रोमि 11
11
इसराइलिकु रे परमेसर रआ दया
1 #
फिलि 3:5
इनाते इञ गाम कनिञ, चिलि परमेसर ता अपन होर के उडुङ एकाःकुवाय? हिरगीस बङा! इञ होचो इसराइली हेकेञ, अबराहम रेन बोंस अरो बिनजामिन रेन गोतोर रे ते हेकेञ। 2परमेसर ता अपन होर के पहिल एते गी सारी कुकनकेनाय, काय बगी, अपनाव वेःकुवाय, चिलि अपे कपे सारीइकाना चि पबितर पोथी एलियाह रआ बबेत रे चिलिकाः गाम कनाय, चि उनी इसराइलिकु रआ बिरोध रे परमेसर के गोहराव वेयकेनाय। 3#1 राजा 19:10,14 “ए परभु! उनकु ता आमरेन परमेसर सोझ एते नधनी वनकु के गोजेः कुवाकु, उनकु ता आम रआ कयेक थान ता धसाव उयुः कताकु, इञ गी एकला बनचाव एकानिञ अरो उनकु इञ रआ जीव हों घताव कथिर ओःकानाकु।” 4#1 राजा 19:18 मुदा परमेसर एते उनी के चिलि जबाब मिलावेना? “इञ ता अपन कथिर सात हजार हेरेल के दोहो एकाःकुञ, जे बाल लुतूम बोंगा के काकु डोंडोत एकाःदेया।” 5नियां लेका एते नियां समेय हों, दया एते सला वन थोड़गन इसराइली सरेच एकानाकु। 6जदि नुवां परमेसर रआ दया एते होय एकाना रेदो अरो करनी एते बङा, बङ रेदो दया, दया का तहिएना।
7अरो परतिफोल चिलिकाः होय्येना? इसराइलिकु जेके दंड़ाय केनाकु, उनी के काकु नाम दड़िवादेया, मुदा जेके सला लेःकुवाय उनकु ता नमेःदेयाकु। मुदा बाकि होरकु रआ मोन दो केटेच एना। 8#नियम 29:4; जसा 29:10 जे लेका पबितर पोथी रे ओल्लेकाना, चि परमेसर ता उनकु के मन्दबुधि एमाःकुवाय अरो नुंकन मेत एमाःकुवाय, जे काकु नेल दड़ी वकाना अरो नुंकन लुतूर जे काकु ओनाव दड़ी वकाना, उनकु रआ नुवां दसा तिहिञ तक बाय एकाना। 9#सिरिञ 69:22,23 अरो दाऊद गाम कनाय,
“उनकु रआ जोजोम वनाः उनकु कथिर झाली अरो फांसी
अरो ठोकोरोः अरो दंड रआ कारन होयुःका।
10उनकु रआ मेत इड़िच कोःका ताकि ओलोकु नेल दड़िवाका,
आम उनकु रआ डांडा सोबदिन कथिर कुबड़ा कम।”
11दो इञ गाम कनिञ चिलि इसराइलिकु ता इनाते तोहोत एनाकु, चि उयुः वोःककु? हिरगीस बङा, मुदा उनकु रआ गुनाह रआ चलते गइर-जहुदिकु ता उद्धार नम्मेताकु, चि इसराइलिकु जलाःकाकु। 12नेबरीक जदि उनकु रआ गुनाह दुनिया कथिर धन अरो उनकु रआ कोमी गइर-जहुदिकु कथिर फयदा हेके, दो उद्धार रे उनकु पुरापुरी मेसाः रेदोकु चिमिनुः ढेर फयदा होयुःआ होनांङ।
गइर-जहुदिकु रआ उद्धार
13नेबरीक इञ अपे गइर-जहुदिकु के मेता पेकानिञ चि, इञ दो गइर-जहुदिकु रे परचार कथिर जोब तक कुल एकानिञ, तोब तक इञ अपन कामि रआ परति बड़ाय कनिञ। 14ताकि जहन लेका एते इञ अपन होरकु एते जलन इरीकेते उनकु रे ते थोड़गन के उद्धार कराव इरीकुञ। 15चिलिमेनचि जदि परमेसर रआ दोवासते उनकु के नकराव रे दुनिया रे परमेसर लोः मेल-मिलाप होयुःका दो अरो उनकु के अपनाव चिलि गोच वनकु रे ते जुवेत बिरीतोः रआ बराबोइर का होयुःआ? 16जदि जोब दान रकाप वनाः पहला पिठा पबितर मेनाःआं दो सुवेत वनाः पुरा होलोंग पबितर मेनाःआं? जदि दाड़ु रआ रेहेत पबितर मेनाःआं रेदो उना रआ डइर हों पबितर मेनाःआं।
17मुदा थोड़गन डइर हुचाः केते अलगे करावेकाना अरो अपे, बुरु जायतून रआ डइर होय केते हों, उना एटाः डइर लोः कलम केते सटावेकाना अरो बुगिन जायतून रआ रेहेत एते पोस्टिक अहार रआ भागी एकानापे। 18दो अपे अपन के हुचाः डइर एते बाइड़ केते ओलोपे सोमझाःआ, अरो जदि अपे बड़ाइ कनरेदोपे, दो सारी केपे चि अपे रेहेत ता कपे सम्भराव काना, मुदा रेहेत अपे के सम्भराव पेकानाय 19अरो अपे गम्मापे, डइर ता इनाते हुचाः एताकु, चि इञ के कलम एञकाकु। 20बुगिन गिया, नुवां दो अबिसवास रआ चलते हुचाः एताय, मुदा अपे बिसवास रे बाय तहीः कनापे, इनाते ओलोपे घमंडिया, मुदा बोरोय चित तहीःपे। 21चिलिमेनचि जदि परमेसर ता असली डइर काय बागी लाःआय दो उनी अपे केहों काय बागिपेयाय। 22इनाते परमेसर रआ माया अरो कड़ाइ ता नेलपे! नुवां कड़ाइ, उनकु कथिर मेनाःआं जे उयुः एकानाकु, जदि अपे उनी रआ माया रे बाय तहीः कनरेदोपे, उनी रआ माया अपे कथिर मेनाःआं। बङ रेदो, अपे केहों माः केते गिड़ी पेयाय। 23अरो उनकु हों अबिसवास रे काकु तहीः रेदो, उनकु केहों दाड़ु रे कलम सटाव कुवाय, चिलिमेनचि उनकु के अरो कलम सटाव रे परमेसर कराव दड़िवाःआय। 24जदि अपे जे बुरु जायतून डइर हेकेपे, उना असहज एते असली बुरु जायतून रआ दाड़ु रे कलम सटाव एकानापे। दो जे असली दाड़ु रआ डइर ता, असली जायतून दाड़ु रे दोबोरा कलम सटाव कराव परमेसर के चिमिनुः सहाज होयुःआ।
सुबिन इसराइलिकु रआ उद्धार
25ए बिसवासी बोयहा-मिसी! नुंका ओलो होयुःका चि अपे अपन के बेचोट बुधिमान सोमझाःपे, इनाते इञ अपे रे नुवां उकु गानाम दिसतार कराव चहाः कनिञ, उना गानाम नुवां हेके चि इसराइलिकु रआ जिध सोबदिन कथिर बङा, मुदा तोब तक तहिनोःओ जोब तक सुबिन गइर-जहुदिकु काकु बोलो कोःका। 26#जसा 59:20,21 अरो इना लेका ते समुचा इसराइली रआ उद्धार होयुःआ, जे लेका पबितर पोथी रे ओल्लेकाना,
छोड़ाव वनीः सियोन एते हिजुःआय,
उनी जाकूब रेन बोंस एते सुबिन बुराय ओचोःइयाय।
27 #
जसा 27:9
अरो उनकु लोः इञ रआ नियां करार होयुःआ,
जोब चि इञ उनकु रआ पाप ता ओचोःइञ।
28बुगिन खभेर रआ बिचार एते, उनकु दो अपे रआ चलते परमेसर रेन बइरी हेकेकु, मुदा सला वन परजा रआ बिचार एते, उनकु रेन पुरखाकु रआ चलते परमेसर रेन दुलारा हेकेकु। 29चिलिमेनचि परमेसर अपन सुबिन बरदान अरो बुलाहट एते हिरगीस तयोम काय ओचोः कनाय। 30चिलिमेनचि जेलेका अपे गइर-जहुदिकु पहिल परमेसर रआ हुकूम कपे मनाव केना, मुदा नेबरीक उनकु जहुदिकु हुकूम का मनाः एते अपे रे परमेसर रआ दया होय्येना। 31इना लेका गी उनकु तहों नेबरीक परमेसर रआ हुकूम काकु मनाव केना चि अपे रे परमेसर रआ दया होयुः काना, ताकि उना एते उनकु रेहों परमेसर रआ दया होयुःका 32चिलिमेनचि परमेसर ता सुबिन के हुकूम का मनाव वन के तोल केते दोहोवेःकुवाय, ताकि उनी सुबिनकु रे दयायाय।
परमेसर रआ इसतुति
33 #
जसा 55:8
ओह! परमेसर रआ धन अरो बुधि अरो गेयान चिमिनुः गम्भीर मेनाःआं! उनी रआ फयसाला सोमोझ एते हों बहरी मेनाःआं, अरो उनी रआ होरा चिमिनुः अनथाह मेनाःआं। 34#जसा 40:13 चिलिमेनचि पबितर पोथी मेन कनाय,
“परभु रआ मोन ता ओकोय सारीइ कनाय?
अरो उनी के सलाह एएम वनीः ओकोय होय सकाःकाय?”
35 #
अयू 41:11
केहियो जहय परमेसर के जहन्नाः एम एकावादेयाकु?
जेकर बदला रे परमेसर उनी के रुवाड़ वयाय?
36 #
1 कुरु 8:6
चिलिमेनचि इनी सोझ एते गी अरो इनी रआ दोवासते अरो इनी कथिर गी सुबिन्नाः हेके उनी रआ महिमा जुगनजुग होयुः चित तहीःका। अमीन।
Currently Selected:
रोमि 11: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
