Luka 5
5
1Ɛlɛho bie, né Yesu gyi Genesaret po ne noa, na ne mmenia abɔ apee ye so bɔ bɛpena kyɛ betie Nyameɛ dwirɛ ne. 2Onwuni kyɛ ɛlɛen nyɔ bie gyi ɛpo ne noa, nakoso né bɛ bɔ bɛkye egyein ne adwu afi nu bɔ bɛnwunzi bɛ nɛt. 3Na ɔfole ɛlɛen ne kõ, né ɔte Simon deɛ, yeɛ ɔsrɛle ye kyɛ ɔpia fi aseɛ naso hɔ nzue nanu dɔ kaa. Na ɔtenane ɛlɛen nanu hyirehyirele mmenia ne. 4Odwudwo yiele ne, ɔha hyirele Simon kyɛ: “Pia ɛlɛen ne kɔ ɛpo ne kunu dɔ, na ɛmɔgua ɛmɔ nɛt ne bɛhye gyein.” 5Yeɛ Simon hane kyɛ: “Me wura, yayɛ adwuma kɔngɔen namukoraati, yannya hwee. Nakoso bɔ aha nati, ngogua nɛt ne.” 6Bɛyɛle sɔ ne, bɛhyele naen pee, na né bɛ nɛt nemɔ po tete. 7Yeti bɛfrɛle bɛ nnamvo bɔ bɛwɔ ɛlɛen foforɛ nu kyɛ bɛɛsɔ bɛ nu. Bɛwale ne, bɛyele naen ne bɛguale ɛlɛen nyɔ nanu maa ye munyɔ namukoraati yili dɛen, bɔ ahaa ɔmono po. 8Simon Petro nwuni bɔ wasi ne, obuli ndwerɛ wɔ Yesu gya bo hane kyɛ: “Awurade, fi me nwo wa kɔ, ofikyɛ nde ɔbɔnefoɛ.” 9Bɔ ɔmaa ɔhane sɔ yeɛ ole kyɛ, egyein bɔ bɛhyele bɛ ne, né ɔyɛ ye ne bɛ bɔ bɛboka ye so namukoraati nwanwa, 10na né ɔyɛ Sebedeo mmaa Yakobo ne Yohane bɔ bɛne Petro yɛ adwuma ne po nwanwa. Nakoso Yesu ha hyirele Simon kyɛ: “Nnɛsuro; ofi ɛnɛ bɔ ɔkɔ ne, ɛkɔhye mmenia.” 11Bɛpiane ɛlɛen ne bɛwale ɛpo ne noa, na bɛyakyile nikye biala berɛ bɛlili Yesu si.
12Kyẽa foforɛ koso, né Yesu wɔ nguro ne kõ anu, na né biaa bie wɔ berɛ bɔ kwata abia ye! Onwuni Yesu ne, ofale ye nyunu butuli berɛ srɛle ye kyɛ: “Awurade, sɛ ekuro a, ɛkɔhora kɔmaa me nwo kɔtɔ me.” 13Na Yesu tengyɛle ye sa sɔle ye nu hane kyɛ: “Mekuro, wɔ nwo tɔ wɔ.” Na ɛberɛ ala, kwata ne tu minini. 14Na ɔha hyirele biaa ne kyɛ, nnɛmaa ɔbɔ so kyire ebiala, mmom “kɔ, na kɔfa wɔ nwo kyire sɔfo ne, ná wɔ nwo bɔ watɔ wɔ nati, fa afɔleɛ bɔ Mose hane ne ma bɛ, na ɔyɛ adanzeɛ ma bɛ.” 15Nakoso ye nwo dwirɛ trɛ hɔle nekaa biala, na mmeni pee yiale nu kyɛ bɛbaatie ye, ná bɛmaa ɔsale b'anwonyerɛ. 16Nakoso né ɔtaa kɔ ɛserɛ naso kɔbɔ mbaeɛ.
17Ɛlɛho bie, né ɔyɛ ngyerɛkyerɛ, na né Farisifoɛ ne mmeraa nanwo akyerɛkyerɛfoɛ bɔ bɛfi Galilea ne Yudea nguraa mɔ nu ne Yerusalem né tete berɛ; na né Awurade tumi bɔ ɔkɔfa kɔsa anwonyerɛ wɔ ye so. 18Na mmrienzua biemɔ fale bubuaniɛ bie bɔ ɔla bɛen so wale berɛ, né bɛpena kyɛ bɛfa ye bɛwura nu bɛkɔto Yesu nyunu. 19Nakoso mmenia bɔ bɛwɔ berɛ nati, bannya atee bamva ye banwura nu. Yeti bɛfole sua naso, na bɛtuli so tokuro yeɛ bɛdwurale ɔne ye bɛen ne bɛwale mmenia nanu wɔ Yesu nyunu berɛ ɔ. 20Na Yesu nwuni bɛ gyidie ne, ɔha hyirele ye kyɛ, “Me damvo, bafa wɔ bɔne bahyɛ wɔ.”
21Na atwerɛfoɛ ne Farisifoɛ ne hyɛle yebo hane ye wɔ b'ahone nu kyɛ: “Nwa yeɛ ɔka sɔ mmusue dwirɛ ne? Nná Nyameɛ ngome yeɛ ɔkora fa bɔne kyɛ ɔ?” 22Yesu nwuni adwene bɔ ɔwɔ bɛ tianu ne, ɔha hyirele bɛ kyɛ: “Nzu yeɛ ɛmɔdwene ye nwo wɔ ɛmɔ ahone nu ne? 23Beni yeɛ ɔyɛ mmerɛ ɔ, kyɛ ɛkɔha kyɛ, ‘Bafa wɔ bɔne bahyɛ wɔ,’ anaa ɛkɔha kyɛ, ‘Dwɔso na nate’? 24Nakoso bɔ ɔkɔyɛ na ɛmɔ anwu kyɛ Sona Awa ne le tumi bɔ ɔkora fa bɔne kyɛ wɔ aseɛ he aso ne—” ɔha hyirele bubuaniɛ ne kyɛ: “Meka mekyire wɔ kyɛ, Dwɔso, fa wɔ bɛen, na kɔ w'awuro.” 25Na bɛ nyunu berɛ ala, odwɔsole, ɔfale bɛen bɔ né ɔla so ne, na ɔhɔle ye awuro; ɔkɔ namu né ɔye Nyameɛ ayɛ. 26Na ɔyɛle bɛ nu biala nwanwa, na bɛhyɛle yebo bɛyele Nyameɛ ayɛ. Na esuronyi hane bɛ maa bɛhane kyɛ: “Ɛnɛ de, yanwu anwanwadeɛ pa.”
27Ɛhene si ne, ofitele, na onwuni biaa bie bɔ odidɛ ɛtoɔ, né bɛfrɛ ye Lewi, na né ɔte nekaa bɔ bɛdide toɔ ne. Na ɔha hyirele ye kyɛ: “Baali me si.” 28Na ɔyakyile nikye biala berɛ dwɔso lili ye si.
29Na Lewi tole paati kandinga bie mane Yesu wɔ ye awuro berɛ; né bɛ bɔ bɛdide toɔ pee ne mmeni foforɛ boka bɛ bɔ ɔne bɛ didi naso. 30Na Farisifoɛ ne atwerɛfoɛ ne hyɛle yebo nwii-nwii hyirele ye asuafoɛ nemɔ kyɛ: “Nzuati yeɛ ɛmɔ ne bɛ bɔ bɛdide toɔ ne abɔnefoɛ to asaa didi ne?” 31Yesu yele bɛ noa kyɛ: “Bɛ bɔ bɛte apɔ ne, benhia dɔktaniɛ, bɛ bɔ bafokyɛ ne mmon yeɛ behia dɔktaniɛ ɔ. 32Nná ateneneefoɛ ti yeɛ mmale ɔ, mmom, mmale kyɛ mebaafrɛ abɔnefoɛ maa bɛsakra b'adwene.”
33Bɛha bɛhyirele ye kyɛ: “Yohane asuafoɛ ne taa yɛ akɔngyere na bɛbɔ mbaeɛ, na Farisifoɛ ne koso, sɔ ala, nakoso w'asuafoɛ ne de, bɛdidi bɛno.” 34Yesu ha hyirele bɛ kyɛ: “Brienzua bɔ ɔbaagya ne wɔ ye nnamvo mɔ nwo ne, ɔkɔyɛ sɛɛ ne bayɛ akɔngyere? 35Nakoso mmerɛ bie kɔwa, bɔ bɛkɔfa brienzua bɔ ɔbaagya ne bɛkofi ye nnamvo mɔ nwo, sɔ mmerɛ ne de, bɛkɔyɛ akɔngyere.”
36Osa yɛle mvandoho hyirele bɛ kyɛ: “Ebiala nne berɛ bɔ ɔpɛ ɛtena monɛ ta atadeɛ daa nu ɔ. Sɛ ɔyɛ sɔ a, ɛtena monɛ ne kɔte, na ɛtena monɛ kaa bɔ wafa wata daa nanu ne, ɔne ye nngɔyɛ pɛ. 37Afei koso, ebiala nne berɛ bɔ ɔfa nzãa foforɛ gua nzãa bɔtɔ daa nu ɔ. Sɛ ɔyɛ sɔ a, nzãa foforɛ ne kɔpakye nzãa bɔtɔ daa ne, na nzãa ne kohwie kogua maa nzãa bɔtɔ ne koso kɔsɛkye. 38Mmom odikyɛ bɛfa nzãa foforɛ bɛgua bɔtɔ monɛ nu. 39Afei, sɛ ebie no nzãa daa a, ɔmbena nzãa foforɛ, ofikyɛ ɔka kyɛ, ‘Nzãa daa ne kama paa.’ ”
Currently Selected:
Luka 5: SNT
Highlight
Share
Compare
Copy
Want to have your highlights saved across all your devices? Sign up or sign in
© 2025 LexiHUB. All rights reserved.
This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.
Authorized digital distribution may be made through approved Bible platforms and partner organizations under license.
For permission requests, write to the publisher at the address below:
LexiHUB
Box 2, Sefwi Juaboso, Western North Region, Ghana
Email: info.lexihub@gmail.com
Scripture quotations are from the Sehwi New Testament © 2025. Used by permission. All rights reserved.
