Luka 24
24
1Dapɛn nanu kyẽa bɔ oli moa ne, bɛwale asieleɛ naso berɛ ngyerɛmɔ tutuutu, bɛba ne, bɛfale sakyeɛ bɔ bɛyɛle ne bɛwale. 2Na bɛnwuni kyɛ baye nyɔboɛ ne bafi asieleɛ ne noa, 3yeti bɛwurale nu, nakoso bannwu Awurade Yesu fuin ne. 4Bɛguso bɛdwene ɛhe anwo ne, bɛkwaanea a, mmrienzua nyɔ bɔ bɛwura ndadeɛ fufue hyɛnn bie gyi bɛ nwo berɛ. 5Né mmrasua nemɔ suro paa, yeti bɛsili bɛ ti ase, yeɛ mmrienzua ne bisale bɛ kyɛ: “Nzuati yeɛ ɛmɔpena teasefoɛ wɔ awufo nu ne? 6Ɔnne wa oo, batingye ye, nnaa ɛmɔkaye edwirɛ bɔ ɔha hyirele ɛmɔ wɔ Galilea ne? 7Ɔhane kyɛ, ‘Bɛkɔfa Sona Awa ne bɛkɔma abɔnefoɛ maa bɛkɔbɔ ye asɛnnua nu, na ye ɛlɛsa naso ne, okotingye.’ ”
8Ɛberɛ ala yeɛ bɛkayele ye dwirɛ ne ɔ, 9na bɛfili asieleɛ naso bɛhɔle, yeɛ bɛhane ɛhe amukoraati behyirele buru-ne-kõ ne, ɔne bɛ bɔ bɛne bɛ wɔ berɛ ne. 10Sɔ mmrasua nemɔ yeɛ ole Mary Magdalene, Joana, yeɛ Yakobo maame Mary. Bɛne mmrasua bɔ baha ne hane ɛhe hyirele asomafoɛ nemɔ, 11nakoso ne bɛnwu ye kyɛ nyanza biala nne bɔ bɛka nanu, na banne banni.
12Nakoso Petro dwɔsole, na otuli mirika hɔle asieleɛ naso dɔ, ɔtole ye nye neane asieleɛ nanu ne, nwera ne ngome yeɛ onwuni ye ɔ. Yeti ofili berɛ hɔle, ɔkɔ namukoraati, né ɔdwene bɔ wasi nanwo.
13Sɔ ɛlɛho nala, né asuafoɛ nanu nyɔ kɔ kuro bie bɔ bɛfrɛ ye Emaus nu, ofi Yerusalem bɔ ɔkɔ berɛ ne te kɔyɛ kwanzii nzoo. 14Ná ne bɛbɔ edwirɛ bɔ wasisi nanwo ngɔmmɔ. 15Bɛguso bɛbɔ ngɔmmɔ ne, Yesu bɔbɔ fitele berɛ, na ɔne bɛ nate hɔle. 16Nakoso bannwu kyɛ ye ɔ. 17Yeɛ obisale bɛ kyɛ: “Na edwirɛ beni yeɛ ɛmɔ nye aboro bɛbɔ ye nwo ngɔmmɔ wɔ atee naso ne?” Bɛgyinane, na ne bɛ wora abɔ paa. 18Yeɛ bɛ nu kõ bɔ bɛfrɛ ye Kleopa mane ye mmuayɛ kyɛ, “Yeti wɔ ngome yeɛ ɛte ɛwɔfoɛ wɔ Yerusalem, bɔ yeti ɛnze edwirɛ bɔ wasi berɛ ɛlɛsaen ne?” 19Obisale bɛ kyɛ, “Nikye yeɛ wasi ɔ?” Yeɛ bɛhane kyɛ: “Yesu bɔ ofi Nazerɛt nanwo dwirɛ yeɛ yɛka ne, né ɔte diifoɛ, na ne Nyameɛ ne sona biala nwu ye kyɛ tumi wɔ ye dwudwolɛ ne ye nneyɛɛ nu. 20Na yɛ sɔfo mbanyi ne kuro nanu mbanyi ne hyele ye buli ye kumfɔ, na bɛbɔle ye asɛnnua nu. 21Nakoso né yedɛ yɛdi kyɛ ye yeɛ ɔbaale Israel ɔ. Na ɛhemɔ mukoraati sili ne, ɛlɛsa ɛhe. 22Ɛhe la ahameɛ a, mmrasua bɔ bɛboka yɛ so ne bie amaa yɛ nwo adwiri yɛ; bɛhɔle asieleɛ naso ngyerɛmɔ tutuutu, 23nakoso bannwu ye fuin ne. Na bɛɛbɔle yɛ amaneɛ kyɛ, abɔfo biemɔ aye bɛ nwo ali ahyire bɛ, na bɛnwa watingye. 24Bɛ bɔ yɛne bɛ wɔ berɛ ne bie hɔle asieleɛ naso, na bɔ mmrasua nemɔ hane ne, sɔ pɛpɛɛpɛ yeɛ bɛnwuni ye ɔ, nakoso ye de, bannwu ye.” 25Yeɛ ɔha hyirele bɛ kyɛ: “Ɛmɔ de, ɛmɔ ndeaseɛ wɔ dede, na ɔyɛ se ma ɛmɔ kyɛ ɛmɔkole bɔ adiifoɛ nemɔ hane ne bɛkoli. 26Né ye nwo nhia kyɛ Kristo ne nwu sɔ amaneɛ hemɔ, na ɔkɔ y'anuonyam nu hɔ?” 27Na ɔhyɛle yebo fili Mose ne adiifoɛ namukoraati so, na ye nwo dwirɛ bɔ bahworɔ ye wɔ Tworɔnzɛm nanu ne, ohyirehyirele nu hyirele bɛ.
28Né bapingye nekaa bɔ bɛkɔ ne, na ɔhyɛda yɛle ye nwo kyɛ ye de ɔtoa so. 29Nakoso bɛsrɛle ye alaa kyɛ: “Tena yɛ nwo wa, nekaa bɔ eyia ne adwu ne de, aleɛ asa ayie.” Yeti ɔne bɛ hɔle awuro. 30Ɔne bɛ tenane tɛbulu nwo bɔ bɛdidi ne, ɔfale paanoo hyirale so, yeɛ obuli nu fa mane bɛ ɔ. 31Ɛberɛ yeɛ bɛ nye wale bɛ nwo so maa bɛnwuni sona-horɛ ɔ. Na otu minini. 32Yeɛ bɛha bɛhyirele bɛ nwo kyɛ: “Mmerɛ bɔ ɔne yɛ bɔ ngɔmmɔ wɔ atee naso, bɔ ne okyirekyire Tworɔnzɛm nanu kyire yɛ ne, yeti wambemo yɛ kaa ala?” 33Na ɛberɛ ala, bɛdwɔso bɛhɔle Yerusalem. Bɛdwuli berɛ ne, bɛnwuni kyɛ asuafoɛ buru-ne-kõ ne né bɛ bɔ baha ne ayia nu, 34na bɛguso bɛka kyɛ: “Amba, Awurade adwɔso, na waye ye nwo ali wahyire Simon.” 35Yeɛ bɛ koso bɛhane bɔ osili atee naso, ɔne kyɛbɔ paanoo bɔ obubuli nu ne maa bɛnwuni ye ne bɛhyirele bɛ.
36Bɛguso bɛka ɛhemɔ nwo dwirɛ ne, Yesu bɔbɔ yele ye nwo ali hyirele bɛ, na ɔha hyirele bɛ kyɛ: “Asomdwie ha ɛmɔ.” 37Na bɛbɔle birim, na esuronyi hane bɛ, na ne b'adwene yɛ bɛ kyɛ banwu honhom bie. 38Na obisale bɛ kyɛ: “Nzuati yeɛ ɛmɔ kunu tete ɛmɔ ne? Nzuati yeɛ ɛmɔ adwene nu ayɛ ɛmɔ naa ne? 39Ɛmɔnea me sa nu ne me gya ne, na ɛmɔ konwu kyɛ, me yeɛ ngyi wa ne. Ɛmɔsɔ me nu bɛnea; ofikyɛ honhom lle anwoɔnaen ne bowue, kyɛbɔ ɛmɔnwu ye kyɛ nne ye ne.” 40Ɔhane ɛhe hyirele bɛ ne, ɔfale ye sa kunu ne ye gya ne hyirele bɛ. 41Kyɛbɔ ne asuafoɛ nemɔ nye agye na bɛ nwo adwiri bɛ ne, né bɛnnwu kyɛ bɛle bɛli, na obisale bɛ kyɛ: “Ɛmɔle aleɛ wɔ wa?” 42Bɛmane ye egyein bɔ batoto, 43na ole lili ye wɔ bɛ nyunu berɛ.
44Yeɛ ɔha hyirele bɛ kyɛ: “Sɔ dwirɛ he yeɛ nga ngyirele ɛmɔ mmerɛ bɔ ne mene ɛmɔ wɔ berɛ ne. Ngane kyɛ bɔ bahworɔ bafa me nwo wɔ Mose Mmeraa ne, Adiifoɛ, ɔne Edwein nanu ne, odikyɛ ɔba nu.” 45Afei obukyele b'adwene nu maa bɛtele Tworɔnzɛm nabo, 46na ɔha hyirele bɛ kyɛ: “Ɛhe yeɛ bɛhworɔle ye kyɛ, odikyɛ Kristo ne nwu amaneɛ, na ye ɛlɛsa so otingye fi ewue nu ne, 47na bɛkogyina ye dumaa naso bɛkɔha bɛkohyire maen-maen ne kyɛ, bɛsakra b'adwene ma bɛfa bɛ bɔne bɛhyɛ bɛ, ɛhe kɔhyɛ yebo wɔ Yerusalem. 48Na ɛmɔte ɛhe anwo adanzefoɛ. 49Na bɔ me Baba hyɛle ye nwo bɔ ne, ngɔsoma ye maa ɔkɔwa ɛmɔ so. Nakoso odikyɛ ɛmɔtena kuro nanu kodwu kyɛ bɛkɔfa tumi bɔ ofi anwuro ne bɛkɔma ɛmɔ.”
50Na ɔne bɛ fili berɛ hɔle Betania, na ɔmane ye sa so hyirale bɛ. 51Ogu so ohyira bɛ ne, bɛmane ye so bɛhɔle anwuro. 52Na bɛbɔle bɛ nu ase bɛkotole ye, yeɛ bɛfale anigye paa besa bɛwale Yerusalem. 53Na daa biala né bɛye Nyameɛ ayɛ wɔ asɔre awuro berɛ.
Currently Selected:
Luka 24: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
