रोमि 12
12
परमेसर रआ सेवा
1इनाते ए बिसवासी बोयहा-मिसी, इञ अपे एते परमेसर रआ माया ओयहर केते गोहराव पेकानिञ, चि अपन होड़मो ता जुवेत अरो पबितर अरो परमेसर के सुहाः लाइख बलिदान एपे। नियां गी अपे रआ आत्मिक उपासना हेके। 2नेबरीक नियां दुनिया रआ रीति लेका ओलोपे सेसेन्ना, मुदा मोन नवां केते परमेसर के अपे रआ चइल-चलन बदलाव इरीवायपे। ताकि अपे के पता होयकोःका चि परमेसर रआ हिछा चिलिकाः हेके। मनेकि जे बुगिन एते बुगिन, सुहाः अरो सिध हेनाःआं।
3इनाते उना दया रआ चलते जे बरदान उनी ता इञ के एम एकावादेञाय, इञ अपे सुबिन एते गाम वपेकानिञ, जे लेका सोमझाः चही, उना एते बइड़ केते जहय हों अपन के ओलोपे सोमझावोःओ, जे लेका परमेसर ता हरेक के जेतना बिसवास एम एकावाःकुवाय, इमिनुः गी बुगिन बुधि एते अपन के सोमझाःपे। 4#1 कुरु 12:12 जे लेका अबुन रआ होड़मो रे बेचोट अंग मेनाःआं अरो सुबिन अंग रआ अलग-अलग कामि हेनाःआं। 5इना लेका गी अबुन जे बेचोट एते मेनाबुना, मसी रे मीः होड़मो होय केते आपस रे अनी-नोय रआ अंग हेकेबुन। 6#1 कुरु 12:4–11 दो मिलाव वनाः उना दया रआ मोताबिक अबुन के जे अलग-अलग बरदान मिलावेकाना, अबुन उना कामि रे अगुयाबुन। जदि जहय के आगमजानी रआ बरदान मिलावेकाना अरो उनकु ठिनुः जेतना बिसवास हेनाःआं उना रआ मोताबिक आगमजानिइ काकु। 7जदि जहय के सेवा रआ बरदान मिलावेकाना दो सेवा लगाल तहीःपे, जदि जहय के सिकछा एएम रआ कामि मिलावेकाना दो सिकछा एएम रे लगाल तहीःकाय। 8जदि जहय के डिढ़ एएम हेनाःआं रेदो उनी के ढढस एएम चही। जदि जहय के दान एएम रआ बरदान मिलावेकाना रेदो उनी के उत्साह ते दान एएम चही। जदि जहय के एगवाइ कराव रआ बरदान मिलाव एकाना उनी पुरा मोन लगाव केते एगवाइ एकाय, जे के दया देखाव मिलावेकाना, उनी खुसी ते दया एकाय।
9अपे रआ दुलार बिन कपटाहा होयुःका, बुराय एते घिनाःपे, बुगिन रे लगाल तहीःपे। 10अपे सचा बोयहाकु लेका अनी-नोय के दुलार कुपे। हरेक होर अनी-नोय के माइन कराव वते लहा बड़हाःपे। 11मेहनेत कराव रे ओलोपे कोड़ही नोःओ, रावा उत्साह बनाल तहीःका, परभु रआ सेवा कराव चित तहीःपे। 12आसरा रे अनादित तहीःपे। बिपेत रे साबुर दोहोयपे। पराथना रे लगाल तहीःपे। 13पबितर होर रआ दरकार रे देंगा कुपे। मेहमानकु के सेवा कराव रे तेयार तहीःपे।
14 #
मती 5:44; लूका 6:28 जे अपे के सताव पेकानाकु उनकु के आसरीबाद एमाकुपे। उनकु के ओलोपे सरफावकुवा, आसरीबाद एमाकुपे। 15जे आनाद हेनाकुवा उनकु लोः आनाद एपे। जे इयाम कनाकु, उनकु लोः इयामपे। 16#बु.बचन 3:7 मेल-मिलाप ते तहीःपे। ओलोपे घमंडिया, मुदा नबर-दुबरकु लोः मिलाः-जुलाः चित तहीःपे। खुद के बुधिमान ओलोपे सोमझावोःओ। 17बुराय रआ बदला ओलोपे बुराय इया। सुबिन होरकु रआ नजेर रे जे बुगिन हेनाःआं उनागी कराव रआ सोंचाःपे। 18जहां तक होय सकाःका, सुबिन होरकु लोः मेल-मिलाप एते तहीःपे। 19#नियम 32:35 इञ रेन दुलारकु, जहय एते अपन ते पलटा ओलोपे अगुया। मुदा परमेसर रआ खिंस ता मोका एमपे, चिलिमेनचि पबितर पोथी रे ओल्लेकाना, “परभु ता गाम एकाःआय पलटा अगु इञ रआ कामि हेके। परतिफोल इञ एमाकुञ” 20#बु.बचन 25:21,22 मुदा अपे रेन बइरी रेंगेच मेनाकु रेदो उनकु के जोजोम वनाः खियावकुपे। जदि उनकु तेतांङ मेनाकुवा रेदो उनकु के दाः नुनू कथिर एमाकुपे। चिलिमेनचि जदि अपे नुंका कराव कनापे रेदो अपे उनकु रआ बोहोः रे लजिम्मोः आनाः अंगरा ढेरिइ कनापे। 21बुराय एते ओलोपे हरावोःओ मुदा बुगिन केते बुराय ता जिताःपे।
Currently Selected:
रोमि 12: BIY
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
