Yohane 7
7
1Ɛhemɔ si ne, Yesu hɔle so hyinini Galilea, né ɔmbena kyɛ ɔkɔ Yudea, ofikyɛ né Yudafoɛ nemɔ pena ye ku ye. 2Sɔ mmerɛ ne, né Yudafoɛ Apata Afahyɛ#7:2 Anaa “Asese Afahyɛ.” ne apingye. 3Yeti oliema nemɔ ha hyirele ye kyɛ: “Fi wa, na kɔ Yudea, ná wamaa w'asuafoɛ nemɔ anwu nningyein bɔ ɛyɛ ne. 4Ofikyɛ ebiala bɔ ɔpena kyɛ ɔyɛ nikye maa mmenia nwu ye ne, ɔnyɛ mvea. Sɛ ɛyɛ ɛhemɔ a, ye de, da wɔ nwo ali kyire wiase ne.” 5Bɔ ɔte yeɛ ole kyɛ, oliema nemɔ po, né benne ye benni. 6Yeti Yesu ha hyirele bɛ kyɛ: “Me mmerɛ nya sonne, na ɛmɔ de, daa ɛmɔle mmerɛ. 7Ɛmɔ de, ewiase ne ngora ndane ɛmɔ, nakoso me de, ɔtane me, ofikyɛ medi ye nwo adanzeɛ kyɛ ye nneyɛɛ te bɔne. 8Ɛmɔ de, ɛmɔhɔ afahyɛ nabo, me de mengɔhɔ, ofikyɛ me mmerɛ nya sonne.” 9Ɔhane sɔ dwirɛ ne hyirele bɛ yiele ne, ɔtenane Galilea.
10Oliema nemɔ hɔle afahyɛ nabo ne si ne, ye koso ɔhɔle dɔ, nakoso wannye ye nwo ali, mmom ɔfale ye nwo feale. 11Yeti Yudafoɛ nemɔ hyɛle yebo kyɛ bɛpena ye wɔ afahyɛ nabo, na bɛhane kyɛ: “Ɔwɔ nisua?” 12Né mmenia ne yɛ ye nwo nwuhu-nwuhu paa. Ebiemɔ nwa: “Ɔte sona pa.” Ebiemɔ koso nwa: “Daabi. Ɔlaka-laka mmenia.” 13Nakoso Yudafoɛ nemɔ nwo suronyi ti, ebiala anye ye nyunu anga ye nwo dwirɛ.
14Bɛdwuli afahyɛ ne afia ne, Yesu hɔle asɔre awuro berɛ, na ɔhyɛle yebo hyirehyirele. 15Yudafoɛ nemɔ nwo dwirili bɛ paa, na bɛhane kyɛ: “Biaa he suanne nwomaa biala, ye de ɔwale ye sɛ yeɛ ɔse tworɔnzɛm nanu sɔ ne?” 16Yesu yele bɛ noa kyɛ: “Bɔ mekyirekyire ne, ɔtte me deɛ, ɔte bɔ ɔsomane me ne deɛ. 17Sɛ ebie pena kyɛ ɔyɛ Nyameɛ apɛdeɛ a, okonwu kyɛ ngyerɛkyerɛ ne fi Nyameɛ berɛ, anaa me bɔbɔ yeɛ mebɔ me ti anu me dwudwo ɔ. 18Ebiala bɔ ɔbɔ ye ti anu dwudwo ne, ɔpena ye bɔbɔ ye anuonyam; nakoso bɔ ɔpena anuonyam fi bɔ ɔsomane ye ne berɛ ne, ye yeɛ odi nahorɛ ɔ, ná nikye bɔ ɔndengyɛ biala nne ye nu. 19Nnaa Mose yeɛ ɔfale mmeraa ne mane ɛmɔ ɔ? Nakoso ɛmɔ nu biala nne berɛ bɔ odi mmeraa naso ɔ. Nzuati yeɛ ɛmɔpena me bɛku me ne?” 20Mmenia ne ha hyirele ye kyɛ: “Ɛle sunzummɔne. Nwa yeɛ ɔpena wɔ ku wɔ ɔ?” 21Yesu koso buale bɛ kyɛ: “Anwanwadeɛ komapɛ bɔ mayɛ ne, ɔyɛ ɛmɔ nwanwa. 22Ɛhe ati yeɛ Mose hane kyɛ ɛmɔpɛ ɛmɔ toa ne, (wanhyɛ yebo wɔ Mose so, mmom ɛmɔ nana mɔ aberɛ so), na homeda po, ɛmɔpɛ sona toa. 23Na sɛ ɛmɔpɛ ebie toa homeda, kyɛbɔ ɔkɔyɛ a, ongobu Mose mmeraa naso a, nzuati yeɛ ɛmɔ afɛ me so yaa kyɛ, mamaa sona nwo atɔ ye koraa homeda ne? 24Atɛn bɔ ɛmɔgyina bɔ otua anyeɛ so bɛbu ne, ɛmɔyakyi, ná ɛmɔbu atɛn tenenee.”
25Afei, bɛ bɔ bɛtete Yerusalem ne bie hane kyɛ: “Nná biaa he yeɛ bɛpena ye bɛku ye ne? 26Nakoso nea, ogyi petee nu odwudwo, na bɛnga hwee bengyire ye. Anaa mbanyi nemɔ anwu ye kyɛ yeɛ ole Kristo ne? 27Biaa he de, yɛse nekaa bɔ ofi ɔ; nakoso Kristo ne de, ɔba a, ebiala ngonwu nekaa bɔ ofi ɔ.” 28Na Yesu gu so okyirekyire wɔ asɔre awuro berɛ ne, ɔteane nu kyɛ: “Ɛmɔse me, na ɛmɔse nekaa bɔ mvi ɔ. Nakoso, nná me bɔbɔ mepɛ yeɛ mva mmale ɔ, Bɔ ɔsomane me ne wɔ berɛ paa, na ye de, ɛmɔnze ye. 29Me de mese ye, mvi ye berɛ,#7:29 Anaa “Mmale kyɛ mebaasi ye gya nu.” na ye yeɛ ɔsomane me ɔ.” 30Yeti, ne bɛpena atee bɔ bɛkɔfa bɛkɔhye ye, nakoso ebiala amva ye sa anga ye, ofikyɛ né ye mmerɛ nya sonne. 31Nakoso, mmenia nanu pee nyane gyidie wɔ ye nu, na bɛhane kyɛ: “Sɛ Kristo ne ba a, ɔkɔyɛ nzɛngyerɛneɛ bɔ ɔtra biaa he deɛ ne anaa?”
32Farisifoɛ nemɔ tele kyɛ mmenia ne keka sɔ dwirɛ ne fa ye nwo, yeti sɔfo mbanyi ne Farisifoɛ nemɔ somane sogyafoɛ kyɛ bɛɛhye ye. 33Yeɛ Yesu ha hyirele bɛ kyɛ: “Mene ɛmɔ kɔtena ɛwa kaa kora ne mahɔ bɔ ɔsomane me ne berɛ. 34Ɛmɔ kɔpena me, nakoso ɛmɔ ngonwu me, na nekaa bɔ ngɔhɔ ne, ɛmɔ ngɔhora berɛ ba.” 35Nakoso, né Yudafoɛ nemɔ keka kyire bɛ nwo kyɛ: “Nisua yeɛ biaa he pena kyɛ ɔkɔ bɔ yeti, yɛngonwu ye ne? Yudafoɛ bɔ babɔ basande Greek ne yeɛ ɔpena kyɛ ɔkɔ bɛ dɔ kɔkyirekyire bɛ anaa? 36Mmerɛ bɔ ɔhane kyɛ, ‘Ɛmɔ kɔpena me, nakoso ɛmɔ ngonwu me, na nekaa bɔ ngɔhɔ ne, ɛmɔ ngɔhora berɛ ba’ ne, né ɔpena kyire sɛɛ?”
37Na kyẽa bɔ ɔpɛ yebo, bɔ ɔte kyẽa piri wɔ afahyɛ nanu ne, Yesu dwɔso gyinane berɛ, na ɔteane nu kyɛ: “Sɛ nzuhɔen ku ebie a, ɔbra me berɛ ɔɔno nzue. 38Ebiala bɔ okonya gyidie wɔ me nu ne, kyɛbɔ tworɔnzɛm ne ka ne: ‘Ye ahone nu tɔnn yeɛ ngoa nzue kɔtengyɛ ɔ.’ ” 39Nakoso ɛhe bɔ Yesu hane ne de, né ɔfa honhom bɔ ebie nya gyidie wɔ ye nu a, okonya ye nanwo. Sɔ mmerɛ ne de, né honhom ne nya walle, ofikyɛ ne bɛhyɛlle ye anuonyam.
40Mmenia ne tele sɔ dwirɛ ne, na bɛ nu biemɔ hane kyɛ: “Amba, ɛhe yeɛ ole diifoɛ ne.” 41Ebiemɔ koso hane kyɛ: “Ɛhe yeɛ ole Kristo ne.” Nakoso ebiemɔ bisale kyɛ: “Galilea yeɛ Kristo ne kofi kɔwa anaa? 42Aso tworɔnzɛm ne nga kyɛ Kristo ne kofi David abusua nu, na okofi Betlehem, nnamue bɔ ne David te nu nanu?” 43Na yeti, mmenia nanu hyɛle. 44Ɔwɔ nu kyɛ né ebiemɔ pena kyɛ bɛkye ye, nakoso ebiala angora amva ye sa anga ye.
45Sogyafoɛ ne sa hɔle sɔfo mbanyi ne Farisifoɛ ne berɛ; na bɛbisale bɛ kyɛ: “Nzuati yeɛ ɛmɔ amva ye bamma ne?” 46Sogyafoɛ nemɔ hane kyɛ: “Ebiala nne berɛ bɔ wadwudwo kyɛ biaa he lle.” 47Yeɛ Farisifoɛ nemɔ ha hyirele bɛ kyɛ: “Ɛmɔ koso, nnaa ɛmɔ amaa walaka-laka ɛmɔ? 48Ɛmɔ anwu kyɛ atumvoɛ ne anaa Farisifoɛ nanu bie anya ye nu gyidie? 49Mmenia hemɔ bɔ bɛnze mmeraa ne de, badome bɛ.” 50Na Nikodemo bɔ mmerɛ bie ɔhɔle ye berɛ ne, né ɔte Farisiniɛ, na obisale bɛ kyɛ: 51“Aso yɛ mmeraa ne kora bu ebie atɛn, mmerɛ bɔ yɛtielle ye noa dwirɛ, na yɛnwuni bɔ ɔyɛ ɔ?” 52Bɛmane ye mmuayɛ kyɛ: “Wɔ koso, efi Galilea anaa? Neɛnea nu nea, na ekonwu kyɛ diifoɛ biala nne berɛ bɔ okofi Galilea kɔwa ɔ.”
Sɛ ɛnea tete asaanoa ndworɔyɛ bɔ wahyɛ paa ɔne bɔ odi mu paa nemɔ nu a,edwirɛ bɔ ɔwɔ Yohane 7:53 kosi 8:11 ne, ɔnne nu. Yeti ɛkora nwu kyɛ ebia ye si ne, yeɛ ebiemɔ fa wurale nu ɔ.
53 Na bɛ nu biala hɔle ye awuro.
Currently Selected:
Yohane 7: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
