Yohane 3
3
1Né Farisiniɛ bie wɔ berɛ bɔ bɛfrɛ ye Nikodemo, na né ɔte Yudafoɛ mbanyi nanu kõ. 2Sɔ biaa he wale Yesu berɛ kɔngɔen, yeɛ ɔha hyirele ye kyɛ: “Rabi, yɛse kyɛ ɛte kyerɛkyerɛniɛ bɔ efi Nyameɛ berɛ, ofikyɛ ebiala ngɔhora ngɔyɛ nzɛngyerɛneɛ bɔ ɛyɛ ne, sana Nyameɛ boka ye so.” 3Na Yesu ha hyirele ye kyɛ: “Nahorɛ paa bɔ meka mekyire wɔ yeɛ ole kyɛ, sɛ banwo ebie foforɛ a, ɔngɔhora ngonwu Nyameɛ Ahennie ne.” 4Nikodemo koso bisale ye kyɛ: “Panyi-banyi de, ɔkɔyɛ sɛɛ né bahora bawo ye bieku? Aso ɔkɔhora kɔhɔ ye maame kunu maa ɔkɔwo ye bieku?” 5Yesu koso yele ye noa kyɛ: “Nahorɛ paa bɔ meka mekyire wɔ yeɛ ole kyɛ, sɛ ebie kɔhora kɔhɔ Nyameɛ Ahennie nu a, sana bɛfa nzue ne honhom bɛwo ye. 6Bɔ bawo ye anwoɔnaen nu ne te anwoɔnaen, na bɔ bawo ye honhom nu ne te honhom. 7Nnɛmaa ɔyɛ wɔ nwanwa kyɛ, nga ngyirele wɔ kyɛ, ‘Odikyɛ bɛwo ɛmɔ bieku.’ 8Mvrama bɔ kɔ nekaa bɔ okuro ɔ; ɛte ye nga; nakoso ɛnze nekaa bɔ ofi, anaa nekaa bɔ ɔkɔ ɔ. Sɔ ala yeɛ ebie bɔ bafa honhom bawo ye ne te ɔ.” 9Na Nikodemo bisale ye kyɛ: “Ɔkɔyɛ sɛɛ ne ɛhemɔ ahora ayɛ yé?” 10Yesu ha hyirele ye kyɛ: “Nnaa ɛte kyerɛkyerɛniɛ wɔ Israel, yeɛ ɛnze ɛhemɔ ne? 11Nahorɛ paa bɔ meka mekyire wɔ ole kyɛ: Bɔ yɛse yeɛ yɛka ɔ, na bɔ yanwu ye yeɛ yɛdi ye nwo adanzeɛ ɔ; nakoso ɛmɔnne y'adanzeɛ ne benni. 12Sɛ maha aseɛ so dwirɛ mahyire ɛmɔ, ná ɛmɔ anne banni a, ye de sɛ meka anwuro dwirɛ mekyire ɛmɔ a, ɔkɔyɛ sɛɛ ne ɛmɔ alɛ́ bali? 13Afei koso, ebiala nne berɛ bɔ wafo wahɔ anwuro ɔ, sana Sona Awa ne bɔ ofili anwuro wale ne ngome. 14Na kyɛbɔ Mose mane ɛwoo naso wɔ ɛserɛ naso ne, sɔ ala yeɛ odikyɛ bɛma Sona Awa naso ɔ, 15kyɛbɔ ɔkɔyɛ a, ebiala bɔ okole ye koli ne konya daa ngoa.
16“Na Nyameɛ dɔ wiase paa, yeti ɔfale Ɔwa komapɛ bɔ owole ye ne mane, ná ebiala bɔ okonya gyidie wɔ ye nu ne, ɔngɔsɛkye,#3:16 Anaa “Ɔngɔ mini.” mmom okonya daa ngoa. 17Na Nyameɛ anzoma Ɔwa ne amma wiase kyɛ, oobu wiase atɛn, mmom ɔkɔfa ye so kole wiase. 18Ebiala bɔ odɛ ye di ne, bɛngobu ye atɛn, nakoso ebiala bɔ onne ye nni ne, babu ye atɛn dada, ofikyɛ wannya gyidie wɔ Nyameɛ Awa komapɛ ne dumaa nu. 19Na bɔ yeti yeɛ bɛbu atɛn ne yeɛ ole kyɛ: Kanea awa wiase, nakoso mmenia kuro awosii ne tra kanea ne, ofikyɛ bɛ nneyɛɛ te bɔne. 20Ná ebiala bɔ ɔyɛ bɔne#3:20 Anaa “Akyiwadeɛ.” ne, okyi kanea ne, na ɔmma kanea nanu, ná ye nneyɛɛ nwo anna berɛ. 21Nakoso ebiala bɔ ɔyɛ nikye pa ne ba kanea nanu, kyɛbɔ ɔkɔyɛ a ɔkɔla ali pefee kyɛ ɔyɛ bɔ ɔsɔ Nyameɛ nye ɔ.”
22Ɛhe si ne, Yesu ne ye asuafoɛ ne hɔle Yudea nnamue nemɔ nu, ɔne bɛ tenane berɛ kaa, na ɔbɔle mmenia asu. 23Na Yohane koso, né ɔbɔ asu wɔ Ainon bɔ opingye Salim ne, ofikyɛ né nzue pee wɔ berɛ; na mmeni pee wale ye berɛ maa ɔbɔle bɛ asu. 24Sɔ mmerɛ ne, ne benya bɛhyelle Yohane bɛtolle prizin.
25Na Yohane asuafoɛ nemɔ ne Yudaniɛ bie suli aporowaa twann bie, né ɔfa ahoteɛ nwo. 26Yeti bɛwale Yohane berɛ bɛɛha bɛhyirele ye kyɛ: “Rabi, biaa bɔ ne ɛne ye wɔ Yordan nzue ne si dɔ, bɔ ɛlili ye nwo adanzeɛ ne, nea, ye koso ɔbɔ asu, na ebiala kɔ ye berɛ.” 27Yohane ha hyirele bɛ kyɛ: “Sɛ ebie kɔhora konya nikye bie a, sana bafa bafi anwuro bama ye. 28Ɛmɔ bɔbɔ ɛmɔdi me adanzeɛ kyɛ nga ngyirele ɛmɔ kyɛ, ‘Nná me yeɛ nne Kristo ne, mmom basoma me kyɛ nni ye nyunu moa.’ 29Bɔ ayeforɔ ne wɔ ye berɛ ne, ye yeɛ ole biaa bɔ ogya ne. Na brienzua bɔ ogya ne damvo ne de, sɛ ogyi berɛ, na ɔte bɔ ogya ne konvi a, ye nye gye paa. Yeti, m'anigye ali mu. 30Ye de, odikyɛ onya mmeni pee, na me de, odikyɛ me so te.”
31Bɔ ofi anwuro ne de, ɔtra ebiala. Na bɔ ofi aseɛ so ne fi aseɛ so, na ɔka aseɛ he aso dwirɛ. Na bɔ ofi anwuro ne, ɔtra ebiala. 32Bɔ wanwu ye, na wate ne, ɛhene yeɛ odi ye nwo adanzeɛ ɔ, nakoso, ebiala nne ye adanzeɛ ne ndonu. 33Ebiala bɔ odɛ́ ye adanzeɛ ne to nu ne, wasi ye pi#3:33 Anaa “Wafa nikye watimu so kyɛ.” kyɛ, Nyameɛ te ebie bɔ odi nahorɛ. 34Na bɔ Nyameɛ asoma ye ne, ɔka Nyameɛ dwirɛ, ofikyɛ sɛ́ Nyameɛ fa ye honhom ne ma a, onzusu.#3:34 Anaa “Nyameɛ fa ye honhom ne ma maa ɔbo so.” 35Baba ne dɔ Baa ne, na wafa nikye biala wawura ye sa. 36Ebiala bɔ odɛ́ Baa ne di ne, ole daa ngoa; na bɔ ondie Baa ne, ɔngonwu ngoa, na Nyameɛ afɛ ye so yaa paa.
Currently Selected:
Yohane 3: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
