Yohane 4
4
1Afei Yesu nwuni kyɛ Farisifoɛ nemɔ ate kyɛ wanya asuafoɛ pee, ná ɔbɔ mmeni pee asu tra Yohane ne, 2(ɔwɔ nu, Yesu bɔbɔ ammɔ asu, mmom ye asuafoɛ nemɔ yeɛ ne bɛbɔ asu ne), 3ofili Yudea hɔle Galilea. 4Nakoso né odikyɛ ɔfa Samaria. 5Yeti, oodwuli Samaria kuro bie so; bɛfrɛ ɛberɛ Sikar, opingye aseɛ bɔ Yakob fa mane ɔwa Yosef ne. 6Ɛberɛ yeɛ ne Yakob abura ne wɔ ɔ. Né akwanduo ne amaa Yesu afɛ, yeti ɔtenane abura nanwo berɛ. Né wabɔ kɔyɛ eyia 12:00.#4:6 12:00 ne te dɔnhwere bɔ ɔtɔ so nzia.
7Maame bie fi Samaria wale berɛ kyɛ ɔbaasa nzue. Yesu ha hyirele ye kyɛ: “Ma me nzue ne bie ma nno.” 8(Né ye asuafoɛ nemɔ ahɔ kuro nu bɛkwaatɔ aleɛ.) 9Yeti Samarianiɛ braa ne bisale ye kyɛ: “Nzuati yeɛ wɔ bɔ ɛte Yudaniɛ ne, ɛsrɛ me Samarianiɛ brasua berɛ nzue ne?” (Sɔ mmerɛ ne, né Samariafoɛ ne Yudafoɛ ngã.) 10Yesu koso mane ye mmuayɛ kyɛ: “Sɛ ɛse akyɛdeɛ bɔ Nyameɛ fa ma mbaen, ɔne sona-horɛ bɔ ɔka kyire wɔ kyɛ, ‘Ma me nzue ne bie ma nno’ ne a, ahaa asrɛ ye maa wama wɔ ngoa nzue ne bie.” 11Maame ne ha hyirele ye kyɛ: “Me wura, ɛlle nikye bɔ bɛfa bɛsa nzue po, na abura ne koso, enu wale paa. Ye de nisua yeɛ enyane sɔ ngoa nzue ne ɔ? 12Yɛ nana Yakob bɔ otuli abura he mane yɛ, na ɔne ye mmaa ne ye nyɛmmoa none bie ne, ɛte piri tra ye anaa?” 13Yesu yele ye noa kyɛ: “Ebiala bɔ ɔkɔno abura he anu nzue ne, nzuhɔen kosa kohu ye. 14Nakoso bɔ ɔkɔno nzue bɔ mefa mema ne de, nzuhɔen nngohu ye le. Na nzue bɔ ngɔfa ngɔma ye ne, ɔkɔyɛ nzue ti wɔ ye nu bɔ opu kɔ daa ngoa nu.” 15Maame ne ha hyirele ye kyɛ: “Me wura, ye de ma me sɔ nzue ne bie, ná nzuhɔen angu me maa daa mamma wa kyɛ mebaasa nzue.”
16Yesu ha hyirele ye kyɛ: “Kɔfrɛ ɛhu, na ɛne ye bra.” 17Maame ne ha hyirele ye kyɛ: “Nngya bia.” Yesu hane kyɛ: “Aha nahorɛ, ɔte amba, ‘Eggya bia.’ 18Ofikyɛ agya mmrienzua nnu, na bɔ ɛne ye te berɛ kesaalae ne po, nná ɛhu ɔ. Yeti bɔ aha ne te nahorɛ.” 19Maame ne ha hyirele ye kyɛ: “Me wura, mekora menwu kyɛ ɛte diifoɛ. 20Né yɛ nana mɔ sõ Nyameɛ wɔ bokaa he aso, nakoso ɛmɔ de, ɛmɔnwa Yerusalem yeɛ ɔte nekaa bɔ odikyɛ ebiala basõ Nyameɛ ɔ.” 21Yesu ha hyirele ye kyɛ: “Maame, dɛ́ me di, mmerɛ bie ba, bɔ nná bokaa he aso anaa Yerusalem yeɛ ɛmɔkɔsõ Baba ne ɔ. 22Bɔ ɛmɔsõ ye ne, ɛmɔnze ye; na yɛ de, yɛse bɔ yɛsõ ye ne, ofikyɛ Yudafoɛ yeɛ Nyameɛ nate bɛ so kole ngoa ɔ. 23Nakoso mmerɛ bie ba, na wadwu, kyɛ bɛ bɔ bɛsõ Nyameɛ nahorɛ nu ne kɔsõ Baba ne wɔ honhom ne nahorɛ nu, na sɔ mmenia nemɔ yeɛ Baba ne pena kyɛ bɛsõ ye ɔ. 24Nyameɛ te honhom, na bɛ bɔ bɛsõ ye ne, odikyɛ bɛsõ ye honhom ne nahorɛ nu.” 25Maame ne ha hyirele ye kyɛ: “Mese kyɛ Mezaya bɔ bɛfrɛ ye Kristo ne ba. Na ɔba a, ɔkɔmaa yekonwu nikye biala pefee.” 26Yesu ha hyirele ye kyɛ: “Me bɔ mene wɔ dwudwo ne, me ane.”
27Sɔ mmerɛ nala yeɛ ye asuafoɛ nemɔ wale ɔ, na ɔyɛle bɛ nwanwa kyɛ ɔne brasua dwudwo ɔ. Nakoso ebiala ammisa ye kyɛ, “Ɛpena nzu?” anaakyɛ, “Nzuati yeɛ ɛne ye dwudwo ne?” 28Yeti maame ne yakyile ye bua ne berɛ, na ɔhɔle kuro nanu ɔɔha hyirele mmenia ne kyɛ: 29“Ɛmɔɔnea biaa bie, waha bɔ mayɛ namukoraati wahyire me. Aso nná ɛhe yeɛ ole Kristo ne?” 30Yeti, bɛfili kuro nanu bɛhɔle ye berɛ.
31Sɔ mmerɛ ne, né asuafoɛ nemɔ srɛ ye kyɛ: “Rabi, didi.” 32Nakoso ɔha hyirele bɛ kyɛ: “Nne aleɛ bie medi bɔ ɛmɔnze ɔ.” 33Yeti asuafoɛ nemɔ bisale bɛ nwo kyɛ: “Ebie aberɛ ye aleɛ ma wali anaa?” 34Yesu ha hyirele bɛ kyɛ: “Me aleɛ yeɛ ole kyɛ, ngɔyɛ bɔ ɔsomane me ne apɛdeɛ, na mayie ye adwuma. 35Nnaa ɛyɛ a ɛmɔka kyɛ, waha bosome nná, ne mmerɛ aso kyɛ bɛpɛ nningyein? Nea, meka mekyire ɛmɔ kyɛ: Ɛmɔma ɛmɔ ti so bɛnea ɛboo ne, na ɛmɔ konwu kyɛ nningyein né aboro bɔ odikyɛ bɛpɛ ɔ. 36Sona bɔ ɔpɛ ne de akatua, ná ɔboɔboa mmaa ne noa kɔ daa ngoa nu; ɛhene kɔmaa bɔ odua ne bɔ ɔpɛ namukoraati nye kɔgye. 37Ɛhe amaa edwirɛ he ayɛ nahorɛ: Sona kõ yeɛ odua ɔ, ná kõ koso apɛ. 38Bɔ ɛmɔ anyɛ ye nwo adwuma, yeɛ nzomane ɛmɔ kyɛ ɛmɔɔpɛ ɔ. Ebiemɔ ayɛ ye nwo adwuma, na ɛmɔ yeɛ ɛmɔ anya bɛ adwuma naso mvasoɛ ɔ.”
39Maame ne adanzeɛ bɔ olili ye kyɛ, “Waha bɔ mayɛ namukoraati wahyire me” ne, ɔmaa Samariafoɛ pee bɔ bɛfi sɔ kuro nanu ne nyane gyidie wɔ Yesu nu. 40Yeti, mmerɛ bɔ Samariafoɛ nemɔ wale ye berɛ ne, bɛha bɛhyirele ye kyɛ, ɔtena berɛ; ná olili ɛlɛnyɔ wɔ berɛ. 41Na ye dwirɛ bɔ ɔhane nati, mmeni pee nyane ye nu gyidie, 42na bɛha bɛhyirele braa ne kyɛ: “Afei de, nná bɔ ɛhane ne ngome yeɛ wamaa yale yali ɔ; ofikyɛ yɛ bɔbɔ yate, na yanwu kyɛ biaa he yeɛ ɔte wiase agyenkwa ne.”
43Ɛlɛnyɔ ne si ne, ofili berɛ hɔle Galilea. 44Né Yesu bɔbɔ di adanzeɛ kyɛ, diifoɛ biala nne berɛ bɔ ole anuonyam wɔ ye kuro ɔ. 45Na mmerɛ bɔ odwuli Galilea ne, Galileafoɛ ne lɛle ye kama, ofikyɛ afahyɛ bɔ ɔhɔle so wɔ Yerusalem ne, bɛhɔle bie, na bɛnwuni nningyein bɔ ɔyɛle ye wɔ afahyɛ nabo ne.
46Afei osa wale Kana bɔ ɔwɔ Galilea ne, nekaa bɔ ɔmaa nzue kakyile nzãa ne. Né ahemvie panyi bie wɔ Kapernaum, na ne ɔwa nde apɔ. 47Mmerɛ bɔ sɔ biaa ne tele kyɛ Yesu afi Yudea awa Galilea ne, ɔhɔle ye berɛ, na ɔsrɛle ye kyɛ ɔɔsa ɔwa né anwonyerɛ, ofikyɛ né ɔla awusu.#4:47 Okyire kyɛ: “Ne waha kaa ma akwalaa ne wu.” 48Na Yesu ha hyirele ye kyɛ: “Ɛmɔ de, sɛ ɛmɔ anwu nzɛngyerɛneɛ ne anwanwadeɛ a, ɛmɔnne benni.” 49Ahemvie panyi ne ha hyirele ye kyɛ: “Awurade, bra kora ne mma ne awu.” 50Yesu ha hyirele ye kyɛ: “Kɔ, ɛwa ne nwo atɔ ye.”#4:50 Anaa “Ɛwa ne te ase.” Biaa ne lɛle Yesu dwirɛ ne lili, na ɔhɔle. 51Na ɔnate atee so ɔkɔ ne, ye ngoaa nemɔ yiale ye, na bɛha bɛhyirele ye kyɛ, ɛwa ne nwo atɔ ye. 52Yeti, obisale bɛ mmerɛ bɔ ye nwo tɔle ye ne. Na bɛha bɛhyirele ye kyɛ: “Anoma, ɔbɔle eyia 1:00#4:52 1:00 ne te dɔnhwere bɔ ɔtɔ so nzoo. ne, yeɛ fiiva#4:52 Anaa “Ebunu.” ne hɔle ɔ.” 53Baba ne nwuni kyɛ sɔ mmerɛ ne yeɛ Yesu ha hyirele ye kyɛ: “Ɛwa ne nwo atɔ ye” ne. Yeti, ɔne ye awurofoɛ mukoraati nyane yenu gyidie. 54Ɛhe yeɛ ole nzɛngyerɛneɛ bɔ ɔtɔ so nyɔ bɔ Yesu yɛle, mmerɛ bɔ ofili Yudea wale Galilea ne.
Currently Selected:
Yohane 4: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
