धेनया हेनाःआं, उसुल सिरमा रे होसान्ना!”
11उनी जरुसलेम रे तेबाः केते मरंग बिनती ओड़ाः रे हेच्चेनाय अरो चइरो ओइर सुबिन्नाः नेल केते बारहों चेला लोः गाति केते बयतनियाह तोराया, चिलिमेनचि धुंधरुप इदीः केना।
का जो वनाः अंजीर दाड़ु
(मती 21:18,19)
12एटाः हिलोः जोब उनकु बयतनियाह एते उडुङएनाकु दो ईसु के रेंगेच एदेया। 13उनी संगिञ एते मियाः हेरयार अंजीर दाड़ु नेल केते उना हेनात तोराया चि, सइत उना थोड़गन जो नाम कोःका, मुदा सेकाम बागी केते जहन्नाः काय नाम; चिलिमेनचि, जो रआ समेय का तहिकेना। 14इना रे ईसु दाड़ु एते गाम्मेताय, “आम रआ जो जहय गी तिहिञ एते केहयो काकु जोम्मा!”
अरो उनी रेन चेला नुवां गापाम केनाय रे उना अयुम एकेनाकु।
मरंग बिनती ओड़ाः एते अखरीञ वनकु के उडुङ वेःकुवाय
(मती 21:12–17; लूका 19:45–48; जोहन 2:13–22)
15अरो उनकु जरुसलेम रे हेच्चेनाकु, उनी मरंग बिनती ओड़ाः रआ राचा रे तोराया; उनी ओन्डो अखरीञ अरो किरीञ वनकु के टांड़ी उडुङ हेलावेनाय। अरो कचा-टका बदलावेकु रआ माचि अरो पेरवां अखरीञ वनकु रआ चोंवकी उलटावेताय, 16अरो मरंग बिनती ओड़ाः राचा रे जहय के जहन्नाः लेयकेते काय हेच सेन इरीवाःकुवाय। 17#जसा 56:7; जिरमि 7:11 अरो सिखाव केते उनकु के गामवाःकुवाय, “चिलि नुवां का ओल एकाना चि, जेलेका परमेसर गाम्मेताय, इञ रआ ओड़ाः सुबिन जाइतकु रेन होर कथिर पराथना रआ ओड़ाः गामुःआं? मुदा अपे गी कुमरुकु रआ मियाः ठांव बाय एकाःआपे।”
18नुवां ओनाव केते मुध जाजककु अरो धरम पोथी सिखाविकु, उनी के गोगोच कथिर रआ मोका दंड़ा हेलावेनाकु; चिलिमेनचि उनकु उनी एते बोरोय केनाकु इनाते चि सुबिन होर उनी रआ सिखाव एते चकरीत ओःकेनाकु।
19धुंधरुप होयुः बेरा उनकु चट्टी एते एटाः सोझ तोराकुवा।
रोहोड़ अंजीर दाड़ु रआ एते सिखाः
(मती 21:20–22)
20सेताः गी जोब उनकु उना सोझ एते सिनुः केनाकु, दो उनकु गी उना अंजीर रआ दाड़ु रेहेत तक रोहोड़ नेल एताकु। 21पतरस के उना गानाम ओयहर हेच्चेना अरो उनी ईसु के गामवादेयाय, “ए गुरु, नेल! नुवां अंजीर रआ दाड़ु जे आम भखाव लाःआम, रोहोड़ेना।”
22ईसु उनकु के जबाब एमाःकुवाय, “परमेसर रे बिसवास दोहोयपे। 23#मती 17:20; 1 कुरु 13:2 इञ अपे एते सच गी गामवापे कनिञ चि जे गी नियां बुरु एते गाम्माकु, आम तुतजोन अरो समुदर रे सेनजोन, अपन मोन रे संका ओलोपे दोहोया, मुदा बिसवास एकाकु चि जे गामकानिञ हें उना होयजोना, दो उनी कथिर इनागी होयुःआ। 24इनाते इञ अपे के गामवापे कनिञ हें चि जहन्नाः गी पराथना रे कोय्येपे, दो बिसवास केपे चि अपे के नाम्मेना, अपे कथिर होयजोना। 25#मती 6:14,15 अरो जोब केहयो तिंगु केते पराथनायपे रेदो जे अपे रआ मोन रे, जहय रआ जहन सिकायत मेनाःआं रेदो माफ एपे; इनाते चि अपे रिई सिरमा आपु हों अबुन रआ गुनाह माफियाय। 26[अरो जदि अपे कपे माफ एरेदो, आपु हों जे सोवाराग रे हेनाया, अपे रआ गुनाह काय माफियाय।]”#11:26 नुवां पद हुडिञगन ती एते काओलएकाना
ईसु रआ हक रे सवाल
(मती 21:23–27; लूका 20:1–8)
27उनकु अरो जरुसलेम रे हेच्चेनाकु अरो जोब उनी मरंग बिनती ओड़ाः रआ राचा रे सेन-बेराय केनाय दो मुध जाजककु अरो धरम पोथी सिखाविकु अरो मुध होरकु उनी ठिनुः हेनात हेच केते कुलिएदेयाकु, 28“आम दो नुवां कामि करा हक एते कामि कनाम? अरो नुवां कामि कथिर आम के ओकोय ता हक एम एकावाःमाय?”
29ईसु उनकु के गामवाःकुवाय, “इञ हों अपे एते मियाः गानाम कुली पेकानिञ; इञ के जबाब एमाञपे दो इञ हों अपे के जबाब एमापिञ चि नुवां कामि करा हक एते कामि कनिञ। 30जोहन रआ बतिसमा चिलि सोवाराग सोझ एते तहिकेना चि होर रआ सोझ एते तहिकेना। इञ के जबाब एमाञपे।”
31तोब उनकु अकु-अकु रे गापाम हेलावेनाकु चि, “जदि अबुन गाम्माबुन, ‘सोवाराग रआ सोझ एते’ दो उनी गाम्माय ‘अपे उनी रआ गानाम चिलिमेन कपे बिसवास लाःआ?’ 32अरो जदि अबुन गाम्माबुन, ‘होर रआ सोझ एते’, दो होर एते बोरो मेनाःआं, चिलिमेनचि सुबिन सारीइ कनाकु चि जोहन सारीगी परमेसर सोझ एते नधनी वनीः तहिकेनाय।” 33इनाते उनकु ईसु के जबाब एमाःदेयाकु, “आले काले सारीइकाना।” ईसु उनकु के गामवाःकुवाय, “इञ हों अपे के काइञ उदुःवापेया चि नुवां कामि करा हक एते कामिइ कनिञ।”
Currently Selected:
मरकुस 11: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
