Yohane 1
1
1Ahyɛaseɛ ne, né Edwirɛ ne wɔ berɛ, né Edwirɛ ne né Nyameɛ yeɛ bɛwɔ berɛ ɔ, na né Edwirɛ ne te nyameɛ. 2Ahyɛaseɛ ne, ye yeɛ né ɔne Nyameɛ wɔ berɛ ne. 3Nningyein mukoraati nate ye so yeɛ ɔwale ɔ, na bammɔ nikye fee bɔ né ɔbokka so ɔ.#1:3 Anaa: “Na bangwati ye bannyɛ nikye fee.” 4Nikye bɔ ɔnate ye so wale yeɛ ole ngoa, na ngoa ne yeɛ ole mmenia kanea. 5Kanea ne ta awosii nu, na awosii ne angora angata kanea naso.
6Nyameɛ somane biaa bie, né ye dumaa li Yohane. 7Sɔ biaa he wale kyɛ ɔbaali adanzeɛ. Né ɔbaali kanea nanwo adanzeɛ, kyɛbɔ ɔkɔyɛ a, ebiala nate ye so kole koli. 8Nná ye yeɛ ne ɔte kanea ne, mmom ne ɔbaali kanea nanwo adanzeɛ.
9Nahorɛ kanea bɔ ɔta ma mmenia mukoraati ne, né ɔba wiase. 10Né ɔwɔ wiase, na bɛnate ye so yeɛ bɛyɛle wiase ne ɔ, nakoso wiase ne nze ye. 11Ɔwale ye bɔbɔ ye awuro, nakoso ye mmenia anne ye. 12Nakoso bɛ bɔ bɛlɛle ye, na benyane gyidie wɔ ye dumaa nanu ne, ɔmaa bɛyɛle Nyameɛ mmaa. 13Nna mogya, anwoɔnaen, anaa brienzua so yeɛ bɛnate bɛwole bɛ ɔ, mmom Nyameɛ bɔbɔ.
14Na edwirɛ ne yɛle anwoɔnaen ɔɔtenane yɛ nu, na yɛnwuni ye anuonyam, anuonyam bɔ baba fa ma ɔwa bɔ owole ye komapɛ ne, bɔ adom ne nahorɛ ayi ye tɛkyɛ ne. 15Yohane lili ye nwo adanzeɛ, na ɔteane nu kyɛ: “Ɛhe yeɛ ngane ye nwo dwirɛ kyɛ, ‘Bɔ oli me si ɔba ne, wali me nyunu dada, ofikyɛ né ɔwɔ berɛ kora yeɛ meba ɔ.’” 16Adom bɔ wayi ye tɛkyɛ nati, yɛ mukoraati yanya adom pee yafi ye berɛ. 17Mmeraa ne de, bɛnate Mose so yeɛ bɛfa bɛmane ɔ; na adom ne nahorɛ ne de, ɔnate Yesu Kristo so yeɛ ɔwale ɔ. 18Ebiala nne berɛ bɔ wanwu Nyameɛ le; Baa#1:18 Anaa “nyameɛ.” komapɛ twen bɔ ɔwɔ Baba ne nwo berɛ ne, ye yeɛ wamaa yanwu kyɛbɔ ɔte ɔ.
19Yudafoɛ ne somane asɔfo ne Lewifoɛ fili Yerusalem hɔle Yohane berɛ kyɛ bɛɛbisa ye kyɛ: “Wɔ yeɛ ɛle nwa?” Na adanzeɛ he yeɛ ɔfa mane ɔ. 20Wannza, mmom ɔhane ye pefee kyɛ: “Nná me yeɛ nne Kristo ne.”
21Na bɛbisale ye kyɛ: “Nzaade, ɛte nwa? Elia?” Ɔyele ye noa kyɛ: “Nnde Elia.” “Wɔ yeɛ ɛle diifoɛ ne?” Ɔhane kyɛ: “Daabi.” 22Yeti bɛbisale ye kyɛ: “Ye de, wɔ yeɛ ɛle nwa? Ka kyire yɛ, ná wamaa yanya edwirɛ bie yaha yahyire bɛ bɔ bɛsomane yɛ ne. Nzu yeɛ ɛka fa wɔ nwo ɔ?”
23Ɔhane kyɛ:
“Me yeɛ nne konviɛ bɔ ɔteanu wɔ ɛserɛ so dɔ kyɛ,
‘Ɛmɔ tengyɛ Awurade atee,’ kyɛbɔ diifoɛ Isaiah hane ne.”
24Bɛ bɔ bɛsomane bɛ ne, né bɛboka Farisifoɛ naso. 25Yeti besa bɛbisale ye kyɛ: “Sɛ nná wɔ yeɛ ɛle Kristo ne, Elia, anaa diifoɛ ne a, ye de nzuati yeɛ ɛbɔ asu ɔ?” 26Yohane ha hyirele bɛ kyɛ: “Me de, nzue yeɛ mefa mebɔ asu ɔ. Na ebie gyi ɛmɔ afia bɔ ɛmɔnze ye. 27Ye yeɛ oli me si ɔba ne, na ye mmaboa nyamaa po, menvata kyɛ mesangye.” 28Ɛhe hɔle so wɔ Betania, Yordan nzue ne si dɔ, nekaa bɔ né Yohane bɔ asu ne.
29Kyẽa bɔ oli berɛ ne, Yohane nwuni Yesu kyɛ ɔba ye berɛ, na ɔhane kyɛ: “Ɛmɔnea Nyameɛ Boan Ba bɔ ɔye wiase bɔne fi berɛ ne! 30Ɛhe yeɛ ngane ye nwo dwirɛ kyɛ: ‘Bɔ oli me si ɔba ne, wali me nyunu dada, ofikyɛ né ɔwɔ berɛ kora yeɛ meba’ ne. 31Me po, né menze ye, nakoso mmale kyɛ mebaafa nzue mebɔ asu, kyɛbɔ ɔkɔyɛ a, bɛkɔmaa Israel konwu ye ɔ.” 32Yohane koso lili adanzeɛ kyɛ: “Nwuni kyɛ honhom ne fi anwuro ɔba te kyɛ abubure, na oogyinane ye so. 33Ɔwɔ nu né menze ye, nakoso bɔ ɔsomane me kyɛ mma mmɔ asu wɔ nzue nu ne ha hyirele me kyɛ: ‘Sona bɔ ekonwu kyɛ honhom ne fi anwuro waagyina ye so ne, ye yeɛ ɔfa honhom krongron bɔ asu ne.’ 34Mafa me nye manwu ye, na medi ye nwo adanzeɛ mekyire ɛmɔ kyɛ, ɛhe yeɛ ole Nyameɛ Awa ne.”
35Aleɛ hene bieku ne, né Yohane ne ye asuafoɛ nanu nyɔ gyi berɛ, 36na mmerɛ bɔ onwuni kyɛ Yesu nate berɛ ne, ɔhane kyɛ: “Ɛmɔnea, Nyameɛ Boan Ba ne ɛhe!” 37Asuafoɛ nyɔ ne tele bɔ ɔhane ne, na bɛɛlili Yesu si. 38Yesu kakyile ye nwo, na onwuni kyɛ beli ye si, yeɛ obisale bɛ kyɛ: “Ɛmɔpena nzu?” Bɛha bɛ hyire ye kyɛ: “Rabi (yebo kyire Kyerɛkyerɛniɛ), nisua yeɛ ɛte ɔ?” 39Ɔha hyirele bɛ kyɛ: “Ɛmɔbra, na ɛmɔ konwu ye.” Yeti bɛne ye hɔle, na bɛnwuni nekaa bɔ ɔte ɔ, na sɔ kyẽa ne, bɛne ye tenane berɛ; né wabɔ kɔyɛ nnɔsoa 4:00.#1:39 4:00 ne te dɔnhwere bɔ ɔtɔ so nná. 40Mmenia nyɔ bɔ bɛtele Yohane dwirɛ ne, ná bɛɛlili Yesu si ne, kõ yeɛ ole Simon Petro aliema Andrea. 41Bɔ oli moa yɛle yeɛ ole kyɛ, ɔɔpenane oliema Simon, yeɛ ɔha hyire ye kyɛ: “Yanwu Mezaya ne” (bɔ yebo kyire “Kristo” ne), 42na ɔfale ye hɔle Yesu berɛ. Yesu nwuni ye ne, ɔhane kyɛ: “Wɔ yeɛ ɛle Yohane awa Simon; bɛkɔfrɛ wɔ ‘Kefa’” (yebo kyire “Petro”).
43Aleɛ hene ne, né Yesu pena kyɛ ɔkɔ Galilea. Na mmerɛ bɔ onwuni Filipo ne, ɔha hyirele ye kyɛ: “Baali me si.” 44Né Filipo fi Betsaida, ɛberɛ ala yeɛ Andrea ne Petro fi ɔ. 45Filipo nwuni Natanael, na ɔha hyirele ye kyɛ: “Bɔ Mose hworɔle ye nwo dwirɛ wɔ Mmeraa nanu, na adiifoɛ nemɔ hworɔle ye nwo dwirɛ ne, yanwu ye. Yosef awa Yesu bɔ ofi Nazerɛt ne.” 46Natanael ha hyirele ye kyɛ: “Ɛnea a, nikye pa bie kɔhora kofi Nazerɛt kɔwa?” Filipo ha hyirele ye kyɛ: “Baanea.” 47Yesu nwuni kyɛ Natanael ba ye nwo berɛ ne, ɔhane ye nwo dwirɛ kyɛ: “Ɛmɔnea, Israelniɛ paa bɔ nnaka-naka nne ye nu ɛhe.” 48Natanael bisale ye kyɛ: “Ɔyɛle sɛɛ yeɛ ɛnwuni me ɔ?” Yesu ha hyirele ye kyɛ: “Nwuni wɔ wɔ borɔdoma bakaa nabo dɔ, kora yeɛ Filipo baafrɛ wɔ ɔ.” 49Natanael hane kyɛ: “Rabi, wɔ yeɛ ɛle Nyameɛ awa ne, wɔ yeɛ ɛte Israelfoɛ hene ne.” 50Yesu bisale ye kyɛ: “Nga ngyirele wɔ kyɛ, nwuni wɔ wɔ borɔdoma bakaa nabo dɔ nati yeɛ alɛ́ ali ne? Ekonwu nningyein bɔ ɔte mbiri tra sɔa.” 51Na ɔha hyirele ye kyɛ: “Nahorɛ paa bɔ meka mekyire ɛmɔ yeɛ ole kyɛ, ɛmɔ konwu kyɛ anwuro abukye, na Nyameɛ abɔfo nemɔ di ahuru-saen wɔ Sona Awa naso.”
Currently Selected:
Yohane 1: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
