Luka 4
4
1Na Yesu bɔ honhom krongron awa ye so ne fili Yordan nzue nanwo, na honhom ne fale ye hɔle ɛserɛ so 2ngyẽa 40, na Abɔnzam sɔle ye neane. Sɔ ngyẽa nanu ne, wanni hwee, yeti ngyẽa 40 ne wale awieɛ ne, né ɛhɔen ku ye.
3Yeɛ Abɔnzam ha hyirele ye kyɛ: “Sɛ wɔ yeɛ ɛle Nyameɛ awa ne a, dwudwo kyire nyɔboɛ he ma ɔkakyi paanoo.” 4Yeɛ Yesu ha hyirele ye kyɛ: “Bahworɔ kyɛ, ‘Nná paanoo ngome yeɛ ɔkɔmaa sona kɔtena ase ɔ.’ ”
5Yeti, Abɔnzam fale Yesu hɔle bokaa tendee bie so, na ɔfale ahennie bɔ ɔwɔ wiase namukoraati hyirele ye. 6Yeɛ Abɔnzam ha hyirele ye kyɛ: “Ngɔfa tumi he amukoraati ne ye nwo anuonyam ngɔma wɔ, ofikyɛ bafa bama me, na ebiala bɔ mekuro ne, mefa mema ye. 7Yeti, sɛ ɛbɔ wɔ nu ase sõ me a, ye mukoraati kɔyɛ wɔ deɛ.” 8Yesu yele ye noa kyɛ: “Bahworɔ kyɛ, ‘Awurade wɔ Nyameɛ ngome yeɛ odikyɛ ɛkoto ye ɔ, na ye ngome yeɛ odikyɛ ɛsõ ye ɔ.’ ”
9Afei, ɔfale Yesu hɔle Yerusalem maa oogyinane asɔre awuro né nekaa bɔ ɔwale paa ne, yeɛ ɔha hyirele ye kyɛ: “Sɛ wɔ yeɛ ɛle Nyameɛ awa ne a, to wɔ nwo fi wa to aseɛ nwo dɔ, 10ofikyɛ bahworɔ kyɛ,
‘Wɔ ti, ɔkɔhyɛ ye abɔfo nemɔ,’
maa ‘bɛkɔbɔ wɔ nwo waen’
11na ‘bɛkɔsoa wɔ bɛ sa so,
kyɛbɔ ɔkɔyɛ a, wɔ gya ngɔpoli nyɔboɛ ɔ.’ ”
12Yesu mane ye mmuayɛ kyɛ: “Baha kyɛ, ‘Nnɛsɔ Awurade wɔ Nyameɛ nea.’” 13Abɔnzam yiele sɔ nzɔhwɛ he amukoraati ne, ɔyakyile ye berɛ oodwuli mmerɛ foforɛ bɔ ɔte pa.
14Afei Yesu bɔ honhom wɔ ye so ne sa wale Galilea, na ye nwo dwirɛ trɛ hɔle nguro bɔ wapɛ bɛ nwo wayia namukoraati nu. 15Afei koso, ɔyɛle ngyerɛkyerɛ wɔ sua bɔ beyia nu nanu, na ebiala kamvole ye.
16Na ɔhɔle Nazerɛt, nekaa bɔ bɛtetele ye ne, na kyɛbɔ daa ɔyɛ ye Homeda ne, ɔhɔle sua bɔ beyia nu nanu, na ɔdwɔso gyinane berɛ kyɛ ɔbaakenga. 17Yeti, bɛfale Isaiah nwomaa ne bɛmane ye, na mmerɛ bɔ obukyele nu ne, onwuni nekaa bɔ bahworɔ berɛ kyɛ:
18“Awurade honhom wɔ me so,
ofikyɛ wasra me kyɛ,
nga nzɛmba ngyire ahiafoɛ.
Wasoma me kyɛ, nga ahofadie nwo dwirɛ ngyire bɛ bɔ bafa bɛ nnɔmun,
na mma anyesiniwaafoɛ nwu nikye,
na mma bɛ bɔ bɛhyɛ bɛ so ne lɛ bɛ nwo,
19na nga Awurade adom mmerɛ ngyire mmenia.”
20Oyiele ne, ɔbobɔle nwomaa ne fa wurale sona bɔ ɔnea berɛ ne sanu, yeɛ ɔtenane ase ɔ. Na bɛ bɔ bɛwɔ sua nu berɛ namukoraati neane ye haa, 21yeɛ ɔha hyirele bɛ kyɛ: “Tworɔnzɛm bɔ ɛmɔ ate ye kesaalae ne, ɛnɛ yeɛ wawa nu ɔ.”
22Na bɛ nu biala hane ye nwo dwirɛ pa, na ye noa nu dwirɛ bɔ ɔhyɛ nguraen ne maa bɛ nwo dwirili bɛ paa. Na bɛhane kyɛ: “Aa! Nná Yosef awa ne ɛhe?” 23Yeɛ ɔha hyirele bɛ kyɛ: “Ɔnyɛ nwanwa kyɛ ɛmɔkobu me anyandera kyɛ: ‘Dɔkta, sa wɔ nwo anwonyerɛ. Nningyein bɔ yɛtele kyɛ ɛyɛ ye wɔ Kapernaum ne, yɛ bie wɔ wɔ kuro wa koso.’ ” 24Na ɔtoale so kyɛ: “Nahorɛ bɔ meka mekyire ɛmɔ yeɛ ole kyɛ, diifoɛ biala nne berɛ bɔ bedɛ ye bɛto nu wɔ ye kuro ɔ. 25Bɔ ɔte yeɛ ole kyɛ: Elia aberɛ so, mmerɛ bɔ bɛtole anwuro nu afoɛ nza ne bosome nzia maa ɛhɔen kandinga bie wale aseɛ namukoraati so ne, né akunafoɛ pee wɔ Israel. 26Nakoso banzoma Elia bangɔ bɛ nu biala berɛ, sana kunaniɛ bɔ ɔwɔ Sarefat, bɔ ɔwɔ Sidon aseɛ so ne. 27Afei koso, diifoɛ Elisa aberɛ so ne, né kwatafoɛ pee wɔ Israel, nakoso bɛ nu biala nne berɛ bɔ ɔsale ye anwonyerɛ ɔ, sana Naaman bɔ ofi Siria ne.”
28Bɛtele sɔ dwirɛ ne, bɛ bɔ bɛwɔ berɛ namukoraati fɛle yaa paa. 29Na bɛdwɔso bɛpiepiale ye bɛfili kuro nanu bɛfale ye bɛhɔle bokaa bɔ bɛ kuro ne gua so ne noa dɔ kyɛ bɛkwaasumu ye bɛto dɔ. 30Nakoso ɔfale bɛ afia berɛ hɔle.
31Na ɔhɔle Galilea kuro bɔ bɛfrɛ ye Kapernaum nanu, na homeda biala né okyirekyire bɛ. 32Na ye ngyerɛkyerɛ ne yɛle bɛ nwanwa, ofikyɛ né tumi wɔ ye dwudwolɛ nanu. 33Né biaa bie bɔ ole sunzummɔne wɔ sua bɔ beyia nu nanu, na ɔteane nu serɛ-serɛ kyɛ: 34“Nazerɛtniɛ Yesu, nzu yeɛ yafa yayɛ wɔ ɔ? Ɛwale kyɛ ɛbaasɛkye yɛ hɔ? Mese wɔ, wɔ yeɛ ɛle Krongroniɛ bɔ ofi Nyameɛ berɛ ne!” 35Nakoso Yesu hwili ye nyunu kyɛ: “Yɛ konn na fi ye nu!” Na sunzummɔne ne maa ɔpɛ fini bɛ nyunu berɛ, na ofili ye nu bɔ wanyɛ ye hwee. 36Na ɔyɛle bɛ mukoraati nwanwa, na bɛha bɛhyirele bɛ nwo kyɛ: “Edwirɛ beni ɛhe? Ɔfa tumi ne anwoserɛ hyɛ sunzummɔne mɔ po maa bɛfite!” 37Yeti ye nwo dwirɛ trɛ hɔle nguro bɔ wapɛ bɛ nwo wayia né nekaa biala.
38Ofili sua bɔ beyia nu nanu ne, ɔhɔle Simon awuro. Né high fiiva ahye Simon sia brasua, yeti bɛsrɛle Yesu kyɛ ɔnea ye. 39Na oogyinane ye nwo berɛ teɛteane fiiva ne, na ofili ye nu. Na ɛberɛ ala, maame ne dwɔsole na ɔhyɛle yebo kyɛ ɔsõ ye.
40Eyia kwaatɔ ne, bɛ bɔ bɛle mmenia bɔ anwonyerɛ ahoroɛ wɔ bɛ so namukoraati fale bɛ wale ye berɛ. Na ɔfale ye sa guale bɛ nu biala so sale ye anwonyerɛ. 41Sunzummɔne koso tu fili mmeni pee nu, na bɛteɛteane nu kyɛ: “Wɔ yeɛ ɛle Nyameɛ awa ne.” Nakoso ohwili bɛ nyunu, na wamma bandwudwo, ofikyɛ ne bɛse kyɛ ye yeɛ ole Kristo ne.
42Nakoso aleɛ hene ne, ofili berɛ oowurale nekaa bie dinn. Nakoso mmenia ne penane ye alaa nwuni nekaa bɔ ɔwɔ ne, na bɛbɔle mmɔden kyɛ, bɛngɔma ɔngofi bɛ nwo berɛ nngɔhɔ. 43Nakoso ɔha hyirele bɛ kyɛ: “Odikyɛ meka Nyameɛ Ahennie nanwo dwirɛ wɔ nguro foforɛ so, ofikyɛ ɛhe ati yeɛ bɛsomane me ɔ.” 44Yeti ɔɔhane nzɛmba ne wɔ Yudea sua bɔ beyia nu nemɔ nu.
Currently Selected:
Luka 4: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
