2
1Ye ɛlɛsa so ne, né bɛyɛ ayeforɔ bie wɔ Kana bɔ ɔwɔ Galilea ne, na ne Yesu maame wɔ berɛ. 2Na bɛfrɛle Yesu ne ye asuafoɛ nemɔ maa bɛwale bie. 3Bɛ nzãa ne yiele, yeti Yesu maame ha hyirele ye kyɛ: “Bɛ nzãa ne ayie oo.” 4Nakoso Yesu ha hyirele ye kyɛ, “Maame, ɛhe de, ɔfa mene wɔ nwo sɛ? Me mmerɛ nya sonne.” 5Na ye maame ha hyirele asomvoɛ ne kyɛ: “Bɔ ɔkaha kohyire ɛmɔ biala ne, ɛmɔyɛ.” 6Kyɛbɔ Yudafoɛ ahoteɛ nwo mmeraa te ne, né bua mbiri-mbiri nzia bɔ bafa nyɔboɛ bayɛ gyigyi berɛ, na ne kõ biala kora fa nzue bua#2:6 Ɛhe te bua mmaa-mmaa bɔ enu biala kora fa nzue lita 22 anaa anwa galɔn kõ. nyɔ anaa nza. 7Yesu ha hyirele bɛ kyɛ: “Ɛmɔsa nzue bɛgua bua nemɔ nu ma oyi.” Yeti, bɛsale nzue bɛguale bua nemɔ nu maa oyili dɛm. 8Afei ɔha hyirele bɛ kyɛ: “Ɛmɔsa bie bɛɛma bɔ ɔnea ayeforɔ naso ne.” Yeti bɛsa bɛhɔle. 9Na mmerɛ bɔ sona bɔ ɔnea ayeforɔ naso ne fale nzue bɔ wakakyi nzãa ne hane ye noa ne, né ɔnze nekaa bɔ ofi ɔ, (nakoso asomvoɛ bɔ bɛsale nzue ne de, né bɛse), yeɛ ɔfrɛle brienzua bɔ ogya ne hɔle ahameɛ, 10na ɔha hyirele ye kyɛ: “Ebiala di moa fa nzãa pa ne ba, na sɛ mmenia ne bo yie a, né wafa bɔ ɔttemaye ne wawa. Na wɔ de, afa nzãa pa ne asie tonn maa waadwu bekye.” 11Ɛhe yeɛ ole nzɛngyerɛneɛ bɔ Yesu limoa yɛle, na ɔyɛle ye wɔ Kana bɔ ɔwɔ Galilea ne, na ɔlale ye anuonyam ali. Na asuafoɛ nemɔ nyane gyidie wɔ ye nu.
12Ɛhe si ne, ɔne ye maame, oliema nemɔ ne ye asuafoɛ nemɔ hɔle Kapernaum, nakoso bandena berɛ bangyɛ.
13Né Yudafoɛ Pɛnu né apingye, na Yesu hɔle Yerusalem. 14Na ɔhɔle asɔre awuro berɛ ne, onwuni bɛ bɔ bɛtɔne nandwie, mmoan, ne mmubure, afei onwuni bɛ bɔ bɛsesã sikaa koso wɔ berɛ. 15Yeti ɔfale nyamaa yɛle kain, na ɔfoale bɛ bɔ bɛtɔne mmoan ne nandwie ne fili asɔre awuro berɛ, na bɛ bɔ bɛsesã sikaa ne, ohwiele bɛ sikaa nemɔ guale, na ɔhane bɛ tɛbulu nemɔ guale ase. 16Yeɛ ɔha hyirele bɛ bɔ bɛtɔne mmubure ne kyɛ: “Ɛmɔfa ɛhemɔ bɛfi wa bɛhɔ! Na ɛmɔyakyi dwaa bɔ ɛmɔdi ye wɔ me Baba awuro wa ne!” 17Ye asuafoɛ nemɔ kayele kyɛ, bahworɔ kyɛ: “Wɔ awuro nanwo dɔ#2:17 Anaa “Mmɔdemmɔ.” kɔyɛ kyɛ see bɔ ɔsɔ wɔ me nu ne.” 18Yeɛ Yudafoɛ nemɔ bisale ye kyɛ, “Nzɛngyerɛneɛ beni yeɛ ɛkɔyɛ kɔfa kohyire kyɛ ele ye nwo atee kyɛ ɛyɛ ɛhe ɔ?” 19Yesu ha hyire bɛ kyɛ: “Ɛmɔdwiri asɔre awuro ne bɛgua, na ngɔfa ɛlɛsa ngɔma so ngosie berɛ.” 20Yeɛ Yudafoɛ nemɔ hane kyɛ: “Asɔre awuro bɔ bɛfale afoɛ 46 bɛsili ne, ɛfa ɛlɛsa ma so sie berɛ?” 21Nakoso ye de, mmerɛ bɔ ɔhane asɔre awuro ne, ye nipadua nanwo dwirɛ yeɛ ne ɔka ɔ. 22Otingye fili ewue nu ne, ye asuafoɛ nemɔ kayele kyɛ ne ɔtaa ka sɔ dwirɛ ne, ɛhe maa bɛlɛle tworɔnzɛm ne né edwirɛ bɔ Yesu hane ne bɛlili.
23Mmerɛ bɔ ɔwɔ Pɛnu afahyɛ nabo wɔ Yerusalem ne, nzɛngyerɛneɛ bɔ mmeni pee nwuni kyɛ ɔyɛ nati, benyane gyidie wɔ ye dumaa nanu. 24Nakoso Yesu de wamva ye nwo wando bɛ so, ofikyɛ né ɔse bɛ mukoraati; 25na né onhia kyɛ ebiala di sona nwo adanzeɛ kyire ye, ofikyɛ ɔse bɔ ɔwɔ ebiala ahone nu ɔ.
